看相片回想人生_1962/8→1965/10_三潭國小服務三年(四)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1962/8→1965/10_三潭國小服務三年(四)：
▲猶未做老師進前，bat聽二伯講恆仔兄讀冊ê故事：「人是愈讀愈進步，你是愈讀愈倒nǹg⋯」「阿爸！你m̄知--lah，人老師lóng是疼bueh升學--è，lóng ūi in[偏坦他們]拍較好ê成績。」「a̍h有hit-lō代誌，貧惰m̄講，推推hō͘老師。」「阿爸！有影--lah，m̄信，聽候學校長kā阮考試，我一定考第一名。」阿伯講，有影tō-tio̍h，果然學校長考考第一名。
升學考試ê競爭，m̄是tsit-mái tsiah有，原來日本時代to̍h存在--ā。聽講三潭國校ùi 3年前hit屆有學生考著彰中kap彰女，名聲自按呢tshìng--起來，斯當時田中鎮有6間國小，有4間聯合舉辦模擬升學考試，椅仔搬去運動埕，5年6年交插排列，學校交換老師監考，然後集中改考卷，然後按成績排序閣標註校名班級，競爭非常，良性pìⁿ惡性，明爭暗鬥，惹起同事間無爽快。1學期有模擬考2擺，月考3擺，閣有每日ê平常考，真正考kah學生喝m̄敢，老師mā無暝無日。
▲因為學校長看我身體也無各樣，to̍h參詳舖排隔轉年擔認5年級升學班，5年級人數無達到編3班，學校kō͘偷食步編2班升學1班無升學，差別tī升學班加強ē考試ê國語、算術、常識3科，課表照排，術科盡量mài教，盡量算術國語課，需要ngē記to̍h ngē記，所以需要理解ê算術科是補習加強重點。彼當時補習老師流行一句話，叫做「飼鴨仔、灌鴨仔」，意思是『填鴨式教學』，暗唸、背誦、重複練習to̍h-tio̍h，所以考試是必要手段，為著考試需要大量試卷，kā生理人買無夠用，to̍h家己買油印紙刻鋼板，1擺油印3份，2份是よび[預備]後日、後學期復習thang用，考卷、油印紙、印書紙著kā學生收錢買，這是額外，bē-tàng hō͘學校開銷，油印工課mā是老師家己印，歹勢勞煩工友先生。
庄腳學校無tī暗時補習，kan-na早起提早1點鐘來學校，下晡放學koh教1點鐘，拜六下晡照常上課，一個月1个學生補習費20箍，1班40个ē-tàng收800箍，比月給較濟，tī hit个缺乏ê時代，算是有補所。m̄-koh hit種勞力勞心ê操勞，身體愈教愈消瘦落肉，算算--leh，補營養食補藥拄拄好，總--是潦落去當然著認真教到底。
有老師是認真教m̄敢放輕鬆，唱歌m̄甘教，體育m̄甘上，盡量儉來教國語、算術，我是按呢想，按呢囡仔鬱tiâu-tiâu m̄-nā拍歹身體，學習mā是無pêⁿ-pāng，所以音樂、畫圖逐禮拜lóng-ē教1節，體育運動逐工半點鐘，上無運動埕走走--leh mā好。
經過月考、模擬考，成績排序發現kap隔壁班差大碼，輸人忝忝--無打緊，koh hō͘人A B比對，實在淡薄仔厭氣，學校長來關心，並無講我教學有啥乜m̄著，我to̍h堅持家己理念繼續教，重要ê算術，較早鄭老師是o-ló有著--è，圖解算術重理解，真正不得已oh理解ê算法，tsiah-ē叫囡仔ngē記，m̄-tsiah巧氣ê學生攏真趣味算術課。

