第十課 恭喜生日快樂
阿公生日hit 一工，阮一家夥仔攏歡喜kah ，阿爸辦一桌tsheⁿ-tshau 請逐家，有麵線，祝福阿公身體勇健食百二。
食飯後，阿母捧一塊雞卵糕出來，點蠟燭閣beh 唱生日快樂歌，tsit
時我kā 逐家講，咱來唱老師教阮ê 「恭喜生日快樂」歌，真有意思，閣用台語唱，阿公一定聽有，一定聽kah
足歡喜：
恭喜你生日快樂！恭喜你生日歡喜！
恭喜生日快樂歡喜！祝福你笑微微！
阿公生日快樂！阿公生日歡喜！
阿公生日快樂歡喜！祝福你笑微微！
恭喜你生日快樂！恭喜你生日歡喜！
恭喜生日快樂歡喜！祝福你笑微微！
阿媽生日快樂！阿媽生日歡喜！
阿媽生日快樂歡喜！祝福你笑微微！
生日歌唱煞，阿公阿媽笑kah 喙仔li̍h-sai-sai，tsim-mī 講真好聽、真好聽，tsim-mī pûn 蠟燭火，逐家攏扑 pho̍k 仔，大聲恭喜「阿公！生日快樂！」「阿媽！生日歡喜！」
【註解】：
hit 一工：[那一天]
歡喜kah：[高興得很]
tsheⁿ-tshau：[豐盛的餐點]
笑kah 喙仔li̍h-sai-sai：[笑得合不攏嘴]
tsim-mī…tsim-mī …：[邊…邊…]
pûn ：[吹氣]
扑 pho̍k 仔：鼓掌。
第十一課 石頭、鉸刀、紙
下課--à ，阿德kap蕙瑛招阿樂仔beh去運動埕跳索仔。
阿德講：咱來比賽看啥物人較gâu 跳，跳較濟下。
蕙瑛講：好--a，咱先來pūe 輸嬴，pūe 嬴--ê 先跳好--無？
阮三個圍一个圓箍仔，tsim-mī 唸，tsim-mī pūe：
一二三四，驚驚無代誌，一二三四，驚驚無代誌。
阿樂仔pūe 贏代先跳：
一、二、三、四、五、六、七、八、 九、十、十一、十二
索仔khê-tio̍h 腳，換蕙瑛--a 跳，蕙瑛跳六下，閣來換阿德--à
跳，阿德--à 誠gâu 跳，一直跳kah 鐘仔聲tân，阮tsiah kā 索仔收--起來，手牽手，入去教室等老師來上課。
【註解】：
pūe 輸贏：[猜拳定輸贏]
圓箍仔：îⁿ-kho͘-á，[圓圈]
tsim-mī 唸，tsim-mī pūe：[邊唸邊比劃]
代先：tāi-sing ，先。
khê -tio̍h 腳：[絆到腳]
鐘仔聲tân ：鐘聲響。
沒有留言:
張貼留言