華臺語詞對照2100詞----12 李志村老師整理

華臺語詞對照2100詞----12  李志村老師整理

1.           借酒澆愁愁更愁----借酒解憂愁，愈lim面愈khiû

2.          倒楣透頂----有夠衰；衰kah hiâⁿ滾水也會kiap鼎；衰kah phùi嘴瀾hō͘雞á食也會死；有夠衰，種瓠á生菜瓜

3.          個性耿直----個性條直

4.          個性陰沈，害人不淺----陰陰thim-thim,咬人三寸深

5.          倉庫(米糧)----棧間

6.          冤大頭----sóng-phàn；戇giàn頭

7.          凌虐----lêng-ti (凌遲)；táⁿ-tia̍p

8.          凋謝----lian--去；謝--去

9.          剖析----破明

10.      剛正不阿----忠直硬氣

11.        原形畢露----龜腳sô--出來

12.       唉聲嘆氣----哀哀cha̍p-cha̍p；吐大氣

13.       唇槍舌戰----一句來一句去

14.       哽咽----嚨喉管tīⁿ；kê喉

15.       娘家----外家；後頭；後頭厝

16.       家務事----家內事；厝內ê代誌

17.       家醜不可外揚----腳底m̄-thang hông khòaiⁿ(看見)

18.       容忍；忍讓；忍氣吞聲----吞lún

19.       差勁----kē-lō͘ (低路)

20.     差得遠----差真濟leh；一丈差九尺

21.       差遣；使喚----差kah；喝起(來)喝倒(去)

22.      差錯----têng-tâⁿ

23.      徒勞無功----了白工

24.      拿人手軟，吃人嘴軟----食人飯，hōan人問

25.      拿人錢財與人消災----食人hōan飯人問

26.      拿手菜----手路菜

27.      拿他沒轍----無伊ê法度

28.      拿捏；節制----chún-chat (撙節)

29.      拿著雞毛當令箭----提雞毛筅當做蠓sut-á

30.     拿蹻----漲價數；sāi-thái；漲kôan價

31.       挾怨報復----khioh田螺á冤；報niau鼠á冤

32.      捕風捉影(以訛傳訛)----風聲pòng影；講一個影，生一個囝

33.      捉弄----創治(人)；作弄(鬼)

34.      挺身而出----跳--出來

35.      捐助----寄附；tê-iân

36.      效力----打拚；出力；效勞

37.      料想不到----(料)想bē到--ê

38.      根基----底tì

39.      氣不過----bē堪得氣；he-ku--ê bē-lún-tit嗽

40.     氣呼呼----氣chhoah-chhoah

41.       氣定神閒----老神在在

42.      氣絕----斷氣(khùi)；過氣(khùi)

