20030530_冬粉 Lah-jih_2016/01/01

20030530_冬粉     Lah-jih_2016/01/01

朋友，你bat食過冬粉--bò͘？白白幼條幼條ná麵線，金滑金滑koh小可通光通光，kài-sîng米粉，食--起來khiū-khiū núi-núi(𩚨𩚨軟軟)，ku̍t--一下吞落喉，hit種滋味通人知。

若講著冬粉料理，冬粉鵝肉冬粉鴨肉，抑是冬粉魷魚羹lóng hō͘人流喙nūa，猶有冬粉湯、冬粉包，lóng是好湯頭ē使得食kah飽。tn̄g-tio̍h寒天時，食火鍋，囥寡冬粉，包領你ē食kah腹肚mo͘h-leh 一直so，飽tong-tong koh bē-ùi。
另外bueh報lín一種料理「炒冬粉」，bat食過ê人一定o-ló kah觸喙舌。Tī tsia順紲教lín按怎炒冬粉，tio̍h tsham 肉絲、香菇、tong蝦、木耳，koh lām一寡青菜、豆菜抑是高麗菜攏總好。Bueh炒進前，先kā tsia ê作料芡芳炒熟，然後hē一屑仔水，炒--起來tsiah-bē siuⁿ-ta歹落喉，隨後tsia̍h-ka洗好ê冬粉鉸鉸剪剪做較細節--leh，囥落去鼎內隨時沿路炒沿路lāng，免外久，芳貢貢khiū-the-teh ê炒冬粉，已經ē-sái-tsit 拴到桌頂，保證你食1碗了後bueh-koh貯1碗，若是tn̄g-tio̍h腹肚當leh枵ê時陣，suah bē記得ngeh菜tō-ē--ò͘。
Tsiah-nī好食ê冬粉，按怎製造--ē 你敢知？到底是冬天ê冬粉，抑是中國ê山東人做ê東粉？請逐家聽我講看覓：

冬粉原料是綠豆，綠豆著先浸水浸hō͘伊軟，chiah-kā挨hō͘幼，親像挨豆奶按呢，挨好tsiah koh hiâⁿ hō͘滾，燃滾煮熟了後tsiah koh過濾，kā豆粕濾掉，kā水分濾ta，著pìⁿ-tsiâⁿ像做紅龜粿ê粿粞按呢。紲落去kā綠豆粞用機器抽絲，大條細條看產品ê設計，抽絲了後，就1捾1捾kā khe̍h入去冷凍庫，冷凍到零下18 ˚ C。 冬粉廠ê頭家講，這to̍h是做冬粉kap做麵線、豆簽、大麵無仝ê所在，無經過冷凍ê過程，冬粉絲(條) ē夾夾做伙，按呢to̍h無彩工，所以冬粉廠ê施設貴tī冷凍庫ê開銷，冷凍過程若順序，做成ê冬粉tsiah-ē 1條1條、1絲1絲。
Ùi 冷凍庫冷凍出來ê冬粉，tsiah-koh經過kha̋n-só·，烘焦，to̍h ē使得包裝出貨，這是tsit-mái ê技術，古早時代，to̍h無tsiah-nī快速方便。
過去無冷凍技術，做冬粉著看天氣，中國東北所在，天氣寒sih-sih，in to̍h是利用寒天時kā冬粉用冰角冷凍，聽候日頭較燒絡tsiah來曝冬粉，m̄-ku in無講冬粉，in lóng講做『粉絲』，後--來有中國人來到咱台灣，to̍h有一寡山東人經營粉絲工廠，in kā產品叫做粉絲，mā有人kap台灣人鬥陣一下久，順應台灣人ê意思，仝款講做冬粉。

