1991年11月1日台文通訊第四期

 1991年11月1日台文通訊第四期：

東方白先生ê意見，值得咱參考。

彰化溪州鄉西畔村（Sai-pêng-á）石塔仔：

 彰化溪州鄉西畔村（Sai-pêng-á）石塔仔：

聽在地人講古：1842年東螺溪做大水，溪水phôaⁿ岸水淹Sai-pêng-á庄，tī危急ê暗暝，石塔位置出現一個人徛tī一粒石頭頂，用手一直ia̍t，指揮引𤆬庄眾脫險。

仝時，有人點一葩火光炤路，Sai-pêng-á庄chiah無淹庄。有人講hit葩火是南瑤宮媽祖顯聖救渡。每擺南瑤宮媽祖若有割香勻庄，定定會來Sai-pêng-á石塔仔巡視保佑閤家平安。

後來庄民tī chia起石塔阻擋水災，mā號名石塔仔。

石塔是庄民信仰精神堡壘，是祖先留落來ê信仰資產。

Sàm-pō͘散步：

 Sàm-pō͘（散步）：

Hitnî joa̍hthiⁿ

（Hit年熱天）

Múiji̍t hônghun boehàmásî

（每日黃昏boeh暗仔時）

Asun-.ê tōē kōaⁿê khǹgtī akong sinkhupiⁿ

（阿孫--ê tō ē捾鞋囥佇阿公身軀邊）

Akong theⁿtī phòngí       ba̍kchiu mi-mi

（阿公撐tī膨椅 目睭mi-mi）

Asun-.ê kō͘ iùiùsèsè chhiútêá

（阿孫--ê撾幼幼細細手蹄仔）

Khinkhin kā akong tōathúi tah nn̄gsaⁿē

（輕輕kā阿公大腿tah兩三下）

Akong chengsîn kāgoán chhēngê

（阿公精神 kā阮穿鞋）

Chi̍tlâng khan chi̍tchhiú         chi̍tlâng khan nn̄gê

（一人牽一手         一人牽兩个）

Hoaⁿ-hí ê akong      chhōa hoaⁿhí ê asun

（歡喜ê阿公 chhōa歡喜ê阿孫）

Hāuhn̂g sàmpō͘ sìkèse̍h

（校園散步四界踅）

詹文聲教授台語薪傳賞 得賞感言：

 詹文聲教授台語薪傳賞 得賞感言：                  Lahjih  20201031

肯定我行ê路，肯定我做ê工。

感謝詹文聲教授ê台語薪傳賞，感謝台灣羅馬字協會推薦，感謝各位評審肯定。

Chit ê獎賞上大ê意義是：「肯定我行ê路，肯定我做ê工。」

1991年chiah知siáⁿmih是十五音，開始傳統音韻研究，想boeh做漢學先á。

1993年接受鄭良偉教授「漢羅lām寫」台語文觀念啟示，寫出頭一篇台語文〈阿爸ê鹿角薰吹〉，tō改變方向，kā「生活台語」chhuisak chiâⁿchò 我ê事工，boeh書寫生活台語 台語文，絕對需要Pe̍h-ōe-jī。

觀念ínchhōa概念，概念ínchhōa學習，台文通訊、台文Bóng報是糧食，台語網社團taigu@googlegroups.com是我精進ê好所在，電腦、台語輸入法是上重要工具，學E-Mail、學上網chiâⁿ做必要日常，除了家己進修，mā用心tī國小老師ê教學推廣。

Ùi TW301到HOTSYS-HAHSYS到KKS台語輸入法kap信望愛台語客語輸入法FHL Taigi-Hakka IME，m̄nā安裝使用，mā提出意見hō͘開發者參考，為著Pe̍h-ōe-jī台語文，有夠kepô cha̍pchhap，展現Lahjih甘草個性本質。

林俊育長老講：「漢羅書寫，王育德教授主張，鄭良偉教授提倡，鄭良光先生創辦台文通訊來實踐。」我是忠實支持者，一直歡喜kintòe後壁phahpiàⁿ。

1997年呂興昌教授指導牽教寫〈台灣俗語鹹酸甜〉，得著教育部獎勵，是肯定我ê才調，2020年ê今á日，得著詹文聲教授台語薪傳賞，是肯定我行ê路是正確ê路，肯定我做ê工是有意義ê工。

