看相片回想人生_1971→1977_中州路南北巷稅厝六冬(三)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1971→1977_中州路南北巷稅厝六冬(三)：

▲板橋教師研習會是國小教師進修ê好所在，mā是晉升主任、學校長ê好所在。來taia ē-tàng學著新ê知識、教冊方法，轉去學校做推廣指導，通常是培訓各縣市ê輔導員kap主任、學校長ê儲訓。

ē-tàng hō͘學校推薦來tsia研習，是tsiâⁿ無簡單ê機會，需要有心bueh牽成部屬ê校長，mā著有特殊機緣促成。用心計較想bueh來tsia進修提分數ê老師真濟。

▲板橋教師研習會結業證書：

1972年2月28日，學校推薦我去板橋教師研習會參加144期「科學玩具」科 研習4禮拜。ná像koh轉去師範學校讀冊仝款，穿制服，按時起床睏眠、食飯、上課，拜六下晡kap禮拜日歇睏。
Tī tsia熟似各縣市推薦來ê精英，共同研習bueh按怎推sak「科學玩具」。照講，各縣市特別推薦ê人選應該是對囡仔物有相當趣味tsiah-tio̍h，siáⁿ知m̄是我所想--ē。
指導老師多數ùi明志工專聘請，講真濟科學、設計、製圖智識，實在學著真濟，不過對製作「科學玩具」並無啥乜幫贊。記智上深是工業設計如何畫「三面圖」tsit个概念，hō͘我教高年級數學「柱形表面積」有真好ê教學方法。
咱人目睭看立體物是「khuàiⁿ前無khuàiⁿ後，khuàiⁿ後to̍h無khuàiⁿ前；看倒爿無看著正爿，看正爿to̍h無看著倒爿；看頂面無看著下面，看下面to̍h無看著頂面。」老師若提實物hō͘學生看兼說明，巧ê囡仔隨聽隨ē-hiáu，比用頭殼透過用想--ē加真緊了解。
4禮拜ê研習，除了個人得著bē少智識kap人生經驗，mā發現，竟然有人來tsia進修13擺，5-6擺是常客，有心bueh來bē-tàng來，suah有人來tsia ná渡假？

△Tsit張證書是教員想bueh升主任、做學校長，siāng-kài想bueh-ti̍ⁿh ê保證文書。

▲1973年9月24日koh召來受訓2禮拜，tsit擺是實作，交代每人結訓進前著提出1件符合囡仔耍ê科學玩具，這m̄是leh做敆作，研習會ê工作室實在無適合，經過1禮拜pìⁿ無啥乜piàn-lián，kui-khì放假轉去家己厝--裡做，等待結訓前3工提轉來交件展覽。
攏總40幾件，件件無仝，有ê是鐵馬零件組立，ná運動器材；有ê ná流籠需要架設tsiah-ē振動；有ê確實有科學玩具概念，利用浮力kap吸石原理，ē-tàng hō͘一隻龜仔peh上peh落，有人o-ló tsit-kâi玩具若是做成商品，一定大賣。奇怪？天光日hit-kâi作品suah消失無khuàiⁿ影跡；siāng-kài hàm--è to̍h是柴做ê九宮格玩具，竟然bē-tàng徙位thuh來thuh去，實在落氣。

▲經過2擺研習，我tsiâⁿ做彰化縣「科學玩具」ê輔導員，輔導幾擺玩具ê製作，lóng是囡仔時代ê tshit-thô-mi̍h，老師to̍h做kah足歡喜，逐家認為新奇koh實用，hō͘我懷疑大部份老師囡仔時代敢m̄-bat做過、耍過tsiah-ê tshit-thô物？
縣政府mā bat辦過2屆老師製作玩具比賽，第一擺3位督學kap阮兩位輔導員做評審，督學大人看著好耍ê玩具，to̍h感覺愈新奇愈懸分，殊不知hit項玩具我囡仔時代to̍h已經耍kah無愛耍，心內暗想，『少見多怪』。
第二屆評審有較進步，聘請3位對美術勞作有研究ê專家kap阮兩位輔導員，5人進入評分進前先會議，各人選出優秀作品10件，按名次排列，然後逐家提出入選名單，tsiah-koh按得分排名，平分作品tio̍h-koh會齊看了做最後決定，tsit擺確實加真公平。
因為著等有嘉獎獎狀，現場有相bat ê老師ē偷偷kā我報編號，我是喙應好，實際是公事公辦無私偏。
▲m̄知為著啥乜路用提tsit份三潭國民小學服務證明書。

▲1973年9月，已經『春風化雨』誤人子弟有10冬。這是教育廳ê獎狀kap縣政府ê獎狀，ē記得mā有獎品獎金ê款。