看相片回想人生_1959/8→1962/7中師51紀念冊(一)：

看相片回想人生_1959/8→1962/7中師51紀念冊(一)：
▲休學過後，重新ùi一年級讀起，hó-ka-tsài，阿爸已經知影我bueh轉去師範學校讀冊，將來bueh做老師。
9月1日轉來到學校，編入一年乙班學號8212，kā同學坦白休學原因，病情已經痊癒(tshuan-jú)bē穢--人，mā感謝同學諒解包容，ē-tit順序正常完成3冬學業，3年師範生活點點滴滴，簡要記錄tī畢業同學錄，經過53年歲月，tī tsia看相片回想人生，mā是kài心適kài有意義。
▲封面：烏tò͘紅絨布包裝冊皮。
台灣省立台中師範學校五一級同學錄  朱滙森題。
畢業日期1962/07/31，是中華民國五十一年七月三十一日。

▲目錄、校訓、校徽。

▲簡史 校旗：1923/民國12年成立，1960/民國49年9月升格師範專科學校。臺灣省立臺中師範學校。

▲台中師範學校 校歌：
*紀念冊版本：
美麗之島，婆娑之洋，吾校聳立，氣象輝煌；百年大計，澤披四方，陶鑄師資，代有賢良；光華復旦，主義宣揚，莘莘學子，校訓勿忘；砥礪學行，不息自強，為人師表，邦國之光。
*在校3年教唱版：改「玉山峰高，濁水流長」兩句，kài有在地味。
玉山峰高，濁水流長，吾校聳立，氣象輝煌；百年大計，澤披四方，陶鑄師資，代有賢良；光華復旦，主義宣揚，莘莘學子，校訓勿忘；砥礪學行，不息自強，為人師表，邦國之光。

▲朱滙森校長真有親切感，kah意親近學生，常利用班級自修時間kap學生phò-tāu，講古講人生道理。每禮拜一頭2節課延續前任黃校長規矩，聘請名人教授來演講。

▲前任校長黃金鰲較嚴肅，罕得kap學生開講，徐教官是伊ê助手，學校規矩交代徐教官to̍h處理kah好勢好勢。時常邀請教授名人來學校演講，每禮拜一頭2節課to̍h是攑椅仔去禮堂聽演講時間，得著真濟做人處事智識。(休學hit年ê校長)

