彰化縣溪州成功旅社_保險櫃：

彰化縣溪州成功旅社_保險櫃：
▲MADE IN JAPAN保險櫃。
△這个保險櫃是鐵枋--è，不止仔重，用對號鎖，對號m̄是數字1 2 3 4 抑是一二三四，是日本字母 アイウエオ。

彰化縣溪州成功旅社_女中房間鎖匙：

彰化縣溪州成功旅社_女中房間鎖匙：
▲古早販仔間旅社ê查某服務生號做「女中」，面稱慣勢尊稱伊ねえちゃん(neh-tsiàng)，ねえちゃん工作其實to̍h是下女khang-khuè，整理房間，àn-nāi(あんない/annai/引導、招待)旅客⋯，除了薪水以外，閣ē-tàng趁外路仔，若有人客吩咐ê額外服務，親像買薰買食物⋯，to̍h有チップ(小費)thang提。
Hiàng-sî來tuà販仔間ê人客，三教九流五花十色人物攏有，吩咐額外服務，ねえちゃん自然有伊包君滿意ê才調。
△女中ê房間：
2塊たたみ蓆(たたみ/tatami/塌塌米、疊蓆)大ê房間，眠床枋下跤有夾層祕密空間，ē-tàng閃避(siám-pī)警察大人ê臨檢。

△柴枋仔做--è ê鎖匙圈仔(só-sî khian-á)，tshng 1條索仔結1支鎖匙，一爿寫成功旅社，一爿寫房間番號。che是tuà房旅客ê鎖匙。

△過間門ê門牽kap鎖頭。

△kui大捾ê鎖匙，是旅社所有客房ê鎖匙，旅社保管備用，抑是ねえちゃん整理房間，臨檢時陣需要時使用。

彰化縣溪州成功旅社_提醒牌仔家私袋仔鐵馬：

彰化縣溪州成功旅社_提醒牌仔家私袋仔鐵馬：
△Tī過間門掛一塊柴枋仔，面頂寫字提醒旅客：「凡投宿本旅社旅客如有貴重物品請點交本旅社否則如有遺失本旅社概不負責      成功旅社」

△Tsit台鐵馬是頭家in-tau出入內外ê交通工具，牛皮繃ê椅坐仔。

△馬角仔，lîng-liang-á(鈴啷仔) ，手擋(tshiú-tòng)。

△帆布(phâng-pò͘)袋仔，農藥行相送品兼廣告。

彰化縣溪州成功旅社_咖啡間茶水間：

彰化縣溪州成功旅社_咖啡間茶水間：
▲想bē到近 20幾年來，咖啡文化ē時行kah tsit款，lim咖啡ê人比lim茶--ē較濟。ē記得5-60年前，罕罕--à bat提著美軍leh泡ê咖啡包，一塊長方體ná番仔火橐烏lu-lu ê咖啡，thìng-á泡1杯，大多數ê人攏講苦苦真pháiⁿ lim，siáⁿ知tsit-mái一四界攏有咖啡thang買，1杯30箍50箍甚至百幾箍都有人買，這是時代進步ê現象。
△50年前ê成功旅社to̍h有tsit款ê服務，tī iap-thiap ê角仔間，簡單向內囥一隻高椅撐(kuân-í-the)ê兩人座膨椅，也thang坐也thang隔離，內面一隻膨椅桌仔，旅社頭家提供in家己泡ê咖啡hō͘人客，兼趁外路仔，「一兼二顧，摸蜊仔兼洗褲。」
斯當時lim咖啡算是kài高尚ê交陪，生理人講生理，食頭路人phò-tāu消遣，少年人談戀愛pua̍h感情，抑是siáu豬哥phāⁿ查某，tsit款貴蔘蔘ê消費攏開ē落--去。

△上內角間收藏室，囥茶水，旅客bueh-ti̍h家己取用。

彰化縣溪州成功旅社_通巷隔間擦皮鞋：

彰化縣溪州成功旅社_通巷隔間擦皮鞋：
▲木造樓仔厝，地板pho͘枋仔，隔間當然mā是柴枋隔間，通巷tsiâⁿ-e̍h(狹)，隔音效果tsin-bái，行路著輕步，講話著細聲，tsiah-bē吵著別人安靜。
△通巷(thong-hāng)。

 △便所起tī樓跤，tī二樓通巷尾，設備一个尿斗(jiō-táu)，方便查埔人客，tuà旅社人客猶是男性較濟。

△通巷、房間門、壁堵、隔間、空氣窗，ē-tàng看出斯當時旅社格間造作，無thang顧慮著人客ê私人空間、私密性。

△擦皮鞋：出入內外ê旅客有真濟穿皮鞋ê食頭路人、紳士、好額人，皮鞋擦金金加真有精神加真有體面。擦皮鞋ē使得家己擦，不過鞋油、鞋擦仔著家己準備，無 著hō͘人服務，擦皮鞋--è(鞋童)ē來tsia做生理。

彰化縣溪州成功旅社_壁頂妝娗：

彰化縣溪州成功旅社_壁頂妝娗(tsng-thāⁿ)：
△入門客廳是公共場所，所以掛tī壁頂ê時鐘較大kâi，而且標示「標準」時鐘，ē使得hō͘旅客對時參考，當然旅社頭家需要時常kap電信局對時tshiâu-hō͘正確，hiàng時ê時鐘手錶誤差較濟，一日緊2--分抑是慢3--分是四常--ē。
掛鐘除了ē-tàng看時間，mā ē-tàng裝飾(tsng-sik)用。

