2016年8月30日 星期二

看相片回想人生_1969→1971_媽祖宮後稅厝二冬(二):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1969→1971_媽祖宮後稅厝二冬(二):

男裝女師傅,名聲通人知:
田中媽祖宮後算是街仔尾,不利時行行業,想bē到ta̋ⁿ開市to̍h有人客踏跤到,訂西裝褲做洋服褲,mā有訂做規套西裝,牽--e 一人頭家兼師傅,因為是歇熱期間,我ē-hiáu tàu招呼人客,2禮拜後學校開學,我是8點前上班,5點後下班ê散教員烏枋杙á,顧店允空課講生理,買賣講價賬,量寸尺、裁剪、車、熨⋯步步lóng是牽--e孤一个,若tio̍h出門bueh車布邊、bueh買li-li-khok-khok幼粒用品,抑是bueh煮食、洗衫,to̍h 著等我下班入門,我是盡量減少外面pha-pha走,不比較早好命,雖罔bô-thang「食,食an 爹;趁,趁私奇」,總--是兄嫂是靠山,m̄知huāⁿ家,kan-na翁某兩人一家to̍h tsiah-nī無閒艱難,透早無閒到暗時10點11點關門了後,tsiah有thang洗蕩。
講--起來好笑koh心適,出門上班是老師,入門隨改換做頭家師傅ê細漢--è,開門、關門是我,掃塗跤、買鈕仔買車仔線是我,閣來教我thīⁿ鈕仔、pâng褲跤mā是我,愈做愈有心得,屜仔來mā有銀票銅銑來來去去,有phah拚to̍h有向望,人有影需要『向錢看』一點仔都無m̄著。
做無兩kó͘月,有一工轉來到店內,牽--e kā我講:「阮寶斗人hit个黃巡佐拄才來--過,講咱開店無申請營業,叫我明仔暗去in-tau--一迣!」
「敢有傳票?」「無傳票m̄免tshap--伊。」
斯當時hit个黃巡佐專門leh掠無營業登記ê趁食生理人,名聲不止仔響,因為無tshap--伊,隔轉kó͘月郵差送來1張公文,無營業登記需要罰錢,好佳哉一位同窗--e tī縣政府上班,隨時替我辦理登記,2禮拜內申訴期間家己寫一份申訴書,用ta̋ⁿ試營業又閣tn̄g-tio̍h負責人身體無爽快(附病院證明)kap營業證字號,to̍h按呢無代誌,從此以後hit个黃--先生mā m̄敢閣來揣麻煩。
營業進行中,學校教冊正常上班,m̄-bat遲到lo̍k-tô,學校huān學校,厝--裡huān厝--裡,m̄敢耽誤為人師教冊ê本份。講實在--ē,『吃飯睡覺/師範學校』訓練3冬ê功夫,課本sa--出來絕對無落氣bē失人ê禮,m̄-tsiah tī店內做『小弟』無空課ê時,著搬1隻椅仔kheh tiàm師傅ê身軀邊,ná談情說愛ná lió師傅按怎補紩鉸熨,人講「曲館邊ê豬母,會拍phik。」看久兼hìng問,「新烘爐新茶鈷」問--ē問bē-siān,應話--ē mā bē ià-siān,to̍h按呢hō͘我慢慢仔tsiâⁿ做師傅。
To̍h-tī頭家師傅身體無爽快調養hit段時間,好佳哉tn̄g-tio̍h歇寒,為著厝稅日日ân,無收入開支ē出問題,暫停營業ná是好辦法?當然店門照開,空課照允,師傅tó位揣?家己來,hit个掃塗跤ê『小弟』家己來。講--起來無人ē-siàn,窮實mā m̄敢公開,hit个師仔工ē-hiáu做洋服褲?事實是m̄-nā ē-hiáu車ē-hiáu做,koh ē-hiáu裁剪。
踏裁縫車仔早to̍h ē-hiáu,真正針線車ē直koh ē-hiáu倒踏針,是需要訓練,頷仔頸生瘤----拄著--à,趕緊認真練,m̄-bat to̍h kā師傅問,bē堪得tsia̍p問捷練,捷練to̍h成鋼,第一領西裝褲3工時間完成交貨,人客koh o-ló kah觸舌,第二領兩工完成,第三領tshun工半,m̄-nā人客滿意,連阮師傅mā認定放心放hō͘我做。師傅裁好ê褲料已經做了,無koh裁剪to̍h無thang車thīⁿ,tshân-tshân kā昨昏允好量好ê寸尺簿仔提--出來,布料mā排tiàm布床頂,準備畫圖裁剪,角尺、彎尺、ìn-tshih帶仔、台尺、くじら尺、粉土、鉸刀攏總tshuân好勢,看寸尺學師傅ê架勢,勻勻仔比,斟酌畫,畫了閣再畫,修改閣修改,最後拜托師傅來鑑定,一聲「ē使得!」無tiû-tî無tùn-teⁿ,鉸刀攑--起來to̍h kā鉸--落去,然後車布邊、開褲袋仔,車褲頭、lah-liān[拉鍊]⋯
閣來,thīⁿ、熨,完成成品,等待人客來驗收,1手交貨,1手交錢。
△除了擔任級任老師,1959年兼職研究課長。