▲敬愛ê師長：揀幾個較有記憶ê老師紹介。
*戴鎬東：教阮寫毛筆字攑筆『懸腕』方法，啥乜是中鋒、逆鋒、藏鋒。(休學hit年導師)
*劉志孝：導師，無為而治，放阮自由發揮，所以阮班特別活kioh。伊教「國語」課tsiâⁿ趣味，採用點名方式，叫學生家己唸家己ê姓名，有tîng-tâⁿ繼續唸，唸到老師滿意為止。輪著同學『陳春男』，3字發音包含ㄔkapㄋ，結果唸做「tshn̂g tshun lânㄘㄥ ㄘㄨㄣ ㄌㄢ」；『周照雄』koh-khah歹唸，「租走松ㄗㄛ ㄗㄠ ㄒㄧㄥ」，實在tsiâⁿ笑詼，結果阮ê北京語mā無較進步。
*王靜珠：教育輔導，真有愛心ê教育家，看待學生親像家己ê囝，bat去in-tau tuà暝，食老師煮ê早頓，綠豆牛奶糜(muâi)配饅頭。
*王之儀：健康衛生，真有愛心，看待學生親像家己ê囝。伊ê查某囝叫『小七/任素英』，附小試教ê學生，讀二年級，真古錐，時常去in眷村行踏。
*饒朋湘：教育心理，教冊足認真，偉大教育家。
*葛道明：參觀實習，少年老師，tshuā阮參觀試教，環島旅行，增加教冊功力增加教育智識。
*徐敏教官：認真負責軍人，有善良心腸，大嚨喉孔，卻是體諒學生愛護學生，破病時陣hō͘伊鼓勵關心真濟。
*呂佛庭：國畫，偉大畫家，修養足讚，無修伊ê山水畫真無彩。老師單身蹛學校宿舍，bat去伊ê房間，聽伊講伊ê畫開始進入抽象階段，kā宣紙坦橫舖tiàm桌頂，墨、筆準備好勢，開始靜坐(坐禪)，心中無意無念，等到一个時間點，目睭小可peh金，大毛筆搵淡墨tiàm紙面隨意畫隨意撇，然後宣紙掠坦直，直覺山水、花鳥抑是人物，決意了後，攑小毛筆搵烏墨，隨意點隨意撇，隨時一幅抽象國畫完成。
*林之助：西畫，東洋畫是伊專長。上伊ê課趣味輕鬆有內涵，得著真濟畫圖技巧、理論。老師是ná講ná畫，講煞畫完，隨了解老師leh講啥。伊講人ê標準體格是八頭身，畫一條直線平分八份，先畫一粒頭殼佔1份，看起來ná竹篙ná lò跤鬼，八頭身ná有可能是phiau-phiat體格？ná講ná畫，講煞畫完，「ua̋！莫怪西洋人體格tsiah-nī phiau-phiat英俊！」有一擺，拜一聽完教授演講，下晡第一節課，老師入門，白墨攑--leh，畫1粒頭殼，簡單喙目鼻，閣再喙下斗點幾若點，無夠半分鐘，學生同齊喝聲「侯潘，侯潘教授！」驚奇佩服寫tī面。
*陳朝陽：音樂，第一學期教阮風琴指法，檢定6曲算通過，第二學期愛ē-hiáu彈有伴奏30首囡仔歌，眾學生煩惱kah，單單我m̄驚，因為我有撇步，135、725、146倒手ê和音已經瞭解ē-hiáu應用，果然過關。真正bē博假博bô-khah-tsua̍h，此後風琴指法無koh進步，到今猶是「無師自通」hit幾步，怨嘆老師無認真教？怨嘆家己無骨力學？
*居葆輝：物理，有夠趣味有夠心適ê上課，老師物理學真飽，教冊心適活潑，該實驗一定無tshìn-tshài，比手話刀增加效果，學生足愛上伊ê課。有一擺我問老師一个戇問題，suah去hō͘我問倒--去：「老師，請問，天頂ê火金星，是星光走來hō͘我看--著，抑是我ê目睭走去kā伊看--著？」一時老師suah bē-hiáu應話。
*李存祿：地理，學生攏尊稱伊是「地怪」，上伊ê課需要先自修，課文內ê疑問做你問，問到無問題，換伊kā阮考試，真làu-khùi，見擺hō͘伊問--著攏零分。有一擺，伊問「台灣ê小麥是冬麥區抑是春麥區？」逐家回答伊攏無kah意，尾仔kō͘攑手表決，逐家攏贊成是冬麥區，單單我無攑手。老師問我答案kap理由，我講：「春麥區。」為啥乜？「因為台灣冬天氣候kap中國長城以南差不多，所以屬春麥區。」老師教ê地理屬自然地理，有一擺講著台灣ê『菠蘿』，伊to̍h喙笑目笑講：「原來台灣ê王梨是生tī樹仔尾頂！」害阮笑一下險險仔落下頦，老師掠林投果實是王梨--lah。
*楊振川：體育，老師是6人制排球ê推sak者，hit-tsūn ê排球時行9人制。
*金鴻儒老師單身tuà校舍，hit-tsūn時行ラヂヲ/rajio/收音機轉播籃球比賽，bueh睏進前，真濟學生tiàm窗仔門邊聽轉播。
*陳老師：教育概論，「我是高考及格」是老師自我紹介第一句話，m̄-tsiah逐家對伊印象無好，我想，伊是leh kā阮鼓勵，讀師範mā ē-tàng出脫，認真phah拚，高考及格to̍h ē使得轉來母校教冊。
*岳老師：教材教法，坐tiàm講台頂看冊唸課文hō͘阮聽，話母『這個 這個』特別濟，有同學bat kā算，一節課攏總講50幾擺。
*劉秀蓮曾碧雲：護士，tsiâⁿ負責任，對學生真親切，身體欠安hit-tsām，受in照顧真濟，時常拜托in注射ビタミン維他命綜合B。
*聽同學講ê：有兩个查某老師，一直交代女同學m̄-thang嫁hō͘男同學，看bē起做老師ê男同學。