△「關公讀春秋」，關公tī生理人眼中是恩主公，民間信仰非常崇拜伊ê義氣神勇。 

 △「台北大稻埕街東南美茶棧」廣告。

 △兩支煙筒ê火船「成功號」，應該是朋友送ê祝賀匾。
兩支煙筒、成功號、大船載入、光明燈塔，意象真明，祝賀溪州ê成功旅社，前程光明一定趁大錢。
溪州鄉gia̍t-khiat仔俗語(歇後語)：溪州煙筒----烏白講(管)。
古早溪州糖廠有2支煙筒，1支鐵管漆烏色，1支是白色紅毛土管，簡單講做烏白管(o͘-pe̍h-kóng)，是溪州ê地標。烏白管、烏白講仝音。

 △溪州最早的醫院，養真醫院：出自《彰化縣溪州鄉客家地圖》。真有紀念性ê相片。

 △「X海製糖株式會社」廣告。株式會社(tu-sik huē-siā)，會社huē-siā。對公司的稱呼。源自日語。

 △朋友祝賀大鏡(玻璃化妝鏡)。

 △西螺大橋舊相片，橋頂有五分仔車鐵枝路，閣有汽油客車。

 △便藥包仔ê廣告單。

彰化縣溪州成功旅社_電鈴電器電風：

彰化縣溪州成功旅社_電鈴電器電風：
▲電器設備無夠幼路，電線m̄-nā看現現，而且花翱翱(hue-kô͘-kô͘)，若tn̄g-tio̍h ショート[短路]，需要師傅來tshiâu規晡。
△電鈴(tiān-lîng)，響--起來kap he鐵馬鈴仔(liâng-á)仝款聲音，不過是連紲--è 較大聲。

 △瓷仔插座(hûi-á tshah-tsō)，圓形開關，直接釘tī壁路柴柱頂。

 △電火，有電火罩(tiān-hué-tà)，點40燭/60燭/100燭ê電火胿仔(tiān-hué-kui-á)/電火球仔(tiān-hué-kiû-á)。

 △電線thàng過間。

 △樓梯下mā是電線牽來牽去。

△徛型電扇風(khiā-hîng tiān-sìⁿ-hong)[立扇]，人客需要tsiah-ē服務，需要加錢。

 △桌頂𥩴型電扇風[桌上型]。

 △外殼風葉仔(hong-ia̍p-á)lóng是鐵鉼(thih-phiáⁿ)。

彰化縣溪州成功旅社_天篷樓枋樓梯：

彰化縣溪州成功旅社_天篷樓枋樓梯：
▲因為樓梯樓枋(二樓地板)lóng是木造，所以人客出出入入行路著輕步khuaⁿ-khuaⁿ-á行，若無，ē吵人安眠，不過日--時猶是hō͘人感覺tsiâⁿ鬧熱。
△二樓天篷thian-pông[天花板]壁堵是木材tìng--è，看--起來真光生(kng-seⁿ)。

△樓跤天篷to̍h是二樓ê樓枋，木材製造，已經真súi，無koh tsng-thāⁿ[裝飾]釘天篷。

△二樓地板是柴釘--è，to̍h是木材樓枋，m̄是ひのき/hinoki/檜木。

△柴造樓梯、樓梯手粗勇真súi。一斡(uat)分兩段。

△斡一斡到二樓。

彰化縣溪州成功旅社_壁堵門窗：

彰化縣溪州成功旅社_壁堵門窗：
△tsit-kâi圓形柴花窗有夠súi。

 △柴框掛鐵條窗仔子(thang-á-tsí)ê天窗，防止賊偷，koh真通風(thang-hong/thong-hong)。

 △柴造過間門，kō͘屜--è。

 △旅社大門kap一般徛家仝款，兩片門扇，兩爿門窗除了玻璃窗仔門，閣有掛鐵窗，預防賊偷。

 △

 △大型窗仔門，柴框柴窗仔門tsí，掛玻璃。

彰化縣溪州成功旅社_兩床房總間：

彰化縣溪州成功旅社_兩床房總間：
▲一間房間囥兩頂眠床，ē-tàng睏4个大人，適合做伙出張(tshut-tiuⁿ)[出差]食頭路人過暝，抑是翁某tshuā囝做伙過暗。
△柴造雙人眠床兩頂，1人睏1頂，有較傷本，為著省錢，kap外人相佮租房mā是無要緊，俗語講「在家靠爸母，出外靠朋友。」出外人互相相照顧(hō͘-siāng sio-tsiàu-kò͘)，koh ē-tàng交朋友。






▲總間[統舖]：m̄是日本式ê和室房，內面tshu たたみ(塌塌米)，無其他設備，kan-nā提供睏ê場所--niā-niā，有人bueh-tuà，ねえちゃん(女中)[飯店或旅館的女服務員]tsiah-ē mo͘h棉績被來，人客洗蕩ê面布、齒抿仔、齒粉家己tsah，lim水家己去客廳抑是灶跤thîn，大小便tī樓跤抑是後壁便所，便所紙家己tsah。
△像tsit款3塊たたみ ê總間，ē-tàng kheh幾若个人客。1957年bat tuà--過，he是頭一擺大兄tshuā我kap姊夫、輝虎去阿里山楠仔仙溪tshit-thô，tī嘉義車頭前巷仔內彼間販仔間隔暝，四人kheh一間，棉被2領，枕頭2粒，我kap輝虎囡仔人免睏枕頭，行李囥踮後角，暗頓去外面食，bueh睏進前去浴間仔跤手面拭拭--leh，囡仔人無洗喙，kō͘水lo̍k-lo̍k--leh，倒落たたみ頂to̍h睏ka-tsuē--ā。

△Tsit種たたみ總舖，若有排桌仔閣拴滾水罐、薰屎觳仔，翁某來tuà，好朋友做伙隔暝，mā是kài高級四是，當然加--出來ê服務著加錢，而且著hō͘ねえちゃん[女中]チップ料[小費]。