〈還我台灣鳥仔ê本名〉重出網路

感謝鳥仔朋友薛光雄先生、Kan Ingli老師、林春吉老師、廖淑鳳老師、蕭清文、蕭文章宗親，無料提供鳥仔相片並允准tiàm相片頂懸書寫紹介文字，chiah ē-tàng hō͘〈還我台灣鳥仔的本名〉重出網路。

〈還我台灣鳥仔ê本名〉    蕭平治編寫2000.01

參考周鎮著：台灣鄉土鳥誌（台灣省立鳳凰谷鳥園出版）簡單台文紹介

【2000.01.01起bat-tī「台灣文學研究工作室」：http://ws.twl.ncku.edu.tw/連載】

話頭：

華語講『行不改姓，坐不改名。』姓是爸母所賜，只有來源，無好bái差別，若無特殊原因，姓是無容允別人kā咱改換，改姓是天大地大ê代誌；名ê稱號大部分是爸母公祖所號，為著尊重序大，大多數ê人攏m̄敢換名，只好等到大人tsiah閣家己號名，為著雅氣mā好，為著命理mā好，總是有伊改名換名ê理由kap自由，可見名姓對人尊嚴ê重要性。朋友！你姓啥、你叫啥物名，你ê名姓tī你ê人生中間敢bat懷疑過？

實在問了tsiânn奇怪，逐ê人ê名姓應該kap Siau Lah-jih仝一樣，免想mā知無問題，攏是tuè爸母姓，攏是爸母所號ê名，哪有啥thang懷疑，無論漢名、戶口名、本名、囡仔名，抑是偏名、外號，若m̄是爸母所號，家己佮意，啥人會kap家己ê姓名會bē清，kô-kô纏？

蕭平治，Siau Lah-jih，這是我ê戶口名kap本名，同窗--e kap社會朋友叫我蕭平治，厝裡爸母兄弟姊妹，庄裡親堂，囡仔伴，kap上知己ê老兄弟，攏叫我Lah-jih。細漢少年時，若有外位朋友同學來相tshuē，講beh tshuē蕭平治，定著三問四問無人bat，著愛閣問伊是啥物人ê囝兒？tsit-má leh創啥物？tsiah知影是leh tshuē Siau Lah-jih，若無kan-na問beh tshuē蕭平治，做你問kui晡，也是無人bat伊。m̄-koh你若直接講beh tshuē「Lah-jih--è」，大概kui庄內ê大大細細無人m̄-bat，免問第二擺就有人tshuā你tshuē著伊。

語言是文化ê根本，文字是記錄語言ê符號，蕭平治kap Siau Lah-jih哪會去hōo人分離，原因是喙講--è kap文字所顯示--ē無仝音字，講歹聽，有淡薄仔put-tap-put-tshit（不答不七），我姓蕭，無m̄著，tī漢文化ê傳統內，tuè老爸ê姓是天公地道，有唐山公，無唐山媽ê悲情，抑是在地人hō͘人滿化賜姓ê不幸，敢講咱平埔族媽ē原味，tō按呢hōo咱放bē記得？父公祖媽留落來ê話語，咱有leh講，m̄-koh tsiânn做文字書寫煞pìnn-tsiânn無路理來，借音借意借kah不答不七，因為除了唐山ê漢字以外，若無lām用羅馬字，就無法度thang寫kah tsiânn順序，長久以來，只有漢字北京語教育ê結果，台灣人家己ê語、文自按呢拆分開。

Tō是tsit-ê原因，台灣鳥仔名mā kap咱仝款運命，仝款liân-huê，根據周鎮先生ê講法，百年來，台灣鳥仔名，受著三擺ê蹧躂，第一擺tī 1937~1945年代，日本人ê非常時期，為著推展in ê「皇民化運動」kap「國語家庭」，台灣鳥仔ê母語，台灣鳥仔ê本地名，煞攏用日語發音，好佳哉日本人猶有一寡良心，對咱台灣鳥ê特有種，親像「oo-tshiu，ka-līng，hue-bî」攏照台語音用『假名』翻譯。上蓋bē o-ló--tit-è tō是終戰後ê『國語』運動，m̄-nā母語hōo人壓迫，連續台灣鳥仔名mā徹底改名換姓，m̄是ùi日語翻譯做「日義漢字名」，tō是中譯外來名，上悲哀是，台灣正港ê傳統鳥仔名，攏總放sak m̄用，甘願採用外來名，tō是m̄叫咱家己祖公祖媽留--落來ê名字，烏鶖已經m̄是oo-tshiu，叫做『大捲尾』，花眉m̄是hue-bî，是『畫眉』。解嚴10外冬，台灣鳥仔ê本名仝款無受重視，罕得tang時ē-tàng tī報紙雜誌看著台灣鳥仔ê本地名，煞hōo人king-thé做「土名」，在地鳥hōo人看輕做土鳥，在地人m̄煞hōo人看做「土人」，在地化ê本質敢tsiânn實按呢生？

第三擺就是最近ê代誌，由出版界偷渡中國鳥名來咱台灣，目前已經有46種ê鳥仔名已經hōo人統一，可憐ê代誌，外來化--è外來化，hōo人統一--è hōo人統一，今（tann），台灣ê愛鳥人，大多數已經m̄知影台灣鳥仔ê本名kap本名ê意思tī-tueh，可嘆！可悲！真正hiau-hīng兼liân-huê。為啥物？為啥物？解嚴後台灣在地化ê口號喝kah tsiah大聲，對台灣鳥ê母語卻m̄知影thang保惜保持，除了無知以外，就是欠缺家己ê自信、自覺kap愛家己文化ê良知。

〈還我台灣鳥仔ê本地名〉，生是台灣人，死beh做台灣魂，台灣話，台灣語，台灣ê在地代誌，攏m̄-thang bē記tit，台灣鳥仔ê本地名beh愛流傳，kan-na漢字無夠，tio̍h-ài用羅馬字sio-thàu，這是筆者參考tsit本「台灣鄉土鳥誌」ê本意，對鳥仔有趣味ê朋友，若是beh了解較濟鳥仔ê紹介，著愛看「台灣鄉土鳥誌」ê本文kap參考內底ê相片。（2000.01.01）