43.      氣鼓鼓----面á膨sai-sai；氣phut-phut；氣chhoah-chhoah

44.      氣頭上----風火頭

45.      浪費----phah損；討債；無chhái

46.      消防車----水龍車；救火車

47.      消息----風聲；消息

48.      消瘦----消sán落肉；sán枝落葉

49.      海枯石爛----海水會乾，石頭會爛

50.     涉世未深----社會事bat無深；較無出入內外；m̄-bat社會事

51.       浴室----洗身軀間á；浴間á

52.      烏煙瘴氣----茫煙散霧；茫煙罩霧

53.      烏鴉嘴----phòa格；phòa格嘴；大妗嘴

54.      狼犬----軍用狗

55.      狼狽為奸----內神通外鬼；tàu孔á；蛇孔thàng鳥鼠siū

56.      留一手----偷藏步；khàm步；囥步

57.      病發作----病giâ--起來

58.      疼愛有加----疼命命；疼入心

59.      疼愛----疼惜愛護；疼惜；疼痛

60.     真人不露相----拳頭母藏tī手ńg內

61.       真心相待----剖心肝交陪

62.      真正忠心----死忠

63.      真正----真正；chiâⁿ實；正港

64.      真----足；有夠

65.      真相大白----真正ê情形，已經真清楚；真相出破；水清魚現

66.      真糟糕----chiâⁿ害

67.      真髒(指衛生習慣)----真lám-nōa

68.      破綻----孔縫；裂線chōe；必巡

69.      破壞感情----phah-pháiⁿ感情

70.     神色自若----老神在在；面無lek色

71.       神似----足相仝--ê

72.      神明桌----紅keh桌

73.      神氣----hiau-pai；sáng勢

74.      秤不離鉈，鉈不離秤----司公á siūⁿ-poe

75.      租房子住----稅厝徛

76.      笑容滿面----歡頭喜面；笑頭笑面；好笑神

77.      笑掉大牙----笑破人ê嘴；笑kah落下頦；笑死人

78.      紗門、紗窗----網á門、網á窗

79.      紙包不住火----鴨卵較密也有縫

80.     缺陷----欠點；無完全

81.       缺德----pháiⁿ失德；hiau-hēng失德；無天良；橫逆

82.      翅膀硬了----翅股尾ta--a

83.      耽誤----擱iân-chhiân；耽誤

84.      胳臂----手骨

85.      胳臂朝裡彎----手khiau曲入無曲出

86.      能人----gâu人

87.      能力所及----做會到

88.      能不能…----敢會當……；會當--bò͘

89.      能屈能伸----會chhun會kiu

90.     能夠----有法度；ē-tàng(會當)