▲
▲服務第二冬，tsiah tshân-tshân做一軀西裝，1300箍，hak一台收音機kah唱盤700箍，西裝是食頭路人ê體面(thé-biān)，聽音樂是siāng-kài kah意ê娛樂，特別趣味古典音樂，想bē到厝內有音樂是增加庄腳鬧熱ê活跳，雖罔大部份是家己欣賞，tn̄g-tio̍h過年放八音布袋戲歌仔戲，逐家lóng歡喜kah笑吻吻，m̄-koh又閣加一條開銷，每月日若領月給to̍h去街路唱片店買--2塊，siáⁿ知彼間唱片店ê古典音樂唱片，ná像kan-na我leh交關，to̍h是hit 40幾塊1-kó͘月tsiah-ē減少--2-3塊。

▲少年人當青春，穿hō͘緣投phiau-phiat，siâⁿ人bē-hiáu妝娗，翕1組súi-súi ê烏白相片，家己自戀mā ē-tàng送朋友留念「莫忘影中人」，可惜bē-hiáu送查某囝仔，pì-sù無膽是致命傷，m̄知欲按怎交女朋友，下班後ê娛樂to̍h是招查埔同事、朋友看電影，有時偷偷tòe人看彼陣時行ê脫衣舞，罕罕--à去都市se̍h街聽歌，增加一寡社會常識。

▲寫真館翕ê相片攏有抾--過，白シャツ(襯衫)結ネクタイ(領帶)疊西裝，是當時公務人員siāng-kài pha-lih-pha-lih ê穿插。

▲師範學校出業，分派無仝縣市無仝學校教冊，近位仔同學有時ē騎鐵馬相揣，遠路--ē等到兩年後第一擺同窗會tsiah見面，猶無啥乜大變化，認真教冊歡喜食頭路，大部份攏得著學校看重。

▲學生囡仔遠足，坐火車koh行路到鐵砧山，kap邱榮義老師翕相。

▲kap邱榮義、蕭岩松老師翕相。

▲kap黃錦吾、蕭岩松、許騰祥、邱榮義、陳金科老師翕相。

▲步輦行大約7公里去二八水(Jī-pat-chúi)(彰化縣二水)碧雲禪寺遠足，tsia-ê學生已經63-4歲，應該做阿公做阿媽--à。

▲鐵砧山遠足，kap魏德宗、許金三、陳世明翕相。

▲陳俊成、林俊彥、許騰祥、蕭平治、陳秀里老師kap姪女蕭素珍翕相。ná像學校同事去台北參觀博覽會。是我頭一擺去台北tshit-thô，大開眼界。

▲校長、教導、老師19个，相片是烏白--è。

看相片回想人生_1962/8→1965/10_三潭國小服務三年(三)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1962/8→1965/10_三潭國小服務三年(三)：
▲第二學期六年乙班牛仔班(無bueh升學)級任代課陳老師欲去做兵，學校tshiâu我接紲未完成ê半冬級任，8年前六年級牛仔班出業ê學生tsit-mái bueh來教六年級牛仔班ê學生，hông放sak放棄ê過來人，敢ē-tàng為學生教一寡啥乜？抑是猶原放牛食草？記得當時是有按呢想過。
接班了後，盡量按課表上課，發現8冬後ê牛仔班較無hông放牛食草，只是程度較低較愛耍無愛讀冊，因為註定無bueh升學，ná著認真。算術有較oh救，國語加減練寫字認bat單字語詞，自然、社會to̍h ná像leh講古，音樂、美術上課上快樂，盡展學校學來ê本事，愛唱歌愛畫圖mā是真重要ê功課，體育課koh-khah歡喜，特別查埔囝仔，1粒球to̍h耍kah歪腰--ì。為著迫in國語、算術ê學習，查某囝仔猶算真聽話，有幾個查埔囝仔koh-ē翻跤車，kap老師tu臍，不得已有時mā-ē拍尻川、拍手蹄。
學校tshiâu我教tsit班，原來是有計畫--ē，開學無外久to̍h交代準備1-kó͘月後ê「觀摩教學」，hit工規教室o͘-khâm-khâm，台頂老師有準備，教案寫了有合規定，按部就班照順序，該講著講，該問著問，講了實在bē-bái，可惜問學生問題親像鴨仔聽雷，「教法正確，反應較差」，猶是得著真tsán ê評價。
囡仔hìng耍hìng tshit-thô，老師是大人囡仔，仝款hìng tshit-thô，除了1學期有1擺ê遠足，我ē招學生去附近鼓山寺、文武廟步輦遠足，hit-tsūn車輛無濟交通khah-bē複雜，所以放心隨在學生tuè-leh行。
▲觀摩教學hit工，負責報到簽名，我負責六年乙班教學，仝時猶有中年級、低年級老師擔任演出，教學後舉辦檢討會，閣有督學、長官訓話，出差參觀老師中晝頓隨人食家己，下晡tsiah-koh轉來開會。
Hit-tsūn教室猶原是日本時代建築，木材造作，khàm安全瓦，塗跤已經有khōng紅毛土，真通風(thang-hong)，「有一好，無兩好」寒天冷ki-ki。
身軀穿--ē tsit領西裝衫是去台中市綠川舊衫仔店買--è，200箍，仝時買1領免熨ないろん [尼龍]質シャツ[襯衫]100箍。

