我ê台文運動記智：

 我ê台文運動記智：

▲1995年台語網有志吳宗信chah《HOTSYS-HAHSYS 台客語文書處理》[1994年，居住在美國南加州的蘇芝萌先生構想、開發] 轉來台灣，伊寄軟體kap使用說明來hō͘我，我ê電腦mā換安裝Microsoft Windows 95，開始應用HOTSYS-HAHSYS拍台語文，除了繼續寫台文，mā kā進前檔案整理做Word版本，電腦phah台文功力大大進步，翻寫現代流行歌江蕙ê歌詞，改做漢羅版tī台語網分享，mā有ke-pô kā《HOTSYS-HAHSYS》詞庫tàu造詞，加減了解電腦ê奧妙。

Ē-hiáu拍電腦了後，bat有下面ê記載：

感覺誠歡喜，多謝彰化.張聰敏兄.提供.鄭教授.ê TW301軟體.予我學。

嘛感謝鄭良光兄.ê 提示，才知影電腦.拍Hō -Ló 台文.ê 好處。

猶有，賴彥君先生.對TW301 ê 指導，我ê 後生.亦哲.教我電腦.ê 使用，攏一時間.予我.無閒--起來，無閒kah 足歡喜.koh 足少年--ē ，感謝In .兩個.少年--ē ！做參考:

輕聲.分二種，一種.是固定輕聲，伊ê 發聲，誠sêng 第三聲。

例:食bē --出來！會相思--bò ？轉--去！好--là ！

另外一種.是隨前變調.輕聲，伊ê 發聲.有第一聲，第三聲，第七聲.ê 變化。

例：有伸- -a ，讀國中- -a ，查埔- -e ，查某--è ，心適--è ，叨位.來--ē ，平治--ē 。

Tī -Chia ，攏總用(--)記號.標出，(--)ê 前一字.讀本調，(--)ê 後面.是輕聲。

另外，本文.ê 拍字，除了標點符號.以外，tī 字.kap 字，詞.kap 詞.ê 中間，有加一點[.]，che .是「音界符」，tī [.]ê 前一字，愛讀本調，che .對初學Hō -Ló 台文.ê 朋友.有真大.ê 幫助。

Che .是ùi 洪惟仁先生.ê 台語.經典笑話.內底.學--來è 。

2000年整理時ê 感想：做文化khang-khòe ê 人，攏真雞婆，攏會食好tàu 相報，bat 一sut 仔別人m̄-bat - -ê ，就那得著寶貝共款，一直beh kā 人教，無管伊會hō͘ 內行人笑 - -無？（ Lah-jih ）

▲Ta̍k個月繼續駛車去彰化〈台文通訊聯誼會〉讀台文通訊、稽考學習台文用字、交換心得，lóng是陳福當發落主持，每擺聚會維持10~20人。有一擺，我印「輕聲」書寫表達方法去kap逐家交換意見，福當老師認為無需要研究，伊講kan-nā聲調(八聲)：kun君/ kun2滾/ kun3棍/ kut骨/ kun5拳/ kun2滾/ kun7郡/ kut8滑都足歹了解，ná著研究chiah-nī深；聰敏兄聽我說明了後，tō講，我tō是leh 搜揣chit款台語氣口ê書寫方法，一直m̄知影按怎用文字表達。問我「你ná有chit款資料？」我ê見解是，咱boeh教人學台語文，必需徹底了解台語聲韻，聰敏兄kap我lóng真注重口語表達按怎書寫，mā對chit方面hē功夫研究。

▲1995年6月，半線文教基金會邀請我去會館教〈社區兒童學台語〉，錄製六大單元，然後由南彰化第四台「三大電視」製作做30小單元tī電視連續播出一個月，轟動南彰化第四台觀眾，甚至有朋友kioh是tī電台演出。

六大單元教材是手寫稿，用漢羅lām寫方式編寫，除了認bat台灣文化，台語漢字kap Lô-má-jī lóng需要學，六大單元有台灣囡仔歌、傳統唸謠謎猜、台灣民謠、生活台語、台灣笑話、漢學仔，其中「生活台語 」是我自編教材，這是復振台語上重要部份。

漢羅lām寫13篇手寫稿：

 Chā-hng 揣著漢羅lām寫13篇手寫稿，chiâⁿ歡喜，下面是手寫稿ê記錄：

第一篇手寫稿1993/8/13：《阿爸ê 鹿角薰吹》1993/9台文通訊第24期。後--來選輯tī台語文學有聲叢刊內。（2012/11/30授權國立台灣文學館「台灣本土母語文學常設展－線上網站」製作）