91.       能與人平起平坐----kah人會比並

92.      胯下----kái邊

93.      胯下癢----kái邊癢

94.      臭著一張臉----一個面àu tu̍h-tu̍h

95.      草率----ló草；chhìn-chhìn-chhái-chhái

96.      茶壺----茶kó͘

97.      茶葉----茶米

崁頂蕭姓朝宰公廷光公輝騰公志榮公家譜歌: Lah-jih_2012-2014

崁頂蕭姓朝宰公廷光公輝騰公志榮公家譜歌：      Lah-jih_2012-2014

崁頂古早屬平埔，阿立昆族ê住所，阿立昆是Arikun，母系社會阿立祖。

崁跤大潭親像鏡，擋仔潭是伊ê名，漢字寫做卓乃潭，無合在地ê原聲。

西北爿面有潭墘，魚寮仔佇北爿面，西爿榕跤下橛仔，厝邊隔壁情綿綿。

崁頂地勢懸閣在，自古罕得做水災，厝宅集中真和諧，攏是蕭姓團字派。

康熙進前非中國，一六八三降皇清，一七五八乾隆時，賜姓熟番歸漢族。

乾隆一七八六時，滿化已經三十年，祖媽墓牌題皇清，是乜緣故真可疑。

蕭姓堂號是書山，為何題名無照辦，其中必定有緣故，若無祖公袂糊塗。

總講一句年代久，揣無真相佇何處，認祖認到朝宰公，有證有據萬古流。

朝宰祖公復興租，一冬收粟難計數，五房鬮書分財產，鬮書寫得像賬簿。

輝騰厝宅有三處，下庄兩處揣無主，崁頂志榮咧繼承，鬮書記載歷史久。

兩塊墓牌是古物，兩份鬮書文獻述，字字句句是史實，年代人名無撞突。

五房互相鬥相拱，廷光單傳蕭輝騰，輝騰囝孫五大房，只有志榮有傳承。

朝宰開基艱苦情，二代廷光來繼承，三代輝騰傳五房，四代志榮蹛崁頂。

志榮公有四个囝，四房正財無囝命，正頌搬去田中央，正煥正養崁頂庄。

古早崁頂瓦厝底，就是志榮的徛家，崁頂路編七一號，向東向陽好厝宅。

肇基四代一脈傳，兩百年前真艱難，奠基囝孫做基礎，跤踏實地是模範，

朝宰囝孫大家族，樸實家教袂刻薄，朝廷輝志至正大，光昌興家到輔國。

蕃薯落土代代湠，釘根旺欉振家聲，各行各業認真拚，族親相伨一定贏。

蕭家囝孫巧koh gâu，志氣高貴袂誇口，榮宗耀祖蔭咱兜，公道做人好名留。

開基已經三百冬，跤踏實地台灣人，囝孫旺盛有向望，貢獻社會責任重。

蕭家家譜世傳世，各派各房照實題，生住異滅輪流踅，生老病死人人會。

喜怒哀樂愛惡欲，修養毋通發性地，慈悲為懷日日過，歡喜人生是咱的。

每人巧氣無共款，需要栽培著讀冊，讀gâu會當獻社會，讀輸毋是你的罪。

人有賢能佮頇顢，能者多勞多幫贊，頇顢嘛免傷怨嘆，認真拍拚袂予散。

蕭姓宗親滿四界，至親才會蹛做伙，喙齒咬舌攏嘛會，兄弟難免會冤家。

冤家宜解不宜結，開闊心胸理通達，志榮囝孫上蓋親，過去恩怨放挕捒。

咱若冤家閣勞債，別人看咱無目地，志榮囝孫若有和，別人毋敢看咱無。

慎終追遠盡孝道，敬宗尊祖著愛做，祖公祖媽攏呵咾，祖媽特別是家寶。

二一世紀新世界，自由平等新時代，男女平權的社會，互相尊重真和諧。

重男輕女無合時，觀念需要來改變，栽培序細重開始，無分巧戇抑男女。

教育子弟順自然，尊重成長的少年，毋通迫害囡仔栽，毋通放囝浪溜嗹。

祈求各房大吉昌，事業發展有理想，生活快樂身體勇，閤家平安大吉祥。

【註解說明】

1、 七字仔詩歌本身，注重歷史真實，節奏好聽好唸，不求每句押韻。

2、擋仔潭tòng-á-thâm，卓乃潭(toh-nái-thâm)。

3、榕跤下橛仔：三潭國小北爿hit庄，有人講「榕仔跤」有人講「ē-koe̍h-á」，意思是講Tóng-á潭ê『下半段』。

4、 滿化：滿清統治台灣，台灣接受滿清ê文化，所以「漢化」實際是「滿化」。

5、 下庄：ē-chng，龍潭里。頂潭里/崁頂mā 號做頂庄。

6、 撞突：tōng-tu̍t。

7、 鬥相拱：tàu sio-kēng，互相支持、幫忙。

8、 相伨：sio-thīn，互相支持、幫忙。

9、 巧koh gâu：khiáu koh gâu。

10、       輪流踅：lûn-liû-se̍h，輪迴。

11、        頇顢：han-bān。

12、       放挕捒：pàng-hìⁿ-sak，『丟棄』「放下」。

13、       冤家勞債：oan-ke-lô-chè，「吵吵鬧鬧」。

14、        無目地：bô-ba̍k-tē，「看無起」。

15、        浪溜嗹：lōng-liu-lian。

20140809_ō͘-hoâiⁿ粿kap ō͘-so-á：

20140809_ō͘-hoâiⁿ粿kap ō͘-so-á：

芋秆粿是在來米lām芋hoâiⁿ落去做--è，kap挨菜頭粿仝款，只是原料無仝。

ō͘-hoâiⁿ to̍h是芋莖，芋仔ê葉柄，柄連葉阮講ō͘-koáiⁿ(芋稈)，若是boeh 絲來煮食、曝ō͘-hoâiⁿ-sng、炊ō͘-hoâiⁿ粿，to̍h講做ō͘-hoâiⁿ，其實ō͘-hoâiⁿ(芋莖)、ō͘-koáiⁿ(芋稈)lóng是芋仔葉ê柄。

ō͘-hoâiⁿ粿罕得人炊，因為厚工，ō͘-hoâiⁿ需要kā外皮si-si--leh chiah ē使得煮食炊粿，chit-mái芋仔tng-leh出，chiah有人炊來賣，較早庄腳人攏家己炊，厝邊頭尾招招--leh同齊炊，較免互相看人食。

ô͘-so-á 有人講芋粿曲(ô͘-kué-khiauô͘-ké-khiau。用芋頭、在來米、紅蔥頭、蝦米等，蒸製而成)，是芋仔礤簽kap糯米粿粞(kué-tshè/ké-tshuè。糯米磨成漿後，裝在布袋裡頭，壓上石頭把水分過濾掉，使米漿變成固體狀，可用來搓湯圓或做年糕的材料。)落去炊，阮崁頂庄時行keⁿ黃麻布做副業，keⁿ布ê hiⁿ-kui有一粒梭仔，ná橄仔籽，雙頭尖梭尖梭，所以阮kā芋梭仔粒chiâⁿ像梭仔型，to̍h號做芋梭仔，若kā小可粒hō͘彎曲一屑仔，to̍h號做芋粿khiau。