感謝逐家！感謝逐个來kā我鼓勵！

歡喜得「詹文聲教授台語薪傳賞

 歡喜得「詹文聲教授台語薪傳賞」

台灣羅馬字協會10月31日

Tiàm成功大學台文系頒發「詹文聲教授台語薪傳賞」

得著chit-ê獎賞，對我來講，意義贏過光榮，「肯定我行ê路 肯定我做ê工」是感想。

牽手、後生新婦、查某囝囝婿kap內外孫lóng來到現場觀禮kap逐家kā我鼓勵恭喜。

這是人生上歡喜ê 一工。

●Chiâⁿ hoaⁿ-hí lâi niá詹文聲教授台語薪傳賞             Lah-jih  20201031

●"Tio̍h-chiáng kám-giân" gōa lóng-tho̍k hō͘ ta̍k-ê thiaⁿ.

●Khéng-tēng góa kiâⁿ ê lō͘, khéng-tēng góa chò ê kang:

●Kám-siā Chiam Bûn-seng kàu-siū ê Tâi-gí sin-thoân siúⁿ. Kám-siā Tâi-oân Lô-má-jī-hia̍p-hōe chhui-chiàn, kám-siā kok-ūi phêng-sím khéng-tēng.

●Chit-ê chiáng-siúⁿ siāng-tōa ê ì-gī sī: " Khéng-tēng góa kiâⁿ ê lō͘, khéng-tēng góa chò ê kang. "

●1991 nî chiah chai siáⁿ-mih sī si̍p-ngó͘-im, khai-sí thoân-thóng im-ūn gián-kiú, siūⁿ boeh chò Hàn-o̍h sian-á.

●1993 nî chiap-siū Tēⁿ Liông-úi kàu-siū, "Hàn Lô lām siá" Tâi-gí-bûn koan-liām khé-sī, siá-chhut thâu-chi̍t-phiⁿ Tâi-gí-bûn" A-pa ê lo̍k-kak hun-chhoe" , tō kái-piàn hong-hiòng, kā "Seng-oa̍h Tâi-gí" chhui-sak chiâⁿ-chò góa ê sū-kang, boeh su-siá seng-oa̍h tâi-gí tâi-gí-bûn, choa̍t-tùi su-iàu PE̍H-ŌE-JĪ.

●Koan-liām ín-chhōa khài-liām, khài-liām ín-chhōa ha̍k-sip, 

Tâi-bûn thong-sìn, Tâi-bûn bóng-pò sī niû-si̍t, Tâi-gí-bāng "taigu@googlegroups.com" siā-thoân sī góa cheng-chìn ê hó-só͘-chāi,Tiān-náu, Tâi-gí su-ji̍p-hoat sī siāng tiōng-iàu kang-kū, o̍h E-mail, o̍h chiūⁿ-bāng chiâⁿ-chò pit-iàu ji̍t-siâng, tû-liáu ka-kī chìn-siu, mā iōng-sim tī kok-sió lāu-su ê kàu-ha̍k chhui-kóng.

●Ùi TW301 kàu " HOTSYS-HAHSYS" kàu " KKS Tâi-gí su-ji̍p-hoat" kap Sìn Bōng Ài Tâi-gí Kheh-gí su-ji̍p-hoat " FHL Taigi-Hakka IME", m̄-nā an-chong sú-iōng, mā the̍h-chhut ì-kiàn hō͘ khai-hoat-chiá chham-khó, ūi-tio̍h PE̍H-ŌE-JĪ tâi-gí-bûn, ū-kàu ke-pô cha̍p-chhap, tián-hiān Lah-jih kam-chhó kò-sèng pún-chit.

●Lîm Chùn-io̍k tiúⁿ-lo kóng:" Hàn-lô su-siá, Ông Io̍k-tek kàu-siū chú-tiuⁿ,Tēⁿ Liông-úi kàu-siū thê-chhiòng, Tēⁿ Liông-kng sin-seⁿ chhòng-pān "Tâi-bûn thong-sìn" lâi si̍t-chiān. Góa sī tiong-si̍t chi-chhî-chiá, it-ti̍t hoaⁿ-hí kin-tòe āu-piah phah-piàⁿ.