△Tī對面明興翕像館翕一張結婚週年記念相。 

2016年8月28日 星期日

看相片回想人生_1969→1971_媽祖宮後稅厝二冬(一)::

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1969→1971_媽祖宮後稅厝二冬(一):
媽祖宮後「國華西裝社」:
「成家」是查埔人人生一大坎站,「立業」是紲落去又閣一大坎站。想著家己一kó͘月tsiah趁千thóng箍,莫怪斯當時食頭路ê女性無愛嫁hō͘散教員仔。師範出業做老師是真好名,娶老師娶食公家頭路是較少數,娶做裁縫--ē、電頭毛--e、刺膨紗--e算是真好ê對象,娶做穡--è、剃頭--ē m̄是有,重要是ē-hiáu tàu趁錢,m̄-tsiah it-tio̍h牽--e有tsit手趁錢功夫,人範koh生做高尚柔性,Taⁿ已經結婚都過了四kó͘月,雖罔兄弟猶原是一家人,總--是牽--e有tsit手做西裝ê功夫,應該著發揮加減趁錢鬥相添。
參詳決定家己開業做西服做生理做副業,大兄建議,世華西裝社徛店tī車頭hit爿,咱號名國華西裝社to̍h tiàm媽祖宮後稅店,距離較遠khah-bē相搶人客khah-bē誤會拍歹感情。契約1年1年拍,厝稅一kó͘月450箍,是我月給三分之一,店面無夠5坪,後壁一間小可ē-tàng轉踅房間,煮食灶跤、浴間、便所kap厝主合leh用,厝主好鬥陣,勉強歡喜過日。
買1座半舊落仔掛玻璃見本櫥,叫師傅簡單釘一隻布床,厝--裡攑幾隻椅仔椅頭仔kap細隻食飯桌,買幾桶油漆招朋友鬥油油漆漆--leh,佈置差不多,廣告社簡單看板「國華西裝社」mā掛四是,利用週末歇睏日翁某相tshuā去彰化布市選一寡時行男裝布料,隔轉日貨to̍h寄到位,簡單排排疊疊--leh都也有sîng一間裁縫店店面。
結婚開了一筆錢,雖罔聘金回hō͘大兄,這擺開西裝社又閣著大兄發落本錢,大兄提一張1萬箍支票hō͘我兌現金,彰化布行hak布料因為牽--e有熟免現金,hak東hak西2萬是有夠額,通書掀掀--leh,揣一日清氣日仔to̍h kā「開張大吉(khai-tiang tāi-kiat)」,丈人兜後頭mā tshuân來碗碟仔、菜櫥仔講是勁灶(kīng-tsàu),suah hō͘我感覺bē-su已經兄弟分開食。
連炮仔pìn-piàng吼,田中街仔媽祖宮後新開一間「國華西裝社」,立業tit-bueh拍基礎,歡頭喜面接待捧場人客,內心卻是沈重有「一人一家代」ê壓力,阿兄敢會?家己臭心想,若無生理是bueh按怎支付厝稅開支?「頭 洗--落去,無剃敢ē-soah-tit?」將近「三十而立」ê歲數,猶閣煩惱東煩惱西無bueh笑死人--kong?

