華臺語詞對照2100詞----11 李志村老師整理

華臺語詞對照2100詞----11  李志村老師整理

1.           故弄玄虛----假鬼假怪；變鬼變怪

2.          既往不究----過去--ê lóng無beh koh計較

3.          春捲(皮)----潤餅kauh (皮)

4.          是這樣嗎？----kám-án-ni

5.          柔弱；軟弱；懦弱----軟chiáⁿ

6.          架子----架勢；派頭

7.          架式(勢)----khut勢；pān

8.          枯萎----lian

9.          殃及無辜----仙拼仙，le̍k死猴齊天；火燒山 累tio̍h猴；火燒厝燒過間

10.      流冷汗----流凊汗

11.        流利----liú-liah；liàn-tńg

12.       流星----漏屎星

13.       彗星----掃帚星

14.       流產----落(làu)胎

15.       流鶯、私娼----徛壁--ê；落翅á

16.       洗心革面----改頭換面；收腳洗手

17.       洗髮精----洗頭毛膏

18.       活到這個歲數----食到chit-ê年歲

19.       活得不耐煩----活久teh siān

20.     活該----應該--ê；死好lah

21.       洩漏----lāu-sia̍p (漏洩)；走漏

22.      炫耀----iāng；展；風神

23.      為所欲為----想beh án怎tō án怎；隨在伊；據在伊

24.      為非作歹----非非sám做；做pháiⁿ代誌；匪類；做惡做pháiⁿ

25.      為難----pháiⁿ做人；做石磨á心

26.      為難人----刁苦人

27.      狡詐----奸巧

28.      狡猾----滑溜；狡怪；奸巧

29.      狡辯----辯解；死諍；強辯；辯話骨；一嘴掛雙舌

30.     甚麼事情----啥代誌

31.       省吃儉用----儉腸neh肚；儉儉á用

32.      相差十萬八千里----一丈差九尺；天差lih地；差大碼leh

33.      相處----tàu陣；作伙

34.      相處不來----鬥bōe合；bōe鬥leh

35.      相輔相成----籬pn̄g壁，壁pn̄g籬；相牽成；相pn̄g相chhiâⁿ；相thīn；相pn̄g

36.      相親----相對看；相親

37.      眉來眼去----使目尾；使目箭

38.      眉開眼笑----嘴笑鼻(目)笑；歡頭喜面

39.      眉頭深鎖----目頭結結

40.     看(瞧)不起----看無目地；看無起

41.       看不過去----看bē落去；看bē做lih；看bē過心

42.      看走眼；看錯人----看tāⁿ秤花；看錯á；看走精--去

43.      看情形----便看；看扮勢

44.      看透了----看破腳手；看破；看出出

45.      看著辦----便看

46.      穿著----穿chhah

47.      穿幫；曝光----piak孔

48.      紅光滿面----紅膏赤chhī

49.      紅得發紫----紅到出汁；chhèng kah掠bōe tiâu

50.     紅顏薄命----súi(媠)人無súi(媠)命

51.       美言----講好話

52.      耍花樣----pìⁿ鬼pìⁿ怪；pìⁿ齣頭；pìⁿ-báng

53.      耍脾氣----使性地

54.      耍嘴皮子----弄(盤)嘴花；liān siáu話；盤嘴錦

55.      胃口----嘴斗；khùi口；脾土

56.      背包----揹(袋)仔

57.      背道而馳----一人行一路

58.      胡吹亂蓋----畫山畫水

59.      胡思亂想----烏白想；想東想西

