Kng-thiⁿ pe̍h-ji̍t（光天白日）：

Kng-thiⁿ pe̍h-ji̍t（光天白日）：

Ū chhiū tō ū ńg

有樹tō有蔭

Ū chúi tō ū iáⁿ

有水tō有影

Chhân-chng pháng chhâm im-chúi kî

田庄pháng田im水期

Chúi-iáⁿ sì-kè gia̍p-gia̍p-si̍h

水影四界gia̍p-gia̍p-si̍h

Súi tō sī súi

媠tō是媠

Kiaⁿ-hiâⁿ koh ò͘-sim: 20200711 Lahjih

Kiaⁿ-hiâⁿ koh ò͘-sim:        20200711        Lahjih

Lāu-hòe-á-lâng kāu-jiō, tú-chiah khì pàng-jiō, pàng-jiō liáu-āu, hoat-hiān bé-tháng lāi-bīn ná-chhiūⁿ ū sè-bóe thâng-á, phû-tī chúi-bīn, sí-giān-giān bô-leh tín-tāng, kám-kak hò͘ⁿ-kî koh kiaⁿ-hiaⁿh, àⁿ-thâu khòaⁿ lān-chiáu-á, hoat-hiān lān-chiáu-á-thâu naih-kau só͘-chai, mā kiap 3-4-bóe, khióng-hông ê sim, ti̍t-chiap hoán-siā tōng-chok sûi kā póe-póe lo̍h-khì bé-tháng. Ná-ē án-ne? che-sī siáⁿ-mih óaⁿ-ko? ná-ē chhut-hiān tī chia? tùi tó-ūi lâi--ê? kám-ē-sī ùi jiō-tō cháu--chhut-lâi--ê? sio-liân-sòa ê hiau-gî hō͘ góa sim-chêng khióng-hông koh bô-nāi.

Siūⁿ-kóng ka-kī sǹg-sī ài chheng-khì ê lâng, kò-jîn ōe-seng ū chiàu-khí-kang, ná-ē tu̍t-jiân ū chit-khoán ò͘-sim boeh-thò͘-boeh-thò͘ ê tāi-chì hoat-seng, si̍t-chāi siūⁿ-bōe-chhun. Pún-chiâⁿ siūⁿ-boeh chhéng-kàu i-seng pêng-iú, siūⁿ-kóng iáu-sī seng Google--chi̍t-ē khah-kín: "ū-khó-lêng sī giô-thâng[蟯蟲], khah-lím 1cm tn̂g, sī gín-á-lâng khah-ē òe--tio̍h ê kià-seng-thâng, it-poaⁿ chhut-hiān tī pùn-kháu, koàn-sì kóng pùn-kháu-thâng, mā-ē chhut-hiān tī phōng-kong". Chhut-hiān tī phōng-kong? án-ne m̄-tio̍h-sī ùi jiō-tō pàng--chhut-lâi--ê? kiaⁿ-sí-lâng, ū-kàu thái-ko ò͘-sim, hō͘-góa kám-kak boeh-thò͘-boeh-thò͘.

Taⁿ boeh án-chóaⁿ chiah-hó, sui-bóng giô-thâng m̄-sī kài oh-tī ê chìn-thâu, siūⁿ-tio̍h chia̍h kàu chi̍t-ê nî-hòe, kóng ū giô-thâng ùi jiō-tō pàng--chhut-lâi, m̄-nā ò͘-sim, koh-khah kám-kak kiàn-siàu-tāi, jú siūⁿ jú ak-chak⋯⋯Kóaⁿ-kín kā lān-chiáu-á sé hō͘ chheng-khì chheng-khì, tán-thāi koh pàng-jiō chiah koh koan-chhat, chiah chò phah-sǹg.

Nn̄g tiám-cheng āu, koh ji̍p-khì piān-só͘ pàng-jiō, chim-chiok khòaⁿ, ná-chhiūⁿ bô koh-iūⁿ, jiō pàng-liáu, the̍h chi̍t-tiûⁿ ōe-seng-chóa boeh chhit lān-chiáu-á, che-sī kúi-nā-nî lâi ê koàn-sì, lāu-lâng m̄-nā kāu-jiō, múi-pái pàng-jiō lóng-ē lâu chi̍t-sut-á jiō-bóe, n̂g-n̂g sió-khóa liâm-liâm, nā-bô chhit chheng-khì, tiāⁿ-tio̍h ē tò͘-tio̍h lāi-khò͘, nā keh-kang koh bô ōaⁿ khò͘, it-tēng sī chhàu-hiam-hiam, chiâⁿ-chò lāu-lâng-hiàn.