19450300_四兄 ê修了證書kap思ひ出：

19450300_四兄 ê修了證書kap思ひ出：     Lah-jih_20150825
▲四兄ê畢業證書，已經保存70年久，猶原新tshak-tshak，表示四兄gua̋-nih寶貝tsit張文書。四兄出世佇日本時代，讀冊佇戰亂時期，ná讀ná覕防空豪，實在m̄-tsiâⁿ讀，m̄-tsiah大漢了後to̍h綴大兄去阿里山林場做集材工仔，扞機器、鉤柴、運搬、記賬攏ē-hiáu，是大兄放心ê助手。5个兄弟to̍h算四兄上古意老實，m̄-bat看伊kap人冤家相罵，bē-hiáu講白賊話，m̄-bat偏--人，除了pok薰以外，lim酒、跋筊是真罕得有--ē，食穿真tshìn-tshái，做人bē翹攲，人人好人人呵咾。因為有4位兄哥kap 4位阿嫂疼惜照顧，Lah-jih tsiah有才調佇社會徛起，做老師教育學生，兄哥疼小弟，小弟mā尊敬兄哥，5兄弟感情ê好，無人ē-tàng比並。今，四兄功德圓滿m̄ kap人間續緣，小弟珍惜tsit段因緣，永遠ē記得兄弟感情歡歡喜喜，願 四兄離苦無憂歡歡喜喜行向極樂世界ê彼爿岸。阿彌陀佛！(2014年8月23日農曆7月28日記念文)
▲四兄出世tī昭和七年(1932)，昭和二十年三月田中國民學校卒業，我出世tī昭和十六年(1941)，四兄加我九歲，伊國民學校卒業時，我猶未四足歲，米國B-29當leh爆擊掃射，五日節前一工ī--ā to̍h來往生，連做司公超渡功德都因為掃射煞來中斷，真正不幸bô-siá-sì ê年代。
讀過六年國民學校ê四兄，實在有夠頇慢，m̄-bat聽伊講過一句日本話，阿爸tī--leh ê時，to̍h bat按呢講：「講kah tsit-ê Kiâng--ē--ho͘ⁿh，有夠頇慢，讀六年冊，kan-nā bat-tī暗時叫伊起來放尿，眠眠kā我應一句 なりか？」
Tsit張 修了證書 除了色水變黃以外，kui張無缺角無bak烏假若新--e，ē-tàng了解四兄寶貴珍惜ê心思。

▲《思ひ出》：

這本卒業記念冊，四兄保存kah好勢好勢，驚做phah-m̄-kìⁿ，10外年前提出來hō͘我保存，ùi這本《思ひ出》ē-tàng hō͘咱想起70年前田中國民學校ê記智，kap我60年前印象精差無外濟，仝款校門，仝款教室，仝款辦公室，仝款禮堂，只是樹木有較大欉。

學校門tsiâⁿ媠，叫做まなびやの門，學校門正爿有3棟教室，包含現此時ê網球埕kap徛家厝；學校門入--去正對面是辦公室，辦公室兩爿lóng是教室；辦公室南爿一間福利社，koh過是禮堂，禮堂兩爿是教室；koh南爿是運動埕；運動埕東爿是魚池，西爿有xx室？南爿有兩棟教室，閣過to̍h是田地，校園不止仔闊。上南爿hit兩棟教室，1955年割hō͘ ta̋ⁿ成立ê田中初中做教室。

△冊皮：
皇紀二千六百五年 昭和二十年三月 田中國民學校
《思ひ出》(思想起 卒業紀念冊)
初等科第三十一回(5班)高科第二十一回(1班)
△這屆卒業生是日本教育上尾屆。

△學校門：山口校長先生、校旗、まなびやの門。

▲皇紀二千六百五年 昭和二十年三月，是1945年3月，已經是日本時代尾期，mā是皇民化ê尾聲，田中國民學校日本教育ê結束。

△方先生：教師名單kap寫真しゃしん[相片]

