昨昏去se̍h京都，今á日mā boeh去京都se̍h，Tiat--è講昨昏坐慢車較了時間，今á日著坐急行--ê，較有時間chhit-thô。boeh去ê所在是尾á第二站，一个無張持soah坐過頭，好佳哉chhiân一時á tiō原車坐倒轉來。
天氣chiâⁿ清無leh落雨，Sió-gio̍k-á恢復健康精神chiâⁿ-chán，離開地下車頭，看he街路chiâⁿ闊，人、車無kài濟，心情放輕鬆行到「二條城」，kan-nā看牆圍、城門，真正大開眼界，權力、霸氣、威風ê王、皇世家，隔離偌濟神祕tī內面。chia是日本幕府時代ê政治中心之ㄧ，tō親像he中國北京ê紫禁城，改朝換代了後，chit-má是觀光chhit-thô ê景點。
二條城是德川家第一將軍德川家康1603年所起ê徛家，1994年hō͘聯合國教科文組織登記做世界遺產，進入城門了後：
「城堡主要ê建築分本丸kap二之丸兩大區，根據我對日本歷史ê了解，本丸是城堡主人toà ê所在，二之丸是hō͘較低級較少年ê貴族toà，mā是招待人客ê所在。」
Tiat--è翁某出國chiâⁿ有計劃，伊ná行ná講，無輸專業解說員：「咱代先來參觀二之丸，入口叫『唐門』，內面『桃山式建築』是雙倒水厝蓋，門斗頂貼金箔á，高貴koh氣派。為著維護世界級木造古蹟，入內參觀，著穿淺拖á保持恬靜，mā bē使得翕相。」
二之丸ê內面chiâⁿ闊間，沿走廊參觀房間1間koh 1間，古早設施排tī目睭前，斯當時貴族生活ê神祕hō͘人稀奇，上特別--ê是走廊木造地板ê「鶯聲地板」，跤步踏過會聽著黃鶯幼幼ê叫聲，實在趣味藏玄機，起厝師傅ê技藝實在會o-ló得，Tiat--è講：「機關khǹg tī地板下跤，m̄-nā是玄機，koh-khah是政治人物ê心機，咱chit-chūn聽著--ê是細聲幼字幼字，若是暝時一定大聲警告你，有刺客--入來，有刺客--入來，著sè-jī，另外室外通路舖細粒石頭á，mā是仝款用意。」
二之丸外面是園藝造景，樹木為主，配合石頭、水池，kài有氣質，尤其是he大欉青翠ê松樹，台灣tiō罕得看見，se̍h 1 liàn不止á遠，ná欣賞ná翕相，2个孫經過阿姑ê指導，真緊tō學會曉，一直搶boeh kā阮翕相。本丸建築簡單樸素，因為無開放，koh hō͘石頭gih--ê牆圍圍tiâu--leh，tiō m̄知內面ê祕密。
遊二條城：
權貴生活心tám-tám，boeh睏bē使有美夢，雖然權勢壓死人，總是過日無輕鬆。
離開二條城，來到南禪寺，che sī日本臨濟宗ê總寺院，是修行坐禪ê好所在，果然無錯，內面恬靜、自然，塗跤清氣好行踏，樹á是chiah大欉koh青翠，古早禪房tiām-chut-chut，行入內院kan-nā chhun鳥聲kap跤步聲，看he高抵天ê三門tiō hō͘人敬仰萬分，三門ê柴柱圓圓ná杉á箍，m̄-koh杉á無可能hiah大箍，有可能是楠á柴抑是ひのき(檜木)，ùi tó位來？心內充滿好奇，來到日本，看著in ê樹木kap神社寺廟建築柴柱，lóng是hiah-nī大支，建築年代lóng是hiah-nī古早，tiō hō͘我想著咱台灣，一寡有古早台灣味ê建築bē-hiáu boeh保存，千外年兩千外年êひのき(檜木)，hō͘日本人剉kah boeh ta-tin，mā m̄知影thang可惜，連家己mā續leh損斷chham--leh，實在hō͘人怨嘆。
ひのき：
ひのき！ひのき！ひのき柴chiah大支，古早阿里山是滿滿是，阿里山鐵路一下開，夭壽！ひのき柴一車一車載--出去，載tó位？載去日本搭「鳥居」。