▲檢討會，督學訓話，hit日我是值日，leh寫記錄。

▲斯當時學生多數褪赤跤，khah-khih衫褲，熱--人白衫，mā有簡單穿內衫。

彼當時翕相機真貴，bueh翕相to̍h kā翕相館稅，翕相底片已經進步到36張，是烏白，洗相片mā是貴蔘蔘，罕罕借1台相機，lóng-ē請教翕相機頭家，按怎安裝底片tsiah-ē加翕1張2張，相片翕了tsiah調查偌濟人bueh買，照翕像館價數收錢，老師家己利不及費無法度慷慨。

△背景是三潭國校學校門。

△tsit張ná像tī鼓山寺入喙牌樓。鼓山寺是日本時代ê神社，tsit个牌樓是鳥居。

△tsit張ná像tī鼓山寺。

▲三潭國校第八屆畢業生六年甲班(升學班)留念。學校長孫炳耀、教導主任楊家發、級任陳俊成。

▲三潭國校第八屆畢業生六年乙班留念。級任蕭平治。

▲做老師1年後ê記念相片。教員19个，學生大約14-5班。學校編制：學校長+教導主任+級任+科任，課長級lóng是老師兼任，科任老師有限。

看相片回想人生_1962/8→1965/10_三潭國小服務三年(二)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1962/8→1965/10_三潭國小服務三年(二)：
▲7月初kā陪伴3冬hit-kha貯行李囥衫褲柴箱搬轉來厝，結束讀冊生活，準備進入社會bueh做教員教冊。
準備？是bueh準備saⁿh？公務人員上班ê交通工具、身穿、鞋襪是上基本，出出入入需要1台鐵馬，2軀替換紳士衫仔褲，總--是bē-tàng sông-sông穿學生服上班，鞋襪照舊穿是ē使得。好佳哉阿兄疼小弟，三兄街路人面較熟，tshuā我去鐵馬店賒1台細lián-khing(輪框)流行跑車，價數1300箍，明品講10--月領月級tsiah付錢，當然猶有其他li-li-khok-khok ê生活用品，ē省盡量省。
猶有，我ê房間，進前讀冊轉--來是有所在thang睏to̍h好，tsit-mái是社會人，ē有同事朋友相揣，需要有家己ê房間。大嫂to̍h去街路擔一隻一人睏ê竹仔眠床轉來khǹg-tiàm khǹg hiⁿ-kui 彼間房間，重新佈置，kā人討一寡舊報紙，kā竹管塗篾仔壁糊糊貼貼--leh，按呢算是小可ē-khuàⁿ-kháu--tit，閣來to̍h是等kā敆作師傅順廷--ē賒--e彼隻事務桌仔。
1962/8師範出業新教員月給是：暫支卅一級薪一百四十元。現金薪水是750+房屋津貼40+油鹽米配給，薪水是領月頭錢，因為敘薪需要作業時間，8月1日起薪，著等10月份3-kó͘月做一睏領，750x3=2250，第一擺領月俸付bē清進前賒欠，mā-tio̍h兄嫂tàu補貼。
也歡喜也鬱卒ê感受講bē了說不盡ê初出社會。
▲Tsit台流行跑車，陪伴3年，滿足少年人淡薄仔虛華ê心，陪我上班買物，走揣親tsiâⁿ朋友，tshit-thô出差走遠路，開闊視野嬉嬉嘩嘩，認bat大自然認bat人生。
斯當時，庄跤人罕得騎tsit款鐵馬，批評講siuⁿ過liāu-siáu(料小)bē堪得載重，m̄-koh kap舊式鐵馬tsi̍t-ē比較，tsiah知輕鬆扭掠好騎。