60.     胡說八道；鬼話連篇----烏白講；畫山畫水

61.       胎記----床母做記號

62.      苦思----激頭腦

63.      苦差事----硬á

64.      苦病纏身----艱苦病痛óa壁sô

65.      苦盡甘來----艱苦頭快活尾

66.      苦頭----苦湯；kiⁿ

67.      若有所思----想到se̍h神se̍h神；失神失神；戇神戇神；thōe-thōe

68.      若要人不知，除非己莫為----瞞--者瞞不識，識--者不能瞞

69.      英俊瀟灑----ian-tâu (緣投)phiau-phiat

70.     苟延殘喘----猶有一點氣絲á teh喘；beh死bē斷氣；病人拖節氣

71.       要不是…----若m̄是……

72.      要死不活----beh死bē斷氣

73.      要死要活----beh死beh活

74.      要命一條----一箍人；人肉鹹鹼

75.      要命----夭壽；買命；hiau-hēng；hiau-hēng失德

76.      計較----khêng分；計較；稽考

77.      訂契約----phah契約

78.      負心漢----薄情郎

79.      負債----欠人(的)錢

80.     迫在眉睫----迫tī目睭前；火燒目眉；水淹到鼻孔

81.       重起爐灶----冷灶重起

82.      重新投胎----têng-koh出世；重挲麻油

83.      陌生----生份(人)；生疏(事)

84.      面具----小鬼á殼

85.      面面俱到----逐方面lóng顧kah到；gâu做人；人人好

86.      面惡心善----賊面佛祖心；賊面菩薩心腸

87.      面善心惡----面白心肝烏；惡魔假書生

88.      音訊全無----無消無息

89.      風水轉流轉----三年一閏，好歹照輪；有時星光，有時月光

90.     風光----chhiaⁿ-iāⁿ

91.       風光----風神； chhiaⁿ-iāⁿ；光景

92.      風吹日晒----吹風曝日

93.      風風光光----chhiaⁿ-chhiaⁿ-iāⁿ-iāⁿ

94.      飛天遁地----飛天鑽地

95.      飛魚----飛烏

96.      飛塵瀰漫----風飛沙eng-phōng-phōng

97.      食髓知味----食了知滋味

98.      首傳弟子----thâu-kioh-sai-á (頭kioh師á)

99.      香末----sok柴hu；香bo̍ah

100. 香皂----芳茶箍

101.   香菜----芫荽(iân-sui)

1948-1960_崁頂庄ê記智 Lah-jih_20140210

1948-1960_崁頂庄ê記智 Lah-jih_20140210

1960年代崁頂庄蕭姓角頭名kap世系族親住宅分配圖：

 土地公廟仔kap將爺廟仔：

 已經焦--去ê大欉榕仔：

 役會：

 翻修前ê祖厝：

 古早ê祖厝：

 現在ê祖厝：

崁頂庄自古早到chit-mái，和諧團結真出名，庄眾多數姓蕭，奮公祖厝to̍h起tī庄內，外姓 黃、江、張、謝、陳、紀、邱，攏kap蕭姓結緣真深，有ê是姓蕭ê招婿，有ê是蕭--姓ê姻親，逐家互相兄弟叔孫稱呼，論輩無論歲，伯公姆婆、叔公嬸婆、姑丈丈公、阿姑姑丈、丈公姨婆、叔公祖舅公祖，有大有細，無leh烏白稱呼。因為庄內厝宅集中，人口真濟，婚喪喜慶陪綴有leh分角頭，若是庄內公眾代誌，to̍h按古例規矩做伙來，出公工、納丁錢，poa̍h頭家、爐主神明代，寒天巡更、做冬尾戲、割香迎神明，只要頭人發落喝聲，煮食、搭棚，弄獅、叁筆鑼仔、子弟陣，隨時就位chhoân-piān-piān，無人會推辭，chit款團結合作ê好風俗，到今猶原維持。公眾代全庄來，陪綴to̍h照親成關係kap族親親疏來分，族親親疏大約按奮公派下「團」--字世系，團欽、團圍、團環、團武kap團貴做區分，抑是照角頭來。