2016年8月26日 星期五

20160708_阿公阿媽夏令營(讀台語學lô-má-jī 第五節回田中):

20160708_阿公阿媽夏令營(讀台語學lô-má-jī 第五節回田中):
5工「阿公阿媽夏令營本成欲插花仔安排1晡參加台語囡仔營 ,因為風颱延期suah失去機會。今仔日著欲結束,台語課提早早埔9點上課,準備坐11點半火車轉來去田中。
師:「a e i oo  u o」「ah eh ih ooh  uh oh」「ann enn inn oonn  」tsia lóng是韻母,親像ㄚ ㄝ ㄧ ㄛ ㄨ ㄜ,m̄-koh台語有鼻音佮短音,咱來復習--一下。(師生做伙唸)
師:tsit-mái老師bueh教恁聲母:pㄅ/ phㄆ/ mㄇ/ b/ tㄉ/ thㄊ/ nㄋ/ lㄌ/ kㄍ/ khㄎ/ ng/ g/ tsㄗ/ tshㄘ/ sㄙ/ j/ hㄏ(綴老師大聲唸3變)
師:kāㄅㄆㄇ提掉「p  ph  m  b  t  th  n  l  k  kh  ng  g  ts  tsh  s  j  h」(綴老師大聲唸3變,然後家己練習)
⋯⋯⋯⋯⋯⋯⋯⋯⋯⋯⋯⋯
然後學生輪流做小老師tshuā讀,老師邊--a指導。
⋯⋯⋯⋯⋯⋯⋯⋯⋯⋯⋯⋯
師:ng 佮g 華語無tsit款音,較歹讀,無要緊,勻勻仔來。tsit-mái老師欲寫一寡音節hō͘恁呼音。
螢幕顯示:ka 鉸刀,kha 豬腳,pho 茶箍泡,so 挲圓仔,mo͘ 頭毛,so͘ 肉酥,kho͘ 大箍,tse 這是啥乜,tshe 初一,bo 帽仔,niau 貓仔,su 老師。」
師:su 老師lāu-su,m̄是『老師ㄕ』,台語無捲舌音 就是『捲舌音ㄓ ㄔ ㄕ ㄖ』。
師:阿公阿媽夏令營」上尾tsit節阿公欲kā恁試驗,看siâⁿ人ē-hiáu看羅馬字呼音,羅馬字呼音kap ㄅㄆㄇ呼音仝款,試看覓,好--bò͘?
生:好!
螢幕:pa phe ti khi ma niau kau to thai tsai tshui tsai-hue tinn thinn siau a-pa  a-ma 
開始練習⋯⋯⋯⋯⋯⋯⋯⋯⋯⋯⋯⋯
師:晴晴、小馬鈴(薯)大部份lóng 呼音正確。(噗仔聲)
師:小玉(仔)換你來呼音。
小玉:pa爸爸, phe, ti豬肉, khi, ma媽媽, niau貓仔, kau狗仔, to菜刀, thai颱風, tsai知影, tshui, tsai-hue知 花, tinn甜甜, thinn天頂, siau蕭嘉儀, a-pa阿爸, a-ma阿媽。
師:呼了有夠讚,有兩个詞m̄著,等一下tsiah講。換羅翊展豆豆。
豆豆:pa阿爸, phe寫批, ti豬腳, khi頭殼khi-khi, ma媽媽, niauniau鼠仔, kau交朋友, to鉸刀, thaihon風颱, tsa知影, tshui, tsai-hue再會, tinn雞卵糕甜甜, thinn天頂, siau蕭老師, a-pa阿爸, a-ma阿媽。
師:豆豆有夠厲害,『颱風』台語講風颱,小玉講tsai-hue知 花無m̄著,m̄-koh豆豆ē-hiáu kā連leh講「再會」。
師:阿公阿媽夏令營」好耍bò͘?
生:好耍!
「再會!」
「再會!」
「再會!」
「再會!」
八月半中秋節咱tsiah-koh轉來田中央阿媽兜tshit-thô!
「再會!」