第二篇手寫稿1994/元旦：《客鳥》1994/4台文通訊29期。後--來選輯tī林央敏編《台語散文一紀年)》

第三篇手寫稿1994/3/1：客鳥（試寫台文韻文）

第四篇手寫稿1994/3/2：寄hō͘豐惠小姐ê批

第五篇手寫稿1994/：客鳥帶來ê喜訊----兼寫母校八十週年生日感言，1994年6月5日和《客鳥》合併，刊tī彰化縣田中國民學校《創校八十週年校慶特刊》

第六篇手寫稿：台語演講稿《交通安全是咱逐家的責任》

第七篇手寫稿：《阮學校長》1994/7台文通訊32期。指導田中國小六年六班邱婉婷作品。

第八篇手寫稿1994/2/5：《一張批kap一通電話》（生活ê母語）1994/07台文通訊32期。

第九篇手寫稿1994/3/3：《思母》1995/08台文通訊41期。

第十篇手寫稿1994/4/25：《一張批，一通電話》

第十一篇手寫稿1994/5/15：《相思 相思豆 相思栽 相思樹 病相思》1996/02台文通訊45期。

第十二篇手寫稿1994/6/：《老師kā畢業生講話》，畢業典禮師長致詞。

第十三篇手寫稿：《田中社頭蕭--姓祭祖歌》翻寫陳國典採錄《社頭蕭姓祭祖歌》

行向台語文運動記事：

 行向台語文運動記事：

做一个現代人，若boeh tòe-ē-tio̍h時代跤步，交通、資訊、網路算是真重要工具、能力，1941年代出世ê小學教員，我算是tòe有著時代ê先覺之一。

1990年代，多數基層公務人員上班普遍騎鐵馬騎o͘-tó͘-bái，hak轎車來駛是傷討債無必要ê奢華。1990年考著轎車駕駛執照，隔轉年1991年tōchhân-chhân買車來駛，m̄是厝內有liōng-siōng錢，mā m̄是hèng典愛面子，是想講已經50歲，ná來車ná濟，慢1-2年kám敢駛出門，結果第三工tō chhōa我去外埠頭參加研習，tō按呢踏入台文界研究台語台語文。

騎o͘-tó͘-bái出入內外半徑約25公里，chit-mái駛自用車，ē使得擴展到半徑200公里，南北二路，若有台語研究台語文研習討論phò-tāu，有興趣tō免驚路頭遠，交bē少有志，交換真濟知識，改變觀念kap研究方向。

1995年為著台語文，行入電腦寫作。進前《台文通訊》發行人鄭良光先生答應boeh kā我ê手寫稿拍字刊載，附帶以後定著ài用電子檔案投稿，無，伊校長兼摃鐘ē舞bē去。

講著電腦，斯當時40歲以上ê中年人，lóng認為he是少年囡仔ê專利，學校機關開始有電腦作業，少年囡仔hèng-chhih-chhih，中老年人驚kah boeh死，雖罔後來學校有倩人來教電腦資訊，大多數少年囡仔報名，中老年人mā有人參加，結局是學bē-ē。我mā算貧惰一个，無kā學電腦khǹg tī心內。

是因為為著寫台文，chiah致蔭我學電腦。1995年，後生已經是成功大學電機系學生，伊組裝一台電腦教我用，後--來張聰敏送我鄭良偉教授TW301，台文作家陳明仁紹介田中少年人賴彥君來厝--裡幫電腦灌軟體，並簡介hō͘我後生瞭解。自按呢開始學拍字，斯當時bat-tī林錦賢冊擔買4-50本歌仔冊，tō開始用漢羅lām寫方式翻寫做漢羅版電子檔案，親像三伯英台、陳三五娘⋯大約20外本，當做學習練功，電腦、輸入法、台語漢字、Pe̍h-ōe-jī，chiâⁿ做電子文字檔案ê製造生產。有電腦拍字，免用稿紙koh ē-tàng重複修改，省去足濟麻煩，存檔chiâⁿ做kài重要一个動作，bē記得存檔拍損一段文字一篇文稿，是四常發生ê無奈，有失落tō有進展，若有耐心重寫，重新思考ê效果，時常有想bē到奇蹟出現，人講扑斷手骨，顛倒勇，確實有道理。