●1997 nî Lī Heng-chhiong kàu-su chí-tō khan-kà siá "Tâi-oân sio̍k-gí kiâm-sng-tiⁿ", tit-tio̍h kàu-io̍k-pō͘ chiáng-lē, sī khéng-tēng góa ê châi-tiāu. 2020 nî ê kin-á-ji̍t, tit-tio̍h Chiam Bûn-seng kàu-siū ê Tâi-gí sin-thoân siúⁿ, sī Khéng-tēng góa kiâⁿ ê lō͘ sī chèng-khak ê lō͘, khéng-tēng góa chò ê kang sī ū-ì-gī ê kang.

●Kám-siā ta̍k-ke!

●Kám-siā ta̍k-ê lâi kā góa kó͘-lē!

 作田人按怎灌溉淹田：                Lahjih      20200918

彰化縣八堡圳是台灣上蓋古老埤圳之一，1709〜1719康熙年代施世榜建造，造福彰化縣境內八堡農田水利。關係八堡圳ê起造，逐家較趣味 林--先生ê傳說，講伊教施世榜用籠仔笱（lam-á-kô）工法，chiah解決濁水溪引水入圳ê困擾。古早為著風調雨順國泰民安，攏會編一寡神話、神ê旨意來an-tah民心，八堡圳ùi二八水分流一圳kah二圳，建 林先生廟；來到田中央造水門hō͘八堡兩圳相通，起 世芳宮林媽廟；然後到鹿港地界，建 天后宮服祀本尊媽祖林默娘，lóng是水神，lóng是姓林。

籠仔笱截水引水入圳，確實是好工法，八堡圳另外一種真重要ê工法，soah罕得有人論述紹介，啥乜工法？tō是浮圳工法，啥乜是 浮圳？

 

八堡圳，在地人講大溪，大溪主流ùi二八水鼻仔頭向西北爿流到鹿港地界，主流koh有分流，號做中圳，設有tòng-mn̂g（擋門）[水門]調節水量，田中地界有鴻門圳、大高圳，中圳有涵孔閘門調節圳水流入大水溝kap細條水溝，水溝仔岸埋圓形涵孔流入水田淹水，構成灌溉水利網。

大溪是按照地形懸低起落，擔塗kā圳路兩爿坉岸，坉成「凹」字形圳體，m̄是挖溝，圳岸坉塗坉懸懸，koh建造水門通水溝，水溝通田園，大溪、中圳溪底，水溝溝底lóng比水田較懸，溪水水面看起來ná像浮tī地面頂懸，所以號做浮圳。圳水溝仔水若boeh淹田，只要kā水門、涵孔開--開，一港一港濁水溪水tō自動流入田園。

 

八堡圳灌溉水利網，兩爿坉懸ê溪岸溝仔岸，大量坉塗ùi tó位挖塗？Tòng-á潭chit个大潭按怎形成，是另外值得思考ê問題。

八堡圳灌溉淹田範圍真闊，二八水、田中央、社頭算是水頭，khah-bē欠水，播田期前後上需要水，為著爭水，有時mā-ē póe-hōe，因為lóng是厝邊隔壁，罕得冤家相拍。

 

下面來講一寡放水淹田ê用語，可能kah別所在有淡薄仔精差：

八堡圳：原名「施厝圳」，mā叫做「濁水圳」，較捷講「八堡圳」。八堡是東螺東堡、東螺西堡、武東堡、武西堡、燕霧上堡、燕霧下堡、馬芝堡及線東堡。

大溪：八堡圳，在地人慣勢講「大溪」。古早有 大溪岸、大溪水、大溪無崁蓋 語詞。

中圳：八堡圳ê分流[支流]。田中地區有鴻門圳、大高圳。

水溝á：中圳koh分流，tō是水溝、水溝á。

浮圳：浮圳ê構造，親像「凹」字形，圳體浮比地面較懸，圳水親像浮tī地面。

水門：施設chhiān枋閘水，古早號做tòng-mn̂g/táng-mn̂g (擋門)。

水田：食濁水溪溪水ê水田，塗壤肥koh黏。

涵空：圳岸、溝仔岸下面埋圓形暗管，引水入水溝抑是田園。較深安閘門，較淺直接塞破布。

放水：kā圳水流入水溝，kā水溝水流入田地，叫做放水、放田水、淹田水、淹水。

濁水窟仔：涵孔水chhiâng-lo̍h所在，留一坪大ê田地挖濁水窟仔，窟仔水chiah盤過水田，濁水窟仔chhē底ê烏塗膏真肥，聽候犁田前，tō kā烏塗膏清去下坵田。