除了山口校長先生是內地日本人以外，台灣籍ê查埔老師有21个，查某老師有14个，改換日本名有12个。

我熟似ê老師有：魏朝其、黃木杞、黃龍江、蕭向西、陳百年、中山紘一(孫水波)、鄭來生、田川達三(陳允成)、陳時英、許金潭。

▲初等科第三十一回卒業有5班，計共查埔學生208人，查某學生95人，改換日本名有11人。ē-tàng看出斯當時男女教育ê差別是2：1。

一組男58；二組男62改日本名2；三組男61改日本名1；四組男27女33改日本名2；五組女62改日本名6。計共：男208女95改日本名11。

△初等科第六學年一組學生名單kap寫真しゃしん[相片]

△初等科第六學年二組學生名單kap寫真しゃしん[相片]

△初等科第六學年三組學生名單kap寫真しゃしん[相片]

第五排→第8个穿烏色是四兄蕭順強。我熟似--ē有：蕭賜源、林子昭、魏慶木、陳見仁、孫國華、蕭永賢。

△初等科第六學年四組學生名單kap寫真しゃしん[相片]

△初等科第六學年五組學生名單kap寫真しゃしん[相片]

▲高科第二十一回卒業1班，計共查埔學生49人，查某學生10人，改換日本名有4人。

△高等科第二學年學生名單kap寫真しゃしん[相片]

第五排→第五个是Chiu-á兄蕭有朋，穿烏色。

▲田中國民學校早期ê寫真しゃしん[相片]
Download：臺灣國定古蹟編纂研究小組（National Historic Monuments of Taiwan） 的相片
Tsit張相片ê年閣比《思ひ出》校門閣較早，形體仝款，只是樹木較細欉。圍牆頭前空地tú好是現此時徛家ê涼亭仔。

▲學校簡史：引用田中國小學校校刊的介紹
田中公學校創建於1914年（日大正3年），今年剛好創立滿第100週年。本校創立於民國三年四月一日。由二水公學校分教場正式獨立。定名為「田中央公學校」。校址設於田中鎮南路里現址。十年四月，改稱為「田中公學校」。十二年四月，增設高等科教育，廿八年四月，分設內灣分教場，卅年四月，內灣分教場獨立，本校改稱為「田中國民學校」，同時再於三潭地區分設「田中北國民學校」。

光復前歷任校長為杉本先生、今仁義記先生、市田清五郎先生、川村秀德先生、山口勝利先生。

卅四年十月，台灣光復，本校改稱「田中第一國民學校」。並廢除高等科教育。卅八年一月，附設幼稚園。卅九年九月，分設三安分校。四十二年九月，三安分校獨立為大安國民學校，而本校再度改稱為「田中國民學校」。五十七年八月，改革學制，實施九年國民教育，廢除附設幼稚園，校名亦改稱為「彰化縣田中鎮田中國民小學」。六十六年九月，設置特殊教育「啟智班」，七十二年九月，再附設幼稚園。七十九年九月，奉令附設「民眾補習教育」班，教育逾齡失學民眾之補習教育。八十一年八月，再於彰化少年輔育院附設「補校分校」，教育少年輔育工作，八十五年八月一日設置「資源班」。

