看相片回想人生_1965/10→1968/10_三冬兵役(五)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1965/10→1968/10_三冬兵役(五)：
▲倒爿士官長已經bē記得伊ê名姓，因為伊有家庭，每日上下班。李明仁tī航醫室，編制上我mā屬航醫室，借調醫務室藥局上班，每年考績猶原航醫室蕭主任負責，可能是親堂關係，蕭主任對我ê評分真懸。廖湘玲是僱員，tuà眷村，kap在地人較少互動，bē-hiáu講台語，曾烈忠bat家婆bueh紹介，結局是in爸母反對嫁hō͘台灣囡仔。
可能是我ê人緣bē-bái閣有固定頭路，幾個朋友一直bueh紹介查某囝仔hō͘我熟似，因為婚頭未浮，姻緣未到。

▲2年10-kó͘月無寒暑假ê日子，對時間觀念時常有淡薄仔gông-ngia̍h，有新來有退伍，熟似bē少朋友，有大學預備軍官，有中學，有小學，鬥陣生活，罕得有冤家掰會抑是關禁閉ê代誌，各人認份，官長mā khah-bē用軍紀壓制，算是kài自由自在。

林治郎tī病房，kap我交陪bē-bái，穿便服koh結ne-khú-tái，已經bē記得是啥乜狀況翕tsit張相。

▲頭一批熟似預官kap李明仁，李明仁邊--a瘦抽瘦抽hit个是陳維昭醫師，逐家攏真好鬥陣。

▲預官退伍有較特別，翕一張記念相，第一排倒手平是李德彥，周司藥官退休後是伊接司藥官職位，藥材清單統計我ē kā tàu-saⁿ-kāng。第三排正手平矮矮hit个是彭宗雲，清潔藥房時，peh懸peh低我ē kā tàu-saⁿ-kāng。

後擺中央躼躼hit个是張國香，耳孔tsiâⁿ重，充員兵攏叫伊『哥哥』，性地tsiâⁿ好，調劑、配藥kài頂真，伊ê包藥包技術kài術頂，為著義診需要事先先款2-3百包藥包，阮tī調劑櫃頂各人排50份藥粉，一聲開始，比賽雙人較緊手，無一tah久『哥哥』已經完成，我--leh，tsiah包無30包。

一張四方形白紙，中央囥藥粉，需要雙手先角對角對拗，tsiah kā雙爿正拗倒拗好勢，然後tsiah kā頂面部份拗2拗seh入縫內，我是雙手並用，『哥哥』mā是雙手並用，m̄-koh人伊是倒手藥紙提--起來to̍h連續動作拗拗--leh，無3秒間正手大垺翁隨時kā最後動作seh入縫內。

▲後壁排：
倒爿第一个是童學財士官長，人tsiâⁿ好，bat kah廖湘玲幾個同志來崁頂庄看平安戲食拜拜。
中央hit个是王靖夫醫師，時常招我食宵夜食豬腳麵，多數hō͘伊納錢。為著伊ê查某朋友bueh kah伊tshé，叫我陪伊去宜蘭談判，輔導官特別準假叫我保護伊。
正爿第二个是林榮一醫師，醫術專業，人人好，bē大色，bat用電殺刀kā我手術雞仔目。