The̍h ōe-seng-chóa chhit chheng-khì, boeh kā khò͘-kha pàng--lo̍h-khì, kî-koài ê hiān-siōng koh hoat-seng, lān-chiáu-á-thâu chhut-hiān pe̍h-pe̍h ê mi̍h, thián-khui hóe-gán kim-cheng chi̍t-ē khòaⁿ, goân-lâi sī ōe-seng-chóa ê chóa-iù-á, chèng-kì tī chia, chèng-kì lia̍h--tio̍h--à, siā thiⁿ siā tē, kám-siā ī--ā kap lāu-pē, eng-àm ē-tàng an-ún lo̍h-bîn--ā!

Ūi-siáⁿ-mi̍h chìn-chêng ē ba̍k-hoe khòaⁿ tâⁿ--khì? khó-lêng mî-iù-á kauh liáu siuⁿ-kú ka-kī kńg-lian, khòaⁿ--khí-lâi kài-sêng sè-bóe giô-thâng; nn̄g-lúi ba̍k-chiu khui-to 3-pái m̄-sī goân-in, sī-bāng-mo̍͘h, pe̍h-lāi-chiàng chhiú-su̍t āu ê hiō-ûi-chèng,  khòaⁿ, iû-goân khòaⁿ chin-hng, khó-sioh kái-sek-le̍k bô hiah-nī chheng-chhó, khòaⁿ sī ū khoàiⁿ, hêng-thé chóng-sī kám-kak bông-bông, chia̍h-lāu ū-iáⁿ chin-chē bái, che-sī chèng-siông, án-chóaⁿ kai-koat bái-châi chò-chiâⁿ ê put-piān sū-si̍t, su-iàu lí-tì tùi-thāi, m̄-thang kín-tiuⁿ, m̄-thang bê-sìn, ū-tāi-chì chhōe i-seng chín-toàn tī-liâu sī siāng iàu-kín, siang-sìn kho-ha̍k, siang-sìn i-ha̍k sī góa chia̍h-lāu lāu-po͘-tiāⁿ ê hoat-pó.

阿仙kap 阿蟬----修正版 20200704 Lahjih

01_阿仙kap 阿蟬----修正版        20200704     Lahjih

1-phiàn樹林，樹 á懸koh ōm，樹頂鳥隻滿滿是，吼聲響亮鬧熱chhih-chhih，樹跤真清涼，樹葉 á lak kah滿四界，塗跤兜tòa 1 群 6 支跤ê蟬 á族，蟬 á族ê族人攏真gâu坐禪，in ê囡 á自出世落塗，就注定著匿入去塗跤兜生活，匿tiàm塗孔內7、8冬，chiah-thang bùn出來地面看光景、chhit-thô、唱歌交朋友。

Chit群6支跤ê蟬 á族內面有1家夥 á，hō͘ in 父母飼tiàm 1 欉大欉樹 á跤，1日到暗攏tī洞內leh生活，tiām-chut-chut，無話無句m̄講話，看in ê 生做，實在無sêng in父母，身軀khiau痀khiau痀，穿1領戰甲ná外星人ê裝甲兵，行著路那龜leh趖，tòng-gōng tòng-gōng，1屑 á to無像in父母hiah-nī活跳gâu飛，閣較無像in老父hiah-nī gâu唱歌。雖然in bē曉飛閣bē曉講話，m̄-koh in攏歡歡喜喜過日，mā會曉用表情、比手畫刀來交陪，交換意見，參詳代誌。生活過著真平靜，一直到有1工，m̄知按怎？突然間，in逐家攏想boeh bùn出去洞口外，in ê心情感覺chiâⁿ pek-chhek，ná像有啥物歹空--e tih-boeh到位？逐家心內起恐惶，m̄知影boeh按怎？

「哪會chiah-nī bē 自在？到底是啥物代？拜託逐家想看覓！想看有啥物好辦法來排解？」tng-tong逐家激破頭殼，想bē 出好主意ê時陣，有1隻蟬 á提出意見：

「恁敢bat聽過1个傳說？」

「啥物傳說？」

「講咱ê祖先交代落來ê教示，傳說中講咱蟬 á族ê囝孫，攏會tī父母kā咱生出來了後，經過7、8冬成長，身體著會起變化，提醒咱tih-boeh轉大人，hit時陣咱著愛注意sè-jī‥‥‥喂！咱幾歲--à --haⁿh？」

「7歲！」

「M̄是，是8歲！」

「Ah chit-ê傳說敢有證據？」

「有！聽講khǹg-tiàm 1个祕密ê所在。」

「應該是著斟酌ê時陣--ā，逐家chhōe看覓，chhōe看有遺書抑是啥物古早ê冊、地圖--無？」

「Ah！有--ā，tī-chia，請你看覓--leh ！」有1隻蟬 á chhiau tio̍h 1張黃gâm-gâm ê字紙，隨時交hō͘提出意見ê hit隻蟬 á斟酌看詳細‥‥‥

