20020412_Ah Kheh-chiáu_2002.04.12
「啊 ！客鳥 ！」
<阿客ùi半空中趨落來網球埕邊ê樹頂，kheh, kheh吼2 聲。>
「Tī-tah？」
<感覺chiâⁿ奇怪--neh？球m̄-phah，soah來leh關心我？>
「已經飛對……啊 ！歇tī hit欉樺樹頂遐…」吳老師用手kí ùi東旁hit欉樺樹。
「啊！閣飛來1隻！」無khà球，隨時將球杯仔tú-tiàm土腳，球賽暫時停止，8、9對目睭kui-ê siòng-tùi樹仔尾溜去。
<原來阿客嫂--à已經toè後壁飛來阿客身軀邊，仝款kheh,kheh 2 聲，4蕊目睭金金看網球埕ê 人群…>
「He啥物鳥仔？哪會chiah-ni̍h 大隻？」
<牽--ê！你有感覺貼心、感覺hiau-pai --bò͘ ？In田中國小ê老師攏真kā咱關心，piān-nā看著咱ê形影，In就kí-kí chí-chí，o-ló褒獎，歡喜tang-tang。>
「客鳥！he叫做客鳥！」
<聽講kā咱在地名「客鳥」回復轉來ê人，就是chit-ê蕭老師，chit-mái已經chiâⁿ-chē人bat 咱ê名叫客鳥--à-neh！>
「客鳥？啥物是客鳥？哪會m̄-bat聽--過？閣chiâⁿ-súi to-tio̍h ！」少年ê劉老師感覺怪怪leh 問。
<莫怪伊m̄-bat，看起來生份面生份面，tăⁿ來田中國小教冊ê款，chiah少年，m̄-chiah 20 thóng 歲--niâ。>
「客鳥！就是喜鵲，在來咱台灣人就叫In客鳥，聽講是中國ê清朝時代移民過來--ê，過去生湠chiâⁿ-chē，可惜chit-má已經pìⁿ-chiâⁿ保育動物，chhun無幾隻，你敢知，咱田中國小有幾隻？」
<牽--ê！你敢知影咱ê祖先已經有偌濟囝孫tī-chia leh徛起？>
<聽講已經經過幾若代，chit-mái分散tī各所在，罕得kā.關心過，抑無你敢知影？>
<我嘛m̄ 知！>
o͘h ！原來是按呢--ò͘，咱學校猶有真濟隻--hioh？
「啊！電火柱仔遐有兩隻！」球埕邊--a 1个學生囡仔閣發現。
「He m̄是客鳥--lah，he是烏鶖，較細隻，kui身烏sô-sô，嘛無客鳥按呢烏--ê chhap白，súi閣大pān 。」
<咱按呢想嘛m̄ 著，攏是tī-chia徛起，總是互相關心，互相照顧嘛是應該--ê。你看，chit-ê蕭老師m̄ 是一直leh kā咱關心！>
<有khah-cho̍ah ？伊亦m̄ 是專家，kan-nā用hit支嘴講講--l，敢有啥物幫贊？>
<有比無卡贏，其實，咱嘛m̄-thang kâng .誤會，chit幾冬來，咱台灣ê兄弟已經進步真濟，有保育觀念，攏真愛護咱鳥仔類，m̄-chiah hō͘ 咱好生存，chit-mái咱m̄ 是自由自在tī-chia kap In leh 鬥陣生活，愛會曉感謝人chiah-tio̍h ！>
「蕭老師！你講咱田中國小有幾隻？我哪會攏m̄-bat看--過？」
「親目看過ê記錄是兩對，吳老師bat看過三對，頂日仔tī頭前運動埕hia chiah看過4隻，同齊tī樹仔頂chhit-thô，飛koân飛低，tī 樹仔頂跳來跳去，kap 1隻膨鼠走相jiok，足趣味。」
<除了蕭老師以外，猶有chit-ê吳老師嘛是真正hō͘ 咱感心，伊ê觀察比蕭老師較深入，時常kōaⁿ 1-kâi攝影機leh kā咱hip相錄影，可惜嘛m̄ 是專業--e。>
