看相片回想人生_1962/8→1965/10_三潭國小服務三年(五)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1962/8→1965/10_三潭國小服務三年(五)：
▲服務進入第二冬，升學班已經是應屆畢業生，koh 1年to̍h-bueh上京赴考，國語算術國語算術繼續thui，老師開始起酷刑，kā in訂目標，訂分數ê目標，考10擺統計1擺，看平均分數ê進步退步做獎勵處罰依據，進步 獎勵文具，處罰 是拍手蹄仔、打尻川䫌，因為成績懸低kap進步分數成反比率，所以採取家己拚家己ê方式，比論講前回平均60分，tsit回著進步10分tsiah有獎勵，若是退步5分以上，照分數打尻川，1分拍1下。若是前回平均90分，tsit回著進步3分tsiah有獎勵，若是退步3分以上，照分數打尻川，1分拍1下。
tn̄g-tio̍h特殊學生，siuⁿ khiàng 抑是siuⁿ 頇慢，ē kap伊參詳訂標準，大約1禮拜to̍h有1擺phah囡仔ê pi-pi-pia̍k-pia̍k ê箠仔聲，篾爿仔、掃梳gím-á，節力節力拍，ē痛bē受傷，tn̄g-tio̍h 著拍2-30下ê時陣，偷偷仔做手，拍較輕力--leh，學生了解老師心意，ná像m̄-bat hō͘其他學生加講話。
到kah第二學期，hiông-hiông發現，若m̄參加聯考讀大學，liâm-mi tio̍h-ài去做兵，m̄-tsiah kā學校顧暝ê空課總bāu--起來，下班後轉去食飯洗身軀，to̍h-koh來值夜室讀冊準備聯考，一直到上緊張ê學期尾，有一工，tsit-tsūn腹肚糾絞疼kah放尿放bē--出來，趕緊送病院，醫生講是盲腸炎，需要開刀，tsit聲慘--à，學生初中考tshun一禮拜，我ê聯考猶10幾工，「先生，敢ē-tàng 慢且手術，等我聯考後⋯」，好佳哉X-rays翕了tsiah知m̄是盲腸炎，是腰子結石tú好lak落來輸尿管，經過7-8工有時siak來siak去ê大疼kap不管時ê ui-ui-á鑽，好佳哉ē-tit赴聯考，可惜學生ê初中考suah無法度陪伴 in安心、鼓勵，連最後hit幾工是按怎過我都m̄知。
好佳哉學生考試放榜得著滿意ê成績，家己ê聯考suah名落孫山，文化大學美術系欠3-4分。傷慢準備是主要原因，mā是命運天註定。
▲紅花柳綠十花五色是súi ê景緻、súi ê身穿，不過1960年代ê庄跤人，查某ē穿花仔布衫裙，查埔較m̄敢穿花lok-lok面頂衫，公務人員食頭路人，長褲疊白衫較普遍人穿，像我一領深草仔色koh-tī胸前繡花êしゃつ (襯衫)，to̍h hō͘叔伯兄siàu-thé「老師人kap人穿tsit款衫」。我是tsiâⁿ kah意tsiâⁿ-tsia̍p穿，koh去寫真館翕tsit 2組tshit-thô相片。

▲為著鼓勵學生認真phah拚，有一擺大投資，鼓勵前5名kap進步上濟1个，tshuā in去中興新村、台中市tshit-thô。吳森田、黃金雄來陪伴，蕭慶章進步獎，魏德宗、蕭昌霖、許金三、蕭女卿、蕭雪珠前5名，蕭素琴、蕭素錦是我ê姪女。

▲學校舉辦唱歌比賽，擔任伴奏，功夫兩步六--niā-niā。hit个年代ē-hiáu彈風琴to̍h是音樂老師。

▲上體育課，示範跳高，姿勢bē孝孤--得。總--是有hō͘囡仔nà日花仔，走走跳跳--leh，真正是必要--è。

▲學校有督學、官員、老師來參觀，朝會定著加真照起工，由我上台指揮唱『國歌』。

▲應屆畢業生5年甲班。

▲應屆畢業生5年乙班。tsit張是老師猶未到位翕ê1張。kap學校長老師做伙翕--è hit張suah揣無。

▲做3年教員，m̄-bat有人鼓催我加入國民黨，mā無hit-lō靠勢升級做教導做學校長ê想法，教冊是我ê趣味，啥乜因素ē自動拜托教導楊老師kap欒老師做紹介，加入國民黨，sian想mā想無。

▲服務3年期滿，等待兵單：
腰子結石ùi腰子lak落輸尿管艱苦bueh規個月，了後koh lak落膀胱內，bē刺鑿疼，一直拖bueh 2-kó͘外月tsiah家己放--出來，hit-tsām期間為著疼tiuh-tiuh不時leh揣醫生揣偏方食化石草仔，1日紅露酒罐仔2罐，koh limビ－ル麥仔酒，一直到兵單來。
新學年度開學第一工，教導主任tī烏枋頂寫放榜結果：
甲班：在籍43，省中4，縣中38，無tiâu 1。
乙班：在籍43，省中7，縣中37。
奇怪乙班哪會加1个？原來是頂一年牛仔班畢業生，臨時來插班，無學籍，人伊mā有學校thang讀，雖罔成績無kài好。

▲兵單來--ā，10月6日入伍。
彰化縣政府令：應征入伍保留底缺。
ē記得收hō͘好，tsit張公文是3冬後退伍轉來教冊ê憑據。
1965/10/6開始，又閣一段人生ê經驗、考驗、磨練。