Harmonica kap Violin

8月15彼暗，規家口仔團圓鬧熱滾滾，店口面烘肉烘煙腸，厝內底sńg Wii 的電視tshit-thô物，突然間一時心適興，揣出真久無leh歕的口琴，歕予逐家欣賞，順紲講斯當時愛欲一支口琴的故事予怹聽：
1956年讀彰化中學初中二年的時，佇庄內暗時定定聽人歕口琴的聲，心內感覺真趣味真欣羡，有一工佇學校看著一個同學leh歕口琴，著共問一支偌濟錢、啥物牌--ê？tsiō按呢日也想、暝也想，siàu想欲愛一支Harmonica。
經過個外月的戇想，tiō決定寫批共佇阿里山做集材工仔的四兄討錢，講我偌愛偌愛一支口琴，你著寄錢予我買，閣特別交帶著寄去學校，毋通予阿爸佮大兄知。四兄足惜我一個減伊9歲的小弟，經過2禮拜學校通知我去辦公室領掛號批，領掛號批需要tǹg印仔，姑不將編一個理由騙老爸予我5箍去刻一粒印仔。
領著50箍tiō去冊局買彼支暝日思念的口琴，毋知欲按怎歕，嘛無人thang好問，好佳哉有說明書，1、3、5 歕出--去，2、4、6、7 suh入來，無偌久tiō已經歕有花字。祕密是掩崁bē-tiâu--ê，會曉歕tiō愛展，煞去予阿爸聽著，「哪有hit支品仔？」「買--ê lah！」「你哪有錢？」「ah tō共四兄討--ê lah！」「tō是按呢--òo，才會kâ討錢去刻印仔--òo！你這個囡仔…」
好佳哉，阿爸嘛興挨弦仔，對我sńg樂器並無反對，閣無問偌濟錢，若無，一支口琴開45箍，m̄ hông罵--死。斯當時田中到彰化的學生通學月票是21箍6，tsit 21箍6差不多逐個月攏著先共人借，彼陣阿爸會當予我的四秀仔錢，一禮拜無超過2箍銀。
1959年入去讀台中師範，真正大開眼界，鋼琴、小提琴、風琴、軍樂隊的樂器，逐項攏好聽，逐項攏想欲學，學鋼琴、小提琴需要開錢佮老師學，閣無參加樂隊，所以kan-nā會當學彈風琴。課外時間有機會聽著同學練習鋼琴佮小提琴的琴聲，時常聽kah戇神戇神，尤其是Violin的聲音，hiah-nī幼膩、顫音hiah-nī迷人，若欲有一支thang學毋知欲偌好--leh，khong-khám的心思，「睏罔睏，千萬m̄-thang陷眠」。
學校生活是十花五色--ê，著學的物件真濟，趣味閣輕鬆，學giú Violin的慾望早著放līng，一直到三年級頂學期才閣重新著火，閣一擺學khong-am做khong-khám的代誌，寫批kā四兄討錢。Violin已經有--ā，毋過無錢佮老師學，tiō「無師自通」罔khioh同學學來的步數，無老師指導有較輸，tn̄g-tio̍h困難tiō放伊suah，當然嘛學袂ka-nn̂g。出業做老師有薪水thang領，tiō決心去台中拜師學藝，結果才學一個月--niâ，tiō放棄無閣再積極繼續。一年前賣hit支琴450箍，tsit-má去台中學琴學費是一個月100箍，1962年做老師的月俸是750箍，ta̋nn踏入社會做工課，嘛需要hak一寡食頭路人的裝備，買兩軀會看口得身穿800箍、一台鐵馬1300箍、一粒手錶仔400箍、一隻事務桌仔400箍、一軀西裝1300箍…li-li-khok-khok一大堆，uì學生囡仔變成社會人，有想欲共厝內湊相添，實在心有餘力不足。2009/10/10蕭平治