頂坵pôaⁿ下坵：1埒田地抑是1塊田地，倚溝仔邊是頂坵，地較懸，離溝仔較遠是下坵，地較低，涵孔放水了後，利用開田岸隙tō-ē頂坵盤下坵。

田岸隙(chhân-hōaⁿ-khiah)：田岸人工掘ê缺隙，破水（phòa-chúi）ê水路。

làu水：田水siuⁿ滇抑是已經無需要田水，利用田隙瀉水。chit種田岸隙著掘較深。

破水：kā田岸掘田岸隙來引水抑是退水。

清水溝：濁水溪水是濁--ê，年久月深塗膏ē chhē底，需要人工清除。古早是逐家義務勞動做公工。

清大溪：八堡圳中圳仝款年久月深沈積濁水溪流來ê石頭沙á kah烏塗膏，歸庄人出動義務勞動做公工清除。

Phah火鳥----Ataya紅喙畢仔故事

 Phah火鳥----Ataya紅喙畢仔故事：       Lahjih 20200911修正

蕭惠麗相片

古早古早，Ataya tòa ê所在，有一工火燒山，連燒幾若暝日，範勢非常危急，樹林是鳥隻、野獸ê徛家，內內面有誠濟食物，樹林、野草若是燒了了，m̄但無thang歇岫，mā無thang揣食，嚴重威脅著in ê討食生存。顧山頭安全ê山神，趕緊調集所有飛鳥野獸ê頭人，開會決定搶救樹林火災辦法，呼籲逐家著同心協力，為著逐家安全活命，一定愛認真來救火，m̄-thang自私驚死，kan-nā知影保護家己，有「日頭赤iāⁿ-iāⁿ，隨人顧性命」ê自私心理，按呢咱ê家鄉chiah-bē hō͘無情ê大火，燒kah孤khu̍t變成無生命力ê火燒埔。

雖然山神緊急調集，總是自私本成就是動物ê本性，閣再講，大部分ê動物生成就是驚火，看著chiah-ni̍h炎ê大火災，逐家攏mā驚kah phi̍h-phi̍h-chhoah gī-gī-chùn，啥物同心協力，啥物坐仝船載--ê，lóng mā bē記得了了，隨ê四散逃命，soah真正有影「日頭赤iāⁿ-iāⁿ ，隨人顧性命」相爭逃命，為著家己ê安全，無人願意冒險去救火，平時上gâu展伊gâu走ê兔á，chit-pái真正走第一，m̄認輸ê hit隻龜mā tòe後壁kho̍k-kho̍k-爬，飛鼠是ná飛ná走，m̄敢越頭看，恐驚會去hō͘火舌nā--tio̍h變niáu鼠á巴，烏鴉á是驚kah險á滲尿，kan-nā會曉ah ah ah ah.一直吼無歇，hit種恐怖，連溪谷水內ê魚蝦水族，攏m̄敢giâ 頭匿匿toeh水底去。

Chit ê時陣，只剩紅喙畢á族留--落來，in無驚惶，心情鎮靜，有計畫有秩序開始動員剩落來ê族群，按照山神ê指示來進行phah火ê工課，有ê開防火巷，chiah-bē hō͘火災繼續湠開；有ê利用in ê雙腳kah嘴pe，kā to̍h火ê樹枝遏斷，mài hō͘閣再to̍h--落去，因為in逐家m̄驚艱苦，無惜性命扑拼救火，最後chiah kā火扑hoa去。

Tī扑火救災ê過程中間，紅喙畢á ê族群出上濟力，siāng-kài phah-piàⁿ m̄驚死，死命phah火，soah hō͘火舌nā kah歸身軀全是傷痕，嘴pe kah兩支腳骨燒kah紅kì-kì，其他ê羽衣mā hō͘火燻燻kah烏sô-sô，tō是親像咱chit-má看著--ê chit款模樣，che tō是紅喙畢á號名ê因由。

因為紅喙畢á in ê出生入死，勇敢拚命救火，chiah kā一場可怕ê樹林大火消滅，保全逐家倚靠活命ê家園。山神為著感謝紅喙畢á冒險救火ê精神，tī慶功賞賜ê同時，mā賞賜in「phah火鳥」ê美名，閣hō͘ in ê囝孫，世世代代攏kah in ê祖先仝款，嘴pe紅紅，雙腳紅紅，配合歸身軀烏金烏金ê羽衣，美麗非常。紅喙畢á「phah火鳥」ê美名自按呢流傳到chit-kú。

