中師51紀念冊（七）：

中師51紀念冊（七）：

△實習、觀摩、試教：

師者，所以傳道、授業、解惑也。所以老師m̄是演講者，老師m̄是王祿仔仙，老師m̄是主持，老師mā m̄是表演者。老師徛tī烏枋前教冊，愛ē-hiáu「引起動機」引起學生讀冊趣味，需要tī限定時間內教學生學習「主學習」「附學習」「副學習」。

老師vs學生是老師、學生互動關係，m̄是單行線ê說教，是有目標ê教kap學，m̄是老師→傳道、授業、解惑→學生。

Boeh按怎kā三年來學著ê知識教hō͘學生瞭解，達著目標？進入教室徛tiàm講台，面對4-50，甚至5-60个ê學生囡仔，無驚惶bē緊張，1步1步kā既定課程教hō͘學生理解，除了經驗無啥物撇步，m̄-chiah實習、觀摩、試教pìⁿ-chiâⁿ非常重要。

△輔導老師葛道明tō是輔導阮實習、觀摩、試教ê老師：

1、Chhōa阮去有特色學校參觀教學、設備。

2、指導家己製作教具掛圖，mā幫忙學校製作教具掛圖。

3、先佇家己班級輪流上台試教，互相評分改進。

4、語文，數理，史地室內教學，體育唱遊室外上課，lòng tio̍h經驗。

5、囡仔頭王m̄是chhìn-chhài封--ê，囡仔緣若好，互動輕鬆，教學輕可，siuⁿ過嚴肅siuⁿ過好性地lóng m̄好，ē-tàng輕鬆教冊學生閣有規矩，chiah是ài學ê功夫。

6、正式試教tī附小進行4禮拜，4个同學負責1班，著寫教案著寫報告，1人上台教冊，3人觀摩，級任老師輔導並評分，mā-tio̍h參加朝會、體操、隊伍行進，下課需要kap囡仔互動，放學後改簿仔改作業，無閒閣緊張。語文、算術、地理、歷史，音樂、畫圖、體育、勞作，算盤、毛筆、掃地、拭窗仔門⋯包班制需要萬能ê老師。

7、閣來外校（阮班tī太平國校）試教2禮拜，進前教低年級，chit-mái換中年級抑是高年級，低年級學生古錐幼茈，高年級bat代誌有個性，老師ê角色需要轉換chiah ē-tit順序完成任務。

8、文武雙全，徛台頂是老師，下課後是朋友。