chit兩項粿路，我攏真有路，食bē-ùi，chit-mái家己m̄-bat做，著去kā人買，去買he庄腳人做--è chiah有合古早味。

讚

《崁頂蕭姓肇基祖朝宰公世系大房廷光公派下家譜》： 序

《崁頂蕭姓肇基祖朝宰公世系大房廷光公派下家譜》序：
2014/8/8是Lah-jih 74歲頭一工，出版《崁頂蕭姓肇基祖朝宰公世系大房廷光公派下家譜》家己慶祝：

序：向祖先交代 對囝孫負責 Lah-jih蕭平治20130808
【蕭家家譜世傳世：蕃薯落土代代湠 釘根旺欉振家聲】
編寫家譜ê意義：
1、 慎終追遠，懷念祖先：食果子拜樹頭，飲水思源頭。
2、 感恩祖先建立chit-ê家，感恩父母，生我、養我、chhiâⁿ我。
3、 家己編寫家己歷史，hō͘囝孫數念。
4、 家己讀家己歷史，了解先人ê奮鬥。
5、 了解家己身世，堅持家己尊嚴：我to̍h是我，無人會當改變我ê身份。
6、 朝宰公是唐山過台灣ê徙台祖？
7、 朝宰公是被滿化(漢化)ê阿立昆族(Arikun)大武郡社在地人？
8、 認識祖媽，重視母親女性：父系社會kap母系社會ê平衡。
9、 認識族親，連絡感情：天腳下上親是朝宰公派下囝孫。
10、 兩性平等，m̄-thang閣重男輕女：生囝是天賜，飼囝chhiâⁿ囝是責任。
時代變遷真緊，ē記得1948年囡仔時代，咱兜外圍是刺竹模、燈籠花欉做籬笆，大門是柴造門樓，三進三落，非常氣派，從大路peh三坎上平台，chiah koh落三坎入門口埕；厝間無夠40間，人口無夠60人，經過1甲子後ê今仔日已經是人丁旺盛，頂埕、下埕、正身、護龍，攏是厝間兼疊樓仔，kap原本ê厝宅改變真濟。
出外人常常想起故鄉，老歲仔人較捷是想起細漢囡仔時，趁頭殼猶清醒猶有氣力，趕緊編寫家譜，共【戶籍謄本記載】kap一寡記智寫--落來，一--來 解心悶，回想人生，二--來 也thang做蕭--家歷史，hō͘後代囝孫數念追思。
根據大旺公遺留〈1899年蕭朝宰公復興大租均分䦰書〉記載，肇基祖朝宰公傳下有五大房，建置「復興館大租」，1冬收租粟大約有110石，算是好額人，傳到第六代日本人來時，大旺公、大趾公chiah參詳將此大租均分拈䦰為定照䦰掌管。古早人早婚，按朝宰公到大旺公有五世代(9祿朝10廷11輝12志13正14大)，一世代若以25年計算(25x5=125)，建置「復興館大租」到大旺公時代已經有125年久，1899－125=1754，ē-tàng斷定朝宰公出世tī 1754年進前(2013－1754=259)，用按呢推算，肇基祖朝宰公年紀到2013年大約有300歲(259+50=309)。
另外根據志榮公遺留〈1819年蕭輝騰公竹圍厝地䦰書〉記載，輝騰公傳下有五大房，竹圍厝地有三處，可惜現此時只有志榮公傳下囝孫kap崁頂庄竹圍厝地。2013－1819=194，ē-tàng證明崁頂庄竹圍厝地至少超過200冬。聽講蕭--姓 奮公派下第四世團圍公ê祖厝本來起tī小紅毛社，咱祖 朝宰公有可能本來是tòa-tī小紅毛社hit爿。朝宰公傳五大房，大房廷光公囝孫tòa崁頂，是啥物時陣搬徙來崁頂，建置現此時「坐西向東」ê竹圍厝地，已經無法追查。若根據志榮公ê墓園(大墓)是tī崁頂庄南爿第三公墓邊來思考，崁頂祖家應該有200年以上ê歷史。
咱祖廷光公、輝騰公、志榮公ê厝宅規模是崁頂庄上闊上大範上蓋有「兜」ê感覺，正身護龍，前有頂、下埕，後有古井，四箍圍有刺竹模kap燈籃仔花籬笆，siōng特別--è是大門有門樓仔，三進三落，非常氣派。厝宅是坐西向東起，東爿大門外是崁頂巷(崁頂路)，西爿kap水溝為界，北爿是頭前庄，南爿是日性、清俊內底kap阮兜水田。較早崁頂庄有公埕、荖宅仔、竹圍仔、榕仔跤、頭前庄、後壁厝kap咱兜幾個角頭地號名，咱兜ê正身護龍竹圍厝地，人攏講做「瓦厝底」抑是「門樓仔內底」。
