蹛旅社ê khiat-chiat----不理異象：

蹛旅社ê khiat-chiat----不理異象：              Lah-jih 20181030

導遊房間分配好勢，行李拖--leh綴人上樓揣eng暗ê房間。

頭前王太太phah開房間門：「攪擾，借蹛一暗。」

紲落去李小姐，先kho̍k三聲門扇，phah開房間門：「借蹛一暗！」

閣來是我ê房間，直接開鎖phah開房間門，插卡片開電火，先檢查水電開關設備。

入喙電火ná-ē無to̍h？老歲仔目看無開關ê說明，字是hiah-nī細，著去揹仔提目鏡來chîn，phah開所有開關，換來拵水道水，想boeh用蓮蓬濺來沖洗浴桶，仙拵都拵無水，試che驗he，無張持soah揤著紅色鈕仔，電話liang-liang一直響，服務櫃台問講啥乜代誌？等一時仔有人來處理，ē-tàng解決bē-tàng解決--è攏OK，已經10點外，趕緊洗蕩準備歇睏。

倒落眠床，感覺翕熱睏bē去，揣冷氣調整tī 17度，結果一屑仔作用都無，調整幾若遍，tō是翕熱原在，實在睏bē去。按說明敲電話去服務台，tō是敲bē通，不得已閣揤hit粒紅色鈕仔，有人來，講冷氣只有冷風，冷風bē涼，幫你phah開通風門窗，微微仔涼風吹入房已經舞boeh到12點，好佳哉，一醒到5點半精神，開始整理行李準備今仔日ê行程。

早頓食飽，準備上車起程，眾人一直會無停，王太太講昨暗睏bē去、李小姐嫌昨暝傷翕熱、有人講房間設備傷舊、有人喝講昨暝規暝無睏⋯⋯

總講一句，原來逐間房間攏有狀況攏有無kah意。

079Hì-pan-á（戲班仔）＞紅山椒鳥、灰喉山椒鳥＞Gray-throated Minivet.

079Hì-pan-á（戲班仔）＞紅山椒鳥、灰喉山椒鳥＞Gray-throated Minivet.

Hì-pan-á（戲班仔），古早嘛叫做五色鳥，噶瑪蘭廳志（kap-má-lân：宜蘭）：『五色鳥，出柑仔潭。大小不一，數十為群，啁啾互答，巧輕如戲。』

Hì-pan-á（戲班仔），公--ê羽毛以印色紅為主，母--ê是黃色tsiânn豔ê黃色。m̄是生湠ê期間，時常kap山烏鶖結做伙活動，數十隻tī樹林頂層抑是大樹頂，因為山烏鶖羽色照著日頭，展現做tsiânn光豔ê青藍色，樹蔭跤是烏色，煞變做青、藍、黃、紅、烏等五彩插雜ê鳥群，名為五色鳥。閣定定有大目khóng-á tuè tī後壁，Hì-pan-á（戲班仔）全長17cm，山烏鶖21cm，『大小不一，數十為群，啁啾互答，巧輕如戲。』Hì-pan-á（戲班仔）就是按呢號名。

Hì-pan-á（戲班仔），生活tī中、低海拔山區闊葉樹林內，波浪形飛行，毛色影目，食昆蟲kap in-ê幼蟲，漿果kap果子。

相命喙m̄是hô͘-lùi-lùi： Lah-jih 20181029

相命喙m̄是hô͘-lùi-lùi：               Lah-jih 20181029

Láu陳--ē急boeh kā in囝娶娶某，去揣熟似ê相命仙問姻緣，啥乜時陣婚頭ē浮？伊問相命禮著偌濟錢？

相命仙比5支指頭仔。

Láu陳--ē：5箍。   相命仙搖頭。

Láu陳--ē：50箍。   相命仙搖頭。

Láu陳--ē：500箍。   相命仙仝款搖頭。

Láu陳--ē：5000箍？敢bē傷酷刑？

相命仙：bē，chit个命格值得五千箍。按呢--lah，先kā你收50箍，有準，一個月後chiah koh收四千五百箍。

講也奇怪，經過無半個月，Láu陳--ē真正歡歡喜喜提四千五百箍去kā相命仙--e說多謝。

相命仙ê好朋友真好奇問相命仙--e：你ná-ē chiah-nī神機妙算鐵口直斷？

相命仙笑笑仔講：ná有啥乜神機妙算，ah tō chhàu-tú-khám--lah，網路拄好看著政府公佈高鐵徵收土地ê消息，Láu陳--ē ê甲外地水田tō佇高鐵範圍。

078Gû-sái-tsiáu-á（牛屎鳥仔）＞鶺鴒（tsit-lîng）＞Wagtails.

