067niau-thâu-tsiáu（貓頭鳥）＞鴟鶚＞Owls.

067 Niau-thâu-tsiáu（貓頭鳥）＞鴟鶚＞Owls.

Niau-thâu-tsiáu（貓頭鳥）是一種猛禽，大自然強--ê提去食ê食物鏈定律是不可免，為著生存，必須掠食kap防衛，長久以來就演化出am-khàm羽色kap擬態行為。貓頭鳥ê頭殼形態，大概分做有角羽kap無角羽兩大類，tsit種角羽嘛叫做耳羽，是冠羽ê一種，m̄是耳仔，因為有親像耳仔ê角羽，閣配合著伊ê面盤kap圓kùn-kùn ê兩蕊目睭，非常sîng貓仔頭，m̄-tsiah有貓頭鷹抑是貓頭鳥ê名。

niau-thâu-tsiáu（貓頭鳥）ê頭殼，會當轉180度看後壁，跤短有力，跤爪利閣會當自由伸勼使用，掠殺小動物非常好勢。羽毛柔軟，翼股ê羽毛尾溜小可必叉，飛行時無聲無說，恬tsut-tsut，大部分ê貓頭鳥攏是樹棲性，日--時覕tiàm樹林àm-sàm所在抑是樹洞內歇睏。

niau-thâu-tsiáu（貓頭鳥）ê面型sîng貓仔面，伊ê叫聲「koo~koo~」，tī恒春地帶有「姑嫂鳥」ê稱號。

姑嫂鳥ê故事：

兄嫂細姑自古以來，就真歹做伙鬥陣，m̄是阿嫂嫌細姑仔貧惰，就是細姑仔kā ta-ke-á投東投西，講兄嫂ê歹話，兄嫂心目中ê「細姑仔猴」從按呢tiâu名。下面ê故事拄好顛倒反，是兄嫂細姑真bā有感情ê故事。

古早古早，有兄嫂細姑兩ê人，個性真bā，感情tsiânn好，厝內大細項代誌攏真有參詳，雙出雙入，是厝邊隔壁欣羨呵咾ê模範。

有一年春天，新筍tânn出，姑嫂雙人就相招beh去社頂附近ê山區竹仔林採幼筍，無疑悟煞遇著大雨，到kah暗暝兩人攏無轉來，厝內ê人非常著急，就派人上山四界走tshuē，tshuē真久攏tshuē無in-ê跤跡，最後tshuē到一欉茄苳樹跤，kan-na聽見兩隻鳥仔tī樹仔頂遐leh吼。講嘛奇怪，in兜ê人轉來到厝裡了後，猶原聽著hit兩隻鳥仔「koo~koo~」吼無停，逐工ùi欲暗仔一直吼kah天光。因為姑嫂兩人一去不回，所以厝內ê人若聽著「koo~koo~」ê叫聲，就想著兄嫂細姑in兩人，嘛因為tsit種鳥仔ê叫聲「koo~koo~」kài-sîng leh叫阿姑仔~阿姑仔~咧，所以逐家認為有可能是姑嫂兩人ê化身，所以tī墾丁所在，貓頭鳥有「姑嫂鳥」ê稱號。

貓頭鷹報喜ê故事：

這是日月潭所在邵族ê神話，in一直相信貓頭鷹是來報喜訊ê靈鳥，而且禁止掠殺。

古早古早，邵族ê部落內，有一个真súi ê少女，伊猶未結婚就有身--a，從按呢予in-ê爸母kap族人責罵毆打，伊無法度忍受，就趁一个暗暝偷偷仔離開in兜。

幾若工後，有一為族人tī山裡拍獵，發現tsit-ê查某囡仔死tī路邊，而且漸漸變成一隻貓頭鷹。

日子一工一工過去，族人也漸漸來bē記得tsit个少女。

有一工暗時，部落內有一个婦jîn人，眠夢著一隻貓頭鷹當面kā伊講：「你beh做老母--à！」隔轉工，tsit-ê查某人tī潭仔邊洗衫，逐家閒閒phò-tāu開講中間，tsiah發現，原來有真濟人tī-teh懷胎有身中間，攏bat做過仝款ê眠夢，而且隔日就有一隻貓頭鷹，安詳恬靜徛tī厝前ê樹仔尾頂，親像leh kā人講有好消息beh報人知ê款。

從按呢以後，邵族ê族人就相信，貓頭鷹若飛來，就是tsah查某人懷孕ê好消息到位。以後in對貓頭鷹漸漸感覺敬畏，同時嘛禁止獵殺貓頭鷹，而且ài保護貓頭鷹。