古物仔_育囡仔(一)：陳慶芳收藏/蕭平治翕相

古物仔_育囡仔(一)：陳慶芳收藏/蕭平治翕相
▲育囝(io-kiáⁿ)vs搖囝(iô-kiáⁿ)：
育囝是飼囝，搖囝是搖--à搖！iⁿ-iⁿ惜！天跤下爸母心，囝生--落來 to̍h開始向望伊緊大漢、gâu大漢，暗時âⁿ leh睏，腹肚枵to̍h趕緊飼奶，日--時仝款無一時閒，嬰仔不比大人食三頓，2-3點鐘to̍h-ài食一擺，koh-tio̍h噓尿kap放屎，嬰仔戇àⁿ-àⁿ，kan-nā ē-hiáu mah-mah哮，意思只有老母知，tó͘ iau mā 吼，愛睏mā 吼，尿tsū-á tâm-tâm mā 吼，褲底1包mā 吼，àⁿ leh睏，抱leh惜，āiⁿ leh搖，to̍h-ē睏kah ka-tsuē好勢好勢甜but-but。總--是àⁿ了ē好款，抱了pak bē-lut，āiⁿ久人ē-thiám，囡仔mā『不舒服』，只好用搖囝家私來服務。
1950年代囡仔時，田庄人生活普遍艱難，為著三頓、穡頭、飼雞鴨，透早無閒到無khuàiⁿ眠床，ná有hit-lō美國時間leh抱tiâu-tiâu，mo͘h-ân-ân，m̄-tsiah育囝kap搖囝做伙來。
eⁿ-á iⁿ-iⁿ-khùn, tsi̍t-mê tuā tsi̍t-tshùn, eⁿ-á iⁿ-iⁿ-sioh, tsi̍t-mê tuā tsi̍t-tshioh.
iⁿ-á iⁿ-iⁿ-khùn, tsi̍t-mî tuā tsi̍t-tshùn, iⁿ-á iⁿ-iⁿ-sioh, tsi̍t-mî tuā tsi̍t-tshioh.
這to̍h是àⁿ囝眠床頂，āiⁿ tiàm尻脊骿，khǹg-tiàm 網仔、hàiⁿ-kô leh唸leh唱ê唸謠、搖嬰仔歌。
àⁿ囝眠床頂，上驚囡仔跋落眠床跤，草蓆仔舖tiàm塗跤hō͘囡仔耍hō͘囡仔睏，mā是一種辦法，驚做塗跤濕氣重，to̍h kā khǹg-tiàm網仔、hàiⁿ-kô搖，搖到伊睏--去，tsiah趕緊做工。
厝內有大漢囡仔工thang tàu顧，大人小可較輕鬆，tsiah-ē放心做工課，若是孤跤手，抑是tn̄g-tio̍h播田割稻大無閒，放hō͘囡仔塗跤爬塗跤睏，覆leh 幌笱大聲哀細聲吼，mā是四常有ê景緻，這hō͘ tsit-mái ê少年人囡仔兄囡仔姊感覺是leh講báng-gah，敢會相信。
下面紹介育囝搖囝ê古物仔，回想較早甜蜜ê滋味，享受爸母ê愛。
▲hàiⁿ-kô(幌笱)：
教育部：幌笱hàiⁿ-kô，搖籃。搖笱io-kô，搖籃。
笱(kô)是竹仔ut、竹篾仔pīⁿ ê籠仔抑是籃仔，ē-tàng貯物ē-tàng掠魚貯魚，若ut做貯石頭用來截水路to̍h是lam-á笱，若是pīⁿ做hō͘細漢囡仔睏ê竹籃仔to̍h是幌笱(hàiⁿ-kô)、搖籃。
幌笱(hàiⁿ-kô)是kō͘索仔吊tī厝蓋楹仔頂，抑是吊tī特製架仔頂，mā ē使得厝外吊tī樹椏，ē-tàng hō͘伊幌過來搖過，嬰仔爽快，大人輕鬆。為著ná搖囡仔ná做工課，to̍h縛一條索仔來遙控。
△有跤架ê幌笱(hàiⁿ-kô)。這个跤架mā是竹仔鑿--è，ē-tàng合倚--來收起來囥。













