看相片回想人生_19690213_結婚彼一工(二)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_19690213_結婚彼一工(二)：

▲大兄ná老爸，完成小弟美滿姻緣：
大兄tī結婚前兩工tsiah轉--來，心肝頭做一下輕鬆，大兄kap總舖師Kiû-á兄參考，決定bueh hông賀禮，Kiû-á兄講：「Tsoh-mo͘h咱蕭--家出tsit个tsiah-nī有出脫ê小弟，閣是咱崁頂庄 頭一个做老師--e，無hông賀bueh thài ē使得，何況咱家己親情閣濟，hông賀--mà 極加mā加siâⁿ十桌而已。」to̍h按呢huâ-huâ算算--leh 按52塊桌。庄腳所在，雖罔分角頭陪綴，厝邊隔壁tàu跤手--è bē少，家己叔伯兄弟lóng是歸家口仔tàu歡喜，古早人講--ê「親情50，朋友60，查某人7桌，囡仔8桌。」to̍h知影辦桌ê鬧熱。原來Kiû-á兄講ê「大陣會仔」to̍h是開放hō͘人賀禮，愈濟人賀禮紅包to̍h收愈濟。
嫁出阿姑阿姊kap遠路親情，早to̍h轉來隔暝，新娘娶轉來hit時陣人to̍h o͘-khâm-khâm bueh看新娘bueh看嫁妝，新娘是徛店人，生媠大方人人o-ló，bueh看嫁妝衫褲是無外濟，柴頭木橛有たんす[衣櫥]、桌櫃、事務桌仔，膨椅一組，鐵馬一台，HITACHI電視一台，按呢--niā-niā。Hit台烏白電視kài轟動，可能是厝邊隔壁頭一台，hō͘人感覺tsiâⁿ稀奇。
▲午時12點已經到，人客挨挨陣陣bueh來食晝，後壁埕椅桌已經排好勢，紅包1包1包seh入大兄ê橐袋仔底，四位兄哥阿嫂無閒招呼人客坐桌，大兄是主婚人，小弟tsit層姻緣是伊主裁，大兄疼小弟，大兄假若是老爸，記得11年前四兄娶某mā是伊發落，阿爸kan-na煩惱東煩惱西ê主婚人。
▲厝後ポンプ(水拹仔tsúi-hia̍p-á)邊總舖灶tshiāng-tshiāng-kún，捀菜--è 1巡1巡捀上桌，大廳坐兩桌，新郎新娘kap媒人，新郎母舅序大kap主人，新娘爸母兄弟kap伴嫁，廳前50桌坐kah滿滿滿，食好料，免客氣，地基khōng好開始喝拳嚷kōng-kōng，雖罔m̄是lim thàng海，lim kah má-se má-se mā是有，菜出6巡，新娘出來敬酒，無民意代表tshuā頭，無強迫灌酒落喉，只有幾个同窗好友加講較濟現代相關笑詼，算是增加鬧熱氣氛，大兄陪阮1桌敬過1桌，52桌se̍h透，已經是宴席尾流。
▲倒爿彰中同窗許健一，三潭國小陳金科、張伍典老師。



▲中師同窗吳森田、何義清、黃金雄⋯。



▲頭前落護龍kap後壁落護龍ê巷路仔。



▲公媽廳內敬酒。