2019 Happy New Year !新年恭喜

099âng-bué-tang-á（紅尾噹仔）＞鉛色水鶇＞Formosan Plumbeous Water-Redstart.

099âng-bué-tang-á（紅尾噹仔）＞鉛色水鶇＞Formosan Plumbeous Water-Redstart.

âng-bué-tang-á（紅尾噹仔），公鳥除了尾kap腹肚是紅咖啡色以外，賰--ê大部分是phú-phú ê niáu鼠仔色，tsiânn古錐可愛ê山溪仔鳥。歇tī中、低海拔山區有坑仔水leh流ê石頭堆，定定看in tī水濱tòm--一下tòm--一下，抑是展開尾羽，雙雙對對出現，互相呼聲應答，飛行時公鳥紅咖啡色ê尾羽非常影目。

âng-bué-tang-á（紅尾噹仔），以水面kap溪石頂ê昆蟲為主食，生活tī溪流邊，無論tshuē食、求偶、生湠攏真少離開倚溪邊ê兩爿山坪。

100oo-pe̍h-tang-á（烏白噹仔）＞小剪尾＞Formosan Little Forktail.

oo-pe̍h-tang-á（烏白噹仔），羽衣烏插白，喙pe烏烏，腹肚下kap兩支跤白皙皙，是山溪仔小型鳥。體刑大細kap âng-bué-tang-á（紅尾噹仔）鉛色水鶇差不多，是垂直分布較普遍ê鳥類，tī海拔3600m ê懸山，老濃溪源頭玉山國家公園有伊ê跤跡，tī大安溪中游溪邊，四角林林場海拔500m所在，嘛有伊ê形影。大部分單獨行動，順山溪仔邊沿路tshuē食。

098âng-kui-á（紅kui仔）＞野鴝（kî）＞Ruby-throat.

098âng-kui-á（紅kui仔）＞野鴝（kî）＞Ruby-throat.

註：『頸子』台語叫頷頸（ām-kún），頷頸ê前面有食道ê所在叫做ām-kui，『甲狀腺腫』台語就是大ām-kui。

âng-kui-á（紅kui仔）ê公鳥，ām-kui紅紅，是非常豔麗ê深紅色，âng-kui-á（紅kui仔）、âng-kui-á（紅kui仔），就是日本名野鴝（kî）ê台灣在地名。

âng-kui-á（紅kui仔），生湠tī東北亞，寒--人南移東南亞各所在，每年秋天飛來台灣避冬，tuà到隔轉年四--月，猶算是普遍ê冬候鳥，活動tī低海拔ê山地kap平地，覕tiàm低欉ê樹林內，tī塗跤兜tshuē食，警戒心tsiânn重，罕得看著in-ê形影。

097Tsuí-tin-tang（水叮噹）＞河烏＞Brown Dipper.

097Tsuí-tin-tang（水叮噹）＞河烏＞Brown Dipper.

Tsuí-tin-tang（水叮噹），生活tī坑溝仔有水流ê清氣水溪谷附近，徛tī溪仔邊、石頭頂tshuē食活動，用伊ê生活環境來號名，是鄉土味真重ê山澗水鳥，好聽古錐。

Tsuí-tin-tang（水叮噹），伊會當靠近水面直線飛行，速度tsiânn緊，ná飛ná吱，聲幼響亮，ká-ná leh表演特技--咧。常在歇tī水濱岩石頂，尾仔翹翹，兩枝跤不sám時屈--leh屈--leh，tsiânn古錐心適，抑是無張無持tso̍k入去水底，是陸鳥中上蓋gâu泅水ê鳥仔，而且會曉tī tshuah流急流中應用雙翼tshàng-tsúi-bī，抑是水內步輦行路。伊ê跤爪間雖然無像一般雁鴨有蹼（pok），卻會當tī水內活動，時常tī岩石頂用喙pe kō尾脽ê油脂腺來抹羽毛，hōo羽毛較bē bak tâm去。

Tsuí-tin-tang（水叮噹）tī tshuah流急流區tshuē食ê時間較濟，因為tshuah流區域較有水生昆蟲kap魚蝦抑是水底昆蟲。

094Ka-ka-á（咖咖仔）＞樹鵲＞Grey Tree Pie.