078Gû-sái-tsiáu-á（牛屎鳥仔）＞鶺鴒（tsit-lîng）＞Wagtails.

Gû-sái-tsiáu-á（牛屎鳥仔），生活tī草原、溪埔，tī牛屎堆內tshuē蠓仔、胡蠅、抑是in-ê幼蟲（蛆）食，m̄-tsiah hōo人號做Gû-sái-tsiáu-á（牛屎鳥仔），雖然無好聽，m̄-koh tsiânn有鄉土味。

Tī台灣猶有灰鶺鴒kap黃鶺鴒兩種，攏是普遍ê冬候鳥，tī開闊ê田園、溪埔仔、塚仔埔、報岸（壩岸、溪岸）活動，tī水濱tshuē食，看著飛蟲隨時起飛thóng食，飛行姿勢sîng~~~形（波浪形），tī地面奔走tsiânn緊，停睏時尾會sìm--一下sìm--一下，真古錐。

077ìnn-á（鳦仔）＞燕、雨燕＞Swallows, Swifts.

077ìnn-á（鳦仔）＞燕、雨燕＞Swallows, Swifts.

分類上ê燕kap雨燕是兩種無仝ê鳥類，kan-na形態kap生態有淡薄仔仝款niâ，in攏tī空中食蠓蟲、頷頸短、身軀流線形、翼尖閣長、跤短無力…因為遮ê無仝，傳統上咱攏kā叫做ìnn-á（鳦仔）。

赤腰燕，伊ê下頷到胸坎、腹肚有烏牛屎色ê花斑，叫做hue-ìnn-á（花鳦仔），燕科鳥類ê跤爪，三前一後，會當歇tī樹枝、竹枝、電線頂，tī塗跤咬塗tī厝蓋內面做岫；雨燕kan-na有前爪無後趾，所以無法度徛立，嘛bē當歇tī樹枝、竹枝、電線頂，tshuē食、咬塗、lim水、洗浴，甚至交尾攏tī空中進行，暝--時tsiah用鉤形ê跤爪鉤tī壁頂歇睏。

候鳥ìnn-á（鳦仔）ê歸巢性，一般攏hōo人叫是每年仝一對ìnn-á會轉來仝一个所在，有人做過實驗，機率無大，7％左右niā-tiānn。

竹北新瓦屋參觀古蹟二：

竹北新瓦屋參觀古蹟二：
▲新瓦屋舊厝遺跡：有兩欉番仔花，樹形chiâⁿ媠。

▲新瓦屋舊厝遺跡：塗墼厝留落來地基水裙，是石頭用紅毛塗khōng--ē。

▲新瓦屋舊厝遺跡：隔間壁堵mā是塗墼疊--è。

▲新瓦屋舊厝遺跡：風頭壁驚潑雨，疊紅磚仔。

▲新瓦屋舊厝遺跡：灶跤磚仔大灶，有大鼎無細鼎。

▲塗墼厝風頭壁，柱仔位疊磚仔，壁堵疊塗墼，需要抹一重紅毛塗chiah koh抹白灰。

▲厝後有三模竹，竹頭真濟，是老竹模。

▲he竹模kài-sêng Hō-ló人「竹圍厝地」ê刺竹模，不過比較較細支、無竹刺，he甲箬仔mā較細。若是Hō-ló人「竹圍厝地」ê刺竹，m̄-nā ē-tàng起竹管厝，甲箬仔mā ē使得苴籠舖(lâng-pho͘)炊甜粿。

▲六角鼓井：六角鼓井tī客人庄bat看過，造型chiâⁿ媠。若是Hō-ló人庄攏是圓形。謎猜：一个物仔圓lin-lin，百个人扛bē起身。tō是圓形鼓井。

竹北新瓦屋參觀古蹟一：

竹北新瓦屋參觀古蹟 一：
▲竹北「新瓦屋」是全國第一間「客家文化保存區」，1805年起造ê Hakka(客家)小庄頭，舊厝是塗墼厝，年久月深，無情風雨損蕩，kan-na chhun地基壁堵隔間痕跡，留hō͘序細做歷史回想。
1973年重起新厝是正身護龍紅磚崁瓦厝宅，正身是「忠孝堂」公廳，公媽龕祀十幾座公媽牌，屬「祖廟」格式，m̄是一般公媽廳。公媽龕下面服祀 思格之神「福德龍神」。土地公信仰kap Hō-ló人仝款，不過Hō-ló人ê祖厝無祀福德龍神。「新瓦屋」入喙有圍牆門樓，題「西河世第」，非常氣派。

