看相片回想人生_1969/2→1969/6_婚後四kó͘月(一)：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1969/2→1969/6_婚後四kó͘月(一)：
▲庄腳人看人嫁娶鬧熱，lóng-ē互相探聽互相通報，講某乜人leh娶新婦，某乜人leh嫁查某囝。阮兜ùi咱人12月26開始無閒到28頭轉客，人是恭喜阿兄阿嫂是leh娶弟婦仔、娶細嬸仔。29又閣開始無閒bueh過年，挨粿、做粿、拜神、拜公媽，阿嫂ná像leh教新新婦，認bat灶跤、煮食，熟似族親序大、序細，牽--e是ná看ná學ná適應新環境，到kah 30過年暝，一家口仔圍爐鬧熱tshih-tshih，記得11年前四兄結婚到今，算是今年鬧熱氣氛上kài喜氣，加人加福氣，歡喜過新年，大兄特別拴烘爐火khǹg-tiàm桌跤，表示炭火相湠，kā弟婦仔o-ló講好話，kā細嬸仔招呼食好料。
大兄較有出入內外，m̄知tó一條腸仔想--著，講：照古例，娶入查某人著降一輩，講是教囝叫，有理無理我m̄-bat，總--是為著疼細漢屘小弟，咱to̍h kā弟婦仔當做是小妹，咱做阿兄阿嫂--è to̍h直接叫伊「うめこ」，抑うめこ tsiah綴Lah-jih叫咱大兄大嫂、二兄二嫂、三兄三嫂、四兄四嫂，此去咱厝內按呢稱呼，不過對外猶是照古例。人講「舊例無設，新例無滅」，大兄ê新例猶原無ka-nn̂g。
▲初五隔開了後，大兄四兄tio̍h-koh轉去阿里山做穡，招阮同齊去tshit-thô，轉來了後，閣有高金生邀請阮去雞籠(Ke-lâng/基隆)行踏，算是古早ê渡蜜月。
結婚tī二月十三日，寒假to̍h是我ê婚假，世華西裝社已經開市營業，等阮渡蜜月轉--來，表兄頭家to̍h來吩咐師傅tsiūⁿ工，崁頂庄到車頭3公里遠，唯一交通器具是hit台嫁妝跑車鐵馬，新郎載新娘，戀愛起磅，1日6公里，早起上班，順紲載牽--e去做裁縫，bueh暗仔下班koh去kā載轉來厝，新烘爐新茶鈷，ná像tī愛河熱戀中，有時表兄頭家ē留阮食暗，鼓勵阮去看電影，講「新正年頭，穡頭無濟。」
「換一个位置，to̍h換一个頭殼。」我是「換一个身份，換一个重點。」實在講，hit个時代，做老師是真輕鬆，尤其正式師範養成教育出業ê老師，上課教冊根本m̄免課前準備，踏入教室，教科書掀開，隨時會得進行教學，1968年9年國教開始實施，已經無leh時盛補習，所以ē-tàng上班歸上班，下班歸下班，下班後to̍h是家己ê時間，需要趕緊培養翁某感情互相了解。
▲嫁妝kah鐵馬較實用，kah kah he電視，貴蔘蔘，是我半冬ê月給，總--是丈人丈姆ê好意，kah電視有影好體面，面子tsiâⁿ-iāng，m̄-koh厝邊隔壁kan-na tsit台，結果lóng是別人leh看，人是看kah笑hā-hā，阮是等到拜六暗有一个古典音樂時間，逐家走了了，tsiah有thang hō͘我坐落來欣賞，ah hit隻膨椅--leh，未兩kó͘月已經變形，後壁面ê膨椅皮仔裂--è裂，li̍h-suàⁿ-tsuē--è裂線tsuē。