Pe̍h-hīnn-á（白耳仔）＞白耳畫眉＞White-eared Sibia.

Pe̍h-hīnn-á（白耳仔）＞白耳畫眉＞White-eared Sibia.

Pe̍h-hīnn-á（白耳仔），有白色ê耳羽，非常明顯。是台灣ê特有種，分布tī中海拔山區，生活tī樹尾頂，kui群活動，鳴聲優美響亮好聽會牽聲。

Tī台灣懸山聽著tsit種尾音會牽聲ê鳥仔，ùi北美洲來ê愛鳥朋友按呢講：無論音色抑是聲調，kài-sîng美國囡仔看著美女ê呼si-á聲。

愛食昆蟲、幼蟲、果子、漿果kap花蜜。

107Sì-bâi（四眉）＞金翼白眉、台灣噪眉＞Formosan Laughing Thrush.

107Sì-bâi（四眉）＞金翼白眉、台灣噪眉＞Formosan Laughing Thrush.

Sì-bâi（四眉），就是有4 kâi目眉ê意思，Sì-bâi（四眉）有眉斑kap顎斑，目睭頂下兩條tsiânn明顯ê白色羽紋，成做美麗ê 4 kâi目眉。聲音響亮順耳，bē噪人耳。

Sì-bâi（四眉），是台灣特有種，是台灣畫眉科分布tī海拔上懸ê鳥類。Kui陣歇tī樹欉跤、雜草內，嘛tsiânn tsia̍p出現tī部落ê厝邊khioh糞埽堆ê食物。鳴聲優美響亮，食昆蟲、幼蟲、漿果，有時嘛食四跤蛇。

106Tek-kha-hue-bî（竹跤花眉）＞小彎喙＞Lesser Scimitar Babbler.

106Tek-kha-hue-bî（竹跤花眉）＞小彎喙＞Lesser Scimitar Babbler.

往過台灣庄跤ê周圍抑是厝宅後壁，攏會種一bôo一bôo ê刺竹做籬笆，遮風兼防賊，竹圍仔、竹圍仔，就是刺竹圍ê意思。Tek-kha-hue-bî（竹跤花眉）就是活動tī刺竹圍（嘛有燈籃花圍）內面ê花眉，tī遐tshuē食、做岫、生湠。

Tek-kha-hue-bî（竹跤花眉），閣叫做奸臣仔鳥，因為伊ê頭殼面容花niau-niau ná奸臣--leh，嘛叫做花眉舅仔。

Tek-kha-hue-bî（竹跤花眉），kap人tuà鬥陣，m̄驚人，卻是tsiânn巧tsiânn精，動作活跳，身軀閣有白斑，tī竹跤出入tsiânn影目、tsiânn súi。歇tī低山區ê雜木仔林、草菢內，是普遍ê留鳥。

104Hue-bî（花眉）＞畫眉＞Formosan Hwamei.

104Hue-bî（花眉）＞畫眉＞Formosan Hwamei.

[感謝鄭光熙先生鳥仔相片]

Hue-bî（花眉）kui身ê羽毛色水是草橄欖色，有烏咖啡色ê條仔tsua̍h，m̄-koh無白目眉，所以台灣人kā叫做Hue-bî，並m̄是『畫眉』。

Hue-bî（花眉），翼短無gâu飛，嘛飛bē遠，兩支跤骨活跳硬tsiānn，經常歇tiàm密tsiuh-tsiuh ê細欉樹林、林投抑是藤仔內，早當時ê台灣，林投是防風林，到處攏有，Hue-bî（花眉）時常出現tī hit內面，所以有「林投Hue-bî」ê俗稱。

以昆蟲kap幼蟲、果子、漿果為主食，生湠、做岫tī旺欉ê樹林內、用雜草、樹根、樹葉做碗形ê岫。

102oo-ki（烏磯）＞紫嘯鶇、臺灣紫嘯鶇＞Formosan Whistling Thrush.

102oo-ki（烏磯）＞紫嘯鶇、臺灣紫嘯鶇＞Formosan Whistling Thrush.

oo-ki（烏磯），規身軀ê羽衣屬深藍茄仔色，遠遠看烏金烏金ná像烏色--ê。活動tī山溪仔水濱，抑是水面ê石頭頂，oo-ki（烏磯）oo-ki（烏磯），庄跤人煞轉音做ôo-khit（胡乞）。

oo-ki（烏磯），公鳥母鳥攏仝色，分布tī中、低海拔山區，是普遍ê留鳥，有顧岫顧鳥仔囝ê本能。

101tshù-kak-tsiáu（厝角鳥）＞藍磯鶇＞Blue Rock Thrush.

101tshù-kak-tsiáu（厝角鳥）＞藍磯鶇＞Blue Rock Thrush.

tshù-kak-tsiáu（厝角鳥），嘛號做厝客，in是候鳥，部份是留鳥，秋去春來，每年一定飛轉來，親像轉來leh做人客，做岫tī厝角，所以hōo人號做tshù-kak-tsiáu（厝角鳥）、厝客，tsiânn有鄉土味。

因為tshù-kak-tsiáu（厝角鳥）每年轉來攏tuà仝个厝角，ká-ná房屋所有權人ê憑證，閣kā號名tshù-khè（厝契）。in足愛徛tī厝角頭抑是石頭頂，恬恬等待獵物出現，突然掠食，tsiah閣轉來原位，以昆蟲kap幼蟲為主食。