「蕭老師！你敢知影hit 4隻客鳥ê關係？」 吳老師是舊年chiah徙來田中國小ê少年cha-po͘老師，發現學校內遮ê客鳥，就一直用心leh斟酌觀察。
「啥物關係？客鳥tī咱學校出現已經7、8冬，會記得1994年第一擺發現，就一直tī咱學校出出入入，m̄-bat消失--過，到taⁿ生湠應該嘛bē少，當然有ê會徙去別位，總--是應該bē離開田中地區siuⁿ遠chiah-tio̍h，chit 4隻ká-ná是2對拄好仝時陣出現--niâ，敢也有啥物關係？」
「頂禮拜，tī力行樓對面hit塊球埕，嘛同時出現4隻，看起來是雙雙對對，kap蕭老師hit篇客鳥所描寫ê仝一樣，代先嘛kioh-sī 兩對朋友同時招出來chhit-thô，感覺chiâⁿ稀奇，因為上課中，我拄好無課，就tiām-tiām kā看，tiām-tiām kā欣賞，實在有影súi，烏chhap白，行路大pān定著，可惜無chah錄影機，若有，kā錄影起來，一定真珍貴。看beh 4、5分鐘久，chiah 去hō͘ 我發現著，原來chit兩對客鳥m̄ 是兩對朋友，是一家伙仔。」
「一家伙仔？你哪會知影？敢m̄ 是攏平大隻平大隻。」
「In是父母chhōa囝出來實習，學飛學chhōe物件食，chit-mái飛ê技術已經無問題，討食猶有較頇慢，所以客鳥囝攏猶toè tī親鳥身邊，聽候父母thóng hō͘ 伊食，為著討食物，鳥仔囝嘛會kek sai-nai ，m̄ 是細聲吼腹肚枵，就是kā si̍t-kó͘ làu hō͘ 拖帆，吼he sai-nai 聲。上趣味--ê 就是直接大聲吼beh-chia̍h ！beh-chia̍h！beh-chia̍h！」
「吳老師！確實無簡單，觀察kah chiah詳細。」
<吳老師有影有心to-tio̍h ，kan-nā 看就了解咱leh創啥，實在hō͘ 咱感心，吳老師，多謝--ò͘。阿客！咱來去hit旁，thang hō͘ In 閣繼續拍球，咱嘛著閣chhōa hit 2 ê囡仔出來實習，扑拼學生活ê技藝，hiah呢大漢猶bē曉家己獨立，kan-nā會曉嘴仔開開beh食beh食，成啥體統，敢bē hō͘ 蕭老師In恥笑。>
<是！牽--ê！遵命！>phu̍h,phu̍h ！真正翁行某toè，1前1後飛向東旁hit欉南洋杉去。
「啊！客鳥飛去--à！mài閣看，beh講beh hōe，等chit盤球扑煞chiah-koh來phò-tāu gī-niū，beh看客鳥，較捷來學校運動散步，定著有歡喜ê收成。來！球賽繼續，看遮，beh發球--ā-ō͘ ！」
……
<爸~！媽~！腹肚真枵，敢有chah 好料--ê轉來！>
<阿爸！我beh食！>
<阿爸阿母，我知影，阮會家己扑拼，beh kah阿爸阿母學生活ê才調技能，請恁放心--lah，阿爸！有1項代誌beh kā你問--ō͘。>
<啥物代誌？>
<咱啥物時陣搬來toà-chia--ê？人m̄ 是攏叫咱客鳥？>
<阿爸m̄ 是常教阮著「飲水思源頭，食果子著拜樹頭」，當然嘛著了解咱是ùi toh-ūi來--ê。>
<聽講tī hit-ê中國ê清朝時代，咱ê祖先就移民來台灣--ā，我嘛無確定，有根據--ê應該是hit-ê 蕭老師所記載ê文獻，tī 1994年，伊發現咱祖先tī田中徛起開始，到taⁿ嘛過了有5、6代，第一代祖起厝tī學校西旁hit欉銀合歡頂峘，後--來閣有tī南旁ê chhêng-á 欉kap 大王椰子頂做岫，恁阿公ê厝起tiàm南洋杉頂峘，阿爸感覺bē-bái ，所以無閣徙位，就kā新厝起tiàm阿公ê樓頂。>