094Ka-ka-á（咖咖仔）＞樹鵲＞Grey Tree Pie.

Ka-ka-á（咖咖仔）ê吼聲粗噪（tshoo-tshò），「ka-á~ka-á~òo！」無真好聽，生活tī低山ê雜木林上、中層，飛行tsiânn慢，翼股白色斑紋kap腰部白色羽毛tsiânn明顯。

喙形粗厚有力，略略仔彎，kap一般鵲鳥仝款是雜食性，蟲豸、爬蟲類、兩棲類、水果、漿果攏愛食。做岫tī大欉ê樹仔尾溜，iap-thiap ê樹椏內。

093Tn̂g-bué-suann-niû（長尾山娘）＞臺灣藍鵲＞Formosan Blue Magpie.

093Tn̂g-bué-suann-niû（長尾山娘）＞臺灣藍鵲＞Formosan Blue Magpie.

Tn̂g-bué-suann-niû（長尾山娘），俗稱山娘仔，紅喙pe、紅跤骨、金藍色ê身軀，頭、頷烏色，尾長長烏插白、金藍花紋，非常súi，tī低山區樹林頂面，三五隻七八隻排一列，ùi山坪向山坑仔直線飛行，排成一tsua̍h長尾陣，構成美麗ê隊伍。

tn̂g-bué-suann-niû（長尾山娘）本性兇惡，吼聲噪人耳，雜食性，食大型蟲豸、細隻鳥仔、鳥仔囝kap鳥仔卵、野鼠、杜定、蛙類，閣較愛食木瓜彼款水果。做岫tī原始雜木林，一岫生4~6隻鳥仔囝，鳥仔囝孵出了後，親鳥特別歹，兇kài-kài，kā頭殼頷頸ê羽毛kek tshàng-tshàng，hán敵人侵入。

台語文行銷： Lahjih 20181130

台語文行銷：        Lahjih 20181130

「台語」行銷著直接講台語佮人對話。

「台語文」行銷需要計畫撇步。

「台文文」ê書寫大部份攏是台文界內銷家己較濟，若boeh外銷，時常tn̄g-tio̍h真濟「加講話」，說明chiâⁿ費氣，相諍m̄是好辦法，諍輸無人chhap-siâu，諍贏朋友走了了，boeh按怎行銷？各人有各人ê法寶，我講我ê方法hō͘恁參考。

1、台語教學用「台語直接教學法」；台語文推銷著用「注入式行銷」。

2、台語文boeh外銷需要行入華語族群，LINE是市場好所在，加入華語群組。

3、看狀況，貼「台語文」ê對話，先用全漢字，chiah用漢羅文。

4、M̄-thang傷捷貼，boeh貼上讚是「笑詼」，短短--à ta̍uh-ta̍uh-á。

5、無人反對tō繼續貼。

6、出現有意見上蓋讚，這是hō͘你說明推銷ê機會，m̄-thang引起反彈，chiah有才調繼續行銷。

7、敢有效果？hō͘ 朋友看慣勢台語文書寫、漢羅文、lô-má-jī，認bat台語文書寫、漢羅文、lô-má-jī，tō是上大功效。

8、後擺朋友若看著國小台語課本，tō-bē刺鑿，甚至ē kah囡仔做伙研究指導。

9、台語文上驚無人看，有看有機會，有「加講話」閣較有行銷ê機會。嫌貨chiah是買貨人。

10、LINE群組互動互相尊重，m̄-thang論戰，chiah-ē達成咱ê行銷策略。

罔參考，m̄是專業論說。

092Kheh-tsiáu（客鳥）＞喜鵲＞Magpie.

092Kheh-tsiáu（客鳥）＞喜鵲＞Magpie.