▲門樓：「新瓦屋」入喙有圍牆門樓，題「西河世第」，非常氣派。














▲公媽龕：正身是「忠孝堂」公廳，公媽龕祀十幾座公媽牌，應該是祖廟才著。














▲思格之神 福德龍神：服祀tī神龕下。土地公信仰kap Hō-ló人仝款，不過Hō-ló人ê祖厝無祀福德龍神。
















▲護龍（hō͘-lêng）：紅瓦厝（âng-hiā-chhù），砛簷（gîm-chîⁿ）水裙（chúi-kûn）舖石頭鞏紅毛塗，門框 (mn̂g-kheng)窗仔門框疊紅磚。壁堵（piah-tó͘）可能是塗墼（thô͘-kat）抹紅毛塗石灰。










▲窗仔門（thang-á-mn̂g）：紅磚窗仔門框，鐵條窗仔門止（thang-á-mn̂g-chí）。










▲番仔花（hoan-á-hoe）：忠孝堂門口金亭邊chit欉白花雞卵花，chiâⁿ媠。雞卵花是3-400年來，庄頭常常看著ê番仔花。有紅有黃有白。










▲厝宅後壁面ê紅磚仔、塗墼壁堵，石頭khōng ê水裙。










▲塗墼厝ê壁堵是塗墼疊--起來ê，需要閣抹紅毛塗抹白灰，chiah-bē沃雨損害。










▲厝後排水溝，是石頭gih--è。

075tshenn-si̍t-á（青翼仔）＞八色鳥＞Blue-winged Pitta.

075tshenn-si̍t-á（青翼仔）＞八色鳥＞Blue-winged Pitta.

tshenn-si̍t-á（青翼仔）ê翼股頭所在，有青藍色金sih-sih影目ê羽毛，tsiânn súi，m̄-tsiah kā號做tshenn-si̍t-á（青翼仔）。

tshenn-si̍t-á（青翼仔）tī台灣是罕有ê夏候鳥，生活tī低山區樹林下，近水邊陰溼ê所在。兩支跤骨tsiânn勇，tī塗跤兜跳來跳去tshuē物食。短距離ê飛行kap釣魚翁仝款，快速無聲直飛，歇tī樹頂時，尾sìm--一下sìm--一下ê動作kap釣魚翁嘛tsiânn仝款，做岫tī雜木林樹仔頂，鳥仔囝tī母鳥喙內討食了後，習慣攏會順紲放屎，屎包ná像果凍kui丸kian-kian，鳥母會隨時用喙pe kā伊咬去tàn掉。

074Tok-tshiū-tsiáu（啄樹鳥）＞啄木鳥＞Woodpeckes.

074Tok-tshiū-tsiáu（啄樹鳥）＞啄木鳥＞Woodpeckes.

  

Tok-tshiū-tsiáu（啄樹鳥），根據伊ê聽覺，若發現樹椏內有雞母蟲（甲蟲ê幼蟲）抑是白蟻，一定挖皮啄空，kā蟲啄出來食。

Tok-tshiū-tsiáu（啄樹鳥）tshuē蛀蟲kap剝樹皮ê效率tsiânn強，實在hōo人想bē到，效率好，嘛tsiânn gâu食。伊ê喙pe尖閣tīng，非常有力，舌頭特別長，尾羽硬腹，貼tiàm樹椏，有固定穩定鳥身ê作用，跤爪前後各兩爪，攏真尖，後爪會使tsit掠坦橫，防止身軀邊搖來搖去。

台灣ê Tok-tshiū-tsiáu（啄樹鳥）有三種，攏是留鳥，大赤啄木kap綠啄木分布tī中、高海拔山區；小啄木tī低海拔山區，是定定看會著ê鳥仔，通常歇tī大箍ê樹椏。

登彩虹瀑布：

登彩虹瀑布：之一

明知chúi-chhiâng無彩虹，山坪猶原青蘢蘢，

落雨答滴山路滑，雙人慢步跤無停。

河溪缺隙水沖落，見證兩老愛情好，

驚人m̄知大聲喝，盤山過嶺一直褒。

登彩虹瀑布：之二

白色chúi-chhiâng天頂lak，千軍萬馬bē齷齪，

哥哥妹妹鬥陣行，紅塵俗事放挕捒。

自然交響深山內，旋律節奏無牽礙，

只要有情閣有愛，自自然然上和諧。

登彩虹瀑布：之三

搪著落雨天，瀑布咱獨享，

雖罔無彩虹，兩人ê清閒。

來回兩點鐘，peh崎時時停，

落崎雨水滑，chiah知依倚情。