▲18工台灣一周來到台東，記得tsia是台東大橋，kap西螺廖福祥做伙翕tsit張相，逐家頭毛已經留長長，無koh和尚頭。
△tsia是阿里山二萬坪(Jī-bān-pêⁿ/ Nn̄g-bān-pêⁿ)，後壁背景是大塔山，天氣涼冷，穿一領雙面穿ê外套，kap吳森田翕相。
△去龍井國校tuà一禮拜，輔導兼服務，整理拋荒草埔，攑鋤頭是王英三，蕭平治褪赤跤攑鍤桮(tshiah-pe)，真正做工。
△Tī龍井國校tuà一禮拜，輔導兼服務，家己煮食，家己洗衫。
▲本成我是50級甲班學生，學號7117，因為休學tsiah慢1屆，是51級乙班學生，學號8212。
50級三甲班第一屆同窗會招我參加，猶原kā我看做仝班同窗，白頭毛彼位是導師戴鎬東老師，伊教阮寫毛筆懸腕、中鋒、逆鋒、藏鋒ê技巧。
▲1960年熱--人，田中第一國民學校第九屆出業生第一擺同窗會，tī禮堂前大王椰子跤國旗台合影，時間已經超過一甲子。
斯當時我是師範學校一年生，同學已經有人tī學校教冊，有ê繼續讀大學，較濟是出社會士農工商leh phah拚。
▲學校長朱滙森鼓勵ê話。
▲2012年12月8日(六)51級校友畢業50週年同學會，普三乙班安排我上台報告，全部台語講出，得著tsiâⁿ熱烈ê phok-á聲，會後有真濟同學比大垺翁(tuā-pû-ong)kā我o-ló。
1962到2012_台中師範51級乙班 蕭平治20121208
〔國立台中教育大學51級畢業生50週年同學會報告文稿〕
玉山峰高 koân-koân khiā-tī hia
護佑台灣勇敢向前行
濁水流長 滋養咱土地
chhiâⁿ-iúⁿ囝孫跤踏實地注心定
台中師範 是教育搖籃
禮義廉恥教咱為人師表做肥底
三年栽培 教學重技藝
母校恩情親像濁水溪
半世紀前少年人，誠懇鬥陣有三冬，各地有緣來做伙，四落宿舍做眠夢；
大鼎飯佇灶腳煮，長條桌椅排碗箸，有魚有肉有菜甲，一聲開動食到飽。
四書五經讀古冊，史地書法西洋畫，教材教法心理學，無論文藝抑武藝；
彈琴唱歌二步七，體育游泳逐項會，家事勞作夯鋤頭，件件皆能學真濟。
未來是欲做老師，著愛認真來讀冊，老師台頂子曰說，學生台腳鄒走常；(周照雄)
王梨生佇樹仔頂，這個這個講袂停，乙班笑詼有夠濟，狡怪出名gâu讀冊。
想起53年前少年時代，咱ùi台中、彰化、南投、雲林各所在來到台中師範母校，充滿新奇kap向望，期待未來boeh做老師教囡仔讀冊，tī好奇、好玄中認真學習，tī chhit-thô、滾笑、「吃飯、睡覺」1工1工過，透早5點半「bē-tín-bē-tāng」tio̍h起床，暗時10點chiah去睏，3冬結緣，一世人黏做伙，到taⁿ已經半世紀。3年同窗兄弟感情，一旦離開分散各地只有暗相思，教冊3冬了後起變化，有人做兵有人大學深造，chit中間阮乙班同窗mā有一寡連絡，辦過幾期《窗友》刊物，連絡感情報導消息，tòa-tī近位兄弟to̍h騎鐵馬假日相chhōe；做兵退伍隨人娶某生囝，互相相chhōe自然減少，需要利用同窗會約時間地點聚會，到今年7--月已經辦過幾若擺，每擺聚會攏會發現有人高升、事業發展，hō͘人歡喜mā hō͘人欣羡。
