南路鷹，一萬死九千。（鷹揚八卦）

南路鷹，一萬死九千。（鷹揚八卦）

「各位房長，各位兄弟：ta̍k-ke koh勞煩巡巡看看咧！看有tòe 無著陣、身苦病痛、傷過thiám 頭--ê 無？一路飛--來chiâⁿ勞苦，taⁿ已經來到中部地界，下面就是出名ê 濁水溪，濁水溪過--去ta̍k-ke就小chhèng khah kôan 淡薄--à ，借著春天ê 風勢，然後放hō͘ 伊輕鬆仔飛，像『滑翔機』『三角翼』按呢慢慢á chhu--落去，連鞭就到半線地頭。八卦山脈ê 地形位置掠hō͘ 好，掠hō͘ 準，hia有一仙大佛為記，m̄-thang bē 記得。

A-éng ！你做頭前趕去八卦山頂探- -一下，看有啥物動靜無？是m̄是有鳥仔踏，抑是天羅地網，趕緊轉來報告。」

「Êng --à 叔公！我知影，阮隨時就來去！」 負責探路顧安全ê A-éng 隨時chhōa 五六個兄弟，向北一直衝，負責ê 精神hō͘ 總領隊A-êng--ā 感覺真放心。

無一tah 久仔，探路先鋒A-éng in 已經斡倒轉來：「報告Êng --à 叔公！天氣chiâⁿ好，風chiâⁿ順，八卦山頂好光景，今仔日koh是禮拜日，有足濟人來tī 大佛邊附近leh 散步chhit-thô 看景緻，逐家lóng笑微微，歡歡喜喜，無啥物thang 掛慮，而且樹林內無看著鳥仔踏kap 鳥網仔，做咱放心kā 紮營無問題。報告完畢！」

「猶有其他koh樣ê 狀況無？」

「有人ê 所在真鬧熱，無人ê 樹林內kan-nā 有一寡鳥隻tī hia chhi-chhi chhū-chhū，唱歌la̍h 曲、phōng-chhiak 跳舞，快樂ê 心情比人無khah輸。」 想bē 到A-éng 觀察chiah入心chiah 詳細。

「各位房長，各位兄弟：ta̍k-ke注意聽，紮營ê 營地八卦山tih-beh 到，大佛tī 頭前hia有看著-- ho͘hⁿ,各房隊長隊伍小整理一下，chhōe 較iap-thiap ê 樹林內紮營，m̄-thang óa 車路邊，車路邊人濟、車濟chiâⁿ危險，而且傷chhap-cha̍p 傷鬧熱會hō͘ gín-á驚- -著，按呢知影--ho͘hⁿ?準備紮營」

一路飛來千外里，有夠thiám,Êng --ā 想beh 小歇睏一下，無，hia ê 猴gín-á連鞭又koh吵beh 聽講古，就無thang 歇喘--lò͘。

「喂！慢且是- - leh lah ！危險--ò͘ ！各位隊長，趕緊叫逐家koh飛kôan ，m̄-thang 落基地，有聽矣無？危險啦…」開路先鋒A-éng hit 五六個兄弟緊張kah chhìn汗一直流，喝kah giōng-beh sau 聲：「Êng --à 叔公！khah緊khit 來！你看he 體育場東旁，hia ê 人群是leh 創啥？ i-i o-o,喊喊喝喝，亦有chhāi 旗仔，亦有搭布篷仔，有人提望遠鏡，有人kí-kí tu̍h-tu̍h，每粒頭殼lóng khiàn-thian khiàn-thian 向ùi 咱chia來，大概無好空ê 款--ō͘ ，看破趕緊斡方向，徙ùi 別位--來去！」

「張持(細膩)無蝕本，lín ê 顧慮chiâⁿ著，m̄-kú taⁿ臨時臨iāu beh 徙去toeh?...小等一下，緊事khoaⁿ 辦，mài 急mài 緊張，hō͘ 我斟酌看詳細，chiah 做決定。」

「hò͘!」

Êng --ā 有影是老經驗，總領隊就是總領隊，實在無簡單，看伊老神在在，飛tiàm 半空中，thián 開伊利劍劍ê 鷹仔目，巡視著八卦山頂每一跡，尤其是人濟ê 所在，伊特別注意，特別注神tī人ê 穿插kap 面腔目神，看in 逐家穿kah súi-tang-tang ，m̄ 是「休閒服」，就是運動衫褲，面容像春天ê 花蕾，歡頭喜面，不時都看對有鷹仔ê 所在，嘴笑目笑，比比指指(kí-kí tu̍h-tu̍h)；ah有--ā ！『鷹揚八卦』 ê 橫批隨風 phia̍t來phia̍t去，ah he是leh迎接阮來到chit 啦！