古早冬粉是冬天tsiah有leh做ê食物，m̄是山東人做ê山東粉，雖然市場mā有山東牌ê冬粉，he是品牌名，m̄-thang誤會誤解--去，無仝ê所在，無仝ê文化，當然有無仝ê號名含意，各有千秋，中國人號ê名有雅氣，咱台灣人號ê名mā 真kah味。
講到tsia，順紲講日本人ê冬粉叫做啥乜？「春雨」，春雨to̍h是春天落雨ê意思，按怎講？日本人做冬粉，仝款需要tī寒天用冰角冷凍，tī春天天氣燒絡ê時，tsiah捾捾出來曝日頭，1時間曝冬粉ê大埕，竹篙頂1捾1捾ê冬粉絲(條)kài-sîng tī-leh落雨，落毛毛仔雨，「春ú、春hō͘」tsit款景緻，敢m̄是真有詩人ê氣質！
冬粉抑是粉絲？ah抑是春雨？敢有人想著台灣人號名ê原意？台灣人ê氣質tī tó位？台灣人bueh有家己ê氣質，一定著用台灣人ê觀點，用台灣人ê話語，tsiah ē-tàng表達出台灣人ê原味原意，趕緊來學台語文，用家己ê原音，用家己ê khùi-kháu，經過文學ê處理，建立台灣人高雅ê氣質。

感謝田中(Chhân-tiong) Thài-pin 企業公司頭家Gân--先生提供製造冬粉ê過程，kap台灣人kā冬粉號名ê由來，hō͘咱了解無仝國度ē產生無仝文化ê內涵。

原文是pe̍h-oē-jī，20160101翻寫做漢羅文。蕭平治

2016 迎新棄舊 毋通執著

『2016 迎新棄舊』

「2016 毋通執著」

阿公無去：(輕聲笑詼)

阿公無去：(輕聲笑詼)

奇才仔叔公約阿公欲去廟埕泡老人茶，阿公人真倦，leh睏中晝，煞bē--記得。

奇才仔叔公佇路裡tn̄g-tio̍h我，問講：「恁阿公有去廟埕--無？」

「無！」

「你講啥？」奇才仔叔公耳孔tsiâⁿ重。

「阮阿公無--去啦！」我thiau-kang牽長聲kā ìn。

啥知奇才仔叔公suah烏白講話：「Ha̋ⁿ！tú-chiah chiah kap我約好--niâ，哪會chiah脆命？」
Lah-jih寫

老歲仔團湘西張家界9日遊----第八工：

老歲仔團湘西張家界9日遊----第八工：

山頂peh山兩工，坑溝仔散步一日，今仔日換bueh去nǹg山洞看石鐘乳(tsio̍h-tsing-jú)kap石筍(tsio̍h-sún)，地點tī黃龍洞，張家界ê旅遊重點到tsia結束，紲落去to̍h是打道回府，又閣是遙遠路途。
Tshiāng-tio̍h中國節日ê黃金週，導遊一直解說為啥乜需要提早參觀黃龍洞，為啥乜需要提早起程趕去長沙坐高鐵ê理由----驚做塞車。有人講伊ê目的是：參觀黃龍洞若bueh特別VIP，ē-tàng較緊入內參觀m̄免排列，不過tio̍h-koh加開錢，結果逐家無同意額外加錢，仝款順利入洞無iân-tshiân時間。
坐船10分鐘koh行路2點鐘，tī暗淡燈光起起落落ê洞穴參觀，看著hiah-tsē有鐘乳石(tsing-jú-tsio̍h)有石筍(tsio̍h-sún)ê現場，見證大自然ê奧妙，上帝ê萬能，6千外萬年地殼變化所造成ê洞穴，雖罔m̄是啥乜美景，卻是親目見ê奇景，值得來行tsit-tsuā。
頂晡參觀黃龍洞了後，隨時起程照原路經由常德到長沙坐高鐵，bus內無カラオケ thang唱歌消遣，一路ná phò-tāu ná tuh-ku，忝頭兼無聊，有人規氣睏hō͘飽眠。
除了食晝、食暗kap歇睏放尿，bus一路平順公路一直走，講驚做塞車都無影，暗時7點外已經到長沙，離9點20分ê車班著等2點鐘，有人開始koh se̍h-se̍h念：實在無夠意思，一直趕一直háⁿ，講啥乜VIP ē較緊，講啥乜ē塞車，a̍h-suah-m̄-tsai kan-nā想bueh趁錢，kan-nā想bueh結束里程趕緊轉--去。
Se̍h-se̍h念ná有啥路用，m̄是著勻勻仔等。
長沙廣州七百公里，兩點半鐘+半點鐘坐tiàm膨椅，也愛睏也尻川䫌酸，暝時閣無風景thang看，實在淡薄仔鬱卒，siáⁿ知半暝12點外廣州落車，載bueh旅館ê bus猶無來接，流浪廣州車頭半點外鐘，1-tīn鴨仔陣41个，只好期待導遊手機仔一直敲，一直連絡，「這是啥乜旅行團⋯」直直牽拖直直tsho̍p-tsho̍p唸bē-suah。
等到bus來載到珠海tuà旅館，已經是半暝3點，1-tīn老人團拖一身倦tauh-tauh ê身軀kap行李箱tsiah-bueh洗身軀oⁿ-oⁿ-khùn。