繼續se̍h，繼續看，路邊有人力車夫打扮古裝身穿leh招呼人客，規規矩矩，bē纏toè人客ko-ko纏，路邊賣物店家，仝款有買ありがとう，無買ありがとう，禮貌客氣十足，每間店lóng有安燒氣，一入門tiō感覺足溫暖燒絡。行了腹肚枵--a，入去路邊1間leh賣ラーメン〔拉麵〕ê店食ラーメン，我食1碗豬肉ラーメン，豬肉軟khiū，可惜湯頭無kah意，啥物是ラーメン，kap台灣手giú ê大麵仝款，並無啥物特別。店頭家家己1人to-chí兼走桌，卻是服務周到，茶、拭手巾lóng拴kah到，桌椅碗箸mā lóng衛生清氣。
ラーメン：
ラーメン！ラーメン！tiō是麵，日本chiâⁿ流行，食--起來bē kah味，猶是台灣大麵羹、chhe̍k-á麵、擔á麵、大麵炒、炒大麵…仙食都bē畏。
食飽koh行，se̍h來到「哲學之路」，這是一條散步之路，倚溪á邊，溪á邊兩pêng kap路中央種真濟櫻花，chit-má m̄是櫻花期，遊客chiâⁿ少，若是家己1人tī chia散步，有影是思考人生ê好所在，哲學(tiat-ha̍k)台灣人講做thiat-ha̍k(徹學)，徹底了解人生ê學問，有影比較較好了解，已經boeh 70歲，人生是啥？猶是茫茫渺渺，了解bē徹底，「食衣住行」？抑是「生住異滅」？既然來到「哲學之路」，bē了解mā著kek一个款，消遣一下家己，tō thiau-kang家己1人慢慢á行，假影做思考面像，叫Tiat--è翕幾若張相，看有像哲學家模樣--bò͘。
媽孫á跤頭chiâⁿ勇，2公里ê路程，行boeh 1點鐘，lóng無喝跤酸。「哲學之路」行到盡磅，斡向銀閣寺，突然1个日本人半行半走，喙內ngāu-ngāu唸，用手一直ia̍t，摧阮趕緊行，Tiat--è看手錶，原來tit-boeh下班，猶chhun 20分鐘，既然來--a，tiō買票入門參觀，倚山坡地ê庭園設計，配合日本式亭閣建築，hō͘人真想boeh toà--落來，時間真趕，hit位顧門ê先生toè阮尻脊後一直ngāu-ngāu唸，一直趕，行到上高所在，會當看山腳京都風景，這時日頭boeh落海，暗霞真súi，可惜影一下tiō ài離開。
下一站是京都車站，著坐バス(公車)，因為坐tī上後壁，不時著看頭前螢幕，斟酌到位猶未？好佳哉目睭看遠猶會堪得，tiō幫Tiat--è tàu看。到位落車，已經是霓虹燈閃熠ê暗暝，夜都市生活已經開始。
京都車站十足現代化，建築真有現代感，11層樓ê建築，樓頂曠闊ê廣場，會當看著天頂，peh上連續百外坎ê電梯，到kah百貨公司ê 13樓，會當看著kui-ê京都車頭ê面貌，有夠壯觀，尤其hit-ê玻璃做ê大壁堵，會當看外口夜景，koh會反射後面ê景色，向玻璃堵有看著京都塔，越後壁看mā有看著京都塔，一時間soah m̄知tó一个是真，tah一个是假，夜景hō͘人看kah茫渺渺。因為好sńg，tī chia peh上peh落行2擺。8點外，tiō去「拉麵小路」食ラーメン，湯頭chiâⁿ濁鹹tok-tok，莫怪會送1杯冷ki-ki ê白滾水，食一喙鹹配一喙chiáⁿ，chit種食法實在真怪奇，食飽行「空中徑路」欣賞京都塔chit-pêng ê夜景。
盈暗換坐特快車轉去大阪，20外分tiō到位，tī UMETA(梅田)地下街問牽--ê「敢boeh koh瘦lim--一下？」
「好--a！」牽--ê應著koh真順喙。
轉來旅館，ná lim ná開講，冰箱內有昨暝tī市場買轉來ê「和菓子」，順續切hō͘孫--ê食，日本人kā和菓子做kah súi-tang-tang，kioh是偌好食，原來口味kap台灣ê糕á粿差不多，因為siuⁿ甜，囡á soah無啥愛食。日本人注重包裝、注重外表體面，he m̄是kan-nā注重個人穿插，閣較重視社會規範、公共設施，莫怪in ê街路清氣，交通規矩，建築美觀，講究生活品質，tī in ê 和菓子製作kap包裝藝術tiō會當看著，che，咱台灣實在輸人thiám-thiám。
一日長ló-ló，實在好chhit-thô，仝款tī tú好茫ê心情睏--去。
沒有留言:
張貼留言