▲俗語講「食，食an 爹；趁，趁私奇」，雖罔無老爸老母thang依倚，總--是阿兄阿嫂ê thíng-sīng疼惜，m̄-bat問過月給按怎開銷，需要kā厝內tàu相添，kan-na唯一一擺，tn̄g-tio̍h冬尾戲，大兄問講「需要辦桌請同事朋友--bò͘？」害我tiām-tiām m̄敢應，猶是大兄發落辦兩桌tsheⁿ-tsháu，教我一定著請同事朋友來食拜拜。
庄跤所在謝平安做冬尾戲極鬧熱，請人客極熱情，tiàm門口截人客，輸人m̄輸陣，厝--裡出一个食頭路人，敢ē-tàng hân-san無請--人？兩桌料理開銷上無mā-tio̍h 7-8百箍，一個月ê薪水--neh！
寒天到，北風一下吹，sngh-sngh叫，寒sih-sih，霜風鑽過向北護龍竹管厝竹管縫，學校tsah轉--來彼領6斤薄棉襀被蓋bē燒，tio̍h-koh hak一領新棉被，tio̍h-koh箍箍，利不及費，是當初時開錢ê感覺。
寒--人天氣冷sih-sih，四兄kā伊儉錢買--è ê煙筒牌セーター(羊毛衫)褪--起來hō͘我穿，講「逐日都穿彼領學生ジャンパ(夾克)較無sîng老師ê pān。」後--來閣買一粒手錶仔hō͘我掛。
△相片背景是辦公室，倒爿拖iap-á彼間是學校長室兼值夜室，1頂雙人竹仔眠床kap兩領棉被，值夜顧暝是1个老師1个工友。不過罕得兩人攏會來值夜，有時一个，有時無半个。

▲阮兩人是仝班同學，黃金雄是霧峰人，1冬後to̍h換調轉去霧峰。背景是日本時代留落來ê木造教室。


▲日本時代木造教室，khàm安全瓦，枋仔壁堵，下旁pún-tsiâⁿ有空氣窗，已經改做紅毛土水裙。

▲1962年國校教員上班ê形影，這兩台鐵馬是當時siāng-kài時行ê款式。日本時代富士霸王跤擋鐵馬已經真少。

▲學生囡仔放學，老師相招欲街路se̍h-se̍h--leh，看電影是siāng-kài娛樂ê消遣，田中有田中戲園kap新宮戲院兩間，日本片西洋片時常客滿。
背景正爿大溪邊是竹管厝ê四秀店仔，學生囡仔拄行tī橋頂。