▲坐自強號台鐵真緊to̍h到田中央,tn̄g-tio̍h舊車頭空間有小朋友作品展覽,入去欣賞後tsiah轉去厝--裡。




2016年8月21日 星期日

20160708_阿公阿媽夏令營(讀台語學lô-má-jī 第三節第四節):

20160708_阿公阿媽夏令營(讀台語學lô-má-jī 第三節第四節):
查某孫家己設計「阿公阿媽夏令營」,逐日攏有安排學台語lô-má-jī課,上課時間是食暗飽hit段時間,雖罔學校有台語課程,阿公猶是ùi 初階教起,阿公m̄敢激老師ê面腔,因為是「夏令營」,孫--e mā真主動學習,ná聽ná唸ná唸ná笑,下面是進行ê課程:
教具:TV、appleTV、iPad、Lohaka輸入法、jiàu-pê-á 1支。
第三節:大約5分鐘復習舊教材。
師:咱kā「pe phe te the ke khe」加一个「ⁿ」符號「peⁿ pheⁿ teⁿ theⁿ keⁿ kheⁿ」,伊ê發聲to̍h變無仝,大聲綴老師唸,「peⁿ pheⁿ teⁿ theⁿ keⁿ kheⁿ」,這有鼻孔音,ná像感冒講話ê聲音,嘛ē使得按呢寫「penn phenn tenn thenn kenn khenn」,「ⁿ」佮「nn」lóng是鼻音符號。
師:綴老師大聲唸,「破病ê pēnn,澎phênn湖ê phênn,鄭tēnn老師ê tēnn,撐thenn膨椅ê thenn,三更kenn半暝ê kenn,坑khenn 溝仔ê khenn。」
師:換恁大聲家己唸,唸m̄著去無要緊,老師tsiah-koh唸一遍hō͘-lín聽。
師:1个1个輪流來頭前tshuā唸,做『小老師』。

師:啥人讀了siāng-kài讚?
生:蕭嘉儀。(phah-pho̍k-á聲)
師:逐家讀了攏真tsán,攏真認真,老師kā恁phah-pho̍k-á,pho̍k pho̍k pho̍k pho̍k、 pho̍k pho̍k pho̍k pho̍k ⋯ kā你o-ló鼓勵。下課!

第四節:大約5分鐘復習舊教材。
師:「a e i oo u o」唸--一遍,tsiâⁿ-gâu!
師:「ai au io ua iau」用ㄅㄆㄇ呼音ê方法想看覓,按怎呼音?趕緊研究參詳。
師:逐家做伙唸,ná有m̄著tsiah kā恁講。開始。
生:aiㄞ,auㄠ,io腰,ua娃『洋娃娃』,iau腹肚iau。
師:哪會tsiah-nī gâu!
師:咱kā音節後壁加「ⁿ」抑是「nn」號做鼻音,咱tsit-mái kā音節後壁加「h」號做短音,看恁會曉唸--bò͘?老師先唸一擺hō͘恁聽。
「a ah e eh i ih u uh oo ooh ooh ai aih  au auh io ioh ua uah iau  iauh」。紲落去逐家互相練習,等--一下輪流做小老師。

師:攑jiàu-pê-á來螢幕前,輪流做小老師,小馬鈴(薯)開始。

師:足讚,逐家唸了足讚,ē記得音節後壁ê「ⁿ」抑是「nn」是鼻音符號,「h」是短音符號。知影--bò?
生:老師,阮攏知影。
師:下課!






