台語聽講讀寫能力教學要領

第三章 台語聽講讀寫能力教學要領

蕭平治  中山醫學大學 台灣語文學系講師

本章重點：

幾百年來，台灣人一直受外來政權統治，至少一百年來台灣人無選擇講家己話ê權利，強制ê「國語」教育政策，hō͘華語（北京話、國語）變成強勢語言，甚至是青少年、囡仔人ê生活語言；反倒轉，多數人講ê台語suah淪落為弱勢語言，恐驚有消失ê趨勢。

    台語是優雅ê語言，有文字、有音標，ē-tàng成做書面語，ē-tàng創作端的、高尚ê文學作品。台灣人對台語ê認捌，m̄-nā ài ē-hiáu聽、講台語，mā-ài學ē-hiáu讀、寫台語文，tsiah-bē成做台語ê文盲。本章紹介ê台語文字(包含漢字kap羅馬字)、音標(羅馬字是文字，mā是音標)，這是學習台語ê基礎。正確認捌而且熟練漢字kap羅馬字，tsiah ē-tàng順利讀、寫台語文，進一步欣賞台語文學，深入了解作者心聲，kap表達家己內心真正感情、崇高理念。

紹介台語音韻kap台語羅馬拼音規則，提供台語、台語文學習者，教學者，學習台語、書寫台語文、教台語ê路用，方便台語文字電腦輸入，加速台語文創作。這是台語文字化ê基礎工程，台語羅馬拼音若會曉，beh學台語ē-tàng家己學，beh寫台語文ē變做真簡單。

第一節　台語音韻系統kap羅馬拼音教學

蕭平治　中山醫學大學台灣語文學系講師

本節重點：

台語音韻kap華語音韻呼音仝款，由子音+母音+聲調組成。

華語：ㄅㄚ ㄅˊㄚ ㄅˇㄚ ㄅˋㄚ    台語：pa pá pà pah pâ pá pā pa̍h

台語語音系統由子音/母音/聲調所構成，語音結構完整，由聲/韻/調組成。子音17个，有清音、濁音、送氣、無送氣ê差別；母音有介音、主要元音分、鼻化音、喉塞音、喉塞鼻音、鼻音母音、鼻音韻尾母音kap入聲韻尾；聲調分做平、升、降、入7調，2个輕聲調，kap變調ê變化。

台語音節結構圖：依據「台灣閩南語羅馬字拼音方案使用手冊」

聲調
聲母	韻母 (韻頭+韻腹+韻尾)

韻頭：i、u

韻腹：a、e、i、oo、o、u、ann、enn、inn、onn、unn、m、ng

韻尾：i、u、m、n、ng、p、t、k、h

音節成分比較表：依據「台灣閩南語羅馬字拼音方案使用手冊」

例字	聲母	韻頭	韻腹	韻尾	數字聲調
阿	零聲母	無	a	無	1
公	k	無	o	ng	1
是	s	無	i	無	7
大	t	u	a	無	7
將	ts	i	o	ng	1
軍	k	u	無	n	1

註：聲母to̍h是子音，韻母to̍h是母音。