△圓形幌笱，tsiâⁿ特別，ē使得坐leh搖bē使得倒leh睏，ē使得kap米籮、畚箕、菜籃thīn頭擔，1頭擔穡頭，1頭擔細囝，也bueh做穡也bueh育囝，較早ê爸母to̍h是tsiah-nī辛苦。
俗語「一頭擔雞，雙頭啼」to̍h是形容單親爸抑母ê艱難khîⁿ家，雞vs家 一語相關。
▲抱囝椅(phō-kiáⁿ-í)/ 新婦仔椅(sim-pū-á-í)：
Tsit隻桂竹ut ê抱囝椅，tī 1950年代田庄所在，差不多逐口灶攏有一隻，4跤落地ē使得做椅仔大人坐，若kā偃倒to̍h是hō͘ 囡仔坐ê抱囝椅，出世後四個月到讀冊進前lóng ē使得坐，若是siuⁿ細漢to̍h需要kō͘枕頭、mo͘h被仔(moah被仔)seh-seh--leh，面前橫杆(huâiⁿ-kuaiⁿ)有套幾kâi竹管仔做tshit-thô-mi̍h hō͘囡仔耍。
一般來講，食飽睏飽ê囡仔足愛坐tsit款抱囝椅，自由自在免受束縛，ná有tshit-thô-mi̍h攑tī手，to̍h-ē家己耍kah歡喜tang-tang。
問題是坐一下久 耍一下久，大人koh無閒 無人tshap伊ê時陣，若是腹肚枵抑是放尿放屎--落去，to̍h一直meh-meh哮哭bē-suah，kài-sîng無人ê ê新婦仔，哭久無人tshap，kui-khì覆tiàm椅杆睏，目屎tam目墘，鼻kô tsu̍t kah kui-ē面，無人疼ê新婦仔囝kap tse有比並，莫怪有人講抱囝椅是新婦仔椅。
△mā有kō͘鐵仔ut ê抱囝椅，bē-tàng做椅仔坐，坐--起來無竹ut ê hiah四是。

古物仔_囡仔時代記智篇_布子仔：陳慶芳收藏/蕭平治翕相

古物仔_囡仔時代記智篇_布子仔：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活teh to̍h有意義；有古物ê歷史，少年人to̍h-ē感恩siàu念。】

▲pò͘-jí-á(布子仔)：

華語『沙包』，有人講kho̍k-jí(硞子)，阮講pò͘-jí-á(布子仔)抑是簡單講jí-á(子仔)。

布jí-á用布thīⁿ，thīⁿ1-kâi 囡仔手tú好提 ná細粒枕頭形ê布包，內面tē沙仔抑是綠豆、白米，提tiàm手--nih方便tàn來tàn去，1粒ē使得耍，2粒較好耍，3粒thèng-á比賽，5粒ē使得表演，lóng是查某囝仔較愛耍，1个人、2个人、3个人，tiàm塗跤、tiàm桌頂、tiàm眠床，ná耍ná唸，ē使得耍kui半點鐘久。

▲放雞鴨：耍 布jí-á/ kho̍k-jí-á唸謠。

準備3粒布jí-á，1粒做雞，1粒做鴨，1粒是tàn起tàn落表現技術ê媒人。眠床頂、桌頂、塗跤攏ē使得耍，動作著快速、扭掠、正確，1人耍、2人比賽攏總好。
唸謠：it 放雞、jī 放鴨、saⁿ 分開、sì 做堆、gō͘ 搭胸、la̍k 拍手、tshit 紡紗、peh 摸鼻、káu 搝耳、tsa̍p 抾起。