▲斯當時學生班級約18班以下，倒爿是陳俊成老師，國校時ê學弟，初中時ê同窗，師範時ê學長；中央是許金潭老師，國校時ê老師輩。

▲因為是正式師範學校出業，學校較器重，器重重點tī升學考試，彼當陣國校出業讀初中著考試，有好成績tsiah 會得讀省立中學，中一中、彰中、員中是重要目標，所以5-6年級著編入升學班加強補習。
8--月報到時，學校長to̍h鼓催我教5年級升學班，我kā推講身體欠安，to̍h無勉強，路尾安排做6年級科任，幫忙陳俊成老師擔任彼班升學班教作文，俊成是好朋友好同窗，阮合作愉快，重要科目算術、『國語』伊負責，其他需要幫忙tàu跤手我bē推辭，kap學生囡仔互動交陪真峇貼，欲暗仔補習siuⁿ暗，我ē陪查某學生行一段路。
第一學期學期尾，庄腳做平安戲，家長tsiâⁿ誠意請阮去食tsheⁿ-tshau，1家食過1家，1戶食過1戶，一暗食過10外攤，「老師有來hō͘阮請！」tsiâⁿ做家長學生上大ê榮幸。tsit班學生記智tsiâⁿ深，此當今mā已經60外，學生ē記得老師，老師mā叫會出學生ê名字。

看相片回想人生_1962/8→1965/10_三潭國小服務三年(一)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1962/8→1965/10_三潭國小服務三年(一)：
▲斯當時阿爸it-tio̍h「讀冊免錢，出業一定有頭路，koh免kā人拜托。」是著--è，按呢阿爸to̍h m̄免koh為我學費操煩，m̄免為我未來操心peh腹，自按呢決定「去讀師範，mài koh考高工。」
Tshân-tiong-ng(田中)崁頂庄散赤人子弟，ē-tàng讀台中師範實在福氣，離厝無遠，食穿m̄-nā免煩惱閣是逐頓白米飯配魚魚肉肉ê羹頓，讀冊是有照起工to̍h-ē過關出業，人講讀師範是khioh-tio̍h一塊鐵飯碗，有影to̍h-tio̍h，經過三冬師範養成教育，得著一張畢業證書，保證ē-tit tī國民小學做老師，做烏枋杙á。
▲Tsit張鐵飯碗飯票，tī 1962年8月1日開始生效，學校根據在校成績ê T分數kap學生意願，分派我去彰化縣政府報到，彰化縣政府tsiah-koh根據意願發出派令，委派蕭平治來三潭國小報到做老師。
當時師範生分派縣市是根據成績，我ê分數是79分，tú-tú-á是分派彰化縣ê上低分數，79分以下ê同學to̍h分派去南投縣、雲林縣。紲落去縣內ê分派是添志願，好學校逐家相爭添，暗中ê運作當然是靠關係、送禮、烏紗來解決。阿兄有拜托家長會長印仔兄kā學校長拜托，經過如何無了解，總--是達著希望委派來母校三潭國小，仝時猶有黃金雄、張碧蓮、葉喻三位同窗。

▲厝內全是青盲牛閣無人面，根本m̄-bat啥乜是派令啥乜是公文，初出洞門ê少年人無人指點，kan-na綴人添資料綴人報到完成手續，結果幾年後suah揣無原始派令hō͘學校證明，不得已學校公文櫥仔揣透透，揣到歸檔日期前後日，to̍h是ka-la̍uh tsit張派令字號，家己糊塗學校mā無保留，m̄知啥人提去用？3个仝期同窗已經離開學校，無好連絡，後--來tsiah去想著分派東和國小ê同窗陳榮，tsiah kā影印來備用，真正是thó͘-sông無社會經驗。

▲1962年7月出業ê畢業證書，其實是3年後tsiah提--著，因為師範學校有享受公費，畢業後需要服務3冬tsiah ē使得轉業，所以隨身猶有1本師範畢業生服務手冊，hō͘服務學校考績，期滿合格tsiah ē-tàng提著證書。讀師範3年著服務3冬，這是契約，違約tio̍h-ài賠錢。

▲服務手冊有相片kap詳細履歷，畢業tī中華民國五十一年七月，畢業學校是台灣省立台中師範學校三年制普通師範科。

▲服務情形登記表：
服務學校：彰化縣三潭國民學校
職務：教員
服務期間：民國51年8月1日起民國54年7月31日止
獎懲：彰府人乙〈2125〉號令實施正常教學嘉獎乙次
考語：教學認真服務優良