Kheh-tsiáu（客鳥），tī台灣是無外普遍ê留鳥，分布tī西部南北平原抑是低山區，ùi中國引進台灣已經200外年，中國話叫『喜鵲』，台灣人叫Kheh-tsiáu（客鳥）。叫聲「kah~kah~kah~」。

Kheh-tsiáu（客鳥），歇tī農耕地帶，庄跤郊區，雙雙對對出入，尤其是生湠期間，特別相好，tshuē食做岫攏ká-ná翁某仝款。做岫tī木麻黃、尤加利樹頂，真懸閣大kâi，用樹枝竹枝橫隔雜叉成球形空心ê岫，雜食性，大尾蟲、鳥仔囝、果子，特別木瓜上愛食。

　

客鳥----Siau Lah-jih散文

頂禮拜三早起時，tú-beh peh-tsiūnn（上）三樓教冊，無意中看著兩隻鳥仔，tī運動埕hia teh散步，tshuē物件食。Tsit兩隻鳥仔，生做真大隻，規身軀ê毛是烏--e tshap白，尾長長，頭殼額仔giâ懸懸，看起來不止仔高雅，尤其是行著路，bē tshia̍k-tshia̍k-tiô，一步仔一步，尾閣sìm一下sìm一下，予人感覺足大方足高貴--ê！Tsit兩隻鳥仔，親像一對翁仔某ê款，tsit隻若行，hit隻就tuè。

當我看kah無nih目ê時，phu̍h--一下，一隻飛去--à，紲落另外彼隻嘛tuè後壁飛去。我斟酌kā看in會飛到佗位去，in無驚惶，也無雄kông，khuann-khuann-á飛，飛到運動埕西爿彼欉上大欉、上懸ê銀合歡樹頂，ah就無-khuàinn--à！

天光日，來到學校，仝款peh-tsiūnn三樓，彼兩隻鳥仔又閣tī-hia teh散步，仝款遐爾相好，tsiânn予人欣羨，嘛tsiânn予人o-ló！好好仔kā in看詳細：「Ah！客鳥！He是客鳥！」差一屑仔就喝出來。莫怪--òo！原來是囡仔時代ê老朋友，才會予人感覺遐爾面熟遐爾親切，真是『好久不見！」

囡仔時代，庄跤舊厝正身後壁，有兩欉Ke-jiû-á樹，足懸大--ê，上頂面ê樹ue，時常有一種鳥仔來hia做岫生湠。阿爸牽我ê手，比樹頂ê鳥仔kā我講：「He號做客鳥！伊真巧哦！岫攏做足懸--ê，按呢才bē hông（予人）掠去飼，hông關tiàm鳥籠仔內。」

「Ah hiah懸！若跋落來beh按怎？敢m̄是tsiânn危險--neh！」

「應該bē才著，in ê岫攏做kah足大ê（个），閣足勇--ê！你kā看，攏是用hit-luē（彼種）樹仔枝做--ê，親像阿爸teh圍籬笆按呢，一枝橫過來，一枝橫過去，每一枝柴仔攏相kit-tiâu--leh交叉固定就是thàu大風、落大雨，嘛bē去予liàn落來，足安全哦！你閣kā看詳細，Tsit兩隻客鳥，逐日攏足無閒--ê，一時仔飛出去，一時仔又閣飛轉來，伊ê喙內，攏會咬一枝柴仔枝，有--bò？Tsit-má in tú-leh做岫，大概母--ê beh生卵--a，閣一月外日，咱就會看著鳥仔囝，tī岫內hia ngiauh一下ngiauh一下--a！」

「阿爸！我知影啦！Ah你嘛足辛苦--ê乎！」……

將近beh四十冬--a，攏罕得看著客鳥，最近看著彼擺，會記得是四、五冬前，去參觀新萬仁製藥廠時，看著大門邊彼欉南洋杉頂懸，歇兩隻鳥仔，看起來ká-ná熟似面熟似面，較緊kā徛tī邊--a ê牽手講:：「你看！樹仔頂彼兩隻鳥仔，是m̄是客鳥？」