<哪著按呢搬來搬去？>
<哪有法度，咱台灣雖然講是美麗島，可是風篩真厚，咱鳥仔族上驚就是風kap雨，特別是無情ê風篩，m̄ 管正掃回南，風篩頭風篩尾，咱註定是衰siâu，1支橫過來1支橫過去ê工法，較按怎kit-tiâu--leh 嘛無較cho̍ah，強風一下掃，岫liàn落來就是liàn落來，敢有法度阻擋是--bò͘ ？是好佳哉，天公保庇，命總是留落來，厝閣起就有，m̄-chiah著一直催恁著趕緊學獨立生活。其實，天災不可怕，上驚是人禍，上天庇佑，台灣已經有覺醒，知影互相扶持，互相尊重ê 道理，若無，親像過去「南路鷹，1萬死9千」ê悲情，看咱客鳥族會絕種抑bē絕種？>
「啊！客鳥！」
「老師！客鳥！運動埕遐有客鳥！」
「較細聲--leh！真súi --ho͘hⁿ！He是真稀罕ê鳥仔，m̄-thang kā扑青驚--ō͘ ！」
「老師！我看鳥仔冊寫，客鳥原來ê名叫喜鵲，哪會老師攏教阮叫客鳥？」
「聽講咱台灣本來無chit款鳥仔，是ùi外位移民來--ê，那像來遮做人客仝款，所以在來咱台灣人tiō稱呼In做客鳥。」
「hò͘ ！按呢--ò͘ ！我知--a！」
<阿爸 ！咱來改名好--bò͘ ？>
<哪著改名？客鳥客鳥，m̄ 是真好聽，閣真有咱台灣ê在地味。>
<你看！In攏叫咱是客鳥，親像咱猶是tī台灣leh做人客仝款，咱已經tiàm chia徛起chiah-ni̍h 久，台灣是咱ê故鄉，敢m̄ 是？我無愛閣hông 叫客鳥。>
<咱ê叫聲kheh,hkeh,kheh,kheh，kui-khì就叫 Kheh-chiáu好--leh，mài用漢字寫，m̄-tio̍h 無hit-lō 麻煩。>
「老師！阮知影，愛護動物，就m̄-thang kā伊掠，kā伊tàn石頭，m̄-thang買烘鳥仔pa 來食，著--bò͘ 。」
「著！完全正確，小朋友，恁敢知影Kheh-chiáu是按怎叫做Kheh-chiáu？」
「M̄知，拜託老師Kā阮講。」
「是In ê吼聲kheh,hkeh,kheh,kheh ê緣故--lah，親像『綠繡眼』ê吼聲ti̍h~ti̍h~ti̍h~，咱就kā號做Chheⁿ-ti̍h-á (青笛仔)仝款，真心適--ho͘hⁿ！」
<著--ā！咱台灣leh號名真濟是按呢號--ē，親像頭殼一chhop白白叫白頭khok-á ；嘴pe那飯匙，撈一下，飛一下，叫Lā-poe ；ho͘ 起來就溜去叫hô͘-liu (鰗鰡)；愛食粟仔ê鳥就叫粟鳥仔，攏真有意思，攏真趣味--ho͘hⁿ！>
「Kheh-chiáu！Kheh-chiáu！Kheh,Kheh,Kheh；Chheⁿ-ti̍h-á！Chheⁿ-ti̍h-á！ti̍h,ti̍h, ti̍h！」 學生chim-mī唸chim-mī回老師ê話：「我知--a！台灣人號名真趣味閣真有意思，Kheh-chiáu！Kheh-chiáu！Kheh,Kheh,Kheh；Chheⁿ-ti̍h-á！Chheⁿ-ti̍h-á！ti̍h,ti̍h, ti̍h！」
「啊！客鳥！飛去--à！」
m̄ 是！是Kheh-chiáu poe-khì chhit-thô --ā！伊會閣轉--來！
沒有留言:
張貼留言