19470000_崁頂廷光公>輝騰公>志榮公厝宅記憶 201301012_Lah-jih

19470000_崁頂廷光公>輝騰公>志榮公厝宅記憶 201301012_Lah-jih

時代變遷真緊，ē記得7,8歲囡仔時代，咱兜門口是燈籠花欉做籬笆，大門是柴造門樓仔，三進三落，ùi路邊水溝橋頂peh三坎上平台，chiah koh落三坎入來門口埕；厝間無夠40間，人口無夠60人，經過1甲子後ê今仔日已經是人丁旺盛，頂埕、下埕、正身、護龍後，攏是厝間koh tha̍h樓仔，起kah cha̍t-thóng-thóng，kap原本ê厝宅差真濟。出外人tiāⁿ-tiāⁿ想起故鄉，老歲仔人較捷是想起細漢囡仔時，趁頭殼猶清醒猶有氣力，趕緊kā細漢記智寫--落來，一--來 解心悶，回想人生，二--來 mā-thang做蕭--家歷史，hō͘後代囝孫數念追思。

根據大旺公遺留〈1899年蕭朝宰公復興大租均分䦰書〉記載，肇基祖朝宰公傳下有五大房，建置「復興館大租」，1冬收租粟大約有110石，算是好額人，傳到第六代日本人來時，大旺公chiah hoa̍t-lo̍h將此大租均分拈䦰為定照䦰掌管。一世代若以25年計算(25x5=125)， 建置「復興館大租」 到大旺公時代已經有125年久，1899－125=1754，ē-tàng斷定朝宰公出世tī 1754年進前(2013－1754=259)，肇基祖朝宰公年紀到2013年大約將近有300歲。

根據志榮公遺留〈1819年蕭輝騰公竹圍厝地䦰書〉記載， 輝騰公傳下有五大房，竹圍厝地有三處，可惜現此時kan-nā有志榮公傳下囝孫kap崁頂庄竹圍厝地。2013－1819=194，ē-tàng證明崁頂庄竹圍厝地至少超過200冬。

根據Lah-jih編寫《蕭姓 廷光公派下家譜》世代推算，蕭--家開基祖 朝宰公出世到2013年將近有300冬；第四代祖 志榮公出世到2013年mā已經超過200冬。聽講蕭--姓 奮公派下第四世團圍公ê祖厝本來起tī小紅毛社，咱祖 朝宰公有可能本成是tòa-tī小紅毛社hit爿。朝宰公傳五大房，kan-nā大房廷光公囝孫tòa-tī崁頂，是啥物時陣搬徙來崁頂，建置chit-má ê「坐西向東」字向ê竹圍厝地，已經無法追查。若根據志榮公ê墓園(大墓) 是tī崁頂庄南爿第三公墓邊來思考，崁頂祖家應該有200年以上ê歷史。咱祖廷光公、輝騰公、志榮公ê厝宅規模是崁頂庄siōng-kài闊siōng-kài大範siōng-kài有「兜」ê感覺，正身護龍，前有頂、下埕，後有古井，四箍圍有刺竹模kap燈籃仔花籬笆，siōng-kài特別--è是大門有門樓仔，三進三落，非常氣派。厝宅是坐西向東起，東爿大門外是崁頂巷(崁頂路)，西爿thàng-kàu水溝隔界，北爿是頭前庄，南爿是日性、俊--è in內底kap阮兜水田。較早崁頂庄有公埕、荖宅仔、竹圍仔、榕仔跤、頭前庄、後壁厝kap咱兜幾個角頭地號名，咱兜chit內底，人攏講做「瓦厝底」抑是「門樓仔內底」。

Lah-jih ùi 1941出世到1968年28冬久攏tòa-tī崁頂庄，28歲冬尾娶某，隔轉年徙去Chhân-tiong街仔khiā家，為著連絡兄弟叔孫感情，無kā公媽題去khiā家服祀，除了年節轉去拜公媽，平常時mā真捷轉去行踏，所以對祖家厝宅變化m̄-bat有chheⁿ-hūn感覺。下面咱to̍h ùi正身公媽廳位置做「參考點」來詳細紹介1948年代ê記智：

