2016年5月6日 星期五

看相片回想人生_1965/10→1968/10_三冬兵役(六):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1965/10→1968/10_三冬兵役(六):
▲既然是病院,當然注重門診kap病房,醫官、醫務士、護理士攏是專業,其他行政部門lóng是為醫療目標服務,所以藥局ê司藥官、士、兵攏tsiâⁿ和諧團結相照顧,無分胡仔蕃薯。
拄來病院是tuà大間房,藥房士官曾烈忠、張國香kap郭守章tuà細間房,(郭守章因為身體無好無leh上班)。大約半冬後,曾烈忠借調美軍單位,床位隨有行政軍官bueh紹介新來ê上士佔位,曾烈忠bueh搬出房間前一工偷偷kā我講,明仔載透早ē記得般入去tuà,先佔先ê,自按呢阮藥局ê醫務士tuà仝間,加班、相替手加真方便,尤其是我bueh請假,隨時講--一聲,to̍h有人代班。
▲飯廳kap伙食委員:
飯廳兼娛樂場所,kap宿舍連做伙,有買物,有撞球桌,有電視,有家庭ê官兵,早暗頓罕得tī tsia食,伙食算是phang-phài,早頓有泔糜仔有山東大饅頭,逐家閣較愛食火頭軍家己做ê大麵tshiau豬油,tsham一寡蒜仔青kah鹽花仔抑是豆油,1大碗公一時仔kiat了了。
Hông推選做伙食委員hit kó͘月,有夠用心,透早3-4點陪採買士官到桃園 市場買菜,了解市面菜蔬狀況、價數,聽講採買攏會歪哥,咱了解情形下,留一寡油湯hō͘--伊,tsiah-koh交代一定愛比頂個月較讚,hō͘人o-ló tsiah ē使得,tsit步實在有效,閣來to̍h m̄免逐工ah車陪買。
菜色mā加減tàu出主意,菜脯卵、hún-tsn̄g(粉臟、粉腸)從來m̄-bat有ê料理,tsit kó͘月出現2-3擺,逐家o-ló kah觸舌。
看電視tsiâⁿ做暗時ê娛樂,金燕、楊小萍、憶如⋯是斯當時ê紅歌星,司藥官周大洪bat請我去桃園歌廳聽楊小萍唱歌,記智tsiâⁿ深。
第x戇撞球相碰,bóng耍--一下to̍h好,m̄敢沈迷。暗頓後,時常近位仔散步。
▲自細漢to̍h真顧家,雖罔大人大種--à,離開厝--裡若超過一kó͘月to̍h-ē想bueh轉--去,雖罔爸母已經無tī--leh,仝款3-4禮拜to̍h-ē轉去一擺,庄--裏行行看看--leh,tiàm厝內食2-3頓阿嫂煮ê羹頓,有時揣一寡囡仔伴、同事、親情講tsē話,tsiah-ē滿心歡喜koh轉來病院。
來來去去全所費,下士一月日300幾箍,無夠開銷,轉去厝--裡只好kā阿嫂開喙,有錢隨提huā,無錢趕緊kā人借,to̍h是bē-hō͘細叔失望,大嫂二嫂ê疼惜無teh比,Lah-jih顧家重感情是有原因--e。
▲斯當時大兄、四兄四嫂tī多林(To-lô-ian/To-lîm/To-nâ)做集材工,已經足久無見面,特別請假來tsia隔兩暝。

▲假日去烏來tshit-thô,簡阿亮、高金生、蕭平治、周植民。
▲講著高金生又閣一段故事:
有一工新來一个落部隊ê莊正國,伊是西裝師傅,分配tī洗衫部,除了洗衫(病房衣服)koh兼leh做衫褲,看伊功夫真tsán,想講tsâu-á孫仔蕭素珍ta̋ⁿ leh學裁縫,to̍h tshuā伊來kap正國師學2禮拜,加減khioh一寡功夫鋩角。後--來bat招高金生、莊正國幾个朋友來崁頂庄看平安戲食tsheⁿ-tshau,自按呢查某孫仔蕭素珍to̍h kah高金生跋落愛河洗浴,tsiâⁿ做恩愛夫妻。





▲演習後寒天穿軍服翕相。


▲Tsit台有十字ê衛生兵卡車,載阮四界去義診,上遠去到角板山(Kak-pán-suaⁿ),mā bat載阮去竹圍仔海水浴場泅水。

▲Kah楊隆財翕相,楊隆財是溪湖人。

▲3冬兵役浪費真濟青春,mā ài怪家己bē-hiáu掌握機會,加學一寡醫學智識,拚一个藥劑師抑是藥劑生,thang tāi-sù-ki開藥局抑是藥房趁較濟銀兩,改善家庭散赤ê困苦。
▲1968年10月5日提著tsit張退伍令,專長是90250中士三級醫務士,其實退伍前幾工已經晉級中士一級,一个充員兵ē-tàng提著中士一級,表示斯當時我是jua̋-nī忠黨愛國。

▲退伍後有一kó͘月公假,11月初6重新轉來家鄉三潭國校上班,重新人生ê一段里程。

沒有留言:

張貼留言