看相片回想人生_1958/8→1959/8中師半冬+休學(下)：

看相片回想人生_1958/8→1959/8中師半冬+休學(下)：
▲人生苦慘ê遭遇，茫茫渺渺ê未來：
醫生斷定肺病第二期，無休學調養bē-suah-tit，轉來到厝，m̄知按怎調養？補營養？三頓是蕃薯簽飯配青菜鹹tuâ-á，補品免想，食藥要緊，醫生開ê藥方是INAH(Isoniazid)kap注射劑鏈黴素(Streptomycin)，注射費氣koh-tio̍h開錢，mā-ē驚人知，hit-tang-tsūn tì-tio̍h肺癆病是ē hō͘人驚惶ê慢性病，愈少人知愈好，kan-nā食藥仔to̍h好。
明明tī師範學校讀冊，為啥乜tī厝--裡luā-luā-sô？只好編故事：「ah tō 也suah m̄知進前開刀身體siuⁿ虛弱，tì-tio̍h神經痛--lah！」
按呢落--去 m̄是辦法，「規氣kap大兄來去楠仔仙溪靜養！」
楠仔仙溪是阿里山林場ê工作站，ùi塔塔加鞍部向南爿hit支山，大兄tī hia做集材工ê ku-lí-thâu[工頭]，除了林班食頭路人kap剉柴、集材工人以外，罕得人踏跤到。深山林內景緻súi，樹木草坪青phiàng-phiàng，天氣涼冷空氣新鮮(sin-sián)，無he齷齪鬧熱聲，暝--時tiām-tsih-tsih，真正是修身養性保養身體好所在。出外人phah拚做苦工，營養一定愛有夠，所以福食魚臊一定bē-tàng liám，大嫂是火頭軍，除了三頓koh-ē拴點心，食好做輕可，kan-nā幫忙大嫂hiâⁿふろ/風呂火以外，to̍h是四界散步，peh懸peh低，無夠兩kó͘月，飼kah膨皮膨皮，精神好體能mā好。
有一工，大兄講：「Jih--è！tuè大兄來去做工，工人ē教你按怎做。」hit-tsūn四兄扞機器(ke-khì)，我去山頂tàu縛柴鉤柴，其實是做雜錯空課，食力危險--è無hō͘我做，我是kan-nā tàu喝聲kap抾柴烘べんとう 飯包，做個外月，換去kā大兄ê朋友做流籠工仔，仝款無做粗重危險空課，原來是大兄bueh鍛練小弟ê身體kap順紲tàu趁錢做學費。山內生活將近有半冬，mā有東埔、阿里山來來去去，行山路peh山嶺，kài-sîng內山人kài-sîng做工仔人，tsit中間mā有厝--裡轉來師範同學關心ê批信kap相片，實在tsiâⁿ期待學生生活閣再來。
▲1959，8月7日hit暝落大雨，落到天光猶leh落，逐家停工tiàm工寮歇睏，有人siàng大眠，有人圍tiàm火爐仔邊phò-tāu，有人耍笑仔pua̍h tsa̍p-hô͘(四色牌)，雨 一直落，厝頂杉仔瓦phi̍h-pho̍k-tuāⁿ，ná像落冰角，連講話tō-tio̍h大聲，落到hit下晡koh落到一半暝猶leh落，吵人眠，「看扮勢，明仔再又閣著停工。」果不其然(kó-put-kî-jiân)，隔轉工，厝頂雨聲猶原phi̍h-phe̍h叫，徛tiàm門喙tsi̍t-ē看，tsi̍t-phiàn白茫茫 無看著對面山，he雨水kài-sîng天頂破孔河溪水潑落地，to̍h按呢連紲落3暝3日，心內想，定著ē做大水，雄雄想起3年前，大兄tshuā姊夫、我kap輝虎來歇熱，tuà-tī下爿寮仔，tshàu-khiáu tn̄g-tio̍h萬達風颱風雨tsâng規暗，因為山水tshū山造成土石流，差無幾尺to̍h衝著4棟柴枋寮仔，險險tshiâng對坑仔底，風雨無情是天做代，hó-ka-tsài。
雨 過 天 清，大兄、工人saⁿ-kap巡現場，tshū山真嚴重，機器、鉛索仔受災殃，鐵枝路lóng是塗石，流籠bē-ti̍t作業，探聽消息，知影土場到東埔自動車路全空隙，東埔線、阿里山已經bē通，損失慘重，只有暫時停工，tang時開工bē按算，有人想bueh轉，大兄交代：「Jih--è，你tuè如仔兄轉--去，提早轉去準備讀冊。」
1暝2工，行12Km+18Km+60Km來到竹崎，ùi楠仔仙溪到東埔到阿里山到竹崎，踏過無數枕木仔(tsám-bo̍k-á)，hāⁿ過算bē了柴橋，nǹg過阿里山線大部份磅空，盤過鐵牛仔車、バス(公共汽車)kap火車，半路中，聽人hán-huah，這擺ê八七水災tsiâⁿ嚴重，濁水溪水phuâⁿ過鐵桶橋，有人tī溪墘leh ko͘身屍，恐怖koh煩惱，煩惱厝內平安--bò͘，煩惱半年無看ê阿爸勇健--bò͘。
轉到崁頂庄，踏入門，發現阿爸倒tī眠床，虛弱無元氣：「許厝寮，恁三姑一家死5个，有夠苦憐！」阿爸在來身體to̍h無好，不sám時khēⁿ-khēⁿ嗽嗽，tsit-mái koh煩惱三姑往生，suah愈嗽愈嚴重，ē kha̍k血，食藥注射無功效，m̄知按怎tsiah好。咱人7月20 hit早起，二兄叫我去街路醫館提藥，步輦去步輦轉--來，10點外轉來到厝，阿爸已經搬舖tī大廳(公媽廳)，一時知覺「ná-ē tsiah歹命」。
Hó-ka-tsài，阿爸知影我bueh復學轉去讀冊將來做老師，9月1日轉來到學校，編入一年乙班學號8212，重新開始，感謝新同學無棄嫌，包容有病休學ê舊同學，mā感謝家己坦白無掩崁病情，不過特別強調我致--著--è是非開放性肺結核，bē穢--人，tsit-mái mā已經痊癒(tshuan-jú)好了離。
請來參觀指教：〈阿里山縣長〉 約8000字。http://chhantionglang.blogspot.tw/2012/11/19580800-20111109lah-jih.html
△休學後轉來學校看運動會kap同學翕相。