下面to̍h來紹介早期崁頂庄角頭名kap團--字世系住宅位置：

※按角頭名來紹介：

▲公埕：廟埕兼大路to̍h是公埕，拜神、做戲、觀童乩、弄獅、澎湖先A-Jiông師教拳頭、子弟陣排場攏tī chia，王祿仔、賣藥仔、扑拳頭賣膏藥、落地掃、歌仔戲mā選tī chia，是庄頭集會好所在，大人、囡仔攏意愛。公埕有兩間廟仔，坐北向南，西爿土地公廟仔，服祀土地公土地婆，磚仔起khàm日本瓦，內面拜桌是紅毛土桌，無拜拜時有囡仔tī chia sńg，大人tī chia跋筊。東爿將爺廟仔，木造khàm安全瓦，有拜亭，3仙元帥爺無裝金身，kan-nā用稻草tān做人形，用紙枋畫五官貼人面，有較陰，囡仔m̄敢入去sńg，冬尾時做巡更寮仔。公埕埕尾倚姓邱--e厝宅溝仔邊有1-kâi「公井」，水泉飽足水質真清，是歸庄人ê食水，有井盤閣有搭棚khàm厝頂，井chhiān 半人koân，較安全，m̄-koh猶是有人無細膩跋落鼓井底，好佳哉救有轉--來。

▲役會：日本時代建築，木造瓦厝，前後壁堵攏開窗仔門，thang光通風，厝後有空地，厝前門埕有花園、旗台，大門邊有磚仔疊ê牆圍，是室內集會所，暗學仔，幼稚園，庄民大會，「集雲軒」曲館金龍師教絃管、唱曲攏總tī chia進行，落雨天排場、搬戲、做王祿仔⋯ 好所在。

▲祖厝：書山祠是蕭--姓奮公派下祖祠，慣勢講做祖厝，每年正月十三祭祖chiâⁿ鬧熱，m̄-nā厝埕闊，厝後厝邊閣有水田，四箍輾轉用紅磚仔khōng牆圍。

▲竹圍仔(團欽/團貴)：傳統竹圍厝宅，刺竹模圍tiâu--leh，tī荖宅仔東北爿，有兩內底。西爿chit內底向北起，團欽囝孫金火、金水、來春、文溪、文福、家修、家明、家炎、家角⋯ê厝宅；東爿chit內底向東起，大門開tī南爿，有牌樓戶碇，團貴囝孫厝宅，貴川、明鏡、明利、清標、清林、江榜、水溝、家舜、家再厝宅。

▲荖宅仔(團欽)：崁頂庄上大內底，除了正身護龍起kah cha̍t-thóng-thóng向西起ê本內底，猶有包含鴻--ē、仁貴--è、文典--è、百枝--e、坤河--ē各別門戶5內底。聽講古早是種荖葉、荖藤、荖花ê宅仔，攏是團欽派下囝孫，添登、添志、朝木、章哲、赤牛、諒、永賢、文典、水榮、鴻、連益、仁貴、再傳、振德、深池、茂桂、乞、再為、百枝⋯ê厝宅。

▲榕仔跤(團圍)：聽講chia古早有一欉榕仔，除了姓蕭--e，mā有陳姓囝孫。蕭姓攏是團圍派下囝孫，新科、新環、銘發、銘郁、元讚、元甲、金閣、金殿、江彬、金印、邦訓、金郎、明堂、明國、明魁、烏棕、榮林、榮杉ê厝宅。

▲頭前庄(團欽)：分做4-kâi門口埕，3-kâi向南，1-kâi向西，攏是團欽派下囝孫，蕭梓、清苗、新科、蕭益、如圭、如東、東鄰、愛哮、水藤ê厝宅。

▲後壁厝(團武)：分做3-kâi門口埕，攏是團武派下囝孫，昌蔭、昌添、光達、源盛、源潔、坤修、光沙、福傳、清四、清歪、成ê厝宅。

▲瓦厝底(團圍)：大門是門樓仔，三進三落，mā講做「門樓仔內底」，周圍真濟刺竹模，前後埕，正身後壁有鼓井，有臭水管味，kan-nā ē-tàng洗蕩用，團圍派下朝宰公囝孫，光貴、光寬、紹振、蕭添福、蕭添福、蕭添壽、蕭添猷、添露、有朋、炳模、順恒、順孝、顏淵、順來、順意、順強ê厝宅。

▲大欉榕仔(chhêng-á)：佇東爿庄外水田溝仔邊，足大欉，分椏真濟，cha̍h日頭光線真闊，熱--人閃涼ê好所在，peh上樹頂有真濟樹椏ē-tang hàiⁿ-tong-chhiu，ē-tàng theⁿ-leh睏，可惜tī 199?年著病枯焦死--去。

