好琴緣： 20190428_Lahjih

好琴緣：                20190428_Lahjih

感謝蕭平治老師，致贈福樂FORD F-3 鋼琴1部，嘉惠本會音樂從業人員習琴創作。

彰化縣演藝職業工會理事長許建峰暨全體會員同謝2019年2月15日戲劇節

老琴新生樂曲長揚：

1977年36歲，蓄一間兩樓22坪巷仔內新厝，開38萬新台票，貸款10萬，借錢10萬，真正負債纍纍，總--是為著4个囡仔有安定生活，牙齒根咬--leh閣較需要繼續拍拚。

1981年熱--人，福樂鋼琴經銷商m̄知tó位探聽，知影我趣味音樂，tō來鼓催我買琴。我kā講目前貸款猶未還了，ná有liōng-siōng錢買鋼琴？經過chiâⁿ禮拜ê ko-ko纏，hō͘伊說服，照行情價5萬5成交，條件是：免訂金，全額賒欠無利息，半冬後付錢，想bē到經銷商a-sá-lih答應，tō按呢直接去Chio̍h-kńg-á (台中縣石岡)選琴載琴轉--來。

Ná有chiah-nī好空ê買賣，無錢ē-tàng賒琴，原來經銷商掠我是田中地區頭一個買主，無論如何一定愛成功買賣。因為一个因緣，chiah-hō͘ 4个囡仔提早接觸彈琴ê機會，雖罔學琴成績普通，總--是有經過學琴經驗認識，影響未來音樂欣賞趣味，算是正面ê投資。斯當時，是m̄是食著好膽藥仔？m̄是，hit陣有kap人份一陣粟仔會，準備半冬後標來還帳。

日子ná噴射機，一目nih，囡仔mā已經成家，mā家己有蓄琴hō͘孫--e練習，厝--裡chit台舊琴soah淡薄仔拋荒罕得相借問，只chhun排看媠而已。有琴無彈奏m̄-nā可惜，囥久恐驚會敗害，m̄知按怎安排伊ê未來較好。算是緣份有夠，熟似田中國小出業學生，現此時彰化縣演藝職業工會理事長許建峰先生，伊講願意收藏做其他路用，提供音樂從業人員習琴創作，這是chiâⁿ好ê歸宿，陪伴37冬歲月福樂FORD F-3 鋼琴，總算揣著新任務，歡喜ē-tàng貢獻伊ê老青春，期待「老琴新生樂曲長揚」。