看相片回想人生_19690213_結婚彼一工(一)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_19690213_結婚彼一工(一)：

▲一台えんじん 三輪貨車，載崁頂庄 集興軒 絃管八音，車頂備辦娶親熟牲醴、豬肉、金炮燭kap tàu十二項禮品，另外三台計程車載新郎、伴娶kap媒人，重要六禮先交代媒人發落，竹掃、米篩縛tiàm新娘車做頭前，bueh做姑丈ê姊夫連炮仔一下放，絃管隨時 士上 合乙 ／士-／合士 合工 ／ㄨ-／六工 ㄨ／ㄨ六 工六／ㄨ-／上工 ㄨ上／合士合 ／工六／ㄨ六 工ㄨ ／上乙／士合 工合 ／士乙ㄨ ／士-／ (61 57 / 6- / 56 53 /2- /53 2 /25 35 /2- /13 21 /5 65 / 3 5 /25 32 / 1 7 / 65 35 /6 72 /6- / )出發bueh去寶斗(Pó-táu)(彰化縣北斗)娶新娘。

▲娶新娘六禮非常重要，雖罔地頭無仝泉漳風俗有精差，總--是互相尊重隨人備辦無khi-khiau，阮是紅包包六个，內面囥銀票，外面寫：開門禮、點燭禮、舅仔禮、梳頭禮、婚書禮、總舖禮。六禮有到，to̍h-bē失人禮，to̍h ē使得大大方方kā新娘娶入門。
▲炮仔聲pin-pin-piàng-piàng響來到新娘in-tau門口埕，有人請出新郎間仔坐，聽候搬嫁妝柴頭木橛，同事阿彥顧翕相，烏白フィルム底片，1蜷36張，翕有tsiâu--起來to̍h有108張記念相，請食紅圓了後，新娘嫁妝tshuân好勢，新郎牽新娘kap爸母相辭隨時坐入kiō-tshia(轎車)bueh起行，伴嫁2位小姐是田中人(Tshân-tiong-lâng)，因為長期tī表兄西裝店做師傅，má-tsih朋友lóng是厝邊隔壁，

▲Hái-kat-á tsa-hng tsiah吹風，烏phú色港料西裝配白色ワイシャツ、紅領帶，連家己mā感覺phiat-sàng一个，翕tsit張相準備bueh娶某。

▲來到新娘兜，厝間前kap媒人公陳炳夷老師翕相。

▲烏枋杙仔kap西裝師傅結姻緣：

娶著裁縫某，穿hō͘媠媠配菜脯；

嫁著老輸翁，薪水少少mā輕鬆。

新郎打扮tsiâⁿ phiau-phiat，ワイシャツ[白襯衫]結ネクタイ[領帶]giap金色ne-khú-tái-pín，カフス[袖口] liú金色カフスボタン[袖釦]。外衫tha̍hせびろ，西裝袋仔seh白色ハンカチ(手巾仔)，胸前結塑膠大紅花，手lom白色手套，跤穿烏皮鞋。

Tsit軀せびろ是新娘親手做，港貨布料連工錢，斯當時市價2000 gua̋外，是我散教員兩kó͘月月給。

▲無倩化妝師，新娘家己畫妝，伴嫁小姐幫忙新娘穿sù-tshuàn，打扮súi-tang-tang嫁好翁。

▲拜別爸母牽出公媽廳，爸母m̄甘，囡仔看鬧熱。

▲娶著媠某心情輕鬆微微笑，新娘拜別爸母一時心情沈重。

▲炮仔聲pin-pin-piàng-piàng「新娘娶到厝，蕭--家年年富。」媒人提鉛錢hō͘主人家摸「人到緣to̍h到」。

好命人提米篩遮新娘「米篩提懸懸，生囝中狀元。」

▲囡仔大細相爭bueh看新娘，鬧熱滾滾。