頭起先紹介厝間部份，正身中間(tiong-keng)是公媽廳，倒爿3間模仔兄 ê，2間林仔姆ê，正爿5間二伯(光寬)ê，正身倒爿後壁3間林仔姆ê，koh後壁倒爿3間kap便所，是阿伯(光貴)ê；正爿護龍6間是阮ê(紹振)，護龍後有柴間仔2間，kap豬椆；倒爿護龍頭前廊豆油仔兄(添猷)2間、添發兄4間，下埕有2間畚間kap豬椆；後壁廊添福兄3間、球仔兄(添壽)3間，後壁護龍頭kap便所中間有2間豬椆。chia-ê厝間攏是竹管厝(tek-kóng-chhù)，雙倒水，厝前厝後有gîm-chîⁿ(砛簷)，ē-tàng搭雞椆飼精牲仔kap囥火柴疊草絪。厝頂蓋蔗箬仔抑是蓋稻草，壁堵糊塗，kan-nā倒爿護龍有3間蓋瓦厝頂，下埕畚間是塗kat厝。每口灶灶腳有大灶，hiâⁿ柴hiâⁿ chháu-in(草絪)，桂竹食飯桌kap椅條；間仔(客廳)有總舖，ē使得睏ē使得坐；房間(翁某房)是竹仔眠床kap簡單桌櫃鏡台，眠床邊khǹg尿桶屎桶。斯當時逐家生活艱苦，顧三頓飽都bē赴--à，hak身穿、傢俱、日常用品⋯ē-tàng省to̍h省，簡單to̍h好。

紲--落去來看正身頭前面門口埕，分頂埕kap下埕，頂埕boeh曝粟仔、nê衫、囡仔chhit-thô，暗時nah-liâng、phò-tāu攏會使，下埕是囡仔拍球、tèng-kan-lo̍k好所在，有火pû-á、糞埽堆，有較lah-sap。倒爿有畚間kap豬椆，阿伯in有飼牛，一間畚間koaiⁿ牛，一間畚間囥作田ê牛犁耙kap一台塗礱(礱殼機是挨粟仔變糙米的機具)。正爿有搭菜瓜棚仔，菜瓜棚仔南爿是菜園仔(宅仔)，長株形，四圍種燈籃仔花做籬笆，講是菜園仔並無種菜，內面有1-kâi水池仔，1-kâi防空壕kap種一寡菝仔、柚仔⋯，也無整理，隨在伊拋荒，siâⁿ來厝邊隔壁ê囡仔來chia peh樹仔挽菝仔chhit-thô，澀kīⁿ-koāiⁿ to̍h開始挽，罕得揣著白霧ē甜--e。

埕尾kap崁頂巷排水溝隔界種燈籃仔花做籬笆，門樓仔大門倒爿(北)有一欉柚仔kap 6,7欉菁仔，lò-lò-koân，菁仔若生，有哺pun-nn̂g--ē to̍h gia̍h竹篙縛鐮力仔，割落來kauh檳榔，門樓仔正爿(南)有2欉柚仔kap 1模刺竹，he柚仔是斗柚，罕得有好收成，ē記得bat hām阿道兄偷挽1粒來食；菜園仔倚路邊hit爿，除了燈籃仔花籬笆，mā有2模刺竹。菜園仔kap阮護龍尾灶腳中間猶真闊，用來疊草垺kap chhāi竹篙晾衫，厝邊隔壁ê囡仔時常ká-tī-chia chhit-thô，ī siàn牌仔、cho̍k窟仔、tiak珠仔ī 挽菜(ばんざい)、khian bâ-bui-chí [無患子核]。

閣來，紹介正身後壁，to̍h是後壁溝，tī公媽廳後壁有1-kâi鼓井，圓形--ē，米外闊，鼓井內用石頭gih--è，離土面1尺koân khōng紅毛土，人徛tiàm頂面chhiūⁿ水，外圍用紅毛土khōng圓形鼓井盤，方便洗蕩、chhiūⁿ水、洗衫⋯，khah-bē土腳tâm-kô͘-kô͘，鼓井盤南爿邊--a有1-kâi長四角形水盤，ē-tàng貯水浸菜、洗蕃薯、thâi cheng-seⁿ-á，因為有臭水管味，bē-tàng做食水；二伯in灶腳後壁、林仔姆in厝邊攏有豬椆、雞椆，chhun--e所在欠整理有較òe-sòe；離正身大約6,7間厝遠to̍h是後壁溝仔，後壁溝仔koh去to̍h是阿伯、豆油仔兄ê菜園，菜園閣過是蓮霧園，10-gŏa-gōa欉白蓮霧，真甜，蓮霧若開花，siâⁿ來真濟鳥仔、蜂仔、筍龜、糙米龜來吸蜜，mā siâⁿ來囡仔peh起去蓮霧欉掠筍龜kap糙米龜，蓮霧若sek，大人割蓮霧，囡仔頭taⁿ-taⁿ聽候sîn蓮霧，割蓮霧用細支桂竹篙仔縛鐮力仔割，用刺竹篙仔縛網仔袋lom，若lom無好勢to̍h-ē lak落土腳，啥人sîn--tio̍h tio̍h啥人ê，有食閣好sńg；蓮霧園西爿to̍h是崁頂庄外圍淹田水溝。