是leh 迎接阮，無m̄ 著！著！iáu有幾個仔熟似面--ē ，tio̍h！he就是愛阮鳥仔族ê 『鳥盟』 人士，ah!嘛有外國人-- neh ，lóng是leh 迎接阮！lóng是leh 歡迎阮！莫怪chiah-ni̍h 鬧熱，人chiah-ni̍h 濟，比舊年有khah濟無khah少。

Êng --ā kui-ê心肝頭開了了，心情做一個輕鬆khit 來，taⁿ 免驚，kap 舊年共一樣，有驚無危險：「Éng --à ！趕緊廣播，請逐家免著驚，放心仔安營，he是leh 歡迎咱-- è ，做您免驚，bē kā 咱害啦！in chiah-nṳ̍h 大tīn人集合tī 遮，就是等beh 看咱ê 風釆，beh 欣賞咱ê 技術，飛行ê 美姿。

交代落去，叫逐家慢且是歇睏，表演hō͘ in 看，看咱鷹仔族ê hiau-pai ，無論飛kôan 飛kē ，孤一隻抑是掠相排，thián si̍t 飛向天，抑是iap 尾飛衝落地，se̍h 圓箍仔、車糞斗，若歡喜就做lín ki-ki 吼，唱出歌聲hō͘ in 聽，免客氣免驚惶，隨在lín chông ，隨在lín kek khong,人客看了若爽，就無枉費咱來chit-cho̍ah，來chia kā in chak-chō --lò͘ ！」

自按呢天頂kap 地上做夥hi-hi hoa-hoa,喊喊喝喝，歡喜寫tī 面像，天頂飛kah chhiâng-chhiâng滾，八卦山頂ê 每一人攏笑bún-bún 。Êng --ā 叔公in鷹仔族今仔日上歡喜，台灣人ê 面子今仔日趁了上富裕，『鷹揚八卦』自按呢揚名國外。

「阿公！你今仔日上蓋歡喜--ho͘hⁿ ！」 beh暗仔鷹仔族安營好勢，八卦山頂回復恬靜，chhun hia ê 細隻鷹仔猶leh 無時閒，ki-ki kā-kā 一直吵總領隊Êng --ā叔公tio̍h-ài 講古hō͘ in 聽：「定著有故事beh 講hō͘阮聽-- e ，阿公！阿公！阮beh koh聽你講古啦！…逐家pho̍k-á 聲扑hō͘ 響，阿公beh 講古hō͘ 咱聽--a ！」

pho̍k ！pho̍k ！pho̍k ！pho̍k ！pho̍k-á 聲扑無停…

「好！好！好啦！beh 講就來講：古早古早，咱ê 祖先tòa-tiàm 北方真遠真遠ê 所在，為著beh hō͘ 咱ê 囝孫有khah好ê 生活環境，每年lóng tī 秋天時ùi 咱ê 故鄉起程，飛向南旁beh 去南洋度假，kā lín chia ê 序細飼hō͘ 大隻koh健康，教lín生活ê 才調，hō͘ lín家己會tàng獨立，tī 隔轉年ê 春天，chiah koh chhōa lín 轉去故鄉，kā lín完成婚事，生湠咱ê 族群，保持咱灰面鵟鷹（Butastur indicus)ê 傳統kap 特質。

每一年tī 落南抑是上北ê 路上，咱lóng ài 借台灣chit 塊 Formosa 土地暫時歇睏，習慣上落南歇tī 屏東恒春一帶，chiūⁿ 北就歇tī 咱chit-mái 歇睏ê 八卦山頂。」

「阿公！阮khah愛歇tī 彰化ê 八卦山頂，無愛歇屏東kap 恒春。」

「為啥物？」

「八卦山頂有人歡迎，好sńg 好chhit-thô ，屏東恒春hia chiâⁿ危險，有鳥仔tah ，嘛有網仔會hō͘阮bē tín 動，有夠驚死人--ê neh ！」

「Lín gín-á人m̄ 知影鳥仔tah kap 鳥網仔有外厲害，kan-nā 知影會hō͘ lín bē tín 動，無thang sńg，無thang chhit-thô --niâ ，he是beh ti̍h 咱ê 生命，lín敢知？」

「有影--ò͘ ！ah tī 半線八卦山頂，哪會lóng無鳥仔tah kap 鳥仔網？閣有hiah 濟人來欣賞咱ê 飛行，按呢m̄-chiah 有趣味好chhit-thô 。」

「是時代leh 進步，人類已經有保育ê 觀念，知影保護咱chia歹命鳥，古早時代咱ê 祖先就無chiah-ni̍h 好運，見若飛來到台灣停腳暫歇睏，就去hō͘ in 剿kah giōng-beh 斷種，lín敢知？南路鷹，一萬死九千…唉！」突然間，Êng--ā 叔公煞目箍紅紅，目屎一大滴一大滴流落來…

