8--月彰化痟媽祖

8月15是大節，是福德正神土地公的成道日，除了做紅龜粿刣精牲仔拜神明，暗時觀月會以外，做田人為著種作有較好的收成，會共土地公伯--à 的神尊用神轎請出來踅街，ah！毋是，是共扛出來田洋仔巡視，保佑農作物ē-tàng豐收，而且家家戶戶會佇田裡祀土地公枴，送一屑仔所費佮1支枴仔予土地公伯--à，較工夫的庄頭會佇廟埕做戲祝賀。
時代leh變，觀月會suah變做烘肉節，放煙火家己歡喜，tshun--ê無啥人leh重視。
M̄-koh今年彰化縣kài鬧熱，uì 8月17～8月28 有「2009年彰化縣媽祖遶境嘉年華活動」，有影足鬧熱，陣頭tsiâu出動，煙火pìn-piàng叫，寶斗嘛有做歌仔戲，是欲做予媽祖婆--à看--ê，土地公伯--à只好徛tiàm邊--a恬恬欣賞。俗語講「3--月痟媽祖」，tsit-má suah 「8--月彰化痟媽祖」，予人感覺時代敢有影變kah tsiah-ní 怪奇？有人講「彼根本tiō是政治操作--mà！」2009/10/17蕭平治