罔談台語輕聲「--bò͘？/--bò？」：

罔談台語輕聲「--bò͘？/--bò？」：       Lah-jih_20161024

欲講端的ua̍h-lìng-lìng ê生活台語，輕聲ê應用非常重要，輕聲ê表達(書寫)若表達得súi-khùi，m̄-nā ē-tàng了解作者描寫ê氣口，連伊內心世界ê喜、怒、哀、懼、愛、惡、欲心聲都ná像現場原音重現仝款，ē-tàng聽聲解意，m̄免經過頭腦看漢字翻譯。下面個人以常用ê輕聲尾音「--bò͘？/--bò？」做例說明，m̄是欲佮教育部公佈ê規則做比較，只是表達個人久年寫作ê體會。

輕聲「--bò͘？」有人認為是「--無？」認為是ùi「bô」輕聲化來--ē，所以著標本調bô。

個人慣勢用「--bò͘？」做語尾輕聲，所以下面ê例lóng是寫「--bò͘？」。

Tī tsia舉hó--bò͘？tio̍h--bò͘？sī--bò͘？bueh--bò͘？幾个例做說明：

1、hó--bò͘？：華語是『好嗎？』『好不好？』；台語著講「hó--bò͘？」「好m̄好？」。請問「bò͘」欲寫tó一字較適合？佮「無」敢有牽礙？「--bò͘」ê本調是第幾聲？

2、tio̍h--bò͘？：華語是『對不對？』『對嗎？』；台語著講「tio̍h--bò͘？」「著m̄著？」有人講「著--嗎？」「著--無？」「著--bò/bô？」。請問「bò͘」欲寫tó一字較適合？佮「嗎」「無」敢有牽礙？「--bò͘」ê本調是第幾聲？

3、sī--bò͘？：華語是『是不是？』『是嗎？』；台語著講「是--bò͘？」「是m̄是？」有人講「是--嗎？」「是--無？」「是--bò/bô？」。請問「bò͘」欲寫tó一字較適合？佮「嗎」「無」敢有牽礙？「--bò͘」ê本調是第幾聲？

4、bueh--bò͘？：華語是『要不要？』『要嗎？』；台語著講「bueh--bò͘？」「欲--bò͘？」有人講「欲--嗎？」「欲--無？」「欲--bô/bò？」。請問「bò͘」欲寫tó一字較合？佮「嗎」「無」敢有牽礙？「--bò͘」ê本調是第幾聲？

5、ū--bò͘？：華語是『有嗎？』『有沒有？』；台語著講「ū--bò͘？」若講「有--無？」「有--bò/bô？」，mā會通，因為有kap無 是相對--è。

6、酒矸thang賣--bò͘？：華語是『有酒矸可以賣嗎？』『酒矸可賣嗎？』；台語著講「酒矸thang賣--bò͘？」「酒矸thang賣--無？」「酒矸thang賣--bò/bô？」，mā會通，因為有kap無是相對--è。

總結：台語ê「--bò͘？」是『否定句』，kap「無」無一定有關連，伊ê本調mā m̄知影，如何標本調？若是確定是「無」ê意思，寫「--bò͘？」「--bò？」「-- bô？」攏會通。

個人看法--niā-niā。
補充：好毋好？>hó--bò͘?[好不好/好嗎？]，是毋是？>sī--bò͘?[是不是/是嗎？]，有也無？>ū--bò͘?[有沒有/有嗎？]，著毋著？>tio̍h--bò͘?[對不對/對嗎？]，欲抑毋？>boeh--bò͘？[要不要/要嗎？]。