△同學寄去hō͘我ê相片，tī山腳陳春男in-tau。

古物仔_囡仔時代記智篇_囡仔尪仔跳跳弓仔：陳慶芳收藏/蕭平治翕相

古物仔_囡仔時代記智篇_囡仔尪仔跳跳弓仔：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活teh to̍h有意義；有古物ê歷史，少年人to̍h-ē感恩siàu念。】
▲囡仔尪仔：塑膠製品出現市場了後，一般來講，真正是囡仔ê福氣，各種造型ê囡仔尪仔，有人形、動物、まんが 漫畫人物，應有盡有。

△Tsit-kâi ē振動phah鼓，內面可能是張發條。

▲跳跳弓仔：
Tsit種tshit-thô-mi̍h 真好耍，ē-tàng伸勼弓仔(彈簧)，ē使得khǹg tī樓梯頭，親像ún痀仔蟲[尺蠖]行路按呢，hō͘伊家己落樓梯，足心適。mā ē-tàng用手幌，產生橫波(huâiⁿ-pho)、縱波(tshiòng-pho)ê現象，雖罔多數囡仔m̄知伊ê原理，若bat耍過ê囡仔，將來讀高年級抑是國中時陣，老師教著橫波(huâiⁿ-pho)、縱波(tshiòng-pho)ê時陣，一定加真快瞭解。