菜豆á糜： Lahjih 2002作品

 菜豆á糜：    Lahjih      2002作品       20200908小可修改

透早散步，躂--à躂，躂轉去到祖家，早起6點外，對庄腳人來講無算早，二嫂ùi厝邊田園挽一把菜豆hō͘--我，種tī家己田ê田岸，無chōaⁿ農藥，做你放心á食。田岸豆，一莢一、二lia̍h長，boeh食 chit-chūn正當時，m̄免像古早時著聽候到「八月八，牽豆藤，挽豆莢」chiah有teh食。

 

轉到厝--裡，趕緊報告牽手知：

Chit把菜豆á是二嫂hō͘--咱ê，中晝來煮菜豆á糜好--m̄？

牽--ê講：閣chiah幼chíⁿ，boeh煮tō來煮，足久m̄-bat煮菜豆á糜，你若愛食我tō來煮hō͘你食！

過晝後á電視新聞已經報一睏。

牽--ê：菜豆á糜煮熟--lò！

趕緊提碗箸，ám-chhiâ-á gia̍h--leh開始khat，芳kòng-kòng，kòng-kòng芳，可惜燒燙燙，bē-tàng吞落喉，講tō hō͘人愛笑，giàn食菜豆á糜，實在無kā汝騙，無張持嘴瀾水soah tin--落來！

 

牽--ê：Taⁿ mā好--à，giàn食kah chit款，sīm--一下chiah貯lah！燒燙燙，是boeh按怎食？你mā mài hiah現世，ká-nám̄-bat食著？免chhoah嘴箍lah！

我無意無意：無lah！猶未boeh食lah！是kan-nā先kā貯hō͘伊冷，聽候等一下收羹了後chiah來su̍t，外好食你敢知？

牽--ê：騙人m̄-bat食著？等一下lah！閣去看有啥物國內大代誌--bò͘！

閣ká-ná leh騙囡á leh！想想leh，家己mā有影ná囡á仝款，敢有影leh去老還童？抑是leh老番癲leh po̍ah老感情？

 

豆á糜食落嘴：ŏa~！汰會chiah好食，甜閣芳，菜豆á幼膩，嘴齒ngauh落去ê口感，蓬萊米ê黏濁，閣拄好冷，實在有夠讚！

牽--ê：好--à lah！取hit支嘴，有食心花開，閣會吟詩作對，啥物口感好，啥物濁水米黏濁，he人soah也m̄知，猶閣有啥物無仝ê氣味--bò͘？

食人飯，犯人問，應話著sè-jī：ĕ~！ká-ná有香菇味--ō͘？猶有tong蝦、肉sò、蝦仁、蔥頭--lio͘h！哪會摻chiah-ni̍h濟佐料？莫怪chiah-ni̍h好食？

牽--ê有淡薄á無kah意聽：「材料夠，m̄是新婦gâu。」俗語講了無m̄著。

有影犯沖--a ho͘ⁿh：歹勢，m̄是chit-ê意思lah！古早ê豆á糜，實在bē-bái食，啥知chit-má你煮ê猶閣較好食，原來是摻chiah-chē配料。想往過煮鹹糜，啥物香菇、肉sò，做你免siàu想，做你免孝孤，若有豬油、蔥頭khiàn芳，閣有thang摻che肉粕á，tō sut kah m̄知影thang飽--lò͘！

 

牽--ê繼續詢問：敢chiah香菇、肉sò--niā-niā？閣chhōe看有啥物寶--bò͘？

無斟酌soah bē使chit：Che散散是啥？敢ē是干貝？食chiah好？ò͘！猶有蚵乾，鮮蚵á，莫怪！莫怪！雖然講「材料夠，m̄是新婦gâu。」若無新婦ê才調，刀子師ê本事，kan-nā有材料，敢tō有法度變lián，材料夠是新婦ê推辭，gâu新婦chiah是重要。牽--ê！感謝你ê功夫，感謝好新婦！

牽--ê歡喜寫tī面：Mài雞母皮--ā，chiâ是你ê新婦？愛食做你食，mài講he hō͘人起雞母皮ê話句，mài話仙--a。

煮食，阮牽手有影gâu，無kā汝騙！菜豆á煮糜，有夠好食，m̄信，煮來食看覓leh，你tō知。