2016年8月19日 星期五

20160708_阿公阿媽夏令營(讀台語學lô-má-jī 第一節第二節):

20160708_阿公阿媽夏令營(讀台語學lô-má-jī 第一節第二節):
查某孫家己設計「阿公阿媽夏令營」,逐日攏有安排學台語lô-má-jī課,上課時間是食暗飽hit段時間,雖罔學校有台語課程,阿公猶是ùi 初階教起,阿公m̄敢激老師ê面腔,因為是「夏令營」,孫--e mā真主動學習,ná聽ná唸ná唸ná笑,下面是進行ê課程:
教具:TV、appleTV、iPad、Lohaka輸入法、jiàu-pê-á 1支。
第一節:
師:老師教唱歌ē先『發聲練習』,按怎唱?
生:ㄚ
師:阿公ê發聲練習kap人無共款,綴阿公大聲唸,a~ e~ i~o͘ ~ u~ o~o加一點烏點唸ㄛ,o唸ㄜ。閣講一擺 a~ e~ i~o͘ ~ u~ o~o加一點烏點唸ㄛ,o唸ㄜ。等一下逐家輪流唸--ō͘

生: a~ e~ i~ o͘ ~ u~ o~ a~ e~ i~ o͘ ~ u~ o~ a~ e~ i~ o͘ ~ u~ o~ a~ e~ i~ o͘ ~ u~ o~
第二節:
師:p  t  k 讀ㄅ ㄉ ㄍ;英文字母佮台語羅馬字發音無仝。
師:abcde 這26字字母,正式講法是拉丁字母抑是羅馬字母,用tī英文叫英文字母,用tī德文叫做德文字母,若用tī咱台語to̍h叫做台語字母、台語羅馬字。有小可hue-kô͘-kô͘,無要緊,若有用心記--起來真緊to̍h分ē清楚。
生:阿公,老師『我們知道了!』
師:綴老師唸3編「p  t  k ,p  t  k ,p  t  k 。
師:p  t  k 後壁加一字「h」,ph  th  kh 讀ㄆ ㄊ ㄎ,hit字「h」表示送氣,p  t  k無送氣,ph  th  kh有送氣。
生:『什麼叫做送氣、無送氣?』
師:阿公提tsit張紙khǹg tī喙ê頭前,進酌看,「p  t  k 」「ph  th  kh」「p ph t th k kh」,閣再一擺,看hō͘清楚--ō͘!
師:有啥乜無共款?
小馬鈴(薯):「p  t  k」紙小可振動,「ph  th  kh」振動加足大下。
師:小馬鈴講了著--bò͘?
生:著!pho̍k pho̍k pho̍k pho̍k!
師:來!換羅翊展唸。p  t  k 」「ph  th  kh」。
生:攏總著!pho̍k pho̍k pho̍k pho̍k!
師:tsit-mái老師bueh kā恁考試,ē-hiáu--è先攑手。
螢幕:出現 p  t  k,然後加添a做pa  ta  ka 」。
小玉(仔)攑手:爸爸ê pa,乾乾ê ta,蕭嘉儀ê ka。 (pho̍k-á-siaⁿ)
晴晴攑手:ph  th  kh>pha  tha  kha>pha-pha走ê pha,『你我他』ê tha。 (pho̍k-á-siaⁿ)
師:攏足厲害,老師欲出較深--e-o͘!「pe phe tan to ku khui khau 」逐家趕緊練習,ē使得互相研究抑是問老師,5分鐘tsiah叫人--起來看螢幕讀。
師:羅翊展,看你攏無leh練習無leh唸,你來唸hō͘逐家聽。
羅翊展:jiàu-pê-á攑--起來行到螢幕前,ná比ná讀,「pe pe飯ê pe,phe 寫批ê phe,tan 等一下ê tán,to 菜刀ê to,ku『烏龜』號做ku,開門ê khui,拔草ê khau。」
師:攏總著,100分,逐家phah-pho̍k-á。
下課,tsit節逐家攏真認真。












