菁仔叢之網：
2019年8月22日 星期四
2019年8月13日 星期二
2019年8月12日 星期一
基隆嶼： Lahjih詩歌20190812
基隆嶼： Lahjih詩歌20190812
基隆嶼tō是基隆島，基隆港北爿4公里遠無人島，古早號做雞籠嶼（Ke-lâng-sū）基隆杙（Ke-lâng-khi̍t），閣有台灣龍珠ê稱號，山頂有燈塔，是基隆港船隻出入明燈。
Ke-lâng-sū chi-it:
Ke-lâng-sū ū kong-bêng-teng,soaⁿ-téngtêng-thah chhiō chin-hng, kó͘-chá hō-miâ Ke-lâng-khi̍t, hiān-tāi kiò-chò Ke-lâng-sū.
Hn̄g-hn̄gkhòaⁿsī chi̍t-chiah ku, kò͘-siú Tâi-oân ê liông-chu,Ke-lâng káng-kháu chòmn̂g-chhòaⁿ, ín-chhōa chûn-chiah hái-siāng phû.
Tó-sū téng ū chi̍t-bóe lêng, khut-sè chāi-táⁿ khòaⁿthâu-chêng, chêng-bīn sī lán Bí-lē-tó, chū-iû bîn-chúéng thài-pêng.
Siang-lâng thiàⁿ-sioh lán-ê chim, kó͘-chá kó͘-chákàu tong-kim, pó-sioh ì-ài bô-thêng-khùn, éng-hêngchi ài bē piàn-sim.
基隆嶼之一：
基隆嶼有光明燈，山頂燈塔炤真遠，古早號名雞籠杙，現代叫做雞籠嶼。
遠遠看是一隻龜，顧守台灣的龍珠，基隆港口做門閂，引𤆬船隻海上浮。
島嶼頂有一尾龍，屈勢在膽看頭前，前面是咱美麗島，自由民主永太平。
雙人疼惜咱的唚，古早古早到當今，寶惜意愛無停睏，永恆之愛袂變心。
Ke-lâng-sū chi-jī :
Ke-lâng kong-bêng-teng, têng-thah chhiō chin-hng, kó͘-chá Ke-lâng-khi̍t, hiān-tāi Ke-lâng-sū.
Hn̄g khòaⁿchi̍t-chiah ku, Tâi-oân ê liông-chu, káng-kháu chòmn̂g-chhòaⁿ, chûn-chiah hái-siāng phû.
Tó-sū chi̍t-bóe lêng, phak lehkhòaⁿthâu-chêng, chêng-bīn Bí-lē-tó, chū-iû éng thài-pêng.
Thiàⁿ-sioh lán-ê chim, phoân-kó͘kàu tong-kim, ì-ài bô-thêng-khùn, éng-oán bē piàn-sim
基隆嶼之二：
基隆光明燈，燈塔炤真遠，古早雞籠杙，現代雞籠嶼。
遠看一隻龜，台灣的龍珠，港口做門閂，船隻海上浮。
島嶼一尾龍，覆咧看頭前，前面美麗島，自由永太平。
疼惜咱的唚，盤古到當今，意愛無停睏，永遠袂變心。
基隆光明燈，燈塔炤真遠，古早雞籠杙，現代雞籠嶼。
遠看一隻龜，台灣的龍珠，港口做門閂，船隻海上浮。
島嶼一尾龍，覆咧看頭前，前面美麗島，自由永太平。
疼惜咱的唚，盤古到當今，意愛無停睏，永遠袂變心。
2019年8月6日 星期二
八七水災一甲子回憶：
八七水災一甲子回憶： Lahjih 20190806
1 9 5 9 hit一冬，楠仔仙溪集材工，日--時ku-lí鉤柴箍，暝--時忝kah無眠夢。