1、it 放雞→正手提3粒jí-á，1粒tēⁿ tiàm手蹄，1粒挾tiàm手縫，大垺翁kí-tsáiⁿ提1粒。喙唸「it 放雞」， 1粒tàn kuân，1粒lak落(眠床頂)，仝時(kâng-sî)sîn頂面lak落hit粒jí-á。(手裏有2粒)
2、jī 放鴨→喙唸「jī 放鴨」 1粒tàn kuân，1粒lak落(眠床頂)，仝時(kâng-sî)sîn頂面lak落hit粒jí-á。(手裏tshun 1粒)
3、saⁿ 分開→喙唸「saⁿ 分開」，手裏1粒tàn kuân，仝時趕緊kā眠床頂2粒分開，仝時sîn頂面lak落hit粒jí-á。(手裏猶原 1粒)
4、sì 做堆→喙唸「sì 做堆」，手裏1粒tàn kuân，仝時趕緊kā眠床頂2粒khioh做伙相疊，仝時sîn頂面lak落hit粒jí-á。(手裏猶原 1粒)
5、gō͘ 搭胸→喙唸「gō͘ 搭胸」，手裏1粒tàn kuân，仝時輕輕用手搭胸坎2下，仝時sîn頂面lak落hit粒jí-á。(手裏猶原 1粒)
6、la̍k 拍手→喙唸「la̍k 拍手」，手裏1粒tàn kuân，仝時雙手phah-pho̍k-á 2下，仝時sîn頂面lak落hit粒jí-á。(手裏猶原 1粒)
7、tshit 紡紗→喙唸「tshit 紡紗」，手裏1粒tàn kuân，仝時雙手se̍h圓箍仔做紡紗動作 2下，仝時sîn頂面lak落hit粒jí-á。(手裏猶原 1粒)
8、peh 摸鼻→喙唸「peh 摸鼻」，手裏1粒tàn kuân，仝時輕輕用手捏鼻孔 2下，仝時sîn頂面lak落hit粒jí-á。(手裏猶原 1粒)
9、káu 搝耳→喙唸「káu 搝耳」，手裏1粒tàn kuân，仝時輕輕用手 giú耳仔2下，仝時sîn頂面lak落hit粒jí-á。(手裏猶原 1粒)
10、tsa̍p 抾起→喙唸「tsa̍p 抾起」，手裏1粒tàn kuân，仝時khioh眠床頂2粒jí-á，仝時sîn頂面lak落hit粒jí-á。(手裏恢復3粒布jí-á)