▲斯當時學校教員考績是有限制--è，甲等晉級有獎金，乙等晉級無獎金，丙等bē-tàng晉級，丁等可能著辭頭路。
而且限制甲等bē-tàng超過總數saⁿ份tsi̍t(1/3)，無真特別學校bē拍丙等丁等，tshun--e to̍h lóng是乙等，我是師範ta̋ⁿ出業服務第一冬，雖罔能力bē-bái閣認真教冊，mā是尊老讓--人，教導主任tsiah用嘉獎乙次來安慰補償，「實施正常教學嘉獎乙次」hō͘人感覺好笑，pún-tsiâⁿ正常教學to̍h是正常事，ná著獎勵？想著較早讀國校hông編入牛仔班ê無正常教學，敢講我tsit-mái是正常教學其他老師是無正常教學？

厝內衛生洗盪6-kha桶，面桶、水桶、跤桶、尿桶、屎桶kap腰桶：

厝內衛生洗盪6-kha桶，面桶、水桶、跤桶、尿桶、屎桶kap腰桶：

▲柴桶kap箍桶師傅(kho͘-tháng sai-hū)：
塑膠製品猶未普遍大量生產ê時代，庄腳所在傢俱攏是木材製造，敆作店敆作師，箍桶店箍桶師攏是木材工藝師，所用柴料m̄-nā是實木閣是松蘿(siông-lô)ひのき(檜木)。
敆作師傅ê成品是mê-mê-kak-kak四角形體，穩穩在在較少搬徙，箍桶師傅完成--ē是圓lìn-lìn 密tsiuh-tsiuh ē-tàng貯水ê圓桶，koh-tio̍h時常搬徙捾來捾去，所以外緣一定著用篾仔箍鉛線箍kho͘ tiâu--leh tau tiâu--leh，tsiah-ē耐用bē散。四角直線好裁，圓箍仔圓周率oh分，總--是技藝各有專長，攏是師傅。
台灣人ê「 kho͘」有 「tau」 ê意思，kho͘-tiâu kho͘-ân to̍h是tau-tiâu tau-ân，kho͘ tiâu--leh tau tiâu--leh攏是持家khîⁿ家「家和萬事興」ê含意，箍是圓形，兜是合倚無分散，鉛線箍篾仔箍m̄-tsiah tsiâⁿ做婚喪喜慶ê禮俗器物，物件雖罔無值錢，意義卻是重大。
▲嫁妝尾後擔(bué-āu-tàⁿ)：
較早娶新娘，頭前是竹掃，押尾是尾後擔(bué-āu-tàⁿ)，尾後擔是新娘ê嫁妝，用1-kha紅布袋貯囝孫桶，有面桶、跤桶、屎桶kap腰桶，是新娘房新娘ê衛生洗盪用--ē，是生囝育囝真tsiâⁿ重要ê傢俱。
△bīn-tháng(面桶)：
查埔人洗面洗跤lóng是用面桶，早起時洗面，bueh暗仔時洗面、拭身軀、洗跤。若是揉身軀洗身軀，用細跤水桶加捾1桶水去iap-thiap所在洗。
查某人需要tiàm房間內洗盪，面桶用來洗手面梳妝打扮。

△kha-tháng(跤桶)：

跤桶kap插秧仔ê秧船仔bueh仝bueh仝，秧船仔ê桶底平平hûi-hûi，跤桶ê桶枋thóng出桶底tsiâⁿ寸。

跤桶路用真濟，上捷是kā嬰仔、囡仔洗身軀，抑是貯衫仔褲去鼓井跤水溝邊洗衫，mā用來洗蕃薯，破醃瓜仔剾瓜仔瓤。

△sái-tháng(屎桶)：
古早庄腳衛生bái，家庭罕得有便所，較濟是tshìn-tshái搭ê屎礐仔，m̄-nā無清氣koh起tī厝外，厝內無可能有便所，暗時暗bong-bong，查某人只好tiàm房間內方便，屎桶是必要配備。放屎臭mi-mo͘ 用蓋khàm，tio̍h趁早起時較無人時陣，趕緊phâng去piàⁿ屎礐仔內，tsiah-koh用稻草做筅仔洗洗lù-lù--leh。
若是厝宅有成樣ê便所，當然ē tī便所放屎，做月內ê查某人tsiah-ē tī房間屎桶仔放屎尿。