八月初七tăⁿ落工，風雨無停chiâu振動，半暝吵到睏bē去，杉仔瓦聲無停時。
透早天光猶leh落，pi-pi-pia̍k-pia̍k ná用倒，只好工寮罔等待，有人跋筊耍chhit-thô。
連紲三暝閣三日，西北大雨落bē直，有聽坑水lòng-lòng叫，一直落到初九日。
嘉義傳來歹消息，嘉南平洋做大水，田園厝宅bē喘氣，財產損失chiâⁿ克虧。
阿里山線bē通車，為著讀冊著回家，綴人步輦行兩工，楠仔仙溪到竹崎。
跤痠牚腿艱苦代，鐵牛車mā 爽oaiⁿ-oaiⁿ，嘉義車頭坐火車，chiah知彰化真傷害。
轉到厝--裡chiah知代，阿爸倒tī 眠床哼，久年症頭重夯起，看病食藥公媽拜。
煩惱三姑一家口，往生五个厝宅流，悽慘八七做水災，天做代無人會知。
三姑hō͘水流，大囝拚命āiⁿ tī肩胛頭，siáⁿ知水掣流，逃生無功效，三姑自按呢無回頭。
表三兄tī山宅，看著大水拚勢走，走bē赴，peh-chiūⁿ樹仔頂，結果樹倒chham人hō͘水流。
悽慘代，bô-siá-sì，一家往生五名字，厝宅埋tī塗跤下，牛隻粟倉損失有夠濟。
阿爸人傷重，煩惱koh悲傷，過了半月日，咱人七月二十tō是伊ê忌日。
Hit年19歲，經過一甲子，已經頭毛喙鬚白，記智原在，心情bē悲哀。
生老病死，生住異滅，無常mā-sī正常，心自在，歡喜繼續未來。
1 9 5 9 hit一冬，楠仔仙溪集材工，日--時ku-lí鉤柴箍，暝--時忝kah無眠夢。
八月初七tăⁿ落工，風雨無停chiâu振動，半暝吵到睏bē去，杉仔瓦聲無停時。
透早天光猶leh落，pi-pi-pia̍k-pia̍k ná用倒，只好工寮罔等待，有人跋筊耍chhit-thô。
連紲三暝閣三日，西北大雨落bē直，有聽坑水lòng-lòng叫，一直落到初九日。
嘉義傳來歹消息，嘉南平洋做大水，田園厝宅bē喘氣，財產損失chiâⁿ克虧。
阿里山線bē通車，為著讀冊著回家，綴人步輦行兩工，楠仔仙溪到竹崎。
跤痠牚腿艱苦代，鐵牛車mā 爽oaiⁿ-oaiⁿ，嘉義車頭坐火車，chiah知彰化真傷害。
轉到厝--裡chiah知代，阿爸倒tī 眠床哼，久年症頭重夯起，看病食藥公媽拜。
煩惱三姑一家口，往生五个厝宅流，悽慘八七做水災，天做代無人會知。
三姑hō͘水流，大囝拚命āiⁿ tī肩胛頭，siáⁿ知水掣流，逃生無功效，三姑自按呢無回頭。
表三兄tī山宅，看著大水拚勢走，走bē赴，peh-chiūⁿ樹仔頂，結果樹倒chham人hō͘水流。
悽慘代，bô-siá-sì，一家往生五名字，厝宅埋tī塗跤下，牛隻粟倉損失有夠濟。
阿爸人傷重，煩惱koh悲傷，過了半月日，咱人七月二十tō是伊ê忌日。
Hit年19歲，經過一甲子，已經頭毛喙鬚白，記智原在，心情bē悲哀。
生老病死，生住異滅，無常mā-sī正常，心自在，歡喜繼續未來。
2019年8月4日 星期日
團結就有力量
團結就有力量----呵咾阿里山鹿林神木： Lahjih詩歌20190804
Thoân-kiat tō ū le̍k-liāng----o-ló A-lí-soaⁿ Lo̍k-lîm sîn-bo̍k : Lahjih si-koa 20190804
Saⁿ-i saⁿ-óa thoân-kiat tō ū le̍k-liāng
A-kong thiàⁿ sun tōa-hiaⁿ thiàⁿ-thàng sió-tī
Lāu-pē kà-kiáⁿ lán tio̍h hō͘-siang hû-chhî
M̄-kiaⁿ hong hō͘ kian-chhî siang-sìn ka-tī
