走揣土地公枴

8月15 ta̋nn過，天光日欲暗仔時，騎鐵馬se̍h田洋仔路，看見稻仔已經出穗，有的閣頭鉤鉤，得欲熟(sik)--á，毋知做田人有送枴仔予土地公gia̍h--bô？
鐵馬ná踏ná斟酌，看田裡有祀土地公枴--bô？鐵馬騎過1坵閣1 坵，thái會攏無人祀？敢講tsit-má的做田人毋知影感恩？抑是怹無愛閣迷信？騎過隔壁湖，歡喜一下，總是tshuē-tio̍h有人祀土地公枴--à，趕緊鐵馬停--落來，共翕相機提--出來，準備翕一張仔相，啥知目睭tsi̍t-ê tsîn，tang-sî-á是警告人的空農藥罐仔。莫怪--òo，人有影現實，有農藥的毒殺蟲豸，總是比土地公伯--à較靈聖，哪著閣拜託土地公伯--à tàu保庇--neh。
鐵馬騎過1湖閣1湖，日頭已經欲落海，忽然間，田頭哪有1欉菅蓁仔，頂面閣縛3支香1褶土地公金，彼m̄是土地公枴m̄是啥？好佳哉，tsia-ê做田人猶原猶有良心，知影對土地的感恩，土地公伯--à猶有leh巡咱的田園，趕緊翕相做紀念。
福德正神土地公，是大多數台灣人的守護神，m̄-nā田頭田尾土地公保庇做田人的穡頭，嘛保庇生理人、做工人的趁食平安順序，閣khah是咱祖先的好朋友。8月15祀土地公枴的民俗，佇科技發達的今仔日，有人共看做是1種迷信，相信科技比求神問佛祖閣較有效的人愈來愈濟，這應該是好現象，m̄-koh人無閣相信神的存在，無閣敬天愛大自然，kan-nā相信科學的萬能，有一工萬能的科學若代替萬能的神，hit-ê時陣的人是欲按怎佮大自然取得平衡，快樂過日--leh？2009/10/16蕭平治