看相片回想人生_1958/8→1959/7中師半冬+休學(上)：

看相片回想人生_1958/8→1959/7中師半冬+休學(上)：
▲人生充滿「不定數」：
為著m̄-bat去台中，為著bueh去台中tshit-thô，hō͘同學招去考台中師範學校。
貪著讀冊免錢，出業一定有頭路，m̄免kā人拜托，阿爸自按呢決定「去讀師範，mài koh考高工。」
師範學校決定一生教冊做烏枋杙仔，歡喜服務43冬。
▲斯當時高中、高職無聯合招生，lóng是各校家己考試，7月中高中，8月初師範，8月底高職，因為m̄敢siàu想讀大學，所以選擇目標是高工，想講將來kap厝邊輔博--è仝款做工程師，m̄-tsiah 8月初，為著台中tshit-thô，hông招去考師範。
ē記得考場tī大禮堂，考啥乜已經無記智，m̄-koh數學hit科有一題到今猶原記牢牢(kì-tiâu-tiâu)。
*甲乙丙三鄉鎮形成一个直角三角形，甲鎮到乙鎮3公里，乙鎮到丙鎮4公里，請問甲鎮到丙鎮幾公里？
ua̋！piàng--à，這是啥乜怪題？老師ná-ē m̄-bat教--過？經過20分鐘久，除了這題bē-hiáu，其他已經寫好勢，著koh想看覓，因為kha-tshng-phé(尻川䫌)倚糞口所在生外痔，坐孤爿，坐bē-tiâu椅，想bueh 20分鐘，無愛koh想，根熟(kin-sio̍k)無想bueh做老師，tsū-án-ni kā考卷交hō͘監考老師，行出門喙，ah！「甲鎮到丙鎮是5公里。」ua̋！現了10分！畢氏定理，3x3+4x4=5x5。tsiah-ní簡單，ná-ē bē-hiáu？怪奇？ná-ē按呢？到今猶原不明不白，啥乜原因造成？
▲痔瘡需要開刀，he醫生謝頂先生，叫我坐tiàm大板椅，尻脊骿kik曲痀曲痀，伊攑4-5公分長注射針ùi腰部龍船骨一直ui一直鑽，1支曲去換1支，連紲ui 3支，疼kah流凊汗，無法度半身麻醉，換全身麻醉，伊提1-kâi喙掩，om-tiàm喙kap鼻孔，教我綴伊唸，伊tsi̍t我mā tsi̍t，伊nō我to̍h nō，按呢一直勻勻仔唸，鼻著he味hiang-hiang，可能是乙醚，記得ná算ná來ná慢，大約算到 70幾ê時陣，我ê喙peh--leh peh--leh，已經無聲說⋯眠眠中，尻川ná像有物件leh振動⋯⋯
一醒精神，人已經倒佇病房眠床頂，尻川痛痛m̄敢振動，阿爸講「手術好勢--à！」
▲轉來厝--裡靜養，kā人借一台ラヂヲ/rajio/收音機陪伴，主要是bueh聽「放榜」消息。hit工theⁿ-tī桂竹仔撐椅聽放榜，聽著『蕭平治』thiòng一下，趕緊peh起來kā阿爸講：「阿爸！我考tiâu師範學校--ā！」阿爸kan-nā應一聲「hò͘！」⋯⋯
「Jih--è！m̄免koh考高工--a，讀師範學校to̍h好！」原來阿爸去問厝邊阿紗仔伯kap慶樑--ē，in kā阿爸講：「恁Lah-jih--è真gâu，he師範出業ē-tàng做老師，叫做訓導，日本時代是有一支刀thang揹tī身軀，是文官職--ō͘。」
「咱也無錢thang hō͘伊讀冊。」
「做你免煩惱，食、蹛、穿、冊錢攏總m̄免錢。」
「抑咱也無hit-lō勢面揣著頭路。」
「公費kā伊栽培，政府頭路kā伊拴便便，著去讀，m̄-thang失去機會。」
To̍h按呢決定一生hō͘人叫做『老輸』。
▲搬1-kâi柴箱、攑1隻柴椅kap 捾1跤行李箱，三兄陪我歡歡喜喜報到完畢，正式tsiâⁿ做 省立台中師範學校學生，看he三層樓校舍súi-súi秀面kap lò-lò大王椰子樹，此去3年to̍h是bueh tī tsia讀冊做老師，歡喜tī心內。註冊結果，蕭平治學號7117，編tī一年甲班，安排tī學生宿舍第二棟第一間(第一棟是女生宿舍)。
記得早起5點半「tā ti tà tā，ta ti ta tā，ta tā tā ti，ta tà tà tā」起床，6點教室早自修，頂晡、下晡上課，暗時koh-tio̍h 2點鐘自修，9點半關電火『睡覺』。囡仔人tng tiōng眠，早起時ê軍用喇叭聲，聽著ke̍h耳孔毛「bē-tín bé-tāng」實在真m̄-guān精神，暗時電火tshun一絲仔暗淡路燈，蠓罩內著ki-ki-kā-kā像鳥仔leh歇岫，教官巡視一下到，著起床、著tiam̄-tiam̄睏，無人敢tèⁿ-siáu。
Hit-tsūn校長黃金鰲，看--起來人hm̍h-hm̍h，罕得聽伊講話，罕得看伊kap人拍招呼，伊管理學校ê步數大概是用「頂司管下司，鋤頭管畚箕」tsit步，學生規矩徐教官負責to̍h OK，若有狀況交代一聲，古意ê徐敏教官to̍h拚kah汗流sám滴，有喙講到無nuā，約束學生囡仔著守規矩，koh利用暗點名步數kā學生灌輸一寡觀念，koh唱中國青年救國團團歌「時代在考驗著我們，我們要創造時代，革命的青年大家團結一起來。反侵略，反殘暴，掀起青年救國的高潮；驅俄寇，殺朱毛，誓復國仇救同胞。團結奮鬥，服從領袖，重建三民主義新中國，讓青天白日大地普照。」有時念經半點鐘，kài-sîng軍事教育。
▲阿爸貪著讀冊免錢叫我讀 師範學校，我是貪著羹頓好食 suah bē記得趣味是高工。
團體蹛宿舍，生活淡薄仔sîng軍人，信號兵歕喇叭，上好聽是食飯號，上討厭是叫精神；1間房間2頂總舖睏14人，棉被摺四角四角像豆乾，食飯碗箸、面巾排tiàm壁邊四是四是，鞋、拖仔、面桶囥tī眠床跤真規矩；食飯時間tit-bueh到，輪值2人量早phâng碗盤去準備，食飯時間一下tân，各人攑箸kap湯匙，挨挨陣陣去飯廳，ua̋！白米飯、虱目魚、豆腐湯，逐項mā kah意，先用目睭看，椅著坐hō͘正，等待pi-pi-á聲，一聲『開動』tsiah ē使得開始，罕罕有人嫌歹食，咱是散赤庄腳戇囝，kan-nā白米飯kap饅頭to̍h ē使得khian kah飽，o-ló tī心內，想講tse麻虱目若ē-tàng tsah轉去hō͘阿爸食，m̄知bueh jua̋歡喜--leh。