閣來，厝--裡裝網路，後生教我用E-Mail，開始kap朋友空中交陪，有一工，良光兄講boeh kā我加入台語網taigu@googlegroups.com，有影青盲--ê m̄驚銃，馬上答應，結果網路傳來完全無漢字ê資料hō͘我，到底是啥乜碗糕，sa無liâu-á-mn̂g，一直等到後生轉來chiah了解，he是一陣有志應用Eudora Internet Mail Server軟體連絡ê團體，探討台語文化台語文字化ê台語網/望/夢，tio̍h是《台文通訊》ê討論組織。軟體是英文版，討論是無調符無連字號(hyphen”-“)ê Pe̍h-ōe-jī，chit聲慘--à，English m̄-bat我，Pe̍h-ōe-jī猶學無徹底，不得已叫後生kā軟體翻譯寫tiàm白紙、教我按怎使用，ná交陪ná學習，有人鼻聲符號寫N，有人寫nn，o͘ 用oo抑是ou代替，這猶算無問題，上悽慘tō是讀chit款chitkoann tnglolo botiauhu bolianjihu e kanliokPOJ。

Sńg久tō熟手，ē-hiáu E-Mail ē-hiáu tī 台語網taigu@googlegroups.com kap國內外朋友互動，擴大視野，真正無遠弗屆。台語網真正是臥龍藏虎所在，pe̍h-ōe-jī高手一大官捾，有教授有牧師有少年家有老根節，學Pe̍h-ōe-jī學人生哲學⋯

我ê台語文運動回憶：

 我ê台語文運動回憶：

▲參加「彰化縣台文通訊讀者聯誼會」了後，陳福當、游麗津、楊振裕、廖英雄、張聰敏、蕭平治chiâⁿ做主要柱仔跤，mā有一寡有志來捧場，台文運動者，海外有陳雷、鄭良光、林洪權，島內有陳明仁、陳豐惠來探訪，一時chiâⁿ做研究探討台語台語文ê場所，我mā m̄免koh孤單無人交流。代起先tī彰化市金馬路，後--來徙去民生路，上蓋感心tō是廖英雄兄，伊國校出業，學Pe̍h-ōe-jī有較食力，猶原認真出席，而且chah好料切水果盤來相請。

Chit段期間，我足拍拚學寫台語文、台語散文，有成篇投稿ê手寫稿4-5篇，因為是手寫稿，需要郵寄，寄出1篇koh 1篇，khiok-sī無hōe無poe，小可失望餒志，bē記得啥乜時日，陳雷、鄭良光sio-chhōa來探訪，經過張聰敏紹介，chiah知《台文通訊》創辦人是鄭良光先生，鄭良偉教授ê小弟，tòa-tī LA洛杉磯，原來鄭良偉ê「漢羅lām寫」觀念由鄭良光《台文通訊》來推廣。陳雷tòa-tī加拿大，是醫生是台語文作家，時常tī《台文通訊》發表散文小說。

歡喜phò-tāu交流意見，我kā良光兄怨嘆講：阿爸ê鹿角薰吹刊出了後，我足認真寫，已經koh投稿3篇，ná-ē lóng無消無息，敢講寫了無夠水準？原來良光兄無收著手寫稿，伊答應boeh幫我kā手寫稿拍字刊載。

總--是了解《台文通訊》發行人鄭良光先生是學校長兼摃鐘仔ê角色。

▲自從〈阿爸ê鹿角薰吹〉tī台文通訊發表了後，tō真認真想boeh創作漢羅lām寫台語文，斯當時田中國小校內發現兩隻客鳥，引起細漢時ê記智，tō開始思考boeh-án-chóaⁿ寫一篇散文，稿紙一張寫了koh一張，改了koh-chài改，一張換寫koh一張，經過兩三禮拜總--是完成一篇描寫客鳥做岫生湠ê散文，然後，家己唸了koh-chài唸，修改一擺koh一擺，驚做有欠點，tō拜托牽--e斟酌聽我讀，請伊進酌無妥當ê句讀kap描寫，最後chiah定稿。

定稿了後，暫時khǹg一爿，換題材koh-chài思考koh-chài寫。

Tī-teh寫《思母》過程，m̄知家己感動kah流目屎有幾擺，完稿仝款讀hō͘牽手聽，koh讀hō͘厝邊朋友聽，發現台語輕聲語尾詞ê重要性，he是感情表達ê聲情所在。Koh-lâi《相思 相思豆 相思栽 相思樹 病相思》，仝款開bē少時間去斟酌人、事、地、物ê舖排。

下面是手寫稿ê記錄：

第一篇手寫稿：1993/9《阿爸ê 鹿角薰吹》台文通訊第24期。後--來選輯tī台語文學有聲叢刊內。（2012/11/30授權國立台灣文學館「台灣本土母語文學常設展－線上網站」製作）

第二篇手寫稿：1994/4《客鳥》台文通訊29期。後--來選輯tī林央敏編《台語散文一紀年)》

第三篇手寫稿：1994/07《一張批，一通電話》台文通訊32期。

第四篇手寫稿：1995/08《思母》台文通訊41期。

第五篇手寫稿：1996/02《相思 相思豆 相思栽 相思樹 病相思》台文通訊45期。