信誼兒歌節~玩沙包唸台灣童謠(放雞鴨) https://www.youtube.com/watch?v=xwnKFtOvK4k

烏寒落雨天：20160129_Lah-jih

烏寒落雨天：20160129_Lah-jih

落雨ta̍p-tih，出門sè-jī，tio̍h tsah雨衣，m̄-thang bē記得；

行路看路，塗跤ku̍t-ku̍t，1步1步，khah-bē tōng-tu̍t；

駛車方便，車內舒爽，頭前雺霧，注神ハンドル；

厝內安穩，靜聽雨聲，ti-ti-ta̍p-ta̍p，kài有意思。

古物仔_囡仔時代記智篇_踢踢仔：陳慶芳收藏/蕭平治翕相

古物仔_囡仔時代記智篇_踢踢仔：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活teh to̍h有意義；有古物ê歷史，少年人to̍h-ē感恩siàu念。】
▲that-that-á(踢踢仔)：
1-kâi「乾隆通寶」古早錢，薄薄圓圓大約現此時50箍銀角仔大，中央有1个四角孔，提1張薄薄韌韌毛邊紙kā銀角仔捲tiàm中央內底，然後ùi四角孔所在tōng孔，tsiah kā銀角仔兩爿ê紙捲捲捏捏穿過孔喙，銀角仔周圍整理hō͘平坦，kā thóng--出來ê紙鉸hō͘做幾若liau to̍h完成--ā。因為銀角仔ê重量，踢懸ê毽子ē遵照「自由落體」按呢lak--落來，正跤踢倒跤踢、跤刀踢跤盤踢lóng是技巧，bueh按怎踢，隨人才調變化。庄腳人較bē-hiáu綴時行，to̍h叫做「that-that-á(踢踢仔)」。
that-that-á 華語是『毽子』，有人直翻台語講「kiàn-tsí」；因為kiàn-tsí是kō͘跤 踢ê tshit-thô-mi̍h，阮自細漢to̍h講做「that-that-á(踢踢仔)」；因為內面包銅錢仔，有人講做that-tsîⁿ-á(踢錢仔)；若是用雞毛做ê毽子，有人to̍h講做ke-mo͘-that-á(雞毛踢仔)。四種講法lóng有人講 lóng-ē通。
△囡仔時代家己DIY ê that-that-á(踢踢仔)。

△ke-mo͘/mn̂g-that-á(雞毛踢仔)。

古物仔_囡仔時代記智篇_樹奶phia̍k-á：陳慶芳收藏/蕭平治翕相

古物仔_囡仔時代記智篇_樹奶phia̍k-á：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活teh to̍h有意義；有古物ê歷史，少年人to̍h-ē感恩siàu念。】

▲古早古早，tī hit-lō散赤ê年代，庄跤所在除了有田有園ê好額人，大部份lóng是手面趁食ê pa̍k-tshân(贌田)佃農，有ê作2-3分地，有ê是5-6分地，也bueh三頓，也bueh納租，頭喙是hiah-nī大陣，逐冬lóng是利不及費，ko͘-put-lī-tsiong著出外趁食抑是做散工相添日常所費。
散赤年代，魚肉tsiâⁿ缺tsiâⁿ貴，三頓物配是青菜、鹹tuâ-á較濟，啥乜魚臊豬肉，m̄是欠錢thang買to̍h是儉錢m̄甘買，厝內飼ê tsing-seⁿ-á，lóng是為著生卵生湠kap為著年節敬神，tio̍h是有飼豬胚，mā是為著賣錢厝內相添，1年thàng天ē-tàng食著肉類，著等過年、清明、五日節、七月半、八月半、九月tiang-liâng(重陽)、冬尾戲，無 to̍h tn̄g-tio̍h著雞災(tse)、著鴨災，tsiah有死雞仔肉、死鴨仔肉thang補喙箍。
