崁頂庄黃麻布 Lah-jih_20140111

崁頂庄黃麻布    Lah-jih_20140111

記智tī 1970年代進前，阮崁頂庄大約90%姓蕭，m̄是姓蕭mā kap姓蕭--e有chhin-chiâⁿ（親情）關係，m̄-chiah 規庄lóng是兄弟叔孫，互相公、婆、伯、叔、姆、嬸、姑、嫂、兄、弟、舅、姨稱呼，蕭--姓奮公祖廟tō tī庄內，土地公廟、將爺廟是信仰中心。庄民大部份是作田人，水田tō tī庄外hit箍圍仔，駛田、掖秧、放田水，挲草、割稻、曝粟，大部份是放伴做互相幫忙tàu跤手，嫁娶、陪綴、hēng餅、請人客，為著節約mài siuⁿ過負擔，傳統有小可分角頭，若是庄內拜神、祭祖、做平安戲，tō歸庄做伙同齊來，崁頂人ê團結到今猶是真好名聲。阮chia水田塗肉肥、鬆，koh im he濁水溪水，1冬ē-tàng 3收成，2冬粟仔，1冬雜錯種，蕃薯、豆類、番麥、油芥菜，青皮仔（豆）上捷種，上特別tō是差不多每口灶lóng-ē種1坵黃麻。

黃麻阮講做iûⁿ-môa，1欉長長躼躼tōa-pû-ong（大垺翁）大，好種好收成，種來peh iûⁿ-môa絲，keⁿ黃麻布賣錢趁所費，栽培囡仔讀冊，是每口灶重要ê副業。Hit當時崁頂庄ê門口埕kap厝內房間tō是工場，查某人lóng是工人兼師傅，keⁿ布師傅，查埔人、讀冊囡仔mā-ē tàu跤手tàu-saⁿ-kāng。外位人攏知影，崁頂庄是黃麻布專門，keⁿ黃麻布是崁頂查某人ê專業。

keⁿ黃麻布ê織布機阮講hiⁿ-kui。

1955前後囡仔時，除了讀冊、寫宿題以外tō是chhit-thô、耍，因為是屘仔囝，罕得做粗重空課，有時hō͘阿爸kin去田裡薅草、趕雞仔鳥仔，其他上捷ê穡頭tō是幫大嫂、二嫂tàu𤆬囡仔，tàu撚黃麻，纏黃麻絲。

相片是二嫂leh keⁿ黃麻布，「iⁿ-oaiⁿ iⁿ-oaiⁿ」正跤踏落倒跤起，正手cho̍k梭 倒手梳，日也keⁿ暝也keⁿ，有時三更共半暝猶原「iⁿ-oaiⁿ iⁿ-oaiⁿ」無停睏，一聲iⁿ-oaiⁿ 1個向望，1-pha微微番仔油燈光影伴一兩更，有時伴到三更kāng半暝。