【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】
看相片回想人生_19690213_結婚彼一工(三)：
▲12巡菜出了離，紲--落去是一碗公清氣水，bueh hông洗湯匙，tsiah-koh送一碗公甜湯，王梨、李仔鹹、細粒圓仔、土豆仁lām-lām煮熟冰涼ê甜湯，囡仔上kah意，大人mā無細膩，湯匙仔tiàm清水lā-lā洗洗--leh，你1匙我1匙，堵飽喙mā甜，歡歡喜喜隨人離開。
送寶斗親情伴嫁轉--去了後，hām師範同窗tiàm外埕竹模前翕相，祝福ê話講真濟，然後再會，換帖小弟吳森田留leh明仔載陪我去寶斗做囝婿。
△中師同窗：張士良、何義清、陳榮、廖福祥、許榮吉、蕭平治、吳森田、黃金雄、黃瑞祥。
▲結婚記念相一定愛翕，明興相館阿興m̄-nā gâu翕，閣tsiâⁿ-gâu鼓催，全家福翕--一張，新郎新娘翕--一張，兄哥姊夫kap當leh戀愛hit兩位翕--一張，全家福有五兄弟兩姊妹kap姪仔輩一大陣，上大長輩是阿姑，手掛玉環，真正是老一輩ê序大。
△翕家族相，當leh tshiâu位，掛手環hit个是長輩阿姑。
▲高金生、三兄、二姊夫、大兄、二兄、四兄、表兄。
姪女蕭素珍、新娘、新郎。
▲1969年ê結婚相，牽手行向美望：
▲食暗飽，母舅、阿姑、阿姊、表兄紅包拴好勢，喝bueh食新娘茶，目的是bueh看新娘，bueh kap新娘熟似，thang-hō͘新娘叫一聲舅公、妗婆，丈公、姑婆。
食新娘茶第一先請薰，新郎綴leh點火，閣來是請冬瓜(糖)，上尾tsiah是請食甜茶，茶米茶tsham糖霜ê甜茶，甜茶lim了，新娘收茶甌，人客著kā紅包硩tiàm茶甌內，順紲講四句連講好話，紅包收了，新娘著回送禮物，查埔--e送手巾仔，查某--è送拖仔鞋，to̍h算完成見面禮。
食茶講四句連是真心適，大兄紹介，新娘bûn-bûn-á笑，pì-sù pì-sù tuè-leh叫：
這位是阿姑，你tio̍h叫姑婆，「姑婆！」阿姑講：甜茶食甜甜，明年趕緊生後生。
這位是Nâ-á舅，你tio̍h叫舅公，「舅公！」Nâ-á舅講：茶盤淺淺，茶甌hiàn-hiàn，sàn-khùi功夫，盡量kā展。
閣來這位是Lah-jih ê表兄，你tio̍h叫阿伯，「阿伯！」聰敬仔兄tī公所做戶籍課長，kap世華西裝社斜對面，早著kap新娘熟似，伊tiau-kang創治新娘：茶盤雙人扛，茶甌囥中央，兩人仝心肝，感情較甜糖。
雙人四支手扛茶盤，實在tsiâⁿ gāi-gio̍h，中央閣囥1甌甜茶，無細膩tshia倒to̍h歹勢，有影創治人。
紲--落去是土富仔兄，有夠kop-pih，伊tī請食冬瓜糖時講：冬瓜ná菜脯，bueh問新娘你是啥人ê某。
「阿伯，你都知影，ná著問。」
to̍h是bueh問你是啥人ê某。
「阿伯，ah-to̍h伊--lah！」
tá 一个伊，我敢有相bat？
「ah-to̍h邊--a--tsit个。」
無名無姓，bē通過。
「ah無bueh按怎講？」
弟婦仔你家己講。
「ah tō ah tō Lah-jih--lah！」
按呢通過，冬瓜食甜甜，祝你生後生。
逐家笑kah真夠氣，新娘大方bē驚場，阿姑tsiâⁿ o-ló。
▲食茶suah，新娘轉去新娘房，人客間仔tshun大兄kap阿姑，幾分鐘後，新娘用茶盤捀1包紅包kap 1摺銀票出來hō͘大兄：「tsia-ê錢請大伯收--起來！」⋯
原來新娘提hō͘大兄ê紅包kap銀票，是硩定ê聘金kap tioh-tī𣛮底棉被衫褲ê現金。原來是「聘金回」，新娘了解大兄疼小弟，開銷真濟錢，m̄甘hō͘大兄負擔siuⁿ大，kō͘按呢tàu相添。
阿姑kia̍p喙偷偷仔kā新娘講：ná-ē tsiah-nī戇，m̄-to̍h囥leh家己做sai-khia⋯
阿姑疼孫仔是有影，m̄-koh阿姑實在無了解，大兄擔頭有外重，我是感動tī心內，相信大兄mā真感心。
▲仝床同眠 誠懇做伙 天光身份無相仝：
