19990500_台灣俗語鹹酸甜第一冊 話頭

19990500_台灣俗語鹹酸甜第一冊 話頭       Lah-jih(蕭平治)

舊年（1997）五月，清華大學呂興昌教授ê 台灣文學研究工作室Home Page 開業，內面有一間「台灣俗語鹹酸甜」ê kám仔店，看伊用漢羅lām寫ê方式寫台灣俗語，感覺真趣味，著kap伊討論，三講四講教授煞來招學生tàu腳手，由鼓勵試寫開始siâⁿ學生入甕，然後講伊真無閒，著分派工課講咱來輪流寫，一人一日一chhiám，教授ê話m̄敢違逆，著那學那寫--落去， 經過教授ê褒獎煽動，歸尾硬將chit間kám仔店放hō͘學生顧，做伊去做較大ê工事。

實在講，chit間kám仔店對學生來講是一擔千斤擔，過去罕得寫文章，chit-mái 雄雄叫學生著愛一日寫一篇，親像leh交作業共款，有影有夠食力。師ê話無聽嘛bē-sái-chit，自按呢青盲--ê m̄驚槍，一篇一篇寫無停睏，驚阿爸咧！有教授thèng-hó靠，若寫了bē見眾--lih ，beh笑師父一定hông笑頭前，師仔工匿tiàm 後壁，家己檢討著好。Taⁿ to-ā寫bē少，寫得好寫得bái著看逐家kā阮批評，阮家己ê呵咾是：m̄-chiâⁿ猴，閣抑做一睏寫出了二百五十chhiám--lioh！算算咧閣有十thóng萬字--koh，連家己嘛感覺懷疑懷疑，苦勞實在值得家己褒。

寫台灣俗語鹹酸甜ê向望有二項：

　第一、想beh挽救giōng beh失落ê台語Hō-Ló話：台語聲韻愛靠面對面教學來完成，但是台語Hō-Ló話ê詞類、語法會使chit tī文字頂面hō͘人有樣看樣來學習。蕭平治頇慢講話，bē曉『出口成章』，閣卡頇慢寫文章，不過有二個特點鼓勵伊勇敢來寫，五十外beh六十歲ê人，台語ê純正免得議論m̄免懷疑，伊感覺講話頇慢m̄是缺點，因為伊聽家己ê母語聽會真，bē曉寫慢慢仔學著好。

Beh寫台語會通順閣liú-lia̍h，需要了解台語聲韻ê變化，kap應用一套台語ê書寫文字，常聽人怨嘆講台語真好聽，beh用文字寫出伊聲影，實在誠pháiⁿ-pháng，借字借音攏m̄是好方式，chhōe古字閣欠hit-lō功夫，就算講你寫會出，嘛m̄敢保證別人看有，che 確實是有影ê事實，嘛困擾咱台灣人幾若百年，其實beh解決chit-ê代誌真簡單，只要你觀念小可改變，mài kan-nā限定tī漢字chit-ê範圍來車拚，用卡開放ê觀念，應用羅馬字來thàu-lām，漢字羅馬字tàu做夥相好，親像蕭平治寫俗語鹹酸甜按呢，就有法度100%寫出心內事，嘴講ê音聲，chit方面ê應用蕭平治已經m̄驚。

　第二、借俗語來了解台灣文化：俗語是語言ê精華，生活上活跳跳ê對談，先民生活ê寫真，扑拚ê腳跡，有真言，有滾笑，有高雅，有粗俗，有hiâ-pai，有無奈，有尊重，有相削…總--是人ê一生過程，你所經驗ê鹹酸苦chiáⁿ，無一項講無著--ê。蕭平治細漢tī庄腳出世，長久以來tòa-tī chhân-tiong-ng（田中），所以講著話真正世俗，世俗ê人生表現tī世俗ê語言內底，台灣俗語表達--ê是台灣人活lèng-lèng ê生活，當然有高雅嘛有奢華詈罵，高雅--ê繼續傳教，粗俗--ê教人m̄-thang胡白講亂使來，iau飽吵，因為語言是中性--ê，在人按怎使用niā-niā。

台灣俗語that-tó街，比貓仔毛閣卡濟，一日一chhiám，寫十冬嘛寫bē完，beh 按怎選題材，蕭平治ê辦法是按呢：格言漢文ê部份，用北京語會凍了解，盡量mài選，其他--ê隨機選擇，看電視看報紙，聽人講話，kap人對談，特別tī庄腳所在，tī市場內，不時都有俗語làu--出來，chit種生活化ê語言，hō͘伊ùi文字上出現，著是上好ê題材。有tang時仔無靈感，著愛péng先覺專家ê著作來編故事、phò-tāu講báng--gah ，話來話去嘛是beh kā講kah有一支柄thang好giâ 。

一個欠腹腸，肚內無文章ê半老老人，用心計較寫出chit款無共款ê文章，看無ê人會笑講寫he 是啥麼文章，文字lām-lām chham-chham，也無『引經據典』，講hit-lō那親像無讀過冊ê人講ê話，chiah頇慢也敢提出來展。看有ê人，（台灣話會曉講，羅馬字會曉讀）看了後上少嘛會肉文笑講，閣親像teh聽人開講話仙共款，感覺趣味趣味--koh。請多多kā阮批評指教，感謝！