△黃龍洞外面展覽ê水車。

△面頂tin--落來--è是鐘乳石，地面puh--起來--è是石筍。

△內面有無仝色水燈光，tshiō hō͘鐘乳石、石筍較美麗。

△

△黃龍洞to̍h是tī tsit座山內。

古物仔_囡仔時代記智篇_錢筒仔行路ê龜：陳慶芳收藏/蕭平治翕相

古物仔_囡仔時代記智篇_錢筒仔龜行路：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活teh to̍h有意義；有古物ê歷史，少年人to̍h-ē感恩siàu念。】

▲儉錢是美德，古早人ê觀念。
有錢人儉錢寄銀行、寄農會，趁食人khiû-khiû儉儉份會仔抑是偷藏櫃屜內，家己規定必要時tsiah ē使得提出來開。若是個人挹私奇，to̍h真正tshàng-tī家己知影別人m̄知影ê所在。儉錢to̍h是儉bueh有一工需要ê時，tsiah ē-tàng滿足家己ê美夢，完成期待ê向望。
囡仔人，bē-hiáu趁錢，錢銀需要大人hō͘伊，有時大人大出手，過年teh年錢，lân-san ê銅銑銀角仔，盡量留hō͘囡仔提去買物，序大人ē利用機會交代開錢著撙節，m̄-thang一睏開了了，紲落去教囡仔按怎儉錢。
囡仔儉錢通常用錢筒仔，鋸1節雙頭有目ê竹管，倚竹目所在鋸一个狹狹ê孔紃，tú好ē-tàng seh入去銀角仔ê縫，意思kap牛蜱sio-siōng，ē-tàng入bē-tàng出，等到貯tīⁿ tsiah來破錢筒仔。
想起「生食都無夠，ná有thang曝干」hit-tang-sî，頭興興，提著銀角仔to̍h隨lok入去錢筒仔內，逐工「lok lok lok」搖看有偌濟，幾工了後，bē堪得四秀仔siâⁿ人流嘴nūa，「lok lok lok lok」用心計較倒出來買物，無外久，lok錢筒仔儉錢已經bē記得。
△Tsit種錢筒仔，好耍較贏過路用，有錢人，囡仔lok錢錢筒仔內做議量(gī-niū)，若bueh買物買四秀仔，kā序大人討to̍h有，m̄免倒錢筒仔。

△台灣銀行儲蓄箱，掛對號鎖ê錢筒仔。

△Tsit隻豬公，塑膠質，tsiâⁿ時盛(sî-sīng)，招財進寶。

▲行路ê龜：空殼ê腹肚張機關，一粒圓形凹窩有溝ê輪仔，kō͘樹奶束連佇龜身兩爿，一條棉線縛纏tiàm圓形凹窩所在，線頭穿出龜骿中心hit-kâi孔，線若giú，樹奶to̍h滾lún-tsūn滾，線若放，樹奶to̍h-ē恢復原狀，圓形凹窩有溝ê輪仔to̍h-ē tuè-leh轉，龜to̍h-ē行路，tsiâⁿ好耍，適合ē-hiáu行路ê細漢囡仔。

記得細漢3-4年級時，大兄阿里山轉--來，tsah一隻tsit款ē行路ê 龜hō͘我耍，感覺足趣味足稀奇，有一工雄雄走無--去，3揣4揣，原來是bih-tiàm眠床跤去。

△一粒圓形凹窩有溝ê輪仔。

△倒爿tsit隻是塑膠製品，正爿tsit隻是用lô-liâm(牢黏)做--è。