2014上元節崁頂庄慶祝活動： Lah-jih_20140216

2014上元節崁頂庄慶祝活動：  Lah-jih_20140216

崁頂庄自早以來，團結和諧真出名，年節拜拜鬧熱家己來，「元宵美景相招崁頂攑鼓仔燈」已經有十thóng年久，頭擺舉辦真奇巧，外庄朋友囡仔兄囡仔姊攏有相招來參加，chit-mái別庄頭mā有leh辦，今年雖罔無hiah鬧熱，人數較少niā-niā，節目猶原phang-phài，有各種點心thang食飽koh食巧，lóng是庄內家己人煮食，有弄獅拍鼓，有庄內托兒所囡仔庀表演，有魔術師變魔術，有台語ioh謎猜，有樂團表演，有三潭國小學生跳舞等等，大部份lóng是崁頂庄家己ê子弟。

里發展協會、里辦公處、晉天宮共同發落，庄民捐錢koh出力幫忙，有食有sńg有鼓仔燈攑，上歡喜to̍h是囡仔兄囡仔姊，參加一擺，一生難忘，規世人ê記智。

咱人正月十五暗時6點開始，5點半已經鬧熱tshih-tshih，由樂隊pûn sakhusong熱場，6點準時，庄內名喙Bùn-jih喝聲「元宵美景相招崁頂攑鼓仔燈」chit-mái開始，火把6支做頭前，閣來是sàm-pit-lô-á tīn-tōng-chhaⁿh、tīn-tōng-chhaⁿ帶動參加庄眾，大人牽細漢囡仔，囡仔牽阿爸，阿爸牽阿媽，挨挨陣陣，一人一支鼓仔燈，綴leh行，中央koh插一陣弄獅陣，暗暝行路無方便ná行ná弄，總--是鑼鼓聲響連天，增加暝時鬧熱氣氛。

阮ùi晉天宮廟前向南進發，踅出庄外hit條和平路，行向東爿中圳溝斡北方，to̍h到庄東望高樓，chiah koh斡西爿入庄內，行到祖厝後koh順崁頂巷tńg到晉天宮廟埕，完成踅庄一liàn，大約40外分鐘。「tongh-tongh-chhaⁿh chhit-tongh-chhaⁿh tongh-tongh-chhaⁿh chhit-tongh-chhaⁿh 」ín-chhōa火把一葩一葩kap遠遠看sih--一下sih--一下 田園中ê火金姑，排列颺颺飛，chham-lām hi-hi-hōa-hōa笑聲，免看面容to̍h-ē知，ta̍k-ê喙仔lóng是笑gi-gi。

轉來到廟埕，表演節目boeh開始，Bùn-jih閣喝聲：「看節目徛頭前，boeh食好料--ē去祖厝後hia排列揀，有人有份，有chhōa阿祖阿媽來--ē ē使得提雙份！」第一個節目是咱崁頂庄托兒所小朋友表演摃鼓，第二節目是三潭國小學生跳舞，第三節目是Gîn-hàn-á表演魔術，囡仔看kah喙仔開開驚惶萬分，上趣味是Lah-jih ê台語謎猜，ioh--tio̍h有獎品，20外謎題做三擺進行，lóng是在地kap在庄ê人、地、物，Lah-jih家己出題，別位bô-tè-chhōe。節目進行到8點，紲落去hō͘逐家點歌唱カラオケ/karaoke/卡拉OK，歡歡喜喜ê暗暝，值得囡仔siàu-liām ê上元暝。

台語謎題kap謎底：

崁頂(地名)：頂潭里古早名。<崁頂>

崁頂(地名)：淹田水溝佇tó位？<崁頂>

崁頂角頭名/竹圍仔：刺竹模做籬笆。<竹圍仔>

崁頂角頭名/荖宅仔：kauh檳榔kauh-pin-nn̂g的材料種佇tó位？<荖宅仔>

崁頂角頭名/祖厝：阿公in阿爸蹛佇tó位？<祖厝>

崁頂角頭名/祖厝：阿爸ê阿爸ê阿爸蹛佇tó位？<祖厝>

崁頂角頭名/頭前庄：里長伯--à 萬福in-tau蹛佇tó位？<頭前庄>

崁頂角頭名/後壁厝：蕭昌國蕭昌三in舊厝蹛佇tó位？

崁頂人名/蕭昌薰/蕭敦仁：日本時代崁頂名人。<蕭昌薰/蕭紹賡/蕭敦仁>

崁頂人名/蕭昌薰/蕭敦仁：崁頂人做過台中廳卓乃潭區長是啥人？<蕭紹賡/蕭昌薰/蕭敦仁>

崁頂人名/蕭敦仁：崁頂人做過省議員是啥人？<蕭敦仁/臺灣省臨時省議會第一屆議員>

崁頂人名/家再：囡仔跋倒無受傷。家再>

崁頂人名/ chúi-kau家舜：崁頂庄東西兩爿有啥物？<水溝/家舜chúi-kau>

崁頂人名/蕭敦仁：田中鎮農會創辦人。<蕭敦仁>

崁頂人名/加重--e(形容詞)：坤--e 娶某。<加重--e ，tiông--ē是坤--e ê某，木聰ê ī--ā>

崁頂人名/加操--e(形容詞)：俊--è 娶某。<加操--e ，chhau--e是俊--è ê某，嘉雄ê ī--ā>

kan-lo̍k (chhit-thô物)：孤跤ē走，無喙ē吼。

ŏa(話語)：無張持摃破玻璃杯仔，按怎講？<ŏa>

二水(地名)：phòng-phuh-á。二水

>

人影(現象)：日頭下跤綴我行，覕佇樹跤無看影。<人影>

三義(地名)：關公，劉備，張飛，結拜做兄弟。<三義>

土豆(植物)：頂面開花塗跤釘，大人囡仔hèng。<土豆>

土豆(植物)：頂開花，下結籽，大人囡仔hèng kah死。<土豆>

土豆莢(植物)：皮膚皺皺m̄-tak-kô，腹內芳酥人o-ló。<土豆ngeh>

弓蕉(植物)：身軀痀痀雙爿翹，穿黃衫，白sut-sut，肉肉肉。<弓蕉>

弓蕉(植物)：身穿黃色ワイシャツ/waishatsu，褪開白sut-sut。<弓蕉>

五堵(地名)：過晝猶未食飯。< gō-tó͘ 餓肚/五堵>

太平(地名)：國泰民安。<太平>

日頭(大自然)：一日東西走拋拋，明日天光閣再來。<日頭>