你敢知？為著補喙空，有人to̍h siàu想大自然ê野生動物鳥隻，釣水蛙、掠hô͘-liu(鰗鰡)鱔魚是tsiâⁿ-tsē田庄人ê記智；安鳥踏仔tng pit-lô-á[伯勞仔]，用pan-kah-tng-á tng斑鴿，除了siàu想食鳥仔巴以外，koh是一種趣味ê娛樂，需要技術需要耐性tng-tán[等候]；另外猶有一種查埔囝仔上趣味ê娛樂tshit-thô物，看--起來kài危險kài殘忍，其實並無hiah-nī恐怖，to̍h是tshiū-ling-phia̍k-á(樹奶擗仔)。
Tshiū-ling-phia̍k-á(樹奶擗仔)華語講『彈弓』，he是取一支生做Y字型ê柴椏縛樹奶條kap一塊皮仔做成--ē，倒手攑柄，正手tuā-pû-ong(大捗翁)kap kí-cháiⁿ(指指)kā皮仔tēⁿ-ân，皮仔內挾一粒細粒石頭仔，然後出力giú開giú長樹奶條，siòng-tsiong[瞄準]目標「phia̍k」一聲 彈出石頭仔，完成phia̍k tshiū-ling-phia̍k-á ê動作。目標有時是樹頂鳥隻，較濟是家己認定ê樹葉、銅管仔、石頭、樹椏、花蕊⋯，當做tshit-thô-mi̍h[玩具]耍，罕得phah鳥隻，若是phah鳥隻，mā是罕得phah ē著，較捷是háⁿ鳥仔飛了了。當然mā有he 專門phah鳥仔賣錢抑是phia̍k來pia̍k鳥仔巴--e，in ē褲袋仔一爿tē石頭仔，一爿tē tshiū-ling-phia̍k-á，見若樹頂有鳥隻，m̄管pan-kah、bi̍t-lô-á、白頭khok-á，隨時tshiū-ling-phia̍k-á sa--出來，石頭仔入--落去，正手tēⁿ-ân，倒手giú盡磅，目睭、石頭仔、鳥仔身連一體，siòng-tsiong-tsiong khan--落去，「phia̋k」一聲，鳥仔隨落地(lo̍h-tē)，有影kài殘忍。
▲古早古早，tshit-thô-mi̍h lóng是DIY家己做，平常時仔厝前厝後行踏，to̍h頭殼khiàn-thian khiàn-thian樹椏罔看罔相，看若有he細支樹椏發做Y字型--ē，to̍h攑鋸仔kā鋸--落來，抑是攑柴刀kā tsām--落來，tsiah-koh kō͘刀仔削，勻勻仔thâi做tshiū-ling-phia̍k-á柄，等候有樹奶kap皮仔ê時陣，tsiah來縛一支tshiū-ling-phia̍k-á。
樹奶著用he自動車輪ê內奶，鐵馬輪ê內奶無夠韌無夠ân，m̄-koh自動車輪ê內奶真oh提--著，若是有人提著1塊內奶，to̍h-ē kā鉸做細條細條(sè-liau)tsiâⁿ尺長ê樹奶條，分--人抑是賣--人；皮仔是軟軟ê牛皮，仝款oh提，若是有皮仔有樹奶條kap樹奶phia̍k-á柄，用鉛線縛縛絞絞hō͘ ân，組合做一支樹奶phia̍k-á，雖然m̄是kài媠款，功能功力卻是真tsán真強。
Hìng phia̍k鳥仔ê人，mā有人kā樹奶phia̍k-á講做鳥phia̍k-á，抑是ぱちんこ。

