國民學校讀七冬：

國民學校讀七冬：                Lah-jih_20180518

無寄讀，無落第，無休學，國民學校tō是讀七冬。

1950年代寫真：田中鎮第三國民學校二年級學生

一九四九囡仔栽，無鞋thang穿赤跤來，戇戇àⁿ-àⁿ真歡喜，老師教阮ㄐㄑㄒ；

也無教阮台灣話，見講攏是北京語，ㄓㄔㄕㄖbē-liàn-tńg，ná像kâm-lān咬喙唇。

二零一八老人羶，面肉皺皺肚大掔，三分之一拍毋見，招同窗會僫實現；

有人chhōa孫真歡喜，有人暝日守電視，上好出門做運動，同窗相揣講過去。

國校四年舊寫真：

1950年6--月翕hti張二年團體相，7--月開始歇熱，9月初開學升三年級，ĕ！怪奇！奇怪！ná-ē hiah-nī chē-ê同學無khoàiⁿ人影？閣來真濟隔壁班ê同學？本來二年--ē有兩班，為啥物升三年--ē soah chhun一班？

後--來chiah知，原來阮ê第三國民學校徙去外三塊厝，phàng見去ê同學tō是綴第三國民學校搬轉去hit爿讀冊。tòa頂潭、中潭、龍潭這三里ê同學猶原留leh無徙位，m̄-koh已經m̄是第三國民學校ê學生，阮是田中第一國民學校分校學生，仝款戇戇àⁿ-àⁿ歡喜上課下課。

第一國民學校分校三年級這一年，變化有夠濟，ná像「搬岫雞母」--leh，有一大站，阿兵哥佔阮ê教室，害阮著家己chah椅仔來學校，m̄是tiàm厝前厝後閃日頭光，tō是去附近樹仔跤、廟埕，ah無烏枋，老師喙講阮耳空聽，覆ē椅仔寫字，算術課只好老師講，阮用心算，都也心適kah，m̄知影心酸。mā有一擺，全部徙去田中第一國民學校本校，借所在上班上課。（一段有小可時間錯亂，bē記得是二年--ē 抑是三年--ē？）

升四年級，阮tō徙去田中第一國民學校本校，因為男女分班kap女生拆散，lām本校14个男生chiâⁿ做一班，級任游傳章老師，記得是四川人，聽講伊hō͘銃子tōaⁿ-tio̍h後斗殼仔，有chit-chhop無頭毛，尻川後有學生叫伊白頭khok仔，伊真pháiⁿ真ok，學生無乖tō是拍，m̄-ku hit-chūn ê學生囡仔，足濟gû-thâu-thóaⁿ（牛頭剷），tō是m̄驚拍。雖罔我ê成績m̄是第一名，因為我較乖bē狡怪，老師hō͘我做班長，有一擺叫我去揣柴仔boeh拍學生，頭一擺我攑了傷細支，koh去攑一支大支--e轉--來，結果班長無責任，拍第一个，有夠衰，m̄-bat hông拍ê乖囡仔，頭一擺食著「竹筍炒肉絲」。

庄跤囡仔pō͘-pîn來到街路讀冊，感覺足心適，一日四逝路，一逝半點鐘，攏是半行半走，無冊揹仔用包袱巾包，縛tiàm尻脊骿，走--起來chiâⁿ扭掠，雖罔四年級，mām̄知影tio̍h-ài認真讀冊，將來‥‥‥，將來？將來是啥？

學年尾，來一个少年家仔，講boeh chhōa唱歌做遊戲，免讀冊kan-na耍，這我上愛，快樂三工後，翕一張團體相做記念，經過幾年了後chiah知影，原來是師範生leh實習，教啥乜bē記得了了，真正奇緣，留chit張相真正有記念性。

國校六年舊寫真：

四年--ē結束，原班人馬升五年--ē，級任是胡老師，大連人，ē記得有一站仔老師身體無好，帶痚呴喘，時常無來上課。下學期老師kā阮講boeh「能力分班」，考試了後，我hông編入甲班18號，阮班又閣拆散，雖然m̄甘，m̄-koh甲班是好班，同學攏較認真讀冊，我mā感覺真歡喜。m̄知啥原因，一個月後tō又閣恢復原班讀冊。

學年尾，老師家庭訪問，老爸講無錢thang考初中，自按呢hông編入六年戊班，是無boeh升學ê牛仔班。

牛仔班tō是放牛食草無受學校重視ê班級，新級任戴老師教無一個月tō hông召去做四個月補充兵，換來一个bē-hiáu教冊ê代課老，等伊戴老師轉--來，牛仔班已經散仙到親像無牛鼻圈ê一陣野牛。讀冊無sêng讀冊，規工siáu-tin-tang，m̄是siàng肉球（ドッジボール躲避球）耍，tō是勞動服務，終其尾mā是六年出額（出業），全校排名108，牛仔班第一名，提著鎮長賞kap畢業證書轉到厝，阿爸歡喜kah kā人展，in囝提著鎮長賞，我猶原戇戇àⁿ-àⁿ m̄知影無冊thang讀閣來boeh chhòng-saⁿh？

出業前，老師用カメラ（照相機）kā阮翕chit張相，chiah有留牢記智，總共65个，攏是赤跤大仙。

經過40年後，轉來母校田中國小kap胡老師同事，有一工老師kā我講，斯當時『平治很會讀書，那一次能力分班考試，全五年級只有你算術考100分，讓老師們覺得好驚奇。』可惜無tn̄g-tio̍h貴人。

國民學校六年出業，tiàm厝--裡hō-lí-hō-sō庄內庄外四界hàiⁿkáu-bó-so，有一工我兩个ê叔伯姪仔閣是同窗--e來招我考田中第一國民學校附設ê補習班，阿爸一聲「無錢」準soah，後--來是三兄提錢hō͘我報名，chiah考牢補習班繼續升學命運，報我消息ê人soah考無牢轉去做田做工。命運創治人，運氣mā改變人ê運命，考牢補習班真正是改變人生真重要ê關鍵。

鄭老師是名師是嚴師，戽斗戽斗khan一支烏框目鏡，惡khia̍k-khia̍k有夠歹，尻川後學生稱呼伊「阿猴--ē」。「算術」科足gâu教足gâu應用圖解分拆，tī十kó͘月無暝無日ê惡補籐條伺候之下，算術ùi考零分到一百分，考牢縣內上讚彰化中學，繼續阿爸haiⁿ「無錢」ê「三更燈火五更雞」「菜脯根仔罔咬鹹」趕火車ê日子。

1960年田中第一國民學校第九屆畢業生第一擺同窗會，轉來80个，有人出社會leh拍拚，有人leh準備考大學，有人已經準備boeh做老師，我是tī台中師範tăⁿboeh升二年。