△io-tháng(腰桶)：

腰桶kap屎桶bueh相仝，比屎桶較懸，bē使得親像屎桶按呢khû leh坐，需要半khû徛，因為是bueh洗下身(ē-sin)，m̄-tsiah腰桶底ê設計tsiâⁿ特別，是tī桶仔半腰所在，按呢較省燒水。(有經過使用者陳老師娘證實)厝內ná有浴室，平常時婦人人ē tī浴間仔洗身軀，若是做月內，tsiah-ē tiàm房間內用腰桶洗下身。

△tsit跤mā是腰桶，不過桶底是tī下底m̄是半腰，是m̄是ē-tàng兼做生囝ê路用？

▲水桶尿桶oh-tit分別：

△水桶(tsúi-tháng)：

庄腳無水電ê時代，食水需要去鼓井用水桶仔tshiūⁿ，貯tī大跤水桶用扁擔擔，抑是kō͘棍仔兩人扛，擔轉去倒tiàm灶跤醃缸做煮食用水。

田園菜股欠水，淹水無方便，ē使得kō͘水桶擔水ak菜。

水桶耳是籐條ut--è，比縛索仔較方便koh耐用。

△細跤水桶：

細腳水桶ē-tit孤手kuāⁿ，捾水洗盪、洗傢俱家私、ak菜⋯加升方便扭掠，若是鼓井tshiūⁿ水，需要koh-khah細腳ê水桶。

△tsim-tsiok看，tsit跤是尿桶，m̄是水桶，猶有尿桶tái(滓)ê痕跡。水桶提來貯水擔水to̍h是水桶，若是用來放尿to̍h是尿桶。

無便所ê庄腳人房間，tī眠床邊ē留一格iap-thiap所在囥尿桶，抑是nê門簾仔(mn̂g-lî-á)，方便放尿，尿桶若tīⁿ，koh ē使得擔去田園做有機肥ak菜。

囡仔時代，阮兜人客間仔總舖邊囥尿桶，暗時厝邊隔壁來聚會phò-tāu參詳穡頭事工，定定有人放蕃薯屁ē牽聲kho͘-si-á，mā定定有人放尿tin-tin tong-tong吵人講話，蕃薯屁bē臭，放尿是臭尿薟kiâ-kiâ。一甲子前ê記智。

▲水桶kah尿桶ê差別猶有一說(tsi̍t-sueh)。

古早箍桶ê桶枋較濟是ひのき/hinoki/檜木木材，價錢較貴，買來做水桶真tsán，若是做尿桶，實在無彩，所以箍桶師傅ē用棺柴枋做尿桶，賣較俗--leh。

笑詼：荷蘭人

笑詼：

25、荷蘭人

一位外省人chiâⁿ認真teh學台語Hō-ló話，時常去菜市仔chhōe機會講台語，無論是買菜抑是kap人開講，伊攏無愛用北京語，可惜猶是有chiâⁿ濟音韻轉bē輾轉。

有一工，一位賣菜ê阿伯--à 問--伊：

你是tó位ê人？

倚是荷蘭人！

騙痟--ê，你頭毛烏烏，哪會是荷蘭人？mài閣hó͘-lān--a-lah！

Hô-lân！著啊！著啊！『我是河南人，沒錯啊！』

猶閣teh hó͘-lān，你kioh是我teh kap你講北京語--hio͘h？荷蘭人ê頭毛是金黃色--è，你ê頭毛烏烏，mài閣騙--à-lah。

無kā汝騙，我是中國hit旁ê hô-lân-séng ê人，m̄是hô-lân-lâng --lah。

按呢我知--a，你是hô-lâm人，m̄是荷蘭人，mā m̄是leh hó͘-lān。

著！著！著！óa是ua̍h-séng人，óa是hô-lân人，m̄是hô-lân人。