龍坑生態保護區冒險記 Lahjih 20231230

 龍坑生態保護區冒險記        Lahjih 20231230

2023年12月24、25兩工南部旅遊thit-thô，重點khǹg tī聖誕節chái-khí 8點，boeh去Khún-teng龍坑生態保護區se̍h chi̍t-chōa園區，欣賞大自然原始生態真面目。

8點準時到ji̍p-chhùi，行10分鐘石頭仔路到管理站，檢查身分證辦理入區手續，隨時分組hō͘導覽chhōa隊開始ná行ná看ná聽紹介說明。

導覽台語自我紹介叫伊A-lêng，有問題做你kā A-lêng問，台語北京語lóng無問題，我叫伊講台語to̍h好，阮是庄腳來--è絕對聽有。

A-lêng台語lián-tńg bē跳針，「Che是林投，果實若有夠黃，內面ê nn̂g ē食--得。」感覺足稀奇，A-lêng竟然ē-hiáu講nn̂g，確定伊是正港台灣人。

「Che是"稜果榕"，咱講tōa-phàⁿ-chhêng，mā講豬母奶舅。」問伊敢有講tōa-phàⁿ-chhiū，A-lêng講有，koh-khah hō͘我kiaⁿ-chi̍t-tiô，腔口竟然hām阮Chhân-tiong-ng sio-kāng。

Ná行ná看ná聽紹介，「Ta̍k-ê chim-chiok看，土腳phòng koân chit lêng siáⁿ-mih路用？」「若是tī公路是阻擋駛車ūn-choán-chhiú駛較慢--leh，tī chia是阻擋雨水khoaⁿ-khoaⁿ-á流，chiah-bē破壞路面，因為chit段路sió-khóa bîn-bîn-á崎，見若落雨水chhoah-lâu路面to̍h-ē流hāi--khì。Che是阮ka-tī想--出來 ê phiat-pō͘。」實在值得phah-pho̍k-á o-ló，有影足用心專業。

「Lín看che樹葉ná-ē chi̍t-khang chi̍t-khang，kui-châng雨傘樹無一葉完整--è，che是lán-chia無phū農藥，是ia̍h-á ê幼蟲食--ē。Lín koh看，nn̄g-pêng邊ê樹仔草仔去hō͘ hit-pái "小犬"風颱sńg-tn̄g kah chit款，除了路徑以外，咱lóng維持原來狀態，無ka整理，che to̍h是生態保護ê原則。」

「Lín看che是siáⁿ-mih植物？che號做白水木（山埔姜、銀毛樹），開花像細蕊花仔菜，白水木hām林投是chia siōng-kài-chē ê植物。」

「請問A-lêng，台語ná-ē chiah-nī gâu講，kap阮ê腔口足sio-kāng。」

「細漢to̍h hām阿媽阿母講台語，當然mā lián-tńg，其實阮老爸sī外省人，tī chia做空軍熟似我a-bú。」

「原來是外省第二代，你m̄-nā認同台灣koh了解台灣語言文化，實在敬佩。」

行來到1.5Km所在，chiàⁿ-pêng是Pa-sū Hái-kiap（巴士海峽），tò-pêng是kui山坪ê林投hām山埔姜，頭前面to̍h是出名ê ló-kó͘-chio̍h台地。

「Ta̍k-ê小等--chi̍t-ē，chia風真透，前面to̍h是ló-kó͘-chio̍h台地，tio̍h peh崎chiūⁿ ló-kó͘-chio̍h山嶺，hia風koh-khah大，是thàu驚人ê落山風，海湧ê水霧ē潑tio̍h身軀，所以tio̍h穿雨幔，bē-tàng giâ雨傘，帽仔tio̍h縛帶戴hō͘ ân，若無ē吹落地，peh到嶺頂千萬tioh sè-jī，徛hō͘在chiah thang徙位，咱se̍h一ê圓箍仔轉來原位，若無boeh se̍h過ê人tiàm-chia等，ta̍k-ê若準備好勢to̍h開始peh。」

