歡喜你退休，做伴台文路： Lah-jih_20170717

歡喜你退休，做伴台文路：      Lah-jih_20170717

[刊載tī台文通訊bóng報 2017年8--月 第281期]

親愛校長振裕兄，服務期滿欲離營，繼續台文心頭定，歡迎咱來做伴行。

想起早前初熟似，一九九三台文界，每一月日有一擺，彰化聯誼足和諧。

每擺聚會笑咍咍，攏是探討台語代，羅馬漢字攏稽考，認真討論誠精彩。

論來論去咱才知，台語漢字僫了解，若無羅馬字音在，生活台語寫袂來。

台文通訊讀冊會，福當𤆬頭咱跟綴，仝心有志好交陪，校長鼓勵有夠濟。

校長真心佇教育，閣較重視咱語族，咱人是番講台語，觀念正確無執著。

見解有正好辦事，推捒台語無推辭，認真走傱來認注，計畫詳細認真舞。

台灣羅馬字協會，世界台語文化營，為著咱人台灣話，拍拚精神無塊揣。

二零零一起發磅，金珠縣長蓋注重，羅馬字的功能強，推動教學一直衝。

南北兩區十二班，講師陣容有備辦，聲韻教學無困難，主辦學校鬥助贊。

研習連紲三四冬，來學老師數千人，有人聽佮愣愣愣，有人發心照起工。

每期三十六點鐘，考試通過先品明，講師學員齊無閒，加分證書有認定。

二零零一到零五，育新校長真辛苦，台語師資咧進步，台文讀冊遮起鼓。

北彰南彰遮會齊，讀冊報告有長短，隨人精進隨人的，互相稽考進步濟。

嘛有聘請先覺師，講解文學佮歷史，認捌咱人的文化，較嬴學校咧讀書。

拼音有利漢字捌，講師講解就有力，學員聽寫有理解，學習台語有價值。

會當順利來進行，咱是用心咧經營，校長舖排有夠精，福當骨力受肯定。

講著台語欲推捒，有的校長面結結，振裕分拆有站節，全縣校長鬥出力。

校長毋但華文讚，台文書寫無困難，縣內校長好模範，各校配合真簡單。

校長樂觀閣熱情，論事是非蓋絕頂，涵養豪爽人正經，處理代誌足精明。

後來徙去頂番婆，毋是刁工共你褒，若無校長用心做，就無台文的創造。

聘請台文諸先覺，指導寫作真明確，鋩鋩角角的手路，了解聲韻那音樂。

投稿比賽真交易，學生老師攏來削，聘請教授做評審，鼓勵呵咾兼分拆。

二零零四第一擺，台語文學印出來，驚動全國足囂俳，繼承到今十三屆。

真心交陪真正久，親像兄弟無較輸，敬愛校長振裕兄，台文路途繼續舞。

退休了後較有閒，寫作本是你本等，盡量發揮你才情，創作在地媠光景。

文學本是你底蒂，台語文學無放棄，咱人族語靠台文，族語文學是根本。

歡喜校長你退休，無煩無惱無憂愁，咱來相伴手牽手，拚予台文萬古留。

熟似振裕校長是佇彰化縣台文通訊讀者聯誼會，1993到今2017已經24冬久，斯當時每月日第三禮拜五暗時7點，借用翁金珠立法委員彰化服務處定期聚會，福當老師𤆬頭，後--來才換林義和兄主持，到今猶原繼續聚會。

台灣羅馬字協會2001年8月19日tī台北淡水真理大學成立，楊振裕、陳福當、蕭平治攏是創會會員，而且參與會務擔當理事。

2001擔任育新國小校長hit 4冬，楊校長認真辦理台文讀冊會，培養真濟台語師資，推動全縣台語研習研究台語音韻kap教會羅馬字，2004年創辦第一屆台語文學創作比賽。振裕兄除了擔任校長以外，mā做過彰化縣九年一貫課程教學輔導團(本土語言)研究員、組長/召集人；彰化縣國民中小學臺灣文學讀本審查委員；辦理彰化縣臺語文學創作研習及徵文比賽，擔任評審及編輯，到今已經13屆。

校外空課擔任過 社團法人臺灣羅馬字協會理事、常務理事；教育部「國民中小學閩南語客家語教學支援人員檢核」口試委員(民國91年)；教育部鄉土語言教學訪視評鑑委員(95學年度)。

楊校長振裕兄上值得我學習ê所在，是伊ê涵養、熱情、奉獻、謙卑，付出bē居功，有權bē佔權，處處得人和得幫贊，彰化縣辦理台語研習推sak台語台語文，會得chiah-nī順利進行，振裕兄ê角色是it-tó͘-chán。