△tshiū-ling-phia̍k-á(樹奶擗仔)/ tsiáu-phia̍k-á(鳥擗仔)/ ぱちんこ[彈弓]

△DIY家己做ê樹奶phia̍k-á kap商品樹奶phia̍k-á。

古物仔_囡仔時代記智篇_炮仔銃：陳慶芳收藏/蕭平治翕相

古物仔_囡仔時代記智篇_炮仔銃：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活--teh to̍h有意義；有古物ê歷史，少年人to̍h-ē感恩siàu念。】
▲放炮：新正年頭、冬尾戲、神明生、拜公媽、娶新娘⋯各種鬧熱場面，無放炮無鬧熱，to̍h是愛放炮。炮有大炮、有連炮，大炮póng一聲響phuà外路遠，連炮仔pi-pi-pia̍k-pia̍k響真久，硫黃煙phông-phông-ing，炮仔紙颺颺飛，lah-sap兼無衛生，為啥乜hiah-nī愛放炮？lóng是因為傳統kap為著爽。
大人hìng放炮，囡仔mā hìng耍摔炮kap 炮仔銃，仝款耍到piáng piáng叫真趣味。
▲摔炮(siak-phàu)：摔炮是kō͘紙包火藥，包成一粒圓圓像龍眼核仔hiah大粒，用手提起來大力摔落tīng-tīng ê塗跤，to̍h-ē piáng一聲，hō͘人驚一趒(tiô)。
▲炮仔銃kap炮仔子：
炮仔銃(phàu-á-tshìng)to̍h是『鐵砲』，是囡仔耍ê tshit-thô銃，金屬類白鐵仔、鉛鉼模仿短銃仔形體製造，有at頭仔型，左輪型，1擺彈1粒紙火藥[紙雷管]ê銃子，mā有連發銃，裝捲心紙火藥，ē-tàng連紲tiau板機連紲彈銃子。
炮仔子(phàu-á-tsí)to̍h是[紙雷管]，囡仔耍炮仔銃用ê紙火藥銃子，比運動徑賽用ê[紙雷管]較細粒，1公分見方ê雙層紙，內面包1丸直徑3公釐扁siân扁siân ê火藥，tsit種炮仔子受著脆力pōng--tio̍h to̍h-ē 「piáng」一聲ná放炮仔，用炮仔銃tuāⁿ，用石頭kòng，用摃槌仔hám，lóng真安全真好耍。
炮仔子ê製造，是1張1張印，1張可能kui百粒，生理擔仔tsiah kā鉸做散賣。囡仔bueh耍ê時，tsiah kā捻做1細塊1細塊。
耍炮仔子若kan-nā kō͘石頭kòng用摃槌仔hám to̍h無好耍，需要買炮仔銃來tuāⁿ較趣味較心適。
炮仔銃tuāⁿ炮仔子，ē噴出火星，發出piáng piáng聲音，koh-ē tshìng煙，bē危險真好耍，特別查埔囝仔koh-khah kah意。
△無仝造型炮仔銃，有左輪有at頭仔。