Kóng goán gō͘ hiaⁿ-tī iā-sī saⁿ-tāi tông-tn̂g
Goán sī kāng ūn-miā Tâi-oân chò-hóe khiā-khí
M̄-koán hong-thai lâi iā-sī sih-nah lûi-kong
Lán-nā mài kiaⁿ-hiâⁿ chū-jiân ē chhut-thâu-thiⁿ
團結就有力量----呵咾阿里山鹿林神木： Lahjih詩歌20190804
相依相倚 團結就有力量
阿公疼孫 大兄疼痛小弟
老爸教囝 咱著互相扶持
毋驚風雨 堅持相信家己
講阮五兄弟 也是三代同堂
阮是仝運命 台灣做伙徛起
毋管風颱來 也是熾爁雷公
咱若莫驚惶 自然會出頭天
2019年8月1日 星期四
田中國校第九屆畢業生同學會1995年聚會報告：
田中國校第九屆畢業生同學會1995年聚會報告：
（1995.12.25.蕭平治台文漢羅電腦拍字）
親愛ê同窗兄姊：逐家看批.平安！時間過著不止仔緊，一晃.又閣過了一年。今年ê 同窗會是由高雄市謝喜麗同學主辦，時間訂tī十二月初九下晡.一點，到初十下晡六點，採取遊覽chhit-thô ê 方式，ùi 田中坐遊覽車到屏東，參觀內埔鄉原住民文化園區。田中這旁，由謝宗憲kah 我負責連絡報名kah 租車ê 工課。
十二月初九下晡一點，阮.準時出發，四點到了高雄，喜麗同學kah 伊翁婿黃政義先生(早咱一屆ê 校友)準時來接阮。予人誠感動是，為著chit 擺ê 聚會.參觀，In 特別邀請一位關心原住民.文化ê 蘇大姊蘇秋老師來kā阮chhöa 路做紹介，另外有二對翁某kā阮安排旅社閣送食送飲料，In 講是「後援會」咱同窗會ê 後援會，ùi-chia 會tàng 看出謝喜麗In 翁某ê 用心，kah In-ti 高雄ê 成就kah人緣。
初九暝tòa-tī水門ê 旅社，水門離三地門kah 文化園區攏誠近，月光暝ê 山地誠幽美寂靜，天氣淡薄仔涼，誠適合同學夜談。借著旅館ê 客廳，泡著帶來ê 凍頂烏龍，一面ha 燒茶，一面談天說皇帝：阮ùi 各人目前ê 生活講起，講到囝仔時代，讀冊chhit-thô，爬樹叢掠雀鳥仔，水溝仔底戽魚，褪肉裼.大溪底.拍碰泅；抑是冤家相拍，騎馬相戰，跳草索仔，跳箍仔，去永樂戲園khioh 戲尾仔；然後講到此當今ê 社會，攏予咱感覺時間過了真緊，拄chah講hia-ê 囡仔代誌，好親像chang-chō日仔(昨昏、昨日)才發生- -niâ！時間是無情--ê！時代.嘛是一直teh 變化，變到kah 早前.誠無仝款，時代到底是進步抑是退步？逐家tī暢談之下，參濫著歡喜怨嘆.相chèⁿkah 向望期待了後，猶還那是上懷念細漢時陣，天真活潑做夥讀冊chhit-thô ê 生活。
阮一直講到深夜，享受著喜麗ê 好友特別準備ê 山芋kah 番麥，才輕鬆滿足轉去房間做夢。我夢著一ê 好夢，夢著逐家對咱台灣ê 未來，充滿了信心kah 希望。
第二工，七早八早就有人起來散步，吸著山間新鮮ê 空氣。我起來卡早，天猶未光，雖m̄是十五暝，m̄-kú 月.誠光，阮嘛有看著北斗七星，斗嘴向塗面五倍長ê hit 粒星，就是北極星，伊會指點人ê 迷路，ah 叨一方向.才是咱ê 希望？
「tio̍h！台灣.是咱ê 母親，愛台灣就是咱ê 方向，咱昨暝開講ê 結論就是tī遮！」我kā逐家按呢講。逐家攏講：「tio̍h！tio̍h！ah m̄愛台灣是beh 愛叨位？頭殼無咧歹去--講？」
