杜蚓仔歌： Lah-jih改寫20171108

杜蚓仔歌：   Lah-jih改寫20171108

為啥物會叫歌？為啥物bē叫歌？

杜蚓仔生做身來長，腰來軟，伊chiah會叫歌。

田嬰敢無身來長，腰來軟，伊都bē叫歌。

曷使田嬰六支跤，四kâi翅，半天飛，樹頂歇，伊chiah bē叫歌。

蟬，敢無六支跤，四kâi翅，半天飛，樹頂歇，伊都會叫歌。

曷使蟬，下跤一kâi膜，tèⁿ力歕，出力唱，伊chiah會叫歌。

躼蟹仔敢無下跤一kâi膜，tèⁿ力歕，出力phū，伊都bē叫歌。

曷使躼蟹仔塗--裡鑽，水--裡chhng，伊chiah bē叫歌。

水蛙敢無塗--裡鑽，水--裡chhng，人伊都會叫歌。

曷使水蛙喙闊闊，堵大大，o̍p o̍p e̍p e̍p，e̍p e̍p o̍p o̍p，伊chiah會叫歌。

醃缸敢無喙闊闊，堵大大，伊都bē叫歌。

曷使醃缸塗來捏，火來燒，燒kah𠕇硞硞，伊chiah bē叫歌。

塗觱仔仝款塗來捏，火來燒，燒kah𠕇硞硞，人伊都會叫歌。

曷使塗觱仔兩空相閬迵，前空迵後空，伊chiah會叫歌。

火管敢無兩空相閬迵，前空迵後空，伊都bē叫歌。

火管是竹來剉，刀來剁，鋸仔鋸，伊chiah bē叫歌。

洞簫仝款是竹來剉，刀來剁，鋸仔鋸，人伊都會叫歌。

曷使洞簫空濟濟，u liu siāng kong chhē，伊chiah會叫歌。

竹米篩敢無空上濟，毋捌u liu siāng kong chhē，伊都bē叫歌。

曷使米篩hō͘人kah絚絚，縛死死，伊chiah bē叫歌。

竹仔眠床敢無hō͘人kah絚絚，縛死死，人伊都會叫歌。

曷使竹仔眠床睏兩个老翁婆，三更半暝，跤來phōa，手來hôe，tō會iⁿ-iⁿ- oāiⁿ-oāiⁿ siⁿ-siⁿ-soāiⁿ-soāiⁿ，siⁿ-siⁿ-soāiⁿ-soāiⁿ iⁿ-iⁿ- oāiⁿ-oāiⁿ，伊chiah會叫歌。

兩个老翁婆，三更半暝，跤來phōa，手來hôe，iⁿ-iⁿ- oāiⁿ-oāiⁿ siⁿ-siⁿ-soāiⁿ-soāiⁿ，siⁿ-siⁿ-soāiⁿ-soāiⁿ iⁿ-iⁿ- oāiⁿ-oāiⁿ，竹仔眠床伊都會 叫 歌。