無經過戀愛，mā無liōng早熟似，ùi紹介到硩定1月日，ùi訂婚到結婚1-kó͘月，敢是緣份，抑是乾柴烈火，已經超過適婚年紀，總講一句，taⁿ已經大人，ing暗仝床同眠，誠懇做伙，天光身份已經無相仝，我to̍h kā新娘，m̄是，是kā牽手講：咱tsit-mái開始來談戀愛⋯
送寶斗親情伴嫁轉--去了後，hām師範同窗tiàm外埕竹模前翕相，祝福ê話講真濟，然後再會，換帖小弟吳森田留leh明仔載陪我去寶斗做囝婿。
△中師同窗：張士良、何義清、陳榮、廖福祥、許榮吉、蕭平治、吳森田、黃金雄、黃瑞祥。
▲結婚記念相一定愛翕，明興相館阿興m̄-nā gâu翕，閣tsiâⁿ-gâu鼓催，全家福翕--一張，新郎新娘翕--一張，兄哥姊夫kap當leh戀愛hit兩位翕--一張，全家福有五兄弟兩姊妹kap姪仔輩一大陣，上大長輩是阿姑，手掛玉環，真正是老一輩ê序大。
△翕家族相，當leh tshiâu位，掛手環hit个是長輩阿姑。
▲高金生、三兄、二姊夫、大兄、二兄、四兄、表兄。
姪女蕭素珍、新娘、新郎。
▲1969年ê結婚相，牽手行向美望：
▲食暗飽，母舅、阿姑、阿姊、表兄紅包拴好勢，喝bueh食新娘茶，目的是bueh看新娘，bueh kap新娘熟似，thang-hō͘新娘叫一聲舅公、妗婆，丈公、姑婆。
食新娘茶第一先請薰，新郎綴leh點火，閣來是請冬瓜(糖)，上尾tsiah是請食甜茶，茶米茶tsham糖霜ê甜茶，甜茶lim了，新娘收茶甌，人客著kā紅包硩tiàm茶甌內，順紲講四句連講好話，紅包收了，新娘著回送禮物，查埔--e送手巾仔，查某--è送拖仔鞋，to̍h算完成見面禮。
食茶講四句連是真心適，大兄紹介，新娘bûn-bûn-á笑，pì-sù pì-sù tuè-leh叫：
這位是阿姑，你tio̍h叫姑婆，「姑婆！」阿姑講：甜茶食甜甜，明年趕緊生後生。
這位是Nâ-á舅，你tio̍h叫舅公，「舅公！」Nâ-á舅講：茶盤淺淺，茶甌hiàn-hiàn，sàn-khùi功夫，盡量kā展。
閣來這位是Lah-jih ê表兄，你tio̍h叫阿伯，「阿伯！」聰敬仔兄tī公所做戶籍課長，kap世華西裝社斜對面，早著kap新娘熟似，伊tiau-kang創治新娘：茶盤雙人扛，茶甌囥中央，兩人仝心肝，感情較甜糖。
雙人四支手扛茶盤，實在tsiâⁿ gāi-gio̍h，中央閣囥1甌甜茶，無細膩tshia倒to̍h歹勢，有影創治人。
紲--落去是土富仔兄，有夠kop-pih，伊tī請食冬瓜糖時講：冬瓜ná菜脯，bueh問新娘你是啥人ê某。
「阿伯，你都知影，ná著問。」
to̍h是bueh問你是啥人ê某。
「阿伯，ah-to̍h伊--lah！」
tá 一个伊，我敢有相bat？
「ah-to̍h邊--a--tsit个。」
無名無姓，bē通過。
「ah無bueh按怎講？」
弟婦仔你家己講。
「ah tō ah tō Lah-jih--lah！」
按呢通過，冬瓜食甜甜，祝你生後生。
逐家笑kah真夠氣，新娘大方bē驚場，阿姑tsiâⁿ o-ló。
▲食茶suah，新娘轉去新娘房，人客間仔tshun大兄kap阿姑，幾分鐘後，新娘用茶盤捀1包紅包kap 1摺銀票出來hō͘大兄：「tsia-ê錢請大伯收--起來！」⋯
原來新娘提hō͘大兄ê紅包kap銀票，是硩定ê聘金kap tioh-tī𣛮底棉被衫褲ê現金。原來是「聘金回」，新娘了解大兄疼小弟，開銷真濟錢，m̄甘hō͘大兄負擔siuⁿ大，kō͘按呢tàu相添。
阿姑kia̍p喙偷偷仔kā新娘講：ná-ē tsiah-nī戇，m̄-to̍h囥leh家己做sai-khia⋯
阿姑疼孫仔是有影，m̄-koh阿姑實在無了解，大兄擔頭有外重，我是感動tī心內，相信大兄mā真感心。
▲仝床同眠 誠懇做伙 天光身份無相仝：
無經過戀愛，mā無liōng早熟似，ùi紹介到硩定1月日，ùi訂婚到結婚1-kó͘月，敢是緣份，抑是乾柴烈火，已經超過適婚年紀，總講一句，taⁿ已經大人，ing暗仝床同眠，誠懇做伙，天光身份已經無相仝，我to̍h kā新娘，m̄是，是kā牽手講：咱tsit-mái開始來談戀愛⋯
沒有留言:
張貼留言