M̄是kài koân，peh-chiūⁿ嶺頂lóng是舖枋仔ê棧道，真好行，m̄-koh風足大足thàu，giōng-boeh徛bē在，落山風sngh-sngh叫，koh ná像leh噴雨毛仔，一時間隨人顧ka-tī安全，無koh hōe東hōe西，A-lêng kau-tài oat tò-pêng行，ta̍k-ê行chiâⁿ慢，有人ná像三心兩意，有人行進前koh oat倒轉--來，風實在有夠大，親像leh做風颱，行路phiân--leh phiân--leh，ā-boeh看光景ā-boeh顧身穿，雨幔hō͘風掃kah pia̍k-pia̍k叫，手、面phùn-tio̍h水霧tâm-sip tâm-sip，手提手機仔ná行ná翕相，hīⁿ-ho͘ⁿ-á有聽人講「風真大，m̄-thang過」，m̄-koh猶是有人一直向前行，實在是thài稀奇稀罕，m̄甘放棄，to̍h tòe人行。

Khan--ê tī頭前，有kiáⁿ婿cha-bó͘-kiáⁿ陪伴，to̍h放心顧咱ka-tī，chiàⁿ-pêng是太平洋，有時ē看tio̍h海湧chhiâng足koân，phū出水霧，雨衣、褲腳、手、面、手機lóng是水滴。風猶原sngh-sngh-kiò chi̍t-chūn koh chi̍t-chūn，kham-kham-khia̍t-khia̍t ê ló͘-kó͘-chio̍h，大細粒滿soaⁿ-lêng，ham-ham-khia̍t-khia̍t phòng-phòng-naih-naih，若無舖柴枋棧道，根本to̍h bē行--得，he棧道chiah chiâⁿ bí闊，風koh強，若無sè-jī phiân--lo̍h-khì tiāⁿ-tio̍h chhè-siang，莫怪A-lêng一直交帶tio̍h sè-jī。

Ná行ná翕，soah無khoàiⁿ人影，行到boeh落崎chiah發現A-lêng徛tī我後壁，一直叫我「ûn-á行，tio̍h sè-jī，手ài hōaⁿ欄杆」，落崎幾若khám，chia ê ló-kó͘-chio̍h有làng隙，ē-tàng看見chiàⁿ-pêng海水hē-hē-kiò，注目看，歡喜chi̍t-tiô，he海霧hām吹雪看現現tī ba̍k-chiu前，手機仔開始錄影，風ná搧水霧ná噴，ā-boeh顧手機ā-boeh看奇景ā-boeh hōaⁿ欄杆，kui面ê水滴bô-khà拭，to̍h是kan-nā專注、小心，安全第一，koh行4-5 khám，角度jú清楚jú好看，實在m̄甘放棄，「hō͘ 我koh錄影--一下」，kā邊a A-lêng拜托，手機繼續koh póe，螢幕bak水sió-khóa bē順，有夠緊張，總--是iū-koh錄chiâⁿ分鐘，繼續koh落崎，看jú清楚，看見海灣海湧leh chhiâng，有koân有kē，有大有細，chhiâng he海墘引起水鬚，m̄-nā造成水霧，koh因為he是ló-kó͘-chio̍h海墘，造成ê chúi-pho pìⁿ-chiâⁿ ná茶箍泡，輕báng-báng tī海腳，koh tn̄g-tio̍h今仔日落山風特別大，he水泡bē堪得落山風ê力頭，ùi海面飛過làng隙到台地iāⁿ-iāⁿ飛，kài-sêng leh落雪，kài-sêng leh吹雪，「千算萬算m̄-ta̍t tú-tn̄g」，chit種奇景竟然hō͘咱tn̄g-tio̍h，koh有錄影為記。Liân-sòa翕幾張相片錄kúi-chat影片，sui-bóng緊急sap時間ê操作，有sió-khóa手影，經過裁剪猶原精彩。