2016年8月16日 星期二

20160817_lam>lap佮om>lop音韻例句:

20160817_lam>lap佮om>lop音韻例句:    Lah-jih
Siáu貪戴ke-lam;伊ê身體真lám;伊kō͘跤蹄kā我làm(腹肚);你ê目睭hō͘牛踏lap(--去);出門hō͘雨lâm;騎鐵馬kō͘雙腳la̍p。

雨真大,提雨幔hō͘我lom;紅柿好食著愛等到軟軟lòm-lòm;濁水窟仔窟底lòm-lòm(著sè-jī);濁水窟仔塗膏lop-lop(斟酌你ê跤);手袖有人講手siū,有人講手kiáu,mā有人講手lôm;lōm;塗跤澹糊糊,tsiùⁿ lo̍p-lo̍p。(mā有講醬lop-lop)。

ke-lam雞籠;真lám真荏;跤盤踢,跤蹄làm,跤蹄tsàm;踏lap[凹];lâm-hō͘淋雨;la̍p=ta̍h踏。

lom[無袖套頭];lòm-lòm[軟Q又不太爛];lòm-lòm[踏濕地泥土的現象];lop-lop[踏到濕地泥土的感覺];手lôm(可能tshiú-lông ê變音);lōm>tsiùⁿ lo̍p-lo̍p(形容塗跤全爛泥)。
用田中央(Chhân-tiong-ng)我ê腔口罔議量罔參考。

2016年8月14日 星期日

20160706_阿公阿媽夏令營(第四工下晡):

20160706_阿公阿媽夏令營(第四工下晡):
▲下晡參觀林百貨(公司):
講下晡bueh參觀林百貨,兩个孫歡喜kah,阿公講,恁bē記得咱是辦「阿公阿媽夏令營」--hio͘h?tsit間「林百貨」比阿公阿媽閣較濟歲,是80外年前真出名ê百貨公司,5棧樓ê樓仔厝,猶閣保持真美觀真有氣質,下晡to̍h是bueh tshuā恁來去看古早ê百貨公司,koh行5--分鐘to̍h到位--ā。
原來mā有leh賣物件禮品,閣有囥bē少ê古物仔hō͘人欣賞。小玉(仔)、小馬鈴(薯),咱ùi第一棧勻勻仔se̍h勻勻仔看,特別ê古物仔阿公阿媽tsiah kā in說明,先kō͘ peh樓梯1棧1棧參觀,到5樓頂tsiah坐電梯落--來。
「阿公!hiah-nī古早to̍h有電梯--ò͘?」
「hèⁿ--à!m̄-tsiah tshuā恁來tsia看古早物件。」
△Siáⁿ知ta̋ⁿ踏入門to̍h去hō͘一台電視機saⁿh--tio̍h,緊來看!緊來看!阿媽ê嫁妝tī tsia,差一點仔to̍h hiu--起來。古早古早阿公kah阿媽結婚,阿媽kah一台電視,轟動咱兜厝邊頭尾,逐暗來人客間仔看電視ê人滿滿是,阿公kah阿媽家己攏無thang看。
這是40外年前Hitachiひたち公司ê電視[日立],20吋烏白螢幕,寶ni-ni,有掛thuah門,tsiâⁿ-súi,kap chit-mái ê TV足無相像,。
△講是阿媽ê嫁妝,小馬鈴(薯)趕緊坐tiàm膨椅邊真認真看來看去,其實in bueh thái-thó 會知tsit台電視機ê價數是斯當時我半年較加月給tsiah買ē著--è,莫怪古早人較無kah意生查某囝。
△看著林百貨「聽台灣」這塊看板to̍h了解主人ê用心「愛台灣」。