▲四跤涼亭；Ún-jī(允藝)ê店仔；Chàn-sêng-á(清在)ê店仔；Làu-tó͘-se--a(邱平福)ê店仔。※按「團」--字世系住宅來紹介：▲大房團周：缺

▲二房團欽：範圍上闊。竹圍仔西爿內底；荖宅仔；頭前庄；順良(木泉)兜；接生/羅漢/壬辰兜；慶樑維欽/純清如泉兜；日性/清俊/清雲/連坤/連魁兜；清課/耀輝兜。

▲四房團環：宗標/進成/輔港/山河/家丁兜；東波/家定/福財/火聖/萬松兜。

▲五房團清：缺

▲六房團武：後壁厝。

▲七房團亨：缺

▲團貴：竹圍仔東爿內底，貴川、明鏡、明利、清標、清林、江榜、水溝、家舜、家再。

▲庄北員集路邊kap社頭隔界：蕭紹賡(昌薰)/蕭敦仁兜。

▲庄南東爿圳溝邊：蕭曰亨/倫振/倫恭兜；蕭興科/樹木兜；蕭昌甲兜。

▲外姓：黃文/國彥兜；黃溝/黃輝兜；紀清水兜；謝--姓兜；張--姓兜；邱--姓兜。

※心適ê唸謠：鬥句好唸，記人名好步數，無歹意。

▲唸謠一：東波--e生家定，萬松--ē生石鐘，石鐘真chiâⁿ khong，火性--è生阿宗，阿宗臭耳聾，日性--è生汝南，汝南--ē真chiâⁿ 媠，阿魁--e生木水(春行)，木水--è真chiâⁿ khong，坤--e生茂聰，茂聰--e皮真韌，清寅 (清雲) --ē生萬順，萬順--ē真無閒，俊--è生嘉明(吉明)，嘉明--ē愛食肉，賣豆油--ē叫阿甲。----記12鄰人名。

▲唸謠二：Chhó(草)、Chài(再)、Toān(緞)、Iām(炎)、Thiam(添)；かつ(和四)、まつ(五郎)、Tiong-kài(忠介)、Hiân(阿賢)、Ban(阿屘)。----記choân--ē(蕭如泉)11个囝名。

▲唸謠三：Hoe(花)、Toān(緞)、Ko(興明)、Eh--è(嘉惠)、Gián(研)、Chhó(草)；Hoe、Toān、Bêng、Eh--è hoán-hêng。----記蕭添福ê囝名。※仝名區分：庄內仝名bē少，需要無仝ê稱呼。竹圍仔Súi vs大頭仔Súi；牛車福vs碗粿福vs矮仔福；豆油膏甲vs榕仔跤甲vs大舌甲；竹圍仔明vs後壁厝明vs khong明/火明--ē；牛車輝vs黃仔輝vs紅猴輝；竹圍仔溝(水溝) vs黃仔溝vs缺嘴溝；紀丁ûi vs黃仔ûi；竹圍仔標vs宗標--e；長腰科vs 榕仔跤科--e vs紅毛仔科。

※崁頂庄名人：

▲蕭紹賡(昌薰)：蕭敦仁ê老爸。日本時代做過卓乃潭區區長、書記、街庄長，崁頂蕭姓族長。

▲蕭敦仁：1907年總督府國語學校畢，做過彰化縣農會理事、臺中州員林郡田中庄長、臺中田中信用組合長、卓乃潭區長、田中庄長、臺灣省臨時省議會第一屆議員。田中鎮農會創辦人。1917年授紳章。

▲蕭鴻：做過田中鎮第二、三屆鎮長。

▲蕭金印：做過田中鎮代表、代表副主席。

▲蕭振瓊：做過田中鎮代表。

▲蕭貴川：煤礦業董事長。

▲蕭輔港：田中代表會秘書。

▲蕭令：電信局局長。

▲蕭文典：田中鎮公所。