老人囡仔性閒閒罔話仙: 看相片回想人生_1971→1977

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1971→1977_中州路南北巷稅厝六冬(一)：
▲搬厝徙岫，全部家伙3 リヤカ：
睏眠房間囥 1頂膨床，tshun 1位空位hē 1隻五斗櫃拄拄好，tsit-mái加一个囡仔庀，pìⁿ-tsiâⁿ真oh轉踅，無徙位稅厝bē-suah-tit。
▲田中鎮中州路是田中thàng溪州鄉ê大路，南北巷倚田中國小近位，tī tsia揣著1間10坪地起ê 4樓店面，to̍h-tī服務站對面， tsia-ê市草比街仔尾媽祖宮後加足鬧熱。厝稅700箍，是我月俸khah-lím一半，見若開門to̍h是20外箍ê支出，ē-tàng買2包長壽薰，hit-tsūn店內著囥薰請人客，家己mā有食，一日開店門現了30外，好佳哉咱是趁功夫錢，有穡頭做定著有收入，認真做穡to̍h-tio̍h。
▲掀通書，揀一日清氣日仔，開始搬徙，一座人檯櫥、布床、菜櫥仔桌椅、ミシン裁縫車、五斗櫃、眠床、囡仔車、布料，kap一寡li-li-khok-khok家私頭仔，四兄kā人借1台リヤカ，和二兄、三兄⋯tàu跤手，來、去拖3-tsuā to̍h an-tah好勢。
新店面有較闊，to̍h倩敆作師傅(kap-tsoh sai-hū)做2-kâi排布料ê見本櫥，裁剪熨平布床囥櫥仔後，2隻裁縫車1隻tī店口，1隻tī內面，厝--裡ê事務桌仔mā搬來做賬櫃，加真有店面ê範。二樓是兩間房間兼灶跤浴間便所，已經真方便轉踅，三樓khǹg-leh做倉庫，四樓厝主家己保留。
▲煮食tiàm二樓有較無方便，1972年年頭，第二查某囝來出世，加添歡喜kap無閑tshih-tshih，頭一个師仔學ē-hiáu做褲to̍h閬港無koh來，換一个大姨(仔)查某囝來，bueh kap阿姨學做衫tàu顧囡仔，大漢--è ē-hiáu行，細漢--è時常囥tiàm竹ut奶母車內育，1日3頓lóng是牽--e發落，樓跤樓頂peh上peh落一日m̄知著偌濟擺，我是bē-hiáu煮食ē-hiáu食飯坩中央ê阿舍，m̄-koh無pān-tuāⁿ，下班了後ê空課to̍h是：kap鉸刀、裁縫車輸贏做褲師，陪囡仔耍，kā囡仔泡牛奶、洗蕩，騎鐵馬載大漢--è去四界hui-hui--leh，較捷是轉去崁頂庄抑是三潭國校，闊闊ê校埕hō͘囡仔自由走傱，暗時，牽--e àⁿ細漢--è，我kap大漢--è睏隔壁總舖。
▲雖罔無閒，日子過了不止仔順事，生理比進前加真好，謝天謝地，講著生理，有影「生理囝oh 生」，kap人客講價賬我是sian學學bē-hiáu。有一擺，牽--e樓頂leh煮食，來一位半面相熟ê朋友bueh做褲，講著價賬，趕緊提布料起去樓頂問牽--e，「這塊pho͘h-lah--è著300箍，既然是熟似朋友，勉強ē-tàng俗20箍。」落樓跤kā人客講「280！」
「敢bē-sái-tsit較減--leh？」
「按呢算是上俗ê價賬。」
「減--20 好--bò͘？」
「有影上底價--à！」
結果生理做無成，人講「生理喙，胡lùi-lùi。」出價刣價賬ê時代，1拄1，兩拄兩ê條直個性，確實做無生理。
▲實在真佩服牽--e，17歲來Tshân-tiong-ng kap表兄學做衫，m̄-nā學著一手好工夫，mā學著徛店人ê禮貌kap風度，巧氣是伊ê功夫，阮是做男裝，大部份是查埔人客，牽--e m̄-nā風度一流，更加在膽定著，ē-hiáu看人目色生張，ē出價bē出價，lóng有法度 hō͘人感覺價賬公道。特別kā人客量西裝寸尺，ē使得ná講ná量，量好做一擺記錄寸尺簿，tn̄g-tio̍h人客量衫仔身，有人ê激挺胸無自然，伊ē kap人客開講hō͘伊放鬆tsiah量，做起來ê西裝定著合軀koh好穿。
我著上班無tī店內，有時師仔工出去放伊孤一人，拄好tn̄g-tio̍h漚客來交關，伊猶原真在膽，萬一真正tn̄g-tio̍h歹人，伊講「猶原kap伊聊聊仔講，ná講ná徙跤行出門外，按呢保證無代誌。」
男裝社查某頭家兼師傅，聽講彰化縣是唯一一个。
▲裁縫業to̍h是過年前1-kó͘月上無閒，ko͘-put-lī-tsiang kā查某囝寄寶斗外媽tshuā，tsiah tsiâⁿ kó͘月--niā-niā，雄雄suah kā父母看做生份人，實在tsiâⁿ m̄甘。阿舅翕tsit張相lóng是伊ê表兄姊。