「阿公！你哪leh 流目屎？」

「想著祖先ê 扑拼，為著生存，為著尊嚴，無惜生命，甘願犧牲認命，唉！攏是人ê 無知，煞hō͘ 咱liân-hôe 歹命。

古早古早，咱ê 祖先就教咱愛隨節氣搬徙，寒天時，咱ê 故鄉寒sih-sih,chiâⁿ歹徛起，m̄-chiah 隨人組隊，趁冬季iáu未到ê 秋天，千里迢迢飛過海洋到南洋度假，順紲教lín技藝，kā lín chhiâⁿ 大漢，chiah koh趁熱--人beh到晉前ê 春天，搬徙轉來去故鄉，hō͘ lín少年-- ê 完婚生湠，che 就是祖先留落來ê 傳統，每一kái 經過Formosa 地界，就會去遇著「南路鷹，一萬死九千」ê 災厄，mā是宿命無奈，好佳哉，chit-mái ê 台灣人已經覺醒，進入文明社會，有野生動物保育ê 觀念，而且經過一寡有心ê 愛鳥人kap 彰化縣政府ê 認真宣傳，得著國際保育界ê 重視，m̄-chiah 有chiah-ni̍h 鬧熱感心ê 活動，向望明年、後年，一直到以後，咱ê 後代囝孫，攏會親像今仔日按呢，平平安安，順順序序來過日，無驚惶，無死傷來經過Formosa  chiah-ni̍h súi ê 地界，免歡迎無要緊， mài kā 咱thâi ，mài kā 咱掠就真感謝。」

「阿公！哪會kā 咱叫做南路鷹--leh ？」

「Che是Formosa 台灣人ê 祖先，看咱逐年都ài 飛向南洋去，m̄-chiah 按呢kā 咱稱呼，無歹意啦！taⁿ chiâⁿ暗-- à，tòe 阿公祈禱了後tio̍h-ài 去睏，bîn-á 早起tio̍h-ài koh上路，無，會peh bē khit 來：感謝天！感謝上帝！賜hō͘ 咱平安，賜hō͘ 咱歡喜，過去-- ê mài koh鬱卒，未來- -ē ，tio̍h-ài 扑拼sè-jī 。感謝台灣人，感謝半線ê 兄姊，lín ê 仁慈，lín ê 疼心，阮會記得，望beh lín mā會tàng平安快樂，免受恐嚇，免受壓霸，khioh 回尊嚴，tio̍h-ài 家己拚！感謝！感謝！感謝！」

【註解】：1. 八卦：eng-iông pat-kòa。 2. thiám 頭：疲勞。 3. chhèng khah kôan ：[衝高一點]。 4. 三角翼：三角翼。 5. 鳥仔踏：chiáu-á-tah。 6. 來去！：laih --去，走，離開。7. 倒轉：o̍at 倒轉，越倒轉（o̍at 倒轉）。 8. 紮營：chat –iâⁿ。9. chhu--落去：[滑下去]。 10. koh 樣：[異樣]。 11. 狀況：chōng-hóng 。 12. 唱歌la̍h 曲：唱歌拉曲。  13. iap-thiap ：[隱密]。 14. chhap-cha̍p ：參雜；混雜。15. 凊汗：chhìn-kōaⁿ，冷汗。 16. sau 聲：破聲；聲音沙啞。17. chhāi 旗仔：[豎旗子]。 18. kí-kí 指指：[比比指指]( kí-kí tu̍h-tu̍h)。19. khiàn-thian khiàn-thian:[看天張望]。 20. 無好空：m̄ 是好代誌。 21. 張持：tiuⁿ-tî，斟酌，小心。 22. khoaⁿ 辦：免緊張，慢慢辦。 23. thián 開：展開。 24. 穿插：[穿著]。25. 面腔目神：面容眼神。 26. phia̍t  ：[晃動]。 27. hiau-pai ：驕傲。 28. thián si̍t ：展翼。29. iap 尾：[縮尾]。 30. chông ：跑，衝。31. kek khong ：[裝傻，賣弄傻相]。 32. chak-chō ：[打攪]。 33. 才調：能力。 34. 上北：chiūⁿ 北。35. beh ti̍h 咱ê 生命：[要我們的命]。 36. 剿：châu ，斬草除根。37. gōing-beh ：[快要]。 38. liân-hôe ：無停ê 歹命，苦ê 輪迴。39. 遇著：gū-tio̍h，拄著。 40. 災厄：chai-eh。 41. 宿命：siok-miā。 42. peh bē khit 來：[爬不起來]。 43.  khioh 回：[拾回]。