△柴造查某人梳妝台,雕花真súikoh闊幅大範,m̄是大好額人買bē落手,處處藝術,含意離bē開福氣,有蝙蝠ê造型。

△可能是囥幼粒物ê櫥仔,紅底金花,後紐鎖頭lóng是紅銅製造。

△彰化市古早地圖,手畫地圖,比率當然無現此時ê精準,相關位置值得參考。
 △電梯(流籠式升降機)門,造型藝術無輸現代,電梯行到幾棧樓顯示tī電梯門斗頂。

△G16 tsit跤柴箱,m̄知啥乜意思,ē記得讀師範時,逐个攏有1跤柴造êtsit款柴箱,貯衫褲貴重物件,保留本色,可惜無留落來做記念。
△正庄司令牌 裁縫車仔,阮攏講ミシン,重要部位bat kah有tshun,紹介hō͘孫--e知,阿媽是西裝師傅,阿公ê西裝lóng是阿媽裁做。恁mā bat穿阿媽做ê洋裝,ē記得--bò͘?「hò͘!」



△Tsit種車台連箱仔kah屜仔êミシン/mishin/裁縫車、縫紉機頭一擺看著。對專業師傅來講,應該無較方便。。


△古早新娘嫁妝,有足濟lóng是木材由敆作師傅製造,有講做柴頭木橛(tshâ-thâu ba̍k-kue̍h)。

△收集日本時代都市地圖,hō͘人回想百年前ê街市款式。









△提出來珍貴冊櫥仔。
△張發條有掛時鐘墜仔ê古早壁鐘。

△布莊展示綾羅紡絲布料hō͘人揀。

△行了跤酸小歇睏。

△5棧樓頂súi-tang-tang。

△收音機,彼陣是真空管m̄是 電晶體,有長短波,仝款貴蔘蔘。




△室內1棧kap1棧中間有類似磚棚仔造作,增加美觀,頭家人mā ē-tàng觀察市草kap徛店員案內あんない人客ê狀況。

△細台トラック/torakku/卡車應該mā歷史悠久,「大手燒」おおてやき原來是日本料理店,m̄-bat字有較輸。

△5樓頂有とりい鳥居kap石燈,猶原保留日本時代設備。

△這支寫大手燒ê柱仔,可能是運送貨物起落ê升降機械。

△囡仔猶是愛看家己kah意ê物,雖罔加減紹介現場古物,總--是做導覽ê阿公ná-bat ná m̄-bat,囡仔仝款感覺生份較濟熟似--ē,行--過總有跤跡,m̄管認bat偌儕,頭殼內總--是有記智,有一工若想起抑是聽人講起冊內提起,相信幫贊定著真濟,這to̍h是「阿公阿媽夏令營」ê目的,m̄是tshit-thô niā-niā,hō͘囡仔感覺是leh參加營隊ê趣味兼學習ê快樂。


1930年林百貨啟動台灣的流行時代
1932年12月5日,林百貨開幕,開啟台灣文明的摩登時代。
1930年代是台灣進入現代文明的起點。
生活上出現電燈、電話、自來水普及、飛機、汽車等文明進入台灣。
台灣咖啡廳開始盛行,流行文化、電影、留聲機,爵士樂出現...。
思想開放主張自由戀愛,洋裝替代和服,西式教育日漸普及,這就是1930年代的台灣。
1932年,古倫美亞唱片發行台語電影《桃花泣血記》同名主題曲。
1933年,鄧雨賢的《跳舞時代》捧出了台灣第一位流行音樂歌手純純(本名劉清香1914-43),同年鄧雨賢寫出台灣經典歌曲《望春風》、《雨夜花》、《月夜愁》。
隨著太平洋戰爭爆發台灣的跳舞時代譜下結束的舞曲。
林百貨也結束他與台南短暫而燦爛的相會。
Download林百貨官方網站