1996.3.23. 寫予呂興昌教授ê批

1996.3.23.  寫予呂興昌教授ê批

呂教授：看批平安!

    咱人舊年冬尾，賴和文教基金會，tī南投傑瑞山莊，舉辦台語文學營，tī上課中，聽tio̍h教授精彩，有台灣味，台灣情ê台灣文學紹介，予學生真感動。

    長久以來，咱chit-iân ê台灣人，攏是受著大中國ê華語教育，幾十年來，雖然日常講--ê是咱ê Hō-ló話，m̄-kuh tī學校內就無仝款--lò͘！喙講--ê，是北京語，手寫--ê，是華文。日常生活中，若mài講mài寫，頭殼猶無代誌，若是著講著寫ê時陣，ah規粒頭殼，就ná親像翻譯ê機器，liâm-mi tio̍h中翻台，liam-mi tio̍h台翻中，愚戇ê我，真正予伊舞kah霧sà-sà，一粒頭兩粒大，用講--ê，猶無要緊，講m̄著去，猶ē-tàng閣改正，若是用寫--ê，ah he就慘--à！詞彙ê翻譯是一項ê困難，文字ê應用，才是一層大工事，我寫會出來--ê，你看無，就是講你看有，（愛講ioh有才著）對漢文、古文有深入研究ê學者，嘛bē同意，真正是苦憐代誌一件。所以時常kah朋友講，m̄是作者ê文(字)gâu寫，應該講是你ê頭腦好，gâu翻譯才著，呂教授，你講，學生ê看法著m̄著！

    學生是台中師範上尾屆ê學生，對台語文(包含Hō-ló語聲韻)ê瞭解kah研究，才四、五冬niā-niā，是不知不覺，進入去後知後覺ê半老老人，對Hō-ló話ê研究有khah敏感。

    對一位tī華文文學，已經有相當成就ê學者，ē-tàng為著咱家己台灣ê本土文學釘根工課，用歡喜ê心，投入koh-khah濟ê精神氣力，來行chit條有理想、有向望ê路，m̄-nā值得學生ê尊敬，嘛值得所有ê台灣人ê o-ló！

    Tī彰化台文通訊讀者聯誼會，三月份ê集會中，知影呂教授tī今年八月，被邀請參加第二屆北美台灣語文夏令營。學生想講教授講ê話，khah有人聽，khah有影響力，所以學生將教授你ê講義，特別應用鄭良偉教授ê TW.301電腦軟體，翻拍為漢羅lām用ê台文作品，提供教授做參考，並請教授指教批評。

    Koh再一擺表示對教授ê敬愛，你是台灣文學ê開拓者，台灣文學ê向望，學生ê導師！

                            學生蕭平治敬上  TW.301電腦拍字tī田中厝內1996.3.23.