落崎了後，已經無海霧，落山風kāng-khoán kā雨幔吹kah pia̍k-pia̍k叫，趕緊kā雨幔褪--落來，行到南北步道交會點，to̍h按原路轉來龍坑入口，坐遊覽車繼續行程。

M̄是食老m̄-siauh-hiauⁿh，實在景緻siuⁿ siâⁿ人，bē堪得引誘soah bē記得ka-tī ê年紀，mā是因為有導覽A-lêng tòe tī身邊，咱chiah敢chiah-nī好膽冒險。

台地棧道

落山風大徛bē在

ló͘-kó͘-chio̍h ham-ham-khia̍t-khia̍t

棧道大約1公尺闊

山頂有海霧 需要穿雨幔

kui遍ê山埔姜

對面to̍h是ló͘-kó͘-chio̍h台地

ló͘-kó͘-chio̍h台地

石頭仔路

林投

山埔姜

擋水ê thô͘-lêng

蟲咬--ê

板根

導覽A-lêng老師

龍坑檢查站

Chháu-khûn Chháu-pû Chháu-in

 Chháu-khún草捆：無經過捲

Chháu-khûn草囷：用機器捲

Chháu-cháng草摠：稻草cháng成1摠1摠

Chháu-in草絪：ē-tàng灶空hiâⁿ火

Kú-chhài-in韭菜絪：糋韭菜條

Chháu-pû草垺：經過師傅疊成ê稻草堆

A-Sian hām A-Siân Lah-jih

A-Sian hām A-Siân              Lah-jih  2023.02.22修正 2002.03. 

Chit-phiàn樹林內，樹仔大欉樹葉真ōm，樹頂鳥隻滿滿是，吼聲響亮鬧熱chhih-chhih ，樹腳真清涼，樹葉仔lak kah 滿四界，土腳兜tòa 1 群 6 支腳ê 蟬仔族，蟬仔族ê 族群lóng真 gâu 修禪，in ê 囡仔自出世落土，to̍h注定bih tiàm土底生活，bih tiàm 土孔內7、8冬，chiah-thang bùn 出來地面看光景、thit-thô、唱歌。

Chit  群6 支腳ê 蟬仔族內面有1 家夥仔，hō͘ in 父母飼tiàm 1 欉大欉樹仔腳，1 日到暗lóng tī洞內生活，tiām-chut-chut ，m̄ 講話，看in ê 生做，實在無sêng in 父母，身軀khiau-ku khiau-ku，穿1 領戰甲ná外星人ê裝甲兵，行路ná龜leh sô，tòng-gōng tòng-gōng ，chi̍t-sut-á to 無像in 父母hiah-nī活跳gâu 飛，koh-khah無像in 老父hiah-nī gâu 唱歌。雖然in bē-hiáu飛koh bē-hiáu講話，m̄-koh in lóng歡歡喜喜過日，mā ē-hiáu用表情、比手畫刀來交陪，交換意見，參詳代誌。生活過kah真平靜，一直到有一工，m̄知án-chóaⁿ？突然間，in逐家lóng想boeh nǹg出去洞口外，in ê 心情感覺chiâⁿ pek-chhek，ná像有siáⁿ-mih pháiⁿ-khang--ê tih-beh 到位？ta̍k-ê心內起恐惶，m̄ 知影boehán-chóaⁿ？

「Ná-ē chiah-nī bē自在？到底siáⁿ-mih-tāi？拜託ta̍k-ê想看māi！想看有siáⁿ-mih好辦法來排解？」 ta̍k-ê tng-leh激破頭殼，想bē 出好主意ê 時陣，有一 隻蟬仔提出意見：

「Lín kám-bat 聽過chi̍t-ē傳說？」

「Siáⁿ-mih傳說？」

「講咱祖先交代落來ê 教示，傳說中講咱蟬仔族ê 囝孫，lóng-ē tī父母kā 咱生--出來了後，經過7、8 冬成長，身體to̍h-ē起變化，提醒咱tih-boeh 轉大人，hit 時陣咱tio̍h-ài注意sè-jī ……oeh！咱幾歲--à haⁿh?」