▲有一擺集合tī大樓後壁草埔暗點名，大隊長kā教官報告人數了後，教官叫阮『蹲下』聽伊講話，古意人siuⁿ過老實聽話有時較剋虧，khû--leh聽半點鐘tsiah叫阮peh起來行禮解散，跤骨m̄-nā麻，suah無氣力tang peh--起來。跛--leh跛--leh轉去宿舍褪鞋tsiūⁿ眠床，跤骨ná-ē tsiah無力？褪1雙鞋著5分鐘，因為跤攑bē--起來，需要用手攑，褪襪仔 跤蹄bē振動，著用手tàu跤手。轉去田中hō͘醫生看，講是しんけいつ神經疼，原來是痔瘡手術流血流siuⁿ濟，營養不良造成，欠ビタミン/bitamin/維他命所致，m̄-tsiah勞煩三兄送藥來到學校幾若擺，感謝學校醫務室2位護士小姐疼痛，時常kā我注射koh安慰我，hit-tsām身懸159cm，體重43kg，真正瘦koh薄板。

▲歡歡喜喜leh讀冊，期待將來做老師，siáⁿ知一聲脆雷khà破美夢，學校通知有「TB」，需要複診kap醫治，台中檢查無通過，koh去嘉義複檢確定是はいけっかく/haikekkaku/肺結核第二期，不得已暫時休學，等待醫好tsiah-koh轉--來。

△師範生相當高中生，戴高中帽，帽花寫 學生，領章寫 中師，khah-khih色制服，頭前頷領內一塊布條tsa̍h內衫，tsiâⁿ特別，倒爿衫袋掛名牌，有學號，學號7117，民國47年入學，第一班甲班，17號。

△白色熱天衫，胸前學號kō͘繡線綉，雖罔無剃光頭，規定bē-sái-tsit留長頭毛，著等3年下學期tsiah ē-sái-tsit留長頭毛。

講著綉學號，倩人綉著愛錢，阿嫂ē-hiáu thīⁿ衫m̄-bat綉字，想講較早初中學號mā是家己綉，to̍h利用時間tī火車內，1針1針thīⁿ，1針tōng--落去，1針tshng過來，koh-iā bē-bái，to̍h是有tsit-ê興趣，m̄-tsiah後--來學ē-hiáu做衫褲。歹命囝有影較tsa̍p-tshap。

△這是學校買ê明信片，m̄是bueh寄批，是bueh hō͘阿爸、阿兄、阿嫂看，師範學校to̍h是tsiah-nī大間tsiah-nī súi，我tī tsia讀冊，從來bueh做老師。

△日治時期臺中師範學校舊照：Download FB台灣國定古蹟編篡研究小組 相片

△昭和5年(1930)臺中師範學校舊照：Download FB台灣國定古蹟編篡研究小組 相片