行參----囡仔耍： 20200422 Lahjih

行參----囡仔耍：           20200422        Lahjih

行參，阮講kiâⁿ-som，有人講kiâⁿ-sam，mā有人講 行直，台日字典有收 行直。

這是一種激頭腦拚腦智ê囡仔耍，ē使得桌頂ī，mā ē使得塗跤耍，兩人對ī，ná像行棋，窮實大人、查某人、老歲仔人來耍mā真趣味，逐日行--幾盤à 增年益壽食百二。

行參 規則：

一、畫「行參」棋盤；準備兩方棋子12+6子（jí）分烏白兩爿，石頭仔、短節竹笒仔、樹仔枝lóng ē使得。

二、行參棋盤有橫巡、直巡、斜巡分別。

三、食子排列款式：●●●/○○○號做som（參）；○●○/●○●號做taⁿ（擔）；●●○/○○●號做thoa（拖）；○●+○/●○+●號做kòng（摃）。

四、食子機會：

        1. 佇橫巡、直巡、斜巡：「som」會使食對方1子。

        2. 限佇橫巡：「taⁿ」會使食對方2子。○●○烏擔白；●○●白擔烏。

        3. 限佇斜巡：「thoa」會使食對方2子。●●○白拖烏；○○●烏拖白。

        4. 限佇橫巡：「kòng」會使食對方1子。○●+○白摃烏；●○+●烏摃白。

五、佈局：

        1. Pōe輸贏（じゃんけん）決定誰先hē-jí（下子）。烏白子輪流hē子，hē到棋盤無位hē子，chiah進入第二階段實戰。

        2. Tn̄g-tio̍h予人「som」予人「taⁿ」予人「thoa」予人「kòng」ê子仔，暫時用子仔kā硩--leh做記號，聽候實戰進前chiah提掉。

六、實戰：

下子（hē-jí）停止，行棋開始。食jí一定喝聲chiah準算，hông食掉ê子隨提掉。

        1. 烏子3子一排喝「som」，食 白子1子；白子3子一排喝「som」，食 烏子1子；烏子擔白子喝「taⁿ」，食白子2子；白子擔烏子喝「taⁿ」，食 烏子2子。

        2. 烏子拖兩子白子，喝「thoa」，食 白子2子；白子拖兩子烏子，喝「thoa」，食 烏子2子。

        3. 烏子摃白子，喝「kòng」，食 白子1子；白子摃烏子，喝「kòng」，食 烏子1子。

        4. 行到一方認輸抑是chhun兩子，結束棋局。閣再ī抑是換人耍。

㊣佈局比實戰較重要，佈局排步若贏，實戰tō輕鬆。有人真gâu佈局實戰，1子子仔，行--過來「som」，行--過去mā「som」，號做īⁿ-oaiⁿ-som。行著īⁿ-oaiⁿ-som，穩贏--ê。

▲進階版：增加橫巡ē使得「taⁿ」ē使得「thoa」ē使得「kòng」。

▲再進階版：再增加直巡ē使得「taⁿ」ē使得「thoa」ē使得「kòng」。

【進階版較複雜，無一定ē增加心適趣味。】