「7 歲！」

「M̄是，是8 歲！」

「Ah chit-ê 傳說敢有證據？」

「有！聽講khǹg-tiàm 1 ê 祕密ê 所在。」

「應該tio̍h chim-chiok ê 時陣--ā ，逐家chhōe看māi，chhōe 看有遺書a̍h是siáⁿ-mih古早ê 冊a̍h是地圖--bò͘？」

「Ah！有--ā ，tī-chia ，請你看māi--leh ！」有1 隻蟬仔chhiau tio̍h 1 張n̂g-gâm n̂g-gâm ê 字紙，隨時交hō͘提出意見ê hit 隻蟬仔chim-chiok看詳細…

「到底是寫siáⁿ-mih？m̄ tio̍h報告hō͘ ta̍k ê知！」

提出意見ê hit 隻蟬仔，kui-khì將hit 張字紙貼tàm 壁堵hō͘  ta̍k ê看詳細。

各位乖囝：

Ta̍k ê平安！ta̍k ê恭喜！恭喜lín boeh轉大人，ē使得出外phah-piàⁿ，雖然阿爸阿母生lín八兄弟，to̍h來離開lín ê 身邊，m̄-koh goán lóng真思念lín，7、8年來，lín  lóng真乖巧，互相照顧，互相參詳，m̄-bat oan-ke-lô-chè，hō͘  goán感覺chiâⁿ安心chiâⁿ hiau-pai ，chit-mái lín已經大漢，tih-boeh 出去外口phah-piàⁿ，表現lín ê 才能，展現咱蟬仔族ê 歌喉hō͘ 人聽，逐家tio̍h-ài較sè-jī--leh ，tih-boeh 轉大人， tih-boeh出外phah-piàⁿ，心內緊張，心情kiaⁿ-hiâⁿ是難免，總是ta̍k ê tio̍h m̄-thang  chheⁿ-kông，事事項項ta̍uh-ta̍uh-á來，ē記得，tio̍h 1 步1 步sô出洞口，m̄-thang  sio-cheⁿ，千萬tio̍h 記hō͘清楚下面幾項祖先ê 交代：

第一：出洞口ê 時間算hō͘ 準，ùi日頭落海到半暝仔12 點進前，siuⁿ緊siuⁿ慢lóng m̄-thang 。

第二：出洞口tio̍h-ài一直sô，勇敢向前行，m̄-thang 停睏，tn̄g-tio̍h樹仔tio̍h開始peh ，peh 去kôan-koân iap-thiap ê所在。

第三：心情放輕鬆，siáⁿ-mih時陣褪殼，免擔心免tio̍h急，時間若到，自然to̍h-ē「羽化」。

第四：天光chái天若光，to̍h趕緊thián-si̍t飛，離開現場，cháu-chhōe安全所在。

Tio̍h--lah ，lín八兄弟，阿爸阿母已經先kā lín號名號好勢：大--ê 叫A-Sian（仙 ），唱歌kôan 音ē牽絲；第二--ê 叫A-Sián（阿癬），頭殼有1 跡青斑為記；第三--ê 叫A-Siàn（阿煽），個性無lám 無ne ，無精神，siāng hō͘ 阿爸阿母擔心；第四是A-Siat（阿設），唱歌猛脆pân-tōaⁿ牽聲；第五叫A-Siân（阿蟬 ），siāng巧siāng gâu 唱歌siāng gâu 牽聲；第六--ê mā叫A-Sián（阿蘚），伊kap 第二阿癬是雙生仔；第七--ê 個性善良古意古意叫A-Siān（阿善）；第八A-Sia̍t（阿舌），吼聲猛脆siāng有個性。Che  lóng是天生自然，m̄是父母偏心thiau-kang kā lín生無kāng-khoán。

