老歲仔團湘西張家界9日遊----第七工：

老歲仔團湘西張家界9日遊----第七工：

昨--日kap tsang-ng兩工攏佇山頂peh上peh落 人kheh人，今仔日換bueh來去山跤 坑溝仔行踏，景點有 十里畫廊、金邊溪、大峽谷天梯kap大峽谷步道、坐船遊江。

頭一站來到風景真媠親像畫ê十里畫廊，坐細台火車慢慢仔行勻勻仔看，有影tō-tio̍h，沿路山景tsiâⁿ-súi，仝款是砂岩峽谷地形，tī-tsia是ùi山跤看tsiūⁿ山頂，he山尖奇形怪狀，形體像人形、像動物，mā有號名三姊妹、壽星迎賓、採藥老人、向王觀書⋯，在人慧眼觀賞。

紲--落來 來到張良ê故鄉張家界金邊溪，沿路mā是砂岩峽谷地形，ē-tàng近倚看較斟酌，路草鞏紅毛土，有山有水好行踏，是散步好所在，可惜時間有限，行無4分之1 to̍h越頭繼續下晡行程。

下晡bueh去ê所在是大峽谷天梯kap大峽谷步道、坐船遊江，he是ùi山頂落崎到山坑仔連紲ê路線，特別hit个天梯，導遊一再háⁿ講千外坎ê樓梯是偌崎拄偌崎，雖罔是落崎比peh崎較輕鬆，總--是跤頭tsih-tsài bē-tiâu ê人需要考慮，因為行落崎to̍h無閣再行回頭路。結果有5-6个鄉親m̄敢落車。

因為chang-ng老兄靠勢伊跤頭勇，烏白走烏白蹤家己迷路，耽誤逐家時間，導遊今日to̍h特別交代，千萬m̄-thang閣tshut-tshê。其實老兄跤手真正扭掠，落車to̍h是bueh行做前，淡薄仔臭屁風神愛展，今仔日bueh去ê天梯有千外坎，伊mā講だいじょうぶ沒問題，做恁放心。

大峽谷天梯有影長koh崎，原來he是300外米深ê山壁必開4-5米闊度ê一線天，tsiah用人工起造一座千外坎ê樓梯路，好佳哉有彎斡平台小歇睏，mā減少懸度ê恐怖，有人開始怪導遊ê無道理，明明ē-tàng行suah hō͘伊háⁿ kah m̄敢行。

天梯上尾站有1段用紅毛土洗石仔磨hō͘金滑ê溝槽做tshū梯，可惜無夠滑溜，tshū著khê-khê無啥好耍。落坑溝仔了後開始沿溪溝仔邊ê步道散步，ná行ná看景緻，有溪水有山石，有瀑布有紹介路牌，不止仔遠，順水路行m̄驚迷路。坑溝仔愈來愈闊，彎一下斡已經是ē-tàng行船ê水路，tī tsia停腳排列換坐船，坐tiàm船內ná歇睏ná看兩爿光景，恬靜恬靜，罕罕--à有鴛鴦水鴨歡喜泅水tshàng-tsúi-bī，加添遊客休閒趣味。落船後peh上岸頂，bus已經leh聽候，時間猶早，導遊tshuā阮來到溪步街se̍h街兼買物，這是現代化風格苗族街路，街路有公埕，路邊有樹木花園，店面妝娗súi-tang-tang，十花五色隨在你揀，徛店姑娘tsiâⁿ客氣，輕聲細說招呼。se̍h到bueh暗仔tsiah去食暗頓，結束今仔日行真遠真遠ê行程。

△十里畫廊三姊妹。

△十里畫廊車頭。

△十里畫廊火車。

△十里畫廊。

△人真濟，行路著ná行ná斟酌隊旗位置。

△世界自然遺產張家界武陵源。

△一線天，大峽谷天梯。

△大峽谷步道tsúi-tshiâng。

△圓桶絕壁，砂岩峽谷地形，。

△坑溝仔邊步道。

△有故事ê破船。

△坐船遊江。

△砂岩峽谷地形，

△溪步街街景。

老歲仔團湘西張家界9日遊----第六工：

老歲仔團湘西張家界9日遊----第六工：

今仔日bueh-koh peh山，走揣「阿凡達」ê家鄉，tī袁家界。

行程有：袁家界、百龍天梯、天下第一橋、天子山景區；賀龍公園、楊家界溜籠、天波府。

為著避免黃金週ê遊客滿山坪，導遊kā明仔載ê行程換來今仔日。閣講山頂 人kheh人，行路peh崎著sè-jī，一定相伴行m̄-thang孤一个，揹仔 phāiⁿ hō͘好，錢銀財寶囥hō͘好勢，手機仔翕相提hō͘牢，lak--落去 是khioh bē轉--來，千萬m̄-thang迷路，隨時斟酌導遊攑ê旗仔⋯，交代一大堆，to̍h是驚做tshut-tshê iân-tshiân時間添麻煩。