ē記得斯當時畢業惜別時，Iûⁿ Chiàu-lâm兄有講過：「咱chit-má出業做老師，10冬後一定ē有真大ê變化」，有影--neh，m̄-nā 10冬有變化，20冬、30冬變化koh-khah大，40冬是巔峰時期，阮乙班ê Iûⁿ Chiàu-lâm已經做到高等法院庭長、Gô͘ Som-tiân做到法商學院院長，tī政界Ông Eng-sam做到台灣省諮議會議員、Lîm Chèng-gān做過鄉長， Si Kàu-hông是銀行家， Koa Sek-hok tī國稅局服務；猶有N̂g Ín-chì、Chng Hong-hiông、Chiu Chiàu-hiông、Tiuⁿ Sè-liâng、Tân Ōng-kin、Liāu Hok-siâng、Tân Chēng-hiông、Sím Iú-ha̍k、Ông Tì-goân轉途做生理，攏真有成就，貢獻社會；Tân Tān、N̂g Gī-sēng、Hô Gī-chheng、Âng Chèng-tī tī大學做教授，Chan Sè-gióng、Lí Ko-chiong、Kí Tiong-lâm早to̍h tī國小做校長；上會得呵咾--ê是堅守本份tī國民教育做到退休ê兄弟，Siau Pêng-tī to̍h是其中一位，ē得thang講無辜負著母校台中師範栽培ê向望。今仔日同窗會，siōng-kài數念--ē是 Gô͘ Chèng-hiông、Tân Chhun-lâm、So͘ Sèng-tī、Kang Phok-bîn、Lîm Ú-bêng、Tiō Úi-eng、Phêⁿ Hin-chôaⁿ in 7个， in無koh迷戀塵世，已經上天國享受清淨。
出業已經50冬，50年ê變化bē-tàng閣較大，應該是修身(修心)養性(養生)ê時機，70歲年紀無算濟，是人生tăⁿ開始，開始享受休閒無憂ê過日，囝孫自有囝孫福，放in家己去發揮，咱若身體顧hō͘勇健，to̍h是上大ê鬥跤手。
拍拚奮鬥著停止，事業放予囝孫伊，囝孫自有囝孫福，閣加煩惱創啥物；
人生七十拄開始，七十年紀滿滿是，心情輕鬆閣運動，保証一定食百二。
貪字著看予清楚，貪財貪食攏毋好，改薰改酒改不良，戒貪戒色戒火氣；
生活著愛有意義，生老病死不得已，佛祖嘛才八十歲，了脫生死是真理。
人講人生是海海，到尾攏是偆氣絲，交陪何必傷計較，歡喜就好敢毋是；
莫論好額佮散赤，莫論成功佮失志，心內若有分別心，心情鬱卒袂歡喜。
人老性地著愛修，酒色財氣毋通求，老相老伴老朋友，歡歡喜喜長歲壽；
朋友互相相探望，同窗關懷心輕鬆，有緣細漢到大人，同窗情誼感情重。
祝福逐家，恭喜兄弟姊妹，身體健康食百二。
Lah-jih(蕭平治) ：51級普師乙班11號，1992年開始投入語言復振事工，學習羅馬字，推sak台語文字化工程，教學、編寫教材、書寫台語文是重點，到今已經20冬。請來參觀【老人囡仔性閒閒罔話仙 http://chhantionglang.blogspot.com/ 】，歡迎來田中厝--裡泡茶開講/ lahjih@gmail.com
附錄：
台中師範學校校歌：(在校3年教唱版)
玉山峰高，濁水流長，吾校聳立，氣象輝煌，百年大計，澤被四方，陶鑄師資，代有賢良，光華復旦，主義宣揚，莘莘學子，校訓勿忘，砥礪學行，不息自強，為人師表，邦國之光。
沒有留言:
張貼留言