祝順利，生活快樂！

阿爸阿母留。

提出意見 hit 隻蟬仔等ta̍k ê看清楚了後，koh-chài 1 pái kā ta̍k ê提醒，父母交代ê 話tio̍h-ài聽，祖先交代ê規矩tio̍h遵守，siáⁿ-mih時陣tio̍h出洞門，隨人斟酌，等你脫殼變做1 隻ē飛ē吼hiau-pai有自信ê蟬了後，你一定ài ē記得相chhōe，chhōe-tio̍h咱ê兄弟，「Phah虎lia̍h賊親兄弟」，有團結chiah  ē出頭天。

經過2、3 工後，樹林內iū-koh增加bē少ê 歌聲，siat siat siat siat，siat siat siat siat ，響聲滿山坪，有hit-lō kôan 聲，有hit-lō 低調，有hit-lō 長聲ē牽絲，mā有hit-lō chhè 聲ná切齒，kui-ê 樹林內交響樂齊交響，充滿歡喜，充滿希望。突然間有蟬ê hoah-hiu聲：

「Ah！A-Siân~！A-Siân~！我tī chia--lah ！你有看tio̍h我--bò͘？」

「Ah！你是A-Sián--hioh？你ê 頭殼額仔有1 跡，一看to̍h知影你是阿癬！」

「是--lah！我是A-Sián！ah 其他ê兄弟--leh？」

「我是A-Sian！」m̄知tī 時hit 隻kôan 音ē牽絲--ê  mā飛來tī in ê 身軀邊。

「實在歡喜，恭喜ta̍k ê ē-tàng sūn-sū蟬蛻（siân-thòe ），chit-má 已經報到3  ê ，chhun--e 咱大聲hoah-hiu--chi̍t-ē，kā in kho͘-kho͘轉來做堆，我喝chi̍t、nn̄g、saⁿ，ta̍k-ê to̍h大聲hiu，1、2、3 ！」

「A-Siān！A-Siàn！A-Siat！ A-Sia̍t」hiu boeh chiâⁿ-cha̍p分鐘，8 兄弟已經chiâu到位，有講有笑，歡喜ka̍h ，歡喜in 褪殼成功，koh團圓做堆。

兄弟相認了後，to̍h共同推薦A-Siân做班長，A-Siân表示感謝了後to̍h開始講話：

「Ē-tàng做蟬仔族是真hiau-pai  ê 福報，咱tio̍h代先來展寶蟬仔族ê 才能hō͘樹林內ê 眾朋友知，chit-mái 咱按大細ê 順序排1 列，我若喝開始，ta̍k ê to̍h照順序ho͘出ka-tī ê聲音，輪流ho͘ 4 piàn。」

「Án-ne是boeh  chhòng-siáⁿ？」

「Ho͘--落去tio̍h知。預備！開始！」

「sian、sián 、siàn 、siat 、 siân 、sián 、siān 、sia̍t ；仙、癬、搧、 設、蟬、蘚、 善、舌；sian、sián 、siàn 、siat 、 siân 、sián 、siān 、sia̍t；仙、癬、搧、 設、蟬、蘚、 善、舌」

「Ó͘ ！ná-ē chiah-nī 好聽！節奏輕鬆koh ná leh phah-phek--leh！」

「M̄-nā án-ne！咱mā ē使得 1 ê 獨唱，a̍h是 2 ê 輪唱，阿設kap 阿舌過來遮，lín 2 ê 表演hō͘逐家聽。」

「Siat  siat siat  siat，siat  siat  siat  siat， siat siat siat  siat⋯」阿設先出聲。

「Sia̍t sia̍t sia̍t sia̍t，sia̍t sia̍t sia̍t sia̍t，sia̍t sia̍t sia̍t sia̍t ⋯」續--落去阿舌kāng-khoán 1 ê 獨唱。

「Án-ne獨唱有較無味，阿設！你先開嘴，阿舌tòe 你後尾，連續唱10 秒，開始！」

「Siat  siat siat  siat，Sia̍t sia̍t sia̍t sia̍t，Siat  siat siat  siat，Sia̍t sia̍t sia̍t sia̍t⋯」