「到底是寫按怎？較緊報告hō͘ 逐家知！」

提出意見ê hit隻蟬 á，規氣將hit張字紙貼tàm壁堵hō͘逐家看詳細。

各位乖囝：

逐家平安！逐家恭喜！恭喜恁boeh轉大人，會使得出外扑拼，雖然阿爸阿母生恁八兄弟，就來離開恁ê身邊，m̄-koh阮攏真思念恁，7、8年來，恁攏真乖巧，互相照顧，互相參詳，m̄-bat 冤家勞債，hō͘阮感覺誠安心誠hiau-pai，chit-mái恁已經大漢，tih-boeh出去外口扑拼，表現恁ê才能，展現咱蟬 á族ê歌喉hō͘人聽，逐家著愛較sè-jī--leh ，tih-boeh 轉大人， tih-boeh出外扑拼，心內緊張，心情驚惶是難免，總是逐家著m̄-thang青狂，事事項項ta̍uh-ta̍uh-á來，會記得，著1步1步趖出洞口，m̄-thang相爭，千萬著記hō͘清楚下面幾項祖先ê交代：

第一：出洞口ê時間著算hō͘準，ùi日頭落海到半暝 á 12點進前，siuⁿ緊siuⁿ慢攏m̄-thang。

第二：出洞口著愛一直趖，勇敢向前行，m̄-thang停睏，tn̄g著樹 á就開始peh，peh愈kôan愈好。

第三：心情放輕鬆，啥物時陣褪殼，免擔心m̄免急，時間若到，自然著會「羽化」。

第四：天光早起（chái）天若phah-phú光，lín ê翼股已經ngē-chiāⁿ就趕緊展翅飛，開始展現你ê歌聲。

著--lah，恁八兄弟，阿爸阿母已經先kā恁號名號好勢：大--ē叫阿仙（sian ），唱歌kôan音輕聲閣會牽絲；第二--ē叫阿癬（sián），頭殼有1跡青斑為記；第三--e叫阿煽（siàn），個性無lám無ne，無精神，上hō͘阿爸阿母擔心；第四是阿設（siat），唱歌猛脆pīn-tōaⁿ牽聲；第五叫阿蟬（siân），上巧上gâu唱歌上gâu牽聲；第六--ē mā叫阿蘚，伊kap第二阿癬個性相像；第七--è個性善良古意古意叫阿善（siān）；第八阿舌（sia̍t），吼聲猛脆個性有較急；che攏是天生自然，m̄是父母偏心thiau-kang kā恁生無仝款。

祝順利，生活快樂！

阿爸阿母 留

提出意見ê hit隻蟬 á等逐家看清楚了後，閣再1擺kā逐家提醒，父母交代ê話著愛聽，祖先交代ê 規矩著遵守，啥物時陣著出洞門，隨人斟酌，等你脫殼變做1隻會飛會吼hiau-pai有自信ê蟬了後，你一定愛會記得相chhōe，chhōe著咱ê兄弟，「扑虎掠賊親兄弟」，有團結chiah會出頭天。

經過2、3工後，樹林內又閣增加bē少歌聲，siat.siat.siat.siat ；siat.siat.siat.siat ，響聲滿山坪，有hit-lō kôan 聲，有hit-lō低調，有hit-lō長聲會牽絲，mā有hit-lō chhè聲ná切齒，kui-ê樹林內交響著好聽音樂聲，充滿歡喜，充滿希望。突然間有蟬ê喝咻聲：

「啊！阿蟬~！阿蟬~！我tī-chia！你有看著我--bò？」

「啊！你是阿癬--ho͘ⁿh？你ê頭殼額 á有1跡，一看就知影你是阿癬！」

「是--lah！我是A-sián！ah其他ê兄弟--leh？」

「我是阿仙！」m̄知tī時hit隻kôan音會牽絲--e mā飛來tī in ê身軀邊。

「實在歡喜，恭喜逐家會當順序蟬蛻（siân-thòe），chit-má已經3个報到，chhun--e咱大聲喝咻--一下，kā in kho͘-kho͘轉來做堆，我喝chi̍t、nn̄g、saⁿ，逐家就大聲咻。1、2、3 ！」

「阿善~！阿煽~！阿設~！阿舌~！阿蘚~！」 呼boeh chiâⁿ 10 分鐘，8兄弟已經chiâu到位，有講有笑，歡喜kah，歡喜in蟬蛻成功，閣團圓做堆。

兄弟相認了後，就共同推薦阿蟬做班長，阿蟬表示感謝了後就開始講話：

「會當做蟬á族是真hiâ-pai  ê福報，咱著代先來展寶蟬 á族ê才能hō͘森林內ê眾朋友知，chit-mái咱按大細ê順序排1列，我若喝開始，逐家就照順序吼聲，輪流唱4遍。」