編寫《崁頂蕭姓肇基祖朝宰公世系大房廷光公派下家譜》對2010年開始到今，用bē少時間kap精神調查、推論、對照、查證、編輯，chiah有舊年hit本初版家譜印出，非常感謝逐家提出意見、校正kap提供戶籍謄本資料。家譜編寫用語，盡量用祖先ê語言「台語」書寫，台語書寫採用漢羅文，to̍h是漢字和羅馬字合寫ê方式。
編寫家譜以公媽牌肇基祖朝宰公為第一代、第二代廷光公、第三代輝騰公、第四代志榮公…。當初冊名是《第四代祖志榮公家譜》，因為發現鬮書chiah知，輝騰公是傳下五大房，可惜其他四大房並無發現後嗣，所以chiah將冊名改做《崁頂蕭姓肇基祖朝宰公世系大房 廷光公派下家譜》。附錄《開基祖朝宰公身世研究》部份是Lah-jih個人研究報告，依照1奮2永3伯4團5文6仕7元道8德世9祿朝10廷11輝12志13正14大15光16昌17興18家19輔20國21奕22世23聯24芳 字輩編寫。為著走揣咱祖朝宰公ê身份，是唐山過台灣心肝結規丸ê徙台祖？抑是本來to̍h tòa-tī-chia徛起ê平埔族洪雅族(Hoanya)/阿立昆族(Arikun)大武郡社在地人？經過看冊、看戶籍謄本、網路搜尋資料文獻，用信仰、風俗、語言各方面去推論，親像刺竹圍厝地、拜地基主、老母叫ī--ā、墓牌堂號寫「皇清」無寫「書山」，戶籍謄本種族欄hō͘人用烏墨抹烏，攏是事實，敢講這kap咱是在地平埔族有啥物牽連？特別《書山蕭氏族譜》內容tī徙台祖進前ê資料，有足濟錯誤懷疑。因為年代遙遠，查證無容易，當然m̄敢大主大意去確定咱祖朝宰公是唐山來ê徙台祖，抑是被清化ê在地平埔族後代。總講一句，《書山蕭氏族譜》印證含糊錯誤，欠缺科學文獻證據，m̄-chiah提出一寡懷疑。祖先是咱ê祖先，來源遙遠不可知，為著認祖歸宗，若無細膩，變成認賊做老爸，按呢to̍h大不孝對不起祖先。ē-tàng安慰ê是咱祖肇基祖朝宰公派下ê真實歷史已經得著印證，300年ê蕭--家歷史，有字為證，值得驕傲，若是boeh閣進一步追查，to̍h需要較有能力有意願ê囝孫，去做科學性、學術性ê調查研究。Lah-jih才疏學淺，kan-nā研究到chia，提供參考、思考，若有無妥當所在，攏是Lah-jih該當負責。
前年2011年4月1日已經將志榮公媽靈骨遷徙彰化縣田中鎮第七公墓聚賢堂服祀 (埔頭仔埔公墓納骨塔) 。舊年2012年清明前，興燦整理房間時發現2張鬮書(文書)，1張1819年嘉慶年代輝騰公傳下五大房厝地分掌鬮書；1張1899年明治時代朝宰公傳下五大房均分大租鬮書，內容所寫祖先名字，kap公廳公媽牌所題祖先名字完全符合，這ē-tàng證明志榮公有2013－1819+20＝224歲，而且tòa-tī崁頂庄現此時厝地，肇基祖蕭朝宰公已經將近300冬ê歷史。這是值得安慰驕傲ê歷史，ē-tàng講《書山蕭氏族譜》內容所寫ê【徙台祖】蕭朝宰，to̍h是咱兜肇基祖朝宰公，伊傳下ê囝孫名字輩份攏是精確歷史，有字為證。
編寫家譜是向祖先交代，對後代囝孫負責ê事工，chit幾年來，耳孔邊時常傳來祖先ê叮嚀交代：「你tio̍h用心，你tio̍h kā咱ê歷史記錄落來hō͘囝孫知！」咱有將近300年有根據有源頭ê歷史，雖罔無啥物輝煌ê家業，但是咱有腳踏實地，誠實做人ê家教，這是值得驕傲安慰遵循ê傳統。畢竟咱是普通人，難免厝內有互相誤會互相計較ê代誌，但是he攏是小事，並無影響咱家族和諧ê親密互動互助，人講「拍虎掠賊親兄弟」，兄弟叔孫若團結，to̍h-ē形成真大力量，bē-hō͘別人看輕。求真求善求傳承，向望逐家ē-tàng kā頂一輩ê是非誤解放水流，兄弟叔孫互動、互諒、互相sio-kēng支持，認真拍拚，歡喜過日，chiah是hō͘先人安歇上大ê安慰kap期待。祝福逐家快樂！祈求逐家平安！ 

朝宰>廷光>輝騰>志榮>正養>大毛>光振>平治 

                                                     Lah-jih蕭平治 寫tī 2013/11/12

讚