七點半.食飽早頓，蘇大姊chhōa阮去三地門，訪問一位.有志氣，有文化氣質ê 山地青年.峨哥(ŏ--kò)，伊ê 工作室無偌大，khǹg誠濟木刻kah土尪仔.陶磁，恬恬講著In 祖先ê 故事，表現著In 原住民ê 文化，峨哥講話，充滿著信心kah hiau-pai。
伊講：「阮原住民ê文化，過去予人thún 踏了真濟，失去了真濟，chit-mái 阮已經覺醒--à！為著beh chhōe轉來家己ê 文化，我才做這種雕刻捏陶磁ê 工課。」
蘇大姊kā阮講：「峨哥實在了不起，誠有志氣，日本人用高薪聘請伊去日本表現伊ê 才能，伊bē-giàn。」
峨哥續- -落去閣講：「阮ê 文化藝術.流落tī日本.已經有夠濟--ā，阮無法度kā伊救倒轉--來，都感覺誠見笑--à ，我哪會beh 為In 效勞--neh ！雖是我ê 經濟無界偌好，嘛無人kā我.鬥相共，m̄-kú 我會家己扑拚，家己.認命。愛知影，流落tī海外ê 藝術文化，是無根--è ，閣卡好，嘛是一塊水流木niâ-niâ！阮.愛--è 是釘根tī咱台灣ê 文化！恁講是抑m̄是！」
看峨哥講話ê口氣，並無咬牙切齒，只是輕聲細說，m̄-kú 看伊ê 面容，會tàng 看出伊ê 信心kah 希望。阮恬恬祝福，祝福伊誠緊會達成伊ê 願望！
九點腳兜，一行人來到文化園區，代先由原住民少年林世治(pu-la-lu-iáng) 做簡報，並隨隊chhōa 阮參觀文化陳列館，經過伊.詳細ê 解說，阮才知tang-sî-á 原住民.是一個聰慧忠厚ê 族群，In.有貴族平民ê 階級，tī生活上所表現- -出-來是有大有細ê 秩序，無像平地人ê 亂象，為名聲，為地位，為金錢，為財產，演變成一個無大無細ê 社會。
我tī心內按呢想：「是咱.卡巧，抑是In 卡巧？」閣來參觀In tòa ê 厝，煮食、穿插、做穡所用ê 家私頭仔，有誠濟kah 咱用--ê相仝，譬論講：鋤頭--啦、牛犁耙--啦、kám-á--啦、篩仔--啦等等，幾百年共同tòa-tīchit 粒美麗之島，實在講.咱無應該閣再分你我，咱攏是兄弟姊妹，因為台灣就是咱ê 母親！
因為時間ê關係，續落來坐區內ê 交通車se̍h過塔瑪路灣區、富谷灣區、來到娜麓灣區，看純正ê 原住民歌舞表演，十幾個青年男女，個個都誠有自信，kah pu-la-lu-iáng 仝款，拍拚演出，得著誠濟ê phok-á 聲。
遮是上大眾化上鬧熱ê所在，人真濟，逐家笑微微，歡喜tang-tang！中晝tī餐飲中心.食山產，有山豬肉、溪蝦、溪魚，chìⁿ香菰、青炒烏甜仔菜，lim 陳區長.相送ê 細仔酒(小米酒)，會lim- -e 攏lim 到半醉猶m̄願停，若m̄是凡塵猶有俗事，真正無愛離開chit-ê 有歡喜有尊嚴ê 仙境。食飯中，kah 區長In.開講，猶原予我仝款ê 感覺，原住民ê 兄弟，阮尊敬恁！
轉來到田中已經暗時七點外，有ê同學著閣轉到台中，逐家並無感覺thiám，因為做夥ê 歡喜kah 向望攏留tiàm-tī咱ê 心肝仔底，希望.明年ê 再相逢。再會！祝福逐家！我ê 同窗！我ê兄姊！###
〔附記〕
這次ê同窗會出席ê 名單：
張天來老師、謝喜麗、蕭美、謝月腕、李梅、許素卿、陳武司、陳明忠、邱靜雄、歐昭良、許榮吉、石啟東、謝宗憲、蕭平治。參老師才十二個，有影有卡少，向望明年ê 聚會是今年ê 十倍，請期待。這次參加ê 同窗傷少，所以改用招遊覽ê 方式，招一寡親情朋友鬥出車錢，做夥chhit-thô，好嘉哉！誠好chhit-thô，無！In 逐家一定罵我kah 宗憲，講去予阮騙去？講爽--ê啦！招- -ê 攏是好腳數，好朋友，beh 哪會會！
訂閱：
文章 (Atom)