「按呢是boeh創啥貨？」

「唱--落去著知影。準備！開始！」

「sian、sián、siàn、siat、 siân、sián、siān、sia̍t；仙、癬、搧、設、蟬、蘚、善、舌；sian、sián、siàn、siat、siân、sián、siān、sia̍t；仙、癬、搧、設、蟬、蘚、善、舌」

「Ó͘！ná會chiah-nī好聽！節奏輕鬆閣那leh拍phek--leh！」

「M̄-nā按呢！咱mā會使得1个獨唱，抑是2个輪唱，阿設kap阿舌過來chia，恁2个表演hō͘逐家聽。」

「siat.siat.siat.siat.siat.siat.siat.siat.siat.siat.siat.siat…」阿設先出聲。

「sia̍t.sia̍t.sia̍t.sia̍t.sia̍t.sia̍t.sia̍t.sia̍t.sia̍t.sia̍t.…」續落去阿舌仝款1个獨唱。

「按呢獨唱有較無味，阿舌！你先開喙，阿設tòe你後尾，連續吼10秒，開始！」

「sia̍t.siat.sia̍t.siat.sia̍t.siat.sia̍t.siat.sia̍t.siat ……」

Pho̍k-á聲充滿山坪，蟬 á聲齊響，阿設kap阿舌愈唱愈soah-phah，愈唱愈āng聲。

「阿癬、阿仙、阿善、阿煽，恁4个來頭前，mā照順序吼4-ûn，拜託恁特別注意節奏ê緊慢kap聲音ê大細，阿癬唱強拍，阿煽上低。」阿蟬繼續交代。

「Kan-nā阮4个按呢輪流唱，敢會好聽？」阿煽無啥自信ê款。

「會！唱落去你就知！閣講1遍，特別注意節奏ê緊慢kap聲音ê 大細，阿癬唱強拍，阿煽上低。開始！」

「癬、仙、善、煽；sián、sian、siān、siàn；癬、仙、善、煽；sián、sian、siān、siàn。」

「有影bē-bái聽to-tio̍h，不過猶是阿設kap阿舌in 2个ê歌聲較mé-chhè，較有精神。」

忽然間，遠遠傳來o-ló兼有淡薄 á giâu-gî ê笑聲：

「讚！讚！讚！實在有影讚！gâu唱歌閣有好滋味，1仙、2癬、3搧、4設；5蟬、6蘚、7善、8舌；chi̍t-sian、nn̄g-sián、saⁿ-siàn、sì-siat；gō͘-siân、la̍k-sián、chhit-siān、peh-sia̍t。哈！哈！哈！哈！讚！讚！讚！讚！實在有影讚！gâu唱歌閣有好滋味！」ná像鳥 á ê笑聲。

「眾兄弟，著注意，m̄-thang kan-nā顧唱歌，顧iāng氣，災難有可能tī你ê身邊，隨人著sè-jī；阿爸阿母生咱8兄弟，並無半个姊妹kap咱鬥陣做堆，會記得，查某囡 á攏是較pì-sú，in攏m̄講話，tiām-chih-chih，咱若boeh娶某boeh交女朋友，一定著展功夫，認真kho͘，認真吼，拚勢chhōe，著會chhōe-tio̍h好妻兒，tú-chiah hit-ê o-ló ê笑聲，m̄是真正經，隨時著注意，祝逐家好運，幸福過日，再會！」

Chit个樹林內，樹 á真ōm 真大欉，樹頂鳥隻滿滿是，對蟬 á族來講，雖罔充滿危機，為著生活，為著生湠，吼聲猶原響亮鬧熱chhih-chhih：

siat、siat、siat、siat！siat、siat、siat、siat！蟬 á飛出來啦！

siat、siat、siat、siat！siat、siat、siat、siat！熱天已經到了！

siat、siat、siat、siat！siat、siat、siat、siat！天氣真正炎熱！

siat、siat、siat、siat！siat、siat、siat、siat！蟬 á歡喜唱歌！

附錄：台語囡 á歌

蟬 á siat-siat （siân-á siak-siak） C 調  2/4 

小青蛙：[ 53 33 /53 33/5.6 53 /4  2. /42 22 /42 22/4.5 42 /3 1. /

53 33 /53 33 /5.6 53 /4  2. /42 22 /42 22 /4.5 42 /3 1. //]

siat、siat、siat、siat！siat、siat、siat、siat！蟬 á飛出來啦！

siat、siat、siat、siat！siat、siat、siat、siat！熱天已經到了！

siat、siat、siat、siat！siat、siat、siat、siat！天氣真正炎熱！

siat、siat、siat、siat！siat、siat、siat、siat！蟬 á歡喜唱歌！