「hm̀！大概是哦！你目睭hiah金，m̄知偌久m̄-bat看著--à，較緊用khamelah kā hip起來！」

相片洗好，無kah luā滿意，細細隻仔，相片閣烏烏，連家己都看bē出來是「客鳥」……

閣飛來ti-hia teh散步--ā，正實是一對翁仔某仔，猶原是雙雙對對，遐爾恩愛，翁行某tuè，飄撇大範又閣高貴。Tsit擺beh kā恁看予斟酌，看予清楚，有影生做tsiânn súi，喙pe.烏烏尖尖，尾長長翹翹，白色ê腹肚，si̍t股頭嘛tshap一寡仔白--ê，sīn--ê（剩的）攏是烏色--ê，Ah！m̄-tio̍h！看in飛起來才知影，si̍t ê外緣彼排羽毛嘛是白--ê。飛tiàm半空中phiat一下phiat一下，真正優美，真正好看，看in飛去樹仔頂才發現，原來in早就tī-hia做一个足大kâi ê岫，嘛是做足懸--ê，kah我細漢看著--ê仝款。

岫愈做愈大，照看beh tuà落來ê款哦！來--òo！來--òo！阮tsiânn歡喜恁留tiàm tsia kah阮做厝邊！阮是tsiânn hònn-kheh（好客）ê在地人，向望恁會tàng疼惜tsit-ê所在，做阮ê好厝邊，永遠tuà落來，kah阮相kap來拍拚，將tsit-ê所在成做一个真正有自由，有尊嚴ê美麗寶島。自tsit-má起，咱攏是家己人--a，無愛閣叫恁是「客鳥」，應該稱呼恁是「喜鵲」，tī咱人七月初七彼一工，搭橋予牛郎織女天河相會，做好代ê「喜鵲」！

Lahjih寓言：

Lahjih寓言：
114、講話不答不七：
兩个台灣人leh開講phò-tāu。
甲：『今天天氣』烏陰烏陰，『可能會下雨』？
乙：tō是--meh，『剛想出門溜踏』，tō tn̄g-tio̍h欲落雨，有夠鬱卒。
第三者：聽恁講話，ná-ē感覺不答不七，liâm-mī台語，liâm-mī華語？
甲：tō是án-ni--m̄，綴人講華語，bē-hiáu--è自然改換咱ê話語。
乙：hèⁿ--à！逐家m̄是攏按呢不答不七leh講。
㊣深層ê DNA，心內有母親，心內有母語；外在soah不知不覺綴人行。

115、漢羅lām寫，不答不七：
在來台語書寫有漢字有pe̍h-ōe-jī，台語漢字有時真費氣，ioh規晡m̄知發音、m̄知意思是啥乜，寫pe̍h-ōe-jī有人講是外國字，漢字、pe̍h-ōe-jī pún-chiâⁿ攏m̄是台灣字，借來用，慣勢tō是咱ê字。
現此時漢羅lām寫上著時，有人批評講不答不七，日文是かな lām漢字，敢講日文mā是不答不七。
㊣尊重別人，m̄-thang看輕家己。

091oo-a-á（烏鴉仔）＞巨喙鴉＞Large-billed Crow.

091oo-a-á（烏鴉仔）＞巨喙鴉＞Large-billed Crow.

oo-a-á（烏鴉仔），全身羽衣，喙kap兩支跤攏是烏色，叫聲「ah、ah、ah、ah…」，是按呢kā號名--ê。

oo-a-á（烏鴉仔），tsiânn大食，鼠類、杜定、狗母梭仔、母舅蛇、蛇類抑是蟲豸伊攏beh食，嘛興食鳥仔卵、鳥仔囝。俗語有一句講：「oo-a-á（烏鴉仔），無隔暝卵。」是leh講伊tsiânn貪食，鳥仔卵無khuàinn便罷，若去khuàinn著，一定kā食掉，無thang留落來。

一个人若無儲蓄tshun-tsûn ê習慣，現趁現開，趁了了食了了，就會使tsit用tsit句「oo-a-á（烏鴉仔），無隔暝卵。」來kā恥笑king-thé。

oo-a-á（烏鴉仔），tī台灣是普遍ê留鳥，中高海拔山地，東部海岸壁攏bat出現，有聚集性，規陣tuà做伙，規陣飛同齊，警戒性強，若有giâu-gî koh樣，隨時「ah、ah」叫，隨隻飛走liu-suann。常tī糞埽堆tshuē食，興食家畜屍體。

古早戲文有「吉凶未到先有兆」，意思是講聽著烏鴉吼是歹吉兆，che對烏鴉來講，實在冤枉。