旅館離武陵源入口行路15分鐘，m̄免坐車，因為7點出仔to̍h到位，無排列to̍h直接入門去坐百龍天梯，百龍天梯是升降梯，懸 300外公尺，透明玻璃窗ē-tàng看山景，因為佔無好位kan-nā影著一屑仔--niâ。ná像無幾分鐘to̍h行出天梯，ua̋！有影人群he̍h-he̍h叫，需要排隊koh坐bus上山頂。

山頂闊莽莽，一四界lóng是懸拄天 直lak-sak ê山峰，你看he上帝疊--è ê石柱，1支1支1柱1柱，祂無用紅毛土khōng，無用尺niû，無king枋模，隨在照祂意思起造，kài-sîng綠化ê都市摩天大樓，頂面發tsiâⁿ-tsē樹木，kài青翠，雖罔奇形怪狀、歪歪tshua̍h-tshua̍h，看--起來卻是媠kah hō͘人o-ló kah 觸喙舌，感謝上帝ê恩典。

山路彎彎斡斡，影目景點足濟，觀景台幾若位，tsia有hia mā有，peh一个崎、落一个坎，斡一个斡、彎一个彎，lóng是無仝ê景緻，講實在，he路草按怎行，tsia是tó位hia是tó一支山，真正茫茫渺渺m̄知影，kan-nā知影tùe人行tùe人看，人是that-that-tīⁿ，看著--è lóng是奇景怪石，除了目睭thí-kim金金看，若有機會to̍h趕緊翕相錄影，好背景位置hō͘在地生理人佔了了，咱若揣著好機會好角度，Model都猶未徛好勢，隨時hō͘人影tsa̍h-tsa̍h去。有時咱m̄行，人是一直kheh一直sak，驚做兩人ē分離，一目nih ē揣無人，tsit時手牽手比心連心suah較重要，只好十指鉤tiâu-tiâu，hō͘咱感情相透，mā是意外ê收成。原來tsia是「阿凡達」電影背景所在，「阿凡達」ê家鄉。

約定時間tit-bueh到，行向指定「袁家界遊客基地」會齊準備食中晝飯繼續下晡行程，相等半點鐘，各組人數已經到齊未？

「啥乜？欠一个？」

「80外歲老先無khuàiⁿ人！」

趕緊揣，bueh tó位揣？生份所在tsiâ敢去揣？kan-nā近位仔niau-niau看，行過來行過去，遊客tshān-tshān-hiúⁿ，to̍h是無khuàiⁿ老--ē 一个，有人leh緊張，我是m̄敢著急，bueh急bueh揣hō͘ tshuā隊導遊去傷腦筋。

10分20分30分一直過，導遊轉來原位講：「已經報警，咱著繼續行程⋯  」

不得已逐家開始koh行，突然有好消息「老--ē到位--ā！」好佳哉！iân-tshiân tsiâⁿ點鐘--niā-niā。

siáⁿ知老兄 一點仔都無緊張mā無感覺失禮，伊suah按呢講：

「我mā有報警，bē--lah，bē phah-m̄-kìⁿ--lah，to̍h是tuè無著陣，我mā有法度轉--去！」

因為敬老尊賢，無人kā見怪，伊lóng無感覺「眾人等伊一个」足歹勢。

落山bueh坐流籠，tio̍h-koh坐bus，1台坐bē落著坐2台，導遊kan-nā一句啥乜所在落車to̍h載leh走，結果又閣有人坐過頭，著閣等in坐回頭車。看he導遊經驗內行，phah拚tshuā阮行，伊是老神在在，麻煩是有，若無跋倒著傷to̍h一切OK！

車站看著「服務遊客 有求必應」，有夠心適趣味，雖罔是漢字，文化無仝意思to̍h歪tshua̍h，有求必應是in ê好意，咱是有應公百姓公廟tsiah有tsit 4字。

楊家界ê溜籠坐著tsiâⁿ爽快歡喜，沿路山景to̍h-tī目睭前，1山1景一直經過，10外分鐘到位，tsiah-koh行一段柴枋釘ê落崎步道，bus tī hia接阮轉去旅館歇暗。

今仔日過了tsiâⁿ精彩，目睭看kah飽tuh-tuh，雙跤行kah bueh thèⁿ腿，雖罔有緊張，心情bē急。

△世界第一梯。

△石頭結構。

△

△排列坐bus。

△人客lâng kheh人客lâng kheh。

△上帝ê傑作，uai-ko-tshi̍h-tshua̍h天然ê媠。

△阿凡達ê家鄉。

△綠化ê摩天大樓。

△服務遊客，有求必應。

△賀龍公園。

△阿凡達ê家鄉。

△袁家界遊客基地。

△旗仔是團隊目標。

△楊家界溜籠。