▲1952_過年行春耍炮仔銃ê記智：     Lah-jih_20160114
囡仔時代1年thàng天上歡喜to̍h是舊曆過年ê過年暝、新正初一kap初二。過年暝圍爐，有一年來上tsheⁿ-tshau ê暗頓thang食，koh有紅包teh年錢；新正初一ē穿上新嫣衫褲鞋襪庄內罔行罔se̍h看鬧熱看人跋筊；初二hit工阿道兄ē招我去許厝寮tshuā三姑，食著比昨暝圍爐koh-khah好食ê料理，teh年錢2箍銀，比阿爸hō͘--我-ē 加4倍，崁頂庄行到許厝寮雖罔路真遠，lóng m̄敢喝跤酸，驚做阿道兄m̄ hō͘我綴路。
1951年4月20日三兄22歲，to̍h去山跤hông招，1952年ê新正初二，阿叔(阿爸)交代阮兄弟，「意--è hông招頭擺過年，新正年頭著去新tshin-tsiâⁿ親家親姆兜行行--leh！」m̄-tsiah hit年許厝寮tshuā三姑kan-nā阿道兄家己去。
三嫂in-tau tuà山跤普興庄(phó͘-hin-tsng)西爿中圳táng-mn̂g-á(擋門)入--去hit內底，離阮崁頂庄無偌遠，新正年頭行春仔行春，大兄二兄四兄kap我，猶有叔伯恆仔兄爐仔兄，六个人行墓仔埔邊牛車路，兄哥in ná行ná phò-tāu，我是ná行ná跳ná拍炮仔銃，有--hiah久à to̍h「piáng」一聲，有--hiah久à to̍h-koh「piáng」--一聲，有時koh-ē tshiāng腳雞路邊捻花草，歡喜ê心情lóng寫tī面--nih！這支炮仔銃是chang-ng tsiah買--è，實在好耍，阿兄看我耍kah tsiâⁿ趣味，mā ē kā我借去tuāⁿ--兩下，驚做銃子tuāⁿ了了，心內一直m̄甘借in 耍。
Hua̍h過táng-mn̂g-á(擋門)來到親家親姆in兜(三嫂ê後頭厝)，親家親姆歡喜kah，大人開講，囡仔厝前厝後行透透，ná行又閣ná piáng，都猶未中晝，tsheⁿ-tshau已經拴一桌頂，親姆先攑1支雞腿「阿叔仔，hō͘你食！」三嫂kā我貯1碗米粉炒，也bueh囥雞腿，也bueh囥煙腸、豬肉、鵝肉⋯，10歲囡仔已經真gâu食，tsit碗kiat了koh食甜粿、菜頭粿，著！大人有lim酒，我囡仔人lim汽水，烏松汽水ē起波，足罕得lim，有夠歡喜tō-tio̍h。
食suah無外久，大兄講tio̍h-koh去普興庄內屘姑兜kap大姊hia，m̄-tsiah kā親家親姆相辭，三兄三嫂著愛tiàm厝--裡聽候親tsiâⁿ來行春，無法度鬥陣去，阮to̍h準備起程，he親姆看阮bueh離開，趕緊hiàm我慢且是，無半分鐘提1包紅紙包tē tiàm我ê橐袋仔內，我枵鬼假細膩 m̄敢提koh sak還--伊，3推4推tsiah假歹勢kā囥落橐袋仔底，心內歡喜銃子錢有--ā，免驚無銃子tha̋ng tuāⁿ。
Táng-mn̂g-á(擋門)到山跤普興庄是行田岸仔路，10分鐘to̍h到屘姑兜，姑疼外家孫仔是有影，看阮1行有6名，自然歡喜招呼，食生仁食糋棗，mā趕緊交代表嫂落鼎煎甜粿煎菜頭粿，無一tah久to̍h bueh食桌，屘姑講：「恁ta̋ⁿ tī親姆in-tau食--過，所以簡單食tsē 包仔粿、菜頭粿to̍h好！」
阿叔常講「恁hit个山跤ê話仙姑--a，hân-san--a！」 真正m̄是講假--è，bueh離開去大姊hia ê時，屘姑tsiah hō͘我4角teh年，莫怪阿道兄較愛招我去tshuā三姑，平平阿姑，ná-ē差hiah-tsē？
大姊kap屘姑tuà隔壁內底，行過一條巷路仔to̍h到--à，猶是兄弟姊妹較有話講，姊夫mā是kap阿兄講到不止仔歡喜，我只有tiàm邊--a sîn話鬚食四秀仔。無外久，仝款又閣是食，一桌八仙桌tú-á滿，煎甜粿kauh蒜仔青koh搵豆油，頭一擺ê食法，感覺ná-ē tsiah好食，甜--e lām鹹--ē，m̄是講「食甜食鹹ē臭跤鼻臁」？看--起來都無影。人講「食飽to̍h無khá(巧)」，mā是有影，獨獨kan-nā一盤煎甜粿kauh蒜仔青搵豆油記牢牢。
大人食飯配話，囡仔人食飽外口phah炮仔銃，「piáng piáng piáng piáng 」增加過年鬧熱氣氛。在來我to̍h真好頭喙：「阿姊！阮bueh來去轉，你tang時bueh轉--來！」大姊知影阮bueh轉--去，to̍h提1箍銀hō͘我teh年，阿姊hō͘我--ē，自然免sè-jī，to̍h kā囥入去橐袋仔內，ua̋！銃子錢有路了了--à。
正月初二，有食有掠大發財，今仔日一迣行春趁bē少，過年ê炮仔子免驚無錢thang買--à。

古物仔_囡仔時代記智篇_算盤子仔自動車時鐘面模型：陳慶芳收藏/蕭平治翕相

古物仔_囡仔時代記智篇_算盤子仔自動車時鐘面模型：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活--teh to̍h有意義；有古物ê歷史，少年人to̍h-ē感恩siàu念。】
▲算盤jí-á：

是tshit-thô物仔mā是教具，幼稚園ê囡仔來學算數字tsi̍t nn̄g saⁿ sì gō͘ la̍k tshit peh/ pueh káu tsa̍p，ná耍ná唸ná學，koh-khah細漢ê囡仔，hō͘伊當做tshit-thô物，ē-tàng耍真久。

▲自動車(tsū-tōng-tshia)，囡仔siāng-ài，特別查埔囝仔，坐leh lù來lù去，ハンドル/handoru/方向盤罔se̍h，學老爸駛車ê架勢。

▲變形ê龜仔車、三輪車，3-5歲囡仔上kah意，坐--leh用雙腳徙振動徙位。

▲時鐘面模型，教囡仔學看時鐘，分針、時針ē-tàng kō͘手pué，mā有算盤子仔thang耍，做配合學習，適合幼稚園囡仔。