有koân有kē koh bē-bái聽。

「Sia̍t siat Sia̍t siat Sia̍t siat Sia̍t siat⋯⋯」想bē到阿舌阿設換chi̍t-ê節奏，soah lú唱lú soah-phah。

Pho̍k-á 聲滿山坪，蟬仔聲chiâu響，阿舌kap 阿設愈唱愈lú心適，愈唱愈大聲。

「阿癬、A-Sian、阿善、阿煽，lín 4 ê 來頭前，mā照順序唱 4 ûn ，拜託lín特別注意節奏ê 緊慢kap 聲音ê 大細，阿癬唱強拍，阿煽上低。」A-Siân繼續交代。

「Kan-nā goán 4 ê án-ne輪流唱，kám-ē好聽？」阿煽無siáⁿ自信ê 款。

「Ē！唱--落去你to̍h知！koh講1 piàn，特別注意節奏ê 緊慢kap 聲音ê 大細，阿癬唱強拍，阿煽上低。開始！」

「癬 仙 善 煽，sián  sian  siān  siàn，癬 仙 善 煽，sián sian  siān  siàn ⋯⋯」

「有影足 聽to-tio̍h，不過猶是阿設kap 阿舌in 2-ê ê 歌聲較mé-chhè ，較有精神。」

忽然間，遠遠傳來o-ló 兼有淡薄仔giâu-gî ê 笑聲：

「Cáhn！chán！chán！chán！實在有影chán！gâu唱歌koh有好滋味，1 仙、2癬、3 搧、4 設；5 蟬、6蘚、7 善、8 舌；chi̍t-sian、nn̄g-sián 、saⁿ-siàn 、sì-siat 、gō͘-siân 、la̍k-sián 、chhit-siān、peh-sia̍t。hah hah hah hah！chán chán chán chán！gâu 唱歌koh好滋味！」Ná像鳥仔ê 笑聲。

「眾兄弟，tio̍h注意，m̄-thang kan-nā 顧唱歌，顧iāng 氣，災難有可能tī 咱ê 身邊，隨人tio̍h sè-jī；阿爸阿母生咱 8 兄弟，並無半ê 姊妹kap 咱tàu-tīn做堆，ē記得，cha-bó͘-gín-á lóng是較pì-sú ，in  lóng m̄ 講話，tiām-chih-chih ，咱若boeh娶bó͘ boeh 交女朋友，一定tio̍h展功夫，認真kho͘，認真吼，piàⁿ-sì chhōe ，tio̍h ē chhōe-tio̍h好妻兒，tú-chiah hit-ê o-ló笑聲，m̄是真正經，隨時tio̍h注意，祝逐家好運，幸福過日，再會！」

Chit-ê 樹林內，樹仔真ōm真大欉，樹頂鳥隻滿滿是，對蟬仔族來講，雖罔充滿危機，為著生活，為著生湠，吼聲猶原響亮鬧熱chhih-chhih。

siat、siat、siat、siat！siat、siat、siat、siat！蟬仔飛出來啦！

siat、siat、siat、siat！siat、siat、siat、siat！熱天已經到了！

siat、siat、siat、siat！siat、siat、siat、siat！天氣真正炎熱！

siat、siat、siat、siat！siat、siat、siat、siat！蟬仔歡喜唱歌！

附錄：台語囡仔歌

蟬仔siat-siat （siân-á siat-siat） C 調  2/4 

小青蛙：[ 53 33 /53 33/5.6 53 /4  2. /42 22 /42 22/4.5 42 /3 1. /

53 33 /53 33 /5.6 53 /4  2. /42 22 /42 22 /4.5 42 /3 1. //]

siat、siat、siat、siat！siat、siat、siat、siat！蟬仔飛出來啦！

siat、siat、siat、siat！siat、siat、siat、siat！熱天已經到矣！

siat、siat、siat、siat！siat、siat、siat、siat！天氣真正炎熱！

siat、siat、siat、siat！siat、siat、siat、siat！蟬仔歡喜唱歌！