講咱ê厝宅是「竹圍厝地」，厝地周圍有刺竹模是特色，東爿大門南爿面有3模；南爿kap日性、俊--è in-tau隔界有5模；西爿鼓井後水溝邊有4模，蓮霧園水溝邊有5模；北爿kap頭前庄隔界有7模；chia-ê數字是大約，竹模有ê相黏，有ê分開，kap隔壁內底攏有留巷路相透。刺竹不比麻竹，麻竹筍好食，麻竹葉ē使得縛粽，所以麻竹模較有管理較清氣相，ah若刺竹模，to̍h隨在伊發，隨在伊puh筍仔，竹枝全刺了了，葉仔細細皮，lak-kah 規塗跤，鵝仔鴨仔tiàm-hia放屎，查埔囡仔mā tiàm-hia放屎放尿，若boeh剉一支竹仔thang利用，著愛細膩，m̄-thang lo̍p-tio̍h「黃金」chiah-bē臭ko͘ⁿ-ko͘ⁿ。刺竹長koh勇，是起竹管厝ê好材料，因為thòaⁿ-kah cha̍t-thóng-thóng，boeh剉無3,4个人工拖bē-tín-tāng，因為koân koh大模，對風颱應該有cha̍h風路用。

細漢足ài掠筍龜、糙米龜、牛角oaiⁿh來sńg，筍龜kah意歇tī菁仔叢，牛角oaiⁿh kah意苦苓仔樹，糙米龜kah意蓮霧花kap suh ke-jiû-á奶(雞榆)，阿伯ê蓮霧園kap菜園仔倚厝宅hit爿有真濟欉菁仔叢，菜園仔南爿kap阮田裡隔界有2欉足大欉ke-jiû-á，攏是阮掠筍龜、牛角oaiⁿh、糙米龜ê好所在，A-ba̍k、A-chiàng、Lah-jih kap厝邊A-pêⁿ、Ka-tēng--ē是仝班同學，時常相招掠leh sńg。糙米龜gâu飛，boeh掠著等伊頭lê-lê leh吸花蜜時用手連蓮霧花做伙me。牛角oaiⁿh行動較慢鈍，掠牛角oaiⁿh需要用竹篙縛有葉樹椏拐伊行入，chiah趕緊放落土腳掠。筍龜(獨角仙)跤爪真尖，khi̍p--tio̍h真疼 著細膩，筍龜hèng吸ke-jiû-á奶[汁]，若歇tī較低所在，liam腳liam手用偷掠；若是透早，昨暝歇tiàm菁仔叢尾溜菁仔葉內ê筍龜，因為凍露水較bē飛，菁仔葉koh金金滑滑，阮用腳出力踢抑是用手搖菁仔欉，「tŏp」一聲he筍龜滴落土腳，隨時掠入手。筍龜公(kang)--e khah gâu飛，提楊麻絲縛tiàm角，hui-hui--leh to̍h家己飛--起來，真心適好sńg，母--è 較bái閣無gâu飛，較無愛掠，不過有時掠來kap公--e sio-kàn mā真心適，囡仔人m̄-bat代誌bē感覺歹勢，大漢chiah知「原來to̍h是按呢--ò͘！」實在是真自然ê性教育。

根據林添福先生編寫：『中華民國七十九年歲次庚午台灣編修《書山蕭氏族譜》內容記載 田中鎮、社頭鄉一帶，古早是平埔番(平地化之山地同胞稱呼)阿里昆族的部落，所以有舊社、社頭、崁頂稱呼，崁頂是蕃社酋長之居住地。(p54)』來看，假使若ē-tàng證明咱祖蕭朝宰m̄是「唐山過台灣，心肝結規丸」ê福建人，是真正hō͘清朝皇帝「賜姓滿化」ê在地人平埔仔「阿里昆族/洪雅族(Hoanya)」，咱kā推論--一下，咱祖蕭朝宰無定著to̍h是斯當時ê「番王」[酋長]，咱看朝宰媽賴--氏2尺闊4尺高ê墓牌kap「復興館大租」1冬收租粟大約有110石ê史實，上起碼ē-tàng證明朝宰公朝宰媽m̄是普通人，m̄-nā是好額人，mā是族親內ê gâu人，m̄-koh為啥物朝宰媽ê墓牌無題「書山」堂號，題「皇清」，che究竟有啥物解bē開ê祕密？需要聽候發現有力ê證據來解說。總講一句，m̄管朝宰公朝宰媽是唐山過台灣，抑是在地平埔原住民，肇基祖朝宰公朝宰媽確定是咱ê祖先，開基傳到此當今300冬，絕對是咱兜蕭--家真正ê歷史。