2016年5月2日 星期一

看相片回想人生_1965/10→1968/10_三冬兵役(四)空軍基地病院:

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1965/10→1968/10_三冬兵役(四)空軍基地病院:

tu-tu tshiàn-tshiàng、tu-tu tshiàn-tshiàng,khi-khi-khok-khok、khi-khi-khok-khok向北行,來到桃園車頭,有兵仔車來載,載我kap邱勝夫佇大坵園(Toā-khu-hn̂g)(桃園縣大園)埔心一間病院落車,原來是分配到空軍病院做衛生兵。
病院新tshak-tshak,宿舍to̍h-tī邊--a,充員兵tuà-tī 14頂個人眠床大房間,另外一間大房間tuà老胡仔士官,上士士官長軍官tuà 4人房,洗浴間便所現代化,比厝--裡四是濟--lò͘。第一暝一醒到3-4點仔,一陣一陣比o͘-tó͘-bái試車聲音閣較恐怖ê phuà-lè(破礪)聲,吵kah bē睏--得,原來是機場噴射機試車ê聲音,病院to̍h-tī機場外。
老胡仔士官大部份tsiâⁿ好鬥陣,有一工有人嫌王華章睏眠會kô͘ⁿ,床位to̍h讓我睏,因為充員兵真濟hìng跋筊,m̄-tsiah tshân-tshân般--過去,hô͘ⁿ眠聲聽幾工後to̍h慣勢,自按呢kap老胡仔tuà仝房,in知影我是老師,特別尊重,時常互相開講。
▲落部隊隨升級下士士官,報到需要褪帽半身寫真,相館技術頇慢,iân-tâu-á-sàng翕tsiâⁿ戇阿西,有夠bái-tsâi。
▲基地病院是平階起,曠闊清氣相,設備現代化。
























▲空軍士官軍服,寒--人是毛質,熱--人是kha-khih-lóng。


▲經過「醫務士官訓練班」1禮拜48點鐘ê上課了後,正式tsiâⁿ做90230助理醫務士,分派去藥局做藥劑生,上班穿白色醫務衫,罕得穿kui軀軍服,因為病院位置tī機場外,出入m̄免證件,上班5工半,門診一早起,下晡整理藥局待命,空課實在輕鬆,koh ē-tàng學醫藥智識。
藥局司藥官姓周,硬直、負責、照顧部屬,司藥曾烈忠、張國香kap羅國勝、蕭平治充員兵,猶有一位摒掃老胡仔彭宗雲,tsia to̍h是2年10-kó͘月生活中心,分工合作無khîng-hun。司藥曾烈忠、張國香ê專業kap敬業精神,是我學習ê導師,無論認bat藥物、敆藥、調劑、應付患者ê態度,攏得著真貼心幫贊,ē使得講疼我ná小弟。
3冬藥局經驗,認bat不止仔多元,藥方真少成藥,多數是單味,需要醫官處方箋調劑,經過天秤秤重tsiah分pheⁿ包藥,規矩照步來,認bat bē少特效處方箋,甚至有熟似官長貧憚揣醫官開藥,to̍h直接揣我敆藥。私底下mā bat拜托醫官開處方箋提藥、注射藥水轉去厝--裡,kā大嫂注營養射,感冒、落屎藥包囥厝--裡分厝邊隔壁服用,藥效真tsán,半年ê經驗kài-sîng 變成密醫。
藥ná包藥理ná研究拉丁字ná學習,報名藥劑生國家考試,想講退伍後ē-tàng開一間西藥房,趁錢較濟。無考無了解,he是非常困難ê考試,連醫官去考都仝款失敗,to̍h無koh siàu想bueh趁大錢,仝款是藥ná包藥理ná研究,了解愈濟愈m̄敢提藥hông食,家己需要家己敢家己敆藥來食,若是別人,歹勢,有處方箋tsiah照處方箋提藥,自按呢開西藥房ê夢想m̄敢koh望。
▲1965年10月6日入伍,1965年12月28日提著助理醫務士畢業證書,開始藥房調劑、敆